Seo se Tlogago se Nyakega Gore o Thabe

JEHOFA, “Modimo yo a thabilego” le Jesu Kriste “yena Kgoši e nnoši e thabilego,” ba tseba go feta motho le ge e le mang gore ke eng seo se tlogago se nyakega gore o thabe. (1 Timotheo 1:11, NW; 6:15, NW) Ka gona, ga go makatše gore senotlelo sa go hwetša lethabo se hwetšwa ka Lentšung la Modimo e lego Beibele.—Kutollo 1:3; 22:7.

Thutong ya gagwe e tumilego ya Thabeng, Jesu o hlalosa seo se nyakegago gore o thabe. O re: “Ba thabilego ke bao” ba (1) humanegilego moyeng goba bao ba lemogago dinyakwa tša bona tša moya, (2) bao ba nyamilego, (3) ba boleta, (4) ba tlala ya gore ba loke e bile ba nyoretšwego go loka, (5) bagaugedi, (6) ba pelo-tshekegi, (7) ba-dira-khutšo, (8) bao ba tlaišetšwago toko le (9) bao ba rogakwago le go tlaišwa ka baka la gagwe.—Mateo 5:3-11, NW. *

Na Dipolelo tša Jesu di Nepagetše?

Go rereša ga tše dingwe tša dipolelo tša Jesu go nyaka tlhaloso e nyenyane. Ke mang yo a ka ganetšago gore motho yo boleta, mogaugedi le mo-dira-khutšo yo a tutuetšwago ke pelo e sekilego o tla thaba go feta kamoo motho yo bogale, yo a ratago dintwa le yo a se nago kgaugelo a tla thabago ka gona?

Lega go le bjalo, re ka ipotšiša gore ke bjang batho  bao ba swerwego ke tlala ya gore ba loke e bile ba nyoretšwego go loka goba bao ba nyamilego ba ka bitšwago bao ba thabilego. Batho ba bjalo ba na le pono e leka-lekanego ka maemo a lefase. Ba ‘a lla e bile ba hlokofetše ka baka la makgapha ao a dirwago’ mehleng ya rena. (Hesekiele 9:4) Seo ka bosona ga se ba thabiše. Lega go le bjalo, ge ba ithuta ka morero wa Modimo wa go tliša maemo a lokilego lefaseng gotee le toka go bao ba tlaišegago, lethabo la bona ga le be le mellwane.—Jesaya 11:4.

Go rata toko le gona go dira gore batho ba nyamišwe ke go palelwa ga bona ka mehla ke go dira se se lokilego. Ka gona ba lemoga dinyakwa tša bona tša moya. Batho ba bjalo ba ikemišeditše go lebelela go Modimo bakeng sa tlhahlo ka gobane ba lemoga gore ke yena a nnoši yo a ka thušago batho go fenya mafokodi a bona.—Diema 16:3, 9; 20:24.

Batho bao ba nyamilego, bao ba swerwego ke tlala ya gore ba loke e bile ba nyoretšwego go loka le bao ba lemogago dinyakwa tša bona tša moya ba tseba gore go ba le tswalano e botse le Mmopi ke gabohlokwa. Tswalano e botse le batho e tliša lethabo, eupša go ba le tswalano e botse le Modimo go tliša lethabo leo le fetišago. Ee, bao ba tlogago ba rata se se lokilego, bao ba ikemišeditšego go amogela tlhahlo ya Modimo, ba ka bitšwa bao ba thabilego e le ka kgonthe.

Lega go le bjalo, o ka hwetša go le thata go dumela gore motho yo mongwe yo a tlaišwago le go rogakwa e ka ba yo a thabilego. Eupša se e swanetše go ba e le sa therešo ka gobane Jesu ka boyena o boletše bjalo. Ka gona, mantšu a a swanetše go kwešišwa bjang?

Ba be ba Tlaišwa Eupša ba Thabile—Seo se ka Kgonega Bjang?

Ela hloko gore Jesu ga se a bolela gore go rogakwa le go tlaišwa ka botšona di be di tla tliša lethabo. O boletše gore: “Ba lehlôxônôlô [“bao ba thabilego,” NW] ké ba ba tlaišetšwaxo tokô, . . . xe ba Le roxa, ba Le tlaiša, . . . ka ’baka la-ka.” (Mateo 5:10, 11) Ka gona, lethabo le tlišwa feela ke ge motho a lebeletšane le go rogakwa ka gobane e le molatedi wa Kriste le ka gobane a phela bophelo bja gagwe ka go dumelelana le melao ya motheo ya go loka yeo Jesu a e rutilego.

Se se bontšhwa ke seo se diragaletšego Bakriste ba lekgolong la pele la nywaga. Ditho tša lekgotla la Sanhedrine, e lego lekgotla le le phagamego la ba-Juda, ‘di ile tša bitša baapostola, tša ba otla ka dikgati, tša ba iletša go ruta ka leina la Jesu, tša kgona di ba lesa ba tloga.’ Baapostola ba ile ba arabela bjang? “Baapostola ba tloxa moo lekxotleng bà thabile ka xo re, xe ba xobošitšwe ka ’baka la Leina la Jesu, ké xôna xe ba xodišitšwe. ’Me ba se kxaotše xo hlwa bà ruta Ntlong-kxêthwa le mo malapeng, bà fêla ba kwatša Ebangedi ya xore Jesu ké Yêna Kriste.” (Mongwalo o sekamego ke wa rena.)—Ditiro 5:40-42; 13:50-52.

Moapostola Petro o re neile kwešišo e oketšegilego mabapi le tswalano magareng ga thogako le lethabo. O ngwadile gore: “Xe Le xobošwa ka ’baka la Leina la Kriste, xôna Le ba lehlôxônôlô [“le ba thabilego,” NW], xobane ké xôna Lè okametšwe ke Môya wa letaxô le matla, Môya wa Modimo, wo bôná ba o xobošaxo, wo lena Le o rêtaxo.” (1 Petro 4:14) Ee, go tlaišwa o le Mokriste o tlaišetšwa go dira se se lokilego, go tliša lethabo leo le tlišwago ke go tseba gore o amogela moya o mokgethwa wa Modimo, gaešita le ge go tlaišwa mo go bjalo go sa thabiše. Moya wa Modimo o tswalana bjang le lethabo?

Na re Swanetše go Hlagolela Mediro ya Nama Goba Dienywa tša Moya

Moya o mokgethwa wa Modimo o okametše feela bao ba kwago Modimo e le mmuši. (Ditiro 5:32) Jehofa ga a nee moya wa gagwe go bao ba dirago “medirô ya nama.” Mediro yeo ke “thlalô, le bootswa, le dithšila, le bohlôtlôlô. Ké xo hlankêla medimo, le boloi, le thlôyanô, le dintwa, le pefêlô, le boxale, le dithsêlê, le boxarexare. Ké moná, le polaô, le botaxwa, le bohori, le tše di swanaxo le tšeo.” (Ba-Galatia 5:19-21) Ke therešo gore lefaseng la lehono “medirô ya nama” e tloga e bonagala. Lega go le bjalo, bao ba e dirago ga ba thabele lethabo la kgonthe le la sa ruri. Go e na le moo, go dira dilo tšeo go senya tswalano e botse ya motho le ba leloko, bagwera le bao a tlwaelanego le bona. Go feta moo, Lentšu la Modimo le bolela gore ba ba “diraxo tše byalo ba ka se jé bohwa mmušong wa Modimo.”

 Ka mo go fapanego, Modimo o nea moya wa gagwe go bao ba hlagolelago “dienywa tša Môya.” Dika tšeo di bopago dienywa tše ke “leratô, le lethabô, le moláô; ke xo se fêle pelo, le botho, le bonôlô, le pôtêxô le bolêta, le boithswarô.” (Ba-Galatia 5:22, 23) Ge re bonagatša dika tše, re tšweletša maemo a go ba le ditswalano tša khutšo le ba bangwe gotee le Modimo, ao a feleletšago ka lethabo la kgonthe. (Bona lepokisi.) Sa bohlokwa le go feta, ka go bontšha lerato, botho, go loka le dika tše dingwe tša go boifa Modimo, re thabiša Jehofa e bile re ba le kholofelo e thabišago ya bophelo bjo bo sa felego lefaseng le lefsa la Modimo la go loka.

O ka Kgetha Lethabo

Ge Wolfgang le Brigitte, e lego banyalani bao ba dulago kua Jeremane, ba be ba thoma go ithuta Beibele ka phišego, ba be ba e-na le dilo tše dintši tše di bonagalago tšeo batho ba naganago gore di a nyakega gore motho a thabe. E be e le ba bafsa e bile ba phetše gabotse. Ba be ba apara diaparo tšeo di bitšago tšhelete e ntši, ba dula ka ntlong e kgabišitšwego ka tsela e bogegago e bile ba e-na le kgwebo e atlegago. Ba be ba fetša nako ya bona e ntši ba phegelela dilo tše di bonagalago tše di oketšegilego. Lega go le bjalo, ge nako e dutše e e-ya, Wolfgang le Brigitte ba ile ba dira kgetho e bohlokwa. Ba ile ba thoma go diriša nako ya bona e ntši le maiteko a bona ba phegelela ditekanyetšo tša moya e bile ba tsoma ditsela tša go batamela kgaufsi le Jehofa. Go se go ye kae kgetho ya bona e ile ya dira gore ba fetole boemo bja bona bja kgopolo, e lego seo ka morago se ilego sa ba tutueletša gore ba nolofatše bophelo bja bona gomme ba hlankele e le babulamadibogo, goba baebangedi ba Mmušo ba nako e tletšego. Lehono, ba hlankela e le baithapi ofising ya lekala ya Dihlatse tša Jehofa kua Jeremane. Go oketša moo, ba ithuta leleme la se-Asia e le gore ba thuše batho bao ba tšwago dinageng tše dingwe go ithuta therešo yeo e hwetšwago ka Lentšung la Modimo, Beibele.

Na banyalani ba ba ile ba hwetša lethabo la kgonthe? Wolfgang o re: “Ga e sa le go tloga ge re tšea karolo ka mo go oketšegilego go phegeleleng dilo tša moya, re bile le lethabo le le fetago la pele e bile re hweditše kgotsofalo e oketšegilego. Le gona go hlankela Jehofa ka pelo ka moka go matlafaditše lenyalo la rena. Lenyalo la rena e be e le le le thabišago peleng, eupša re be re e-na le boikarabelo le dikganyogo tšeo di bego di re dira gore re be le dipakane tše di fapanego.  Mo nakong ye re phegelela gotee pakane e swanago.

Go Nyakega’ng Gore o Thabe?

Ka boripana: Phema “medirô ya nama,” gomme o hlagolele “dienywa tša Môya [wa Modimo].” E le gore motho a thabe, o swanetše go hlologela go ba le tswalano ya kgaufsi le Modimo. Motho yo a katanelago go hwetša se o tla swanela tlhaloso ya Jesu ya motho yo a thabilego.

Ka gona, o se ke wa dira phošo ya go phetha ka gore lethabo ga le hwetšagale. Ke therešo gore mo nakong ye o ka ba o se na boemo bjo bobotse bja tša maphelo goba mohlomongwe o bile o e-na le mathata lenyalong. O ka ba o fetilwe ke nako ya go ba le bana goba o ka ba o katana le go hwetša mošomo o tsenyago tšhelete e ntši. Mohlomongwe sekhwama sa gago sa tšhelete ga se a tlala kudu go etša kamoo se bego se tletše ka gona pele. Lega go le bjalo, e ba le sebete; ga o na lebaka la go itlhoboga! Pušo ya Mmušo wa Modimo e tla rarolla mathata a le a mangwe a mantši. Ke therešo gore go se go ye kae Jehofa Modimo o tla phethagatša kholofetšo ya gagwe yeo e boletšwego ke mopsalme e rego: “Mmušô wa xaxo ké mmušô wa mehla yohle le ya neng le neng . . . O khupurolla ’atla sa xaxo, ’me ka moka tše di phelaxo O di horiša lethabô.” (Psalme 145:13, 16) Go etša ge bahlanka ba Jehofa ba dimilione go dikologa lefaseng ka moka ba ka hlatsela, go dula o gopola kholofetšo ye ya Jehofa yeo e kgonthišetšago go tla tlaleletša kudu lethabong la gago lehono.—Kutollo 21:3.

[Mengwalo ya ka tlase]

[Lepokisi go letlakala 6]

Dilo Tšeo di Tlaleletšago Lethabong

Lerato le tutueletša ba bangwe gore le bona ba go rate.

Lethabo le go nea matla a go lebeletšana le mathata ka katlego.

Khutšo e go thuša go boloka ditswalano tša gago di se na dintwa.

Go se fele pelo go go dira gore o kgone go dula o thabile gaešita le ge o le tlase ga teko.

Botho bo gogela ba bangwe go wena.

Go loka moo o go bontšhago go dira gore ba bangwe ba arabele ka lethabo ge o nyaka thušo.

Tumelo e tla go kgonthišetša ka tlhahlo ya Modimo e lerato.

Boleta bo tla go tlišetša khutšo ya pelo, ya monagano le ya mmele.

Boitshwaro bo bolela gore o tla dira diphošo tše sego kae.

[Caption on page 7]

E le gore o hwetše lethabo, o swanetše go kgotsofatša dinyakwa tša gago tša moya