Neang Modimo Letago “Ka Molomo O Tee”

“Modimo Tata xo Mong ’a rena Jesu Kriste Le Mo rêtê . . . ka molomo o tee.”—BA-ROMA 15:6.

1. Ke thuto efe ya mabapi le go rarolla go se swane ga dikgopolo yeo Paulo a ilego a e ruta badumedi-gotee le yena?

GA SE Bakriste ka moka bao ba dirago dikgetho tše di swanago goba bao ba ratago dilo tše di swanago. Lega go le bjalo, Bakriste ka moka ba swanetše go sepela ka botee tseleng e išago bophelong. Na seo se a kgonega? Ee, ge e ba re sa dire gore ditaba tše dinyenyane e be tše dikgolo. Yeo ke thuto ye moapostola Paulo a ilego a e ruta badumedi-gotee le yena lekgolong la pele la nywaga. O ile a hlalosa bjang ntlha ye ya bohlokwa? Le gona re ka diriša bjang keletšo ya gagwe e buduletšwego lehono?

Bohlokwa bja Botee bja Bokriste

2. Paulo o ile a gatelela bjang go nyakega ga botee?

² Paulo o be a tseba gore botee bja Bokriste bo bohlokwa, gomme o ile a nea keletšo e botse bakeng sa go thuša Bakriste gore ba kwane ka lerato. (Ba-Efeso 4:1-3; Ba-Kolose 3:12-14) Lega go le bjalo, ka morago ga go hloma diphuthego tše dintši le go etela tše dingwe ka lebaka la ka godimo ga nywaga e 20, o be a tseba gore go kgomarela botee e ka ba tlhohlo. (1 Ba-Korinthe 1:11-13; Ba-Galatia 2:11-14) Ka go rialo, o ile a kgothaletša badumedi-gotee le yena bao ba bego ba dula kua Roma gore: ‘Eka Modimo yena mong wa tiišo le khomotšo a ka dira gore re rete Modimo Tatago Mong a rena Jesu Kriste ka pelo-tee le ka molomo o tee.’ (Ba-Roma 15:5, 6) Lehono, le rena ka mo go swanago re swanetše go nea Jehofa Modimo letago “ka molomo o tee” bjalo ka sehlopha seo se lego boteeng sa batho ba gagwe. Re šoma bjang tabeng ye?

3, 4. (a) Bakriste ba kua Roma ba be ba e-na le ditlogo dife tšeo di sa swanego? (b) Bakriste ba kua Roma ba be ba ka kgona bjang go hlankela Jehofa “ka molomo o tee”?

³ Bakriste ba bantši kua Roma e be e le bagwera ba kgaufsi ba Paulo. (Ba-Roma 16:3-16) Gaešita le ge ditlogo tša bona di be di sa swane, Paulo o ile a amogela bana babo ka moka e le “baratiwa ba Modimo.” O ngwadile gore: “[Ke] leboxa Modimo wa-ka ka Jesu Kriste xe ke bôna lena bohle, tumêlô ya lena xe e bolêlwa mo xo fêla lefaseng.” Go molaleng gore ba-Roma ba be ba bea mohlala ka ditsela tše dintši. (Ba-Roma 1:7, 8; 15:14) Ka nako e swanago, ditho tše itšego tša phuthego di be di e-na le dikgopolo tše di sa swanego ditabeng tše dingwe. Ka ge Bakriste lehono ba e-tšwa ditlogong le ditšong tše di fapa-fapanego, go ithuta keletšo e buduletšwego ya Paulo ya mabapi le kamoo go ka swaraganwago ka gona le go se swane ga dikgopolo go ka ba thuša go bolela “ka molomo o tee.”

⁴ Kua Roma go be go e-na le badumedi ba ba-Juda le ba ba-Ntle. (Ba-Roma 4:1; 11:13) Go bonagala Bakriste ba bangwe ba ba-Juda ba sa ka ba kgona go kgaotša go latela mekgwa e itšego yeo ba bego ba e latela ka tlase ga Molao wa Moše, gaešita le ge ba be ba swanetše go ba ba ile ba lemoga gore mekgwa e bjalo e be e se bohlokwa bakeng sa phološo. Ka lehlakoreng le lengwe, Bakriste ba mmalwa ba ba-Juda ba ile ba amogela gore sehlabelo sa Kriste se ba lokolotše dithibelong tšeo ba bego ba di latela pele ba e ba Bakriste. Ka baka leo, ba ile ba fetoša e mengwe ya mekgwa ya bona ya motho ka noši gotee le ditšo tše dingwe. (Ba-Galatia 4:8-11) Lega go le bjalo, go etša ge Paulo a bontšhitše, ka moka e be e le “baratiwa ba Modimo.” Ka moka ga bona ba be ba ka tumiša Modimo “ka molomo o tee” ge e ba ba be ba kgomaretše mokgwa wa go lebelelana ka boemo bjo bo nepagetšego bja kgopolo. Le rena lehono re ka ba le dikgopolo tše di sa swanego ditabeng tše itšego, ka gona re swanetše go hlahloba ka kelohloko kamoo Paulo a hlalosago  molao woo wa motheo o bohlokwa ka gona.—Ba-Roma 15:4.

“Amoxêlanang”

5, 6. Ke ka baka la’ng kua phuthegong ya Roma go be go e-na le dikgopolo tše di sa swanego?

⁵ Lengwalong la gagwe leo le yago go ba-Roma, Paulo o bolela ka boemo bjoo go bjona dikgopolo di bego di sa swane. O ngwala gore: “E mongwê ó dumêla xo ja tšohle; mofokodi ó fo ja merôxô.” Ke ka baka la’ng go be go le bjalo? Ge e le gabotse, ka tlase ga Molao wa Moše, nama ya kolobe e be e le sejo seo se sa amogelegego. (Ba-Roma 14:2; Lefitiko 11:7) Lega go le bjalo, Molao woo o be o se sa šoma ka morago ga ge Jesu a hwile. (Ba-Efeso 2:15) Ke moka, nywaga e meraro le seripa ka morago ga lehu la Jesu, morongwa o ile a botša moapostola Petro gore go ya ka pono ya Modimo ga go na dijo tšeo di swanetšego go lebelelwa e le tše di šilafetšego. (Ditiro 11:7-12) Ba naganne ka dintlha tše, Bakriste ba bangwe ba ba-Juda ba ka ba ba ile ba nagana gore ba ka ja nama ya kolobe—goba ba thabela dijo tše dingwe tšeo di bego di ileditšwe ka tlase ga Molao.

⁶ Lega go le bjalo, yona kgopolo yeo ya go ja dijo tšeo kgale di bego di lebelelwa di sa hlweka mohlomongwe e ka ba e be e le e hlaswegago go Bakriste ba bangwe ba ba-Juda. Batho ba bjalo bao ba kgopišegago gabonolo mohlomongwe ba ka ba ba ile ba fo ikwa ba kgopišwa ke go bona Bakriste-gotee le bona ba ba-Juda ba e-ja dijo tše bjalo. Go feta moo, Bakriste ba itšego ba ba-Ntle, bao mohlomongwe setlogo sa bona sa bodumedi le ka mohla se bego se sa akaretše dikiletšo tša dijo, ba ka ba ba ile ba makatšwa ke gore motho le ge e le ofe a ka tsoša kgang ka taba ya dijo. Go ba gona, e be e se phošo gore motho yo mongwe a pheme go ja dijo tše itšego, ge feela a be a sa gapeletše gore go se je dijo ka tsela e bjalo go be go le bohlokwa bakeng sa phološo. Lega go le bjalo, dikgopolo tše di sa swanego di ka ba di ile tša bešeletša gabonolo mollo wa ngangišano ka phuthegong. Bakriste ba kua Roma ba be ba tla swanelwa ke go ela hloko gore go se swane mo go bjalo ga dikgopolo go be go sa ba thibele go nea Modimo letago “ka molomo o tee.”

7. Ke dikgopolo dife tše di sa swanego tšeo di bego di le gona tabeng ya go boloka letšatši le le kgethegilego beke e nngwe le e nngwe?

⁷ Paulo o nea mohlala wa bobedi ka gore: “E mongwê ó bôna letšatši le lengwê è le le lexolo; e mongwê a tla a re matšatši a a lekana.” (Ba-Roma 14:5a) Ka tlase ga Molao wa Moše, go be go se na  modiro o swanetšego go dirwa ka Sabatha. Gaešita le go tšea maeto go be go ileditšwe ka go tia ka letšatši leo. (Ekisodo 20:8-10; Mateo 24:20; Ditiro 1:12) Lega go le bjalo, ge Molao o be o fedišitšwe, dithibelo tšeo e ile ya ba tše di fetilwego ke nako. Go sa dutše go le bjalo, Bakriste ba bangwe ba ba-Juda ba ka ba ba ile ba ikwa ba sa lokologa mabapi le go dira modiro le ge e le ofe goba mabapi le go sepela leeto le letelele ka letšatši leo nakong e fetilego ba bego ba le lebelela e le le lekgethwa. Gaešita le ka morago ga ge e bile Bakriste, ba ka ba ba ile ba beela letšatši la bošupa ka thoko bakeng sa merero ya dilo tša moya feela, gaešita le ge go ya ka pono ya Modimo Sabatha e be e se sa šoma. Na ba be ba le phošo ka go dira bjalo? Aowa, ge feela ba be ba sa gapeletše gore go boloka Sabatha go be go nyakwa ke Modimo. Ka baka leo, ka baka la go naganela matswalo a bana babo ba Bakriste, Paulo o ngwadile gore: “A motho a tsebê se a se kxodilwexo è le nnete.”—Ba-Roma 14:5b.

8. Gaešita le ge ba be ba ka bontšha go naganela matswalo a ba bangwe, ke’ng seo Bakriste ba kua Roma ba bego ba sa swanela go se dira?

⁸ Lega go le bjalo, le ge a be a kgothatša bana babo ka borutho gore ba se felele pelo bao ba bego ba tshwenywa ke ditaba tša letswalo, Paulo o ile a sola ka matla bao ba bego ba leka go gapeletša badumedi-gotee le bona go kwa Molao wa Moše e le gore ba phologe. Ka mohlala, mo e ka bago ka 61 C.E., Paulo o ile a ngwala puku ya Ba-Hebere, e lego lengwalo le matla le le yago go Bakriste ba ba-Juda leo le hlalosago ka mo go kwagalago gore go kwa Molao wa Moše go be go se na mohola ka gobane Bakriste ba be ba e-na le kholofelo e phagamego yeo e theilwego sehlabelong sa Jesu sa topollo.—Ba-Galatia 5:1-12; Tito 1:10, 11; Ba-Hebere 10:1-17.

9, 10. Bakriste ba swanetše go phema go dira’ng? Hlalosa.

⁹ Bjalo ka ge re bone, Paulo o gatelela gore go dira dikgetho tše di fapa-fapanego ga se gwa swanela go bea botee kotsing ge feela go sa akaretšwe go tshelwa mo go lego molaleng ga melao ya motheo ya Bokriste. Ka baka leo, Paulo o botšiša Bakriste ba matswalo a fokolago gore: “O re’ng xe O ahlola ngwan’eno?” Le gona o botšiša bao ba tiilego (mohlomongwe bao matswalo a bona a bego a ba dumelela go ja dijo tše itšego tšeo di bego di ileditšwe ka tlase ga Molao goba go šoma mešomo ya boiphedišo ka Sabatha) gore: “O re’ng O nyatša wa xeno?” (Ba-Roma 14:10) Go ya ka Paulo, Bakriste bao ba nago le matswalo a fokolago ba swanetše go phema go ahlola bana babo bona bao ba nago le pono e bulegilego. Ka nako e swanago, Bakriste bao ba tiilego ga se ba swanela go nyatša bao matswalo a bona a sa dutšego a fokola dikarolong tše itšego. Ka moka ba swanetše go hlompha maikemišetšo a nepagetšego a ba bangwe gomme ba se ke ‘ba nagana kudu ka bona ka noši go feta ka mo go swanetšego.’—Ba-Roma 12:3, 18.

¹⁰ Paulo o hlalositše pono e leka-lekanego ka tsela ye: “E a jaxo a se kê a nyatša eo a sa jexo. E a  sa jexo a se kê a ahlola eo a jaxo; hleng Modimo ó mo amoxetše.” Go oketša moo o re: ‘Kriste o re amogetše e le go leboga Modimo.’ Ka ge bobedi ba ba tiilego le ba ba fokolago ba amogelega go Modimo le go Kriste, re swanetše go ba le boemo bjo bo swanago bja kgopolo gomme re ‘amogelaneng.’ (Ba-Roma 14:3; 15:7) Ke mang yo a ka ganetšanago le seo ka mo go nepagetšego?

Lerato la Borwarre le Tšweletša Botee Lehono

11. Ke boemo bofe bja moswana-noši bjo bo bego bo le gona mehleng ya Paulo?

¹¹ Lengwalong la gagwe leo le yago go ba-Roma, Paulo o be a bolela ka boemo bja moswana-noši. Jehofa o be a sa tšwa go fediša kgwerano e nngwe gomme a hlomile e mpsha. Ba bangwe ba be ba thatafalelwa ke go tlwaelana le kgwerano e mpsha. Boemo bjo bo swanago tlwaa le bjo ga bo gona lehono, eupša ka dinako tše dingwe go ka rotoga ditaba tše di swanago le bjona.

12, 13. Ke maemo afe a mangwe ao go ona Bakriste lehono ba ka bontšhago go naganela matswalo a bana babo bona?

¹² Ka mohlala, mosadi yo e lego Mokriste a ka ba a kile a ba setho sa bodumedi bjo bo bego bo gatelela gore motho a apare le go itokiša ka tsela yeo e sego ya go ikgabiša. Ge a amogela therešo, a ka hwetša go le thata go amogela kgopolo ya gore ga se mo go iletšwago go apara diaparo tša bothakga le tšeo di nago le mebala-bala mabakeng a swanetšego goba go diriša ditlolo tša go ikgabiša ka tsela e lekanetšego. Ka ge go se na molao wa motheo wa Beibele o akaretšwago, e ka se be mo go swanetšego gore motho le ge e le ofe a leke go kgodiša mosadi yoo wa Mokriste gore a gobatše letswalo la gagwe. Ka nako e swanago, o lemoga gore ga se a swanela go sola basadi ba Bakriste bao matswalo a bona a ba dumelelago go diriša dilo tše bjalo.

¹³ Ela hloko mohlala o mongwe. Monna yo e lego Mokriste a ka ba a godišeditšwe tikologong yeo go yona go dirišwa ga dino tše di tagago go bego go sa dumelelwe. Ka morago ga go hwetša tsebo ya therešo, o ithuta pono ya Beibele ya gore morara goba beine ke mpho e tšwago go Modimo gomme e ka dirišwa ka tekanyetšo. (Psalme 104:15) O amogela pono yeo. Lega go le bjalo, ka baka la setlogo sa gagwe, o kgetha go phema dino tše di tagago ka mo go feletšego, eupša ga a swaye phošo bao ba di dirišago ka tekanyetšo. Ka go rialo, o diriša mantšu a Paulo ao a rego: “A re phexeleleng tše re kaxo khutšišana ra axišana ka tšôna.”—Ba-Roma 14:19.

14. Ke maemong afe ao go ona Bakriste ba ka dirišago seo se bolelwago ke keletšo ya Paulo e yago go ba-Roma?

¹⁴ Go rotoga maemo a mangwe ao a nyakago go dirišwa ga seo se bolelwago ke keletšo ya Paulo e yago go ba-Roma. Phuthego ya Bokriste e dirilwe ka batho ba bantši, gomme ba rata dilo tše di sa swanego. Ka baka leo, ba ka dira dikgetho tše di sa swanego—ka mohlala, tabeng ya moaparo le go itokiša. Ke therešo gore Beibele e nea melao ya motheo e kwagalago yeo Bakriste ka moka ba botegago ba swanetšego go e latela. Ga go le o tee wa rena yo a swanetšego go apara diaparo goba go itokiša meriri ka mokgwa o sa tlwaelegago goba o sa leka-lekanago goba woo o re tswalanyago le dihlopha tše di sa rategego tša lefase. (1 Johane 2:15-17) Bakriste ba gopola gore ka dinako ka moka, gaešita le dinakong tša ge ba iketlile, ke badiredi bao ba emelago Mmuši wa Legohle. (Jesaya 43:10; Johane 17:16; 1 Timotheo 2:9, 10) Lega go le bjalo, dibopegong tše dintši go na le dikgetho tše di fapa-fapanego tšeo di amogelegago bakeng sa Bakriste. *

Phema go Kgopiša ba Bangwe

15. E le go hola bana babo, ke neng moo Mokriste a ka phemago go diriša ditshwanelo tša gagwe?

¹⁵ Go na le molao wa motheo wa mafelelo o bohlokwa woo Paulo a re hlokomedišago wona keletšong ya gagwe e yago go Bakriste ba kua Roma. Ka dinako tše dingwe, Mokriste yo a nago le letswalo le le tlwaeditšwego gabotse a ka kgetha gore a se dire kgetho yeo a bonago e se na phošo. Ka baka la’ng? Ka gobane o lemoga gore go phegelela ga gagwe tsela e itšego go ka gobatša ba bangwe. Re swanetše go dira’ng tabeng yeo? Paulo o re: “Ké mo xo botse xe O sa je nama, Ò sa nwe sedila, Ò lesa se se kxopišaxo ngwana weno.” (Ba-Roma 14:14, 20, 21) Ka baka leo, “sa rena ba re tiilexo, ké xore re kxôtlêlêlê mefôkôlô ya ba  ba sa tiaxo, re lesê xo ithata. Mang le mang a kxahlê ngwan’abô ka xo thakxa le ka xo mo axiša.” (Ba-Roma 15:1, 2) Ge letswalo la Mokriste-gotee le rena le ka kgopišwa ke seo re se dirago, lerato la borwarre le tla re tutueletša go bontšha go naganela ba bangwe le go phema go dira dilo tšeo di ka kgopišago ba bangwe. Mohlala wa se e ka ba go dirišwa ga dino tše di tagago. Mokriste o dumeletšwe go diriša beine ka tsela e lekanetšego. Eupša ge e ba go dira bjalo go ka kgopiša mogagabo, a ka se gapeletše go diriša ditshwanelo tša gagwe.

16. Re ka bontšha bjang go naganela bao ba lego tšhemong ya gabo rena?

¹⁶ Molao wo wa motheo o ka dirišwa gape le ditirišanong tša rena le bao ba lego ka ntle ga phuthego ya Bokriste. Ka mohlala, re ka ba re dula tikologong yeo bodumedi bja gona bo rutago balatedi ba bjona go lebelela letšatši le tee mo bekeng e le letšatši la go khutša. Ka baka leo, e le gore re se ke ra kgopiša baagišani ba rena gomme ra dira mapheko bakeng sa modiro wa boboledi, re tla phema ka mo re ka kgonago ka gona go dira selo le ge e le sefe ka letšatši leo seo se tlago go kgopiša baagišani ba rena. Boemong bjo bongwe, Mokriste yo a humilego a ka hudugela go yo hlankela moo go nyakegago thušo e kgolo gona gare ga batho bao ba diilago. A ka kgetha go bontšha go naganela baagišani ba gagwe ba bafsa ka go apara ka tsela e leka-lekanego goba ka go phela bophelo bja maemo a tlase gaešita le ge a ka kgona go phela bophelo bja manobonobo.

17. Ke ka baka la’ng e le gabohlokwa go naganela ba bangwe dikgethong tšeo re di dirago?

¹⁷ Na ke mo go kwagalago go letela gore bao ‘ba tiilego’ ba dire diphetogo tše bjalo? Ge e le gabotse, nagana ka seswantšho se: Ge re dutše re otlela tseleng ya lephefo, re bona ka mo pele ga rena go e na le bana bao ba sepelago kgaufsi le tsela ka mokgwa o kotsi. Na re tšwela pele re otlela ka lebelo la godimo leo le dumeletšwego e le feela ka gobane re na le tshwanelo ya molao ya go dira bjalo? Aowa, re fokotša lebelo e le gore re pheme kotsi yeo e ka welago bana. Ka dinako tše dingwe, go ikemišetša mo go bjalo go fokotša lebelo, goba go ema ganyenyane go a nyakega tswalanong ya rena le badumedi-gotee le rena goba batho ba bangwe. Re ka ba re dira selo se itšego seo re nago le tshwanelo e feletšego ya go se dira. Ga go na melao ya motheo ya Beibele yeo e tshelwago. Lega go le bjalo, ge e ba re ka kgopiša ba bangwe goba ra kweša ba matswalo a fokolago bohloko, lerato la Bokriste le tla re tutueletša go dira dilo ka šedi. (Ba-Roma 14:13, 15) Go kgomarela botee le go godiša  dikgahlego tša Mmušo go bohlokwa kudu go feta go diriša ditshwanelo tša rena tša motho ka noši.

18, 19. (a) Ke bjang re latelago mohlala wa Jesu ka go bontšha go naganela ba bangwe? (b) Ke ditabeng dife tšeo ka moka ga rena re dirago dilo ka botee, gomme ke’ng seo se tlago go ahla-ahlwa sehlogong se se latelago?

¹⁸ Ge re dira dilo ka tsela ye, re latela mohlala o mobotse kudu. Paulo o re: “Xobane Kriste le Yêna xa a ka a ithata, byalo ka xe xo ngwadilwe xwa thwe: Ke wetšwe ke kxoboxô ya ba Xo kxobaxo.” Jesu o be a ikemišeditše go gafa bophelo bja gagwe bakeng sa rena. Ka ntle le pelaelo le rena re ikemišeditše go gafa tše dingwe tša ditshwanelo tša rena ge e ba seo se tla dira gore “ba ba sa tiaxo” ba nee Modimo letago ka botee le rena. Ka kgonthe, go bontšha boemo bja kgopolo bja go kgotlelela gotee le go ba ba botho go Bakriste bao ba nago le matswalo a fokolago—goba go ikemišetša ka go rata go lekanyetša dikgetho tša rena le go se gapeletše go diriša ditshwanelo tša rena—go bontšha “kxopolô e tee ya xo amana le Kriste Jesu.”—Ba-Roma 15:1-5.

¹⁹ Gaešita le ge dikgopolo tša rena ditabeng tšeo go sa akaretšwego melao ya motheo ya Mangwalo di ka fapana ka tsela e itšego, ditabeng tša borapedi re dira dilo ka botee ka mo go feletšego. (1 Ba-Korinthe 1:10) Ka mohlala, botee bjo bo bjalo bo bonagala tseleng yeo re arabelago ka yona go bao ba ganetšago borapedi bja therešo. Lentšu la Modimo le bitša baganetši ba bjalo gore ke batho ba šele gomme le re lemoša gore re hlokomele “lentšu la ba šele.” (Johane 10:5) Re ka tseba bjang batho ba bjalo ba šele? Re swanetše go arabela bjang go bona? Dipotšišo tše di tla ahla-ahlwa sehlogong se se latelago.

[Mengwalo ya ka tlase]

[Dipotšišo tša Thuto]

[Caption on page 9]

Keletšo ya Paulo mabapi le botee e be e le bohlokwa kudu bakeng sa phuthego

[Caption on page 10]

Bakriste ba boteeng go sa šetšwe ditlogo tša bona tše di sa swanego

[Caption on page 12]

Mootledi yo o swanetše go dira’ng gabjale?

[Caption on page 12]

O tla Araba Bjang?

• Ke ka baka la’ng go ba le dikgopolo tše di sa swanego ditabeng tša motho ka noši go be go ka se bee botee kotsing?

• Ke ka baka la’ng rena bjalo ka Bakriste re swanetše go bontšha go naganelana ka tsela e borutho?

• Ke ditsela dife tše dingwe tšeo ka tšona re ka dirišago keletšo ya Paulo ya mabapi le botee lehono, gomme ke’ng seo se tlago go re tutueletša go dira bjalo?