Kamoo o ka Lebeletšanago le go Nyama

NA O nyamile? Mehleng ye ya go se kgonthišege le ya mathata, batho ba bantši ba nyamile. Ba bangwe ba nyamile ka gobane ba sa šome. Ba bangwe ba lebeletšane le ditla-morago tša kotsi. Le gona go na le ba bangwe bao ba katanago le mathata a lapa, bolwetši bjo bošoro goba maikwelo a go ba noši.

Ge e ba o nyamile, o ka hwetša kae thušo? Lefaseng ka bophara ba dimilione ba hweditše khomotšo ka go bala Lentšu la Modimo e lego Beibele. Ba kgonthišeditšwe ke mantšu a moapostola Paulo yo a itšego: “A xo rêtwê Modimo, Yêna Tata xo Mong wa rena Jesu Kriste, Yêna Radikxauxêlô, Modimo wa khomotšô yohle, E a re homotšaxo mahlokong a rena ohle.” (2 Ba-Korinthe 1:3, 4) Ke ka baka la’ng o sa bale se le ditemana tše dingwe tša Beibele ka Beibeleng ya gago? Go dira bjalo, go tla go ‘homotša pelong, o kgone go dira tše botse.’—2 Ba-Thesalonika 2:17.

Thušo ya go lebeletšana le go nyama e ka hwetšwa gape ka go gwerana le bao ba hlankelago Jehofa. Diema 12:25 (PK) e re: “Manyami a pelo a imeletša motho fase; eupša lentšu la botho le thabiša pelo.” Ge re e-ba gona dibokeng tša Bokriste, re kwa ka “lentšu la botho,” leo le ‘natefelago pelo, le tsošago le mmele.’ (Diema 16:24) Ke ka baka la’ng o sa be gona sebokeng Holong ya Mmušo ya Dihlatse tša Jehofa gore o bone ka noši mafelelo a kgothatšago ao pokano e bjalo e ka bago le wona go wena?

O ka holwa gape ke matla a thapelo. Ge o ikwa o imelwa ke dipelaelo tša bophelo, botša “Mokwi wa dithapêlô” maikwelo a gago a tseneletšego. (Psalme 65:2) Mmopi wa rena, Jehofa Modimo, o re kwešiša gakaone go feta kamoo rena re ikwešišago ka gona. Re ka ithekga ka thušo ya gagwe. Lentšu la gagwe le re holofetša gore: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.” (Psalme 55:22) Ee, “baholofedi ba Morêna bôná ba fiwa matla a mafsa.”—Jesaya 40:31.

Jehofa Modimo o re file dithušo tše matla tšeo di ka re thušago go lebeletšana ka katlego le go nyama. Na o tla di diriša?