“Aparang Dithlamô Tšohle Tša Modimo”
“Aparang Dithlamô Tšohle Tša Modimo”
“Aparang dithlamô tšohle tša Modimo, xore Le kxônê xo fenya dipoxo tša Diabolo.”—BA-EFESO 6:11.
1, 2. Ka mantšu a gago, hlalosa ditlhamo tša moya tšeo Mokriste a swanetšego go di apara.
ROMA e be e fihleletše matla a magolo kudu lekgolong la pele la nywaga C.E. Matla a bahlabani ba Roma a be a dira gore motse o kgone go ba le taolo e kgolo dinageng tšeo di bego di tsebja tša mehleng yeo. Radihistori yo mongwe o ile a hlalosa madira a e le “sehlopha sa tša bohlabani seo se atlegilego kudu historing.” Madira a Roma ao a nago le bokgoni a be a bopša ke bahlabani ba ba tlwaeditšwego gabotse bao ba neilwego tlwaetšo e thata, eupša go atlega ga ona e le madira a nago le bokgoni go be go ithekgile gape ka ditlhamo tša ona. Moapostola Paulo o ile a diriša ditlhamo tša mohlabani wa Roma bakeng sa go swantšhetša didirišwa tša moya tšeo Bakriste ba di nyakago e le gore ba lwe ka katlego kgahlanong le Diabolo.
2 Re hwetša tlhaloso ya ditlhamo tša moya go Ba-Efeso 6:14-17. Paulo o ngwadile gore: “Emang . . . Lè itlemile mathêka ka therešô, Lè apere se-phêma-sefêxa sa tokô, Dinaong Le dulê Lè itlemeletše xo phafoxela Ebangedi ya khutšô. Xa-xolo-xolo Le swarê kôtsê ya tumêlô, ye Le kxônaxo xo tima mesêbê e thšumaxo ya yêna e mobe ka yôna. Le rwalê kêfa ya pholoxô, Le swarê thšoša ya Môya e lexo Lentšu la Modimo.” Ge di lebelelwa go ya ka pono ya batho, ditlhamo tše tšeo Paulo a di hlalositšego di be di nea mohlabani wa Roma tšhireletšo e kgolo. Le yena ka mo go swanago o be a diriša tšhoša gabotse, e lego sebetša sa gagwe se segolo seo a se dirišetšago go lwa le motho yo mongwe.
3. Ke ka baka la’ng re swanetše go kwa ditaelo tša Jesu Kriste gotee le go latela mohlala wa gagwe?
3 Ka ntle le didirišwa le tlwaetšo, go atlega ga madira a Roma go be go ithekgile ka go kwa ga bahlabani molaodi wa bona. Ka mo go swanago, Bakriste ba swanetše go kwa Jesu Kriste, yoo Beibele e mo hlalosago e le “molaodi wa ditšhaba.” (Jesaya 55:4, PK) Le gona ke “hlôxô ya phuthêxô.” (Ba-Efeso 5:23) Jesu o re nea ditaelo bakeng sa go lwa ntwa ya rena ya moya e bile o re nea mohlala o mobotse wa kamoo re ka aparago ditlhamo tša moya ka gona. (1 Petro 2:21) Ka ge semelo se se swanago le sa Kriste se swana kudu le ditlhamo tša rena tša moya, Mangwalo a re kgothaletša gore re ‘itlhame’ ka boemo bja kgopolo bja Kriste. (1 Petro 4:1) Ka gona, ge re dutše re ahla-ahla karolo e nngwe le e nngwe ya ditlhamo tša rena tša moya, re tla diriša mohlala wa Jesu go bontšha bohlokwa bja tšona le go šoma ga tšona ka katlego.
Go Šireletša Matheka, Sefega le Dinao
4. Lepanta le kgatha tema efe ditlhamong tša mohlabani, gomme le swantšhetša’ng?
4 Lè itlemile mathêka ka therešô. Mehleng ya Beibele, bahlabani ba be ba apara lepanta le lekoto, la disenthimithara tše hlano go ya go tše 15 ka bophara. Bafetoledi ba bangwe ba šišintše gore temana ye e swanetše go balega ka gore, “ka therešo e le lepanta leo le tiišitšwego mathekeng a gago.” Lepanta la mohlabani le be le thuša go šireletša matheka a gagwe, gomme le be le dira gore go be bonolo go khwamela tšhoša. Ge mohlabani a be a itlema matheka, o be a itokišeletša ntwa. Paulo o dirišitše lepanta la mohlabani bakeng sa go bontšha tekanyo yeo ka yona therešo ya Mangwalo e swanetšego go tutuetša maphelo a rena. Ka tsela ya seswantšhetšo, re swanetše go itlema ka lona ka go tia, e le gore re phele ka go dumelelana le therešo le gore re kgone go e lwela nakong le ge e le efe. (Psalme 43:3; 1 Petro 3:15) E le gore re fihlelele seo, re swanetše go ithuta Beibele ka phišego re be re naganišiše ka dikagare tša yona. Jesu o be a e-na le molao wa Modimo ka ‘pelong ya gagwe.’ (Psalme 40:8) Ke ka baka leo a bego a kgona go araba ka go tsopola Mangwalo ka hlogo, ge baganetši ba gagwe ba be ba mmotšiša dipotšišo.—Mateo 19:3-6; 22:23-32.
5. Hlalosa kamoo keletšo ya Mangwalo e ka re thušago ka gona dinakong tša mathata goba tša diteko.
5 Ge re dumelela therešo ya Beibele gore e re hlahle, e ka re šireletša tabeng ya go nea mabaka mo go fošagetšego ya ba ya re thuša go dira diphetho tše bohlale. Dinakong tša diteko goba tša mathata, ditlhahlo tše tšwago ka Beibeleng di tla matlafatša boikemišetšo bja rena bja go nyaka go dira se se lokilego. Go tla ba bjalo ka ge eka re bona Molai wa rena yo Mogolo, Jehofa, gomme gwa ba bjalo ka ge eka re kwa lentšu ka morago ga rena le re: “Tsela šé! Tšeang ka yôna.”—Jesaya 30:20, 21.
6. Ke ka baka la’ng pelo ya rena ya seswantšhetšo e nyaka tšhireletšo, gomme go loka go ka e šireletša bjang ka katlego?
6 Se-phêma-sefêxa sa tokô. Sephema-sefega sa mohlabani se be se šireletša setho sa bohlokwa, e lego pelo. Pelo ya rena ya seswantšhetšo—motho yoo re lego yena ka gare—e nyaka tšhireletšo e kgethegilego ka gobane e sekametše go se se fošagetšego. (Genesi 8:21) Ka gona, re swanetše go tseba ditekanyetšo tša Jehofa tša go loka le go di rata. (Psalme 119:97, 105) Go rata ga rena go loka go re dira gore re ganetše tsela ya lefase ya go nagana yeo e hlokomologago goba e nyenyefatšago ditlhahlo tša Jehofa tše di kwagalago. Go oketša moo, ge re rata se se lokilego le go hloya se se fošagetšego, re phema go phegelela tsela yeo e ka senyago maphelo a rena. (Psalme 119:99-101; Amosi 5:15) Jesu o re beetše mohlala tabeng ye, ka gobane Mangwalo a bolela mabapi le yena gore: “O rata xôna xo loka; O hlôya bokxôpô.”—Ba-Hebere 1:9. *
7. Ke ka baka la’ng mohlabani wa Roma a be a nyaka dieta tšeo di lego boemong bjo bobotse, gomme di swantšhetša’ng?
7 Dinaong Le dulê Lè itlemeletše xo phafoxela Ebangedi ya khutšô. Bahlabani ba Roma ba be ba nyaka dieta tše di swanetšego goba diramphašane tše di tiilego, ka ge gantši nakong ya ge ba lokišeletša ntwa ba be ba gwanta dikhilomithara tše 30 letšatši le letšatši mola ba apere goba ba rwele ditlhamo le didirišwa tšeo di imelago dikhilograma tše 27. Paulo o dirišitše dieta ka mo go swanetšego bakeng sa go swantšhetša go ikemišetša ga rena go bolela ka molaetša wa Mmušo go motho yo mongwe le yo mongwe yo a tlago go theetša. Se ke sa bohlokwa ka gobane batho ba tla tseba bjang Jehofa ge e ba re sa itokišeletša e bile re sa ikemišetša go dira boboledi?—Ba-Roma 10:13-15.
8. Re ka ekiša bjang mohlala wa Jesu bjalo ka mmoledi wa ditaba tše dibotse?
8 Modiro wa bohlokwa kudu bophelong bja Jesu e be e le ofe? O boditše Mmušiši wa Roma e lego Pontio Pilato gore: ‘Ke tlile lefaseng go tlo ba hlatse ya therešo.’ Jesu o be a dira boboledi nako le nako ge a be a hwetša tsebe e theetšago, gomme o be a thabela bodiredi bja gagwe kudu moo a ilego a bo etiša pele ga dinyakwa tša gagwe tša nama. (Johane 4:5-34; 18:37) Ge e ba re fišegela go tsebatša ditaba tše dibotse go etša Jesu, re tla hwetša dibaka tše dintši tša go boledišana le ba bangwe ka tšona. Go oketša moo, go swarega ga rena ka mo go feletšego bodireding bja rena go tla re thuša gore re tšwele pele re matlafetše moyeng.—Ditiro 18:5.
Kotse, Kefa le Tšhoša
9. Kotse e kgolo e be e šireletša bjang mohlabani wa Roma?
9 Kôtsê ya tumêlô. Lentšu la Segerika leo le fetoletšwego e le ‘kotse e kgolo’ le bolela ka kotse yeo e bego e le e kgolo ka mo go lekanego go šireletša karolo e kgolo ya mmele. E be e tla šireletša motho go “mesêbê e thšumaxo” yeo go boletšwego ka yona go Ba-Efeso 6:16. Mehleng ya Beibele, bahlabani ba be ba diriša mesebe e dirilwego ka mahlaka a gorulotšwego ao a nago le diswaro tše nyenyane tša tšhipi tšeo di bego di ka tlatšwa ka makhura a tukago. Seithuti se sengwe se hlalosa mesebe ye e le “tše dingwe tša dibetša tše kotsi kudu dintweng tša bogologolo.” Ge e ba mohlabani a be a se na kotse e kgolo gore a itšhireletše mesebeng e bjalo, o be a ka gobala o šoro goba gaešita le go bolawa.
10, 11. (a) Ke ‘mesebe efe e tšhumago’ ya Sathane yeo e ka fokodišago tumelo ya rena? (b) Mohlala wa Jesu o bontšha bjang bohlokwa bja go ba le tumelo dinakong tša teko?
10 Ke ‘mesebe efe e tšhumago’ yeo Sathane a e dirišago bakeng sa go fokodiša tumelo ya rena? A ka hlohleletša tlaišo goba kganetšo ka lapeng, mošomong goba sekolong. Kganyogo ya go nyaka go ba le dilo tše dintši tše di bonagalago le molaba wa boitshwaro bjo bo gobogilego le tšona di ipontšhitše e le tše kotsi go ba bangwe. E le go itšhireletša dikotsing tše bjalo, “xa-xolo-xolo [re swanetše gore re] swarê kôtsê ya tumêlô.” Tumelo e tlišwa ke go ithuta ka Jehofa, go bolela le yena ka mehla ka thapelo le go lemoga kamoo a re šireletšago le go re šegofatša ka gona.—Jošua 23:14; Luka 17:5; Ba-Roma 10:17.
11 Ge Jesu a be a le lefaseng, o ile a bontšha bohlokwa bja go ba le tumelo e tiilego dinakong tša mathata. O be a bota diphetho tša Tatagwe ka mo go feletšego e bile o be a thabela go dira thato ya Modimo. (Mateo 26:42, 53, 54; Johane 6:38) Le nakong ya ge a be a lebeletšane le tlalelo e kgolo kua serapeng sa Getsemane, Jesu o ile a botša Tatagwe gore: “E se bê ka mo xo rataxo Nna, e bê ka mo xo rataxo Wene.” (Mateo 26:39) Le ka mohla Jesu ga se a ka a lebala bohlokwa bja gore a dule a botega le gore a thabiše Tatagwe. (Diema 27:11) Ge e ba re bota Jehofa ka mo go swanago, a ka se ke a dumelela gore go ntšhwa diphošo le tlaišo di fokodiše tumelo ya rena. Go e na le moo, tumelo ya rena e tla matlafala ge e ba re ithekga ka Modimo, re bontšha gore re a mo rata e bile re boloka melao ya gagwe. (Psalme 19:7-11; 1 Johane 5:3) Ga go na meputso ya dilo tše di bonagalago goba kganyogo ya go kgotsofatša maikwelo ya nakwana yeo e ka bapišwago le ditšhegofatšo tšeo Jehofa a di beetšego bao ba mo ratago.—Diema 10:22.
12. Ke karolo efe ya bohlokwa yeo e šireletšwago ke kefa ya rena ya seswantšhetšo, gomme ke ka baka la’ng tšhireletšo e bjalo e le bohlokwa?
12 Kêfa ya pholoxô. Kefa e be e šireletša hlogo ya mohlabani gotee le bjoko bja gagwe—moo go tšwago bohlale. Kholofelo ya rena ya Bokriste e bapetšwa le kefa ka gobane e šireletša menagano ya rena. (1 Ba-Thesalonika 5:8) Gaešita le ge re fetotše menagano ya rena re diriša tsebo e nepagetšego ya Lentšu la Modimo, re sa dutše re le batho ba fokolago, bao ba sa phethagalago. Menagano ya rena e ka senywa gabonolo. Dipakane tša tshepedišo ye ya dilo di ka re fapoša goba gaešita le go tšeela legato kholofelo ya rena yeo re e neilwego ke Modimo. (Ba-Roma 7:18; 12:2) Diabolo o lekile eupša a palelwa ke go fapoša Jesu ka go mo holofetša “mebušô ka moka ya lefase le letaxô la yona.” (Mateo 4:8) Eupša Jesu o ile a gana kholofetšo ye ka go tia, gomme Paulo o boletše ka yena gore: “[Jesu] e a kxôtleletšexo [kota ya tlhokofatšo, NW], le xe se se bexo se mo loketše e le lethabô, a dumêla xo xobošwa, a kxôna xo y’o dula ka letsoxong le letona la sedulô sa boxoši bya Modimo.”—Ba-Hebere 12:2.
13. Re ka kgomarela bjang kholofelo ya rena kholofetšong yeo e lego kua pele?
13 Mohuta wa kholofelo yeo Jesu a bego a e-na le yona ga o fo itlela. Ge e ba re tlatša menagano ya rena ka ditoro le dipakane tša tshepedišo ye ya dilo go e na le go lebiša tlhokomelo ya rena kholofelong yeo e lego ka pele, tumelo ya rena dikholofetšong tša Modimo e tla feleletša e fokola. Ge nako e dutše e e-ya, re ka ba ra lahlegelwa gaešita le ke kholofelo ya rena ka mo go feletšego. Ka lehlakoreng le lengwe, ge e ba re naganišiša ka mehla ka dikholofetšo tša Modimo, re tla tšwela pele re thabela kholofelo yeo e beilwego ka pele ga rena.—Ba-Roma 12:12.
14, 15. (a) Tšhoša ya rena ya seswantšhetšo ke’ng, gomme e ka dirišwa bjang? (b) Bontšha kamoo tšhoša ya moya e ka re thušago go phema teko ka gona.
14 Thšoša ya Môya. Lentšu, goba molaetša wa Modimo, wo o begilwego ka Beibeleng le swana le tšhoša ya magale a mabedi yeo e ka kgonago go fediša maaka a bodumedi le go thuša batho ba dipelo tše di lokilego gore ba hwetše tokologo ya moya. (Johane 8:32; Ba-Hebere 4:12) Le gona tšhoša ya moya e ka re šireletša ge re hlaselwa ke diteko goba ke bahlanogi bao ba lekago go fediša tumelo ya rena. (2 Ba-Korinthe 10:4, 5) Re leboga gakaakang gore ‘Mangwalo ka moka a buduletšwe ke Modimo le gore a re hlama ka mo go feletšego bakeng sa mediro e mebotse ka moka’!—2 Timotheo 3:16, 17.
15 Ge a be a lekwa ke Sathane lešokeng, Jesu o ile a diriša tšhoša ya moya ka mo go atlegago bakeng sa go phaela ka thoko go nea mabaka mo go fošagetšego le diteko tša boradia. Tekong e nngwe le e nngwe ya Sathane, o ile a arabela ka gore: “Xo ngwadilwe xwa thwe.” (Mateo 4:1-11) David, e lego yo mongwe wa Dihlatse tša Jehofa kua Sepania, ka mo go swanago o lemogile gore Mangwalo a mo thušitše go fenya teko. Ge a be a e-na le nywaga e 19, mosadi yo a bogegago yo a bego a šoma khamphaning e tee le yena ya go hlwekiša o ile a šišinya gore ba “be le nako ya go ithabiša ba le gotee.” David o ile a ganetša maiteko a gagwe gomme a kgopela mookamedi wa gagwe gore a yo šoma tikologong e nngwe e le gore boemo bjo bo se ke bja rotoga gape. David o re: “Ke ile ka gopola mohlala wa Josefa. O ile a ganetša boitshwaro bjo bo gobogilego gomme a tšhaba ka go akgofa. Ke ile ka dira se se swanago.”—Genesi 39:10-12.
16. Hlalosa lebaka leo ka lona re nyakago tlwaetšo e le gore re ‘rathe lentšu la therešo re sa kgopamiše.’
16 Le gona Jesu o ile a diriša tšhoša ya moya go thuša ba bangwe gore ba tšhabele go laolwa ke Sathane. Jesu o itše: “Thutô ya-ka xa se ya-ka; ké ya E a nthomilexo.” (Johane 7:16) E le gore re ekiše tsela ya Jesu ya bokgoni ya go ruta, re nyaka tlwaetšo. Ge e le mabapi le bahlabani ba Roma, radihistori wa mo-Juda e lego Josephus o ngwadile gore: “Mohlabani yo mongwe le yo mongwe o tlwaetšwa letšatši le letšatši, gomme seo se dirwa ka phišego e kgolo, bjalo ka ge eka e be e le nakong ya ntwa, e lego lebaka leo ka lona ba kgotlelelago gabonolo gakaalo go lapiša kudu ga dintwa.” Ntweng ya rena ya moya, re swanetše go diriša Beibele. Go oketša moo, re swanetše go ‘dira sohle seo re ka se kgonago gore re ipontšhe re le bao ba amogelwago ke Modimo, re le badiri bao ba se nago bosodi, bao ba tsebago go ratha lentšu la therešo ba sa kgopamiše.’ (2 Timotheo 2:15) Le gona re ba le kgotsofalo e kgolo gakaakang ge re diriša Mangwalo bakeng sa go araba potšišo e tšwago pelong ya motho yo a nago le kgahlego!
Rapelang ka Dinako Tšohle
17, 18. (a) Thapelo e kgatha tema efe go ganetšeng Sathane? (b) Nea mohlala wo o bontšhago bohlokwa bja thapelo.
17 Ka morago ga go ahla-ahla ditlhamo tšohle tša moya, Paulo o tlaleletša ka keletšo e nngwe ya bohlokwa. Ge ba ganetša Sathane, Bakriste ba swanetše go ipha nako ya go “tliša dithapêlô tšohle le ’kxopêlô tšohle.” Ga kae? Paulo o ngwadile gore: ‘Tšwelang pele le rapela ka mabaka ohle ka moya.’ (Ba-Efeso 6:18) Ge re lebeletšana le diteko, mathata goba go nyama, thapelo e ka re matlafatša kudu. (Mateo 26:41) Jesu ‘o tlišitše didimo tša dithapelo le ditopo le dillo tše thata ka megokgo a di fihliša go Yoo a kgonnego go mo phološa lehung, gomme a kwewa a hlakodišwa poifong.’—Ba-Hebere 5:7.
18 Milagros, yo a ilego a hlokomela monna wa gagwe yo a bego a babja o šoro ka nywaga ya ka godimo ga e 15, o re: “Ge ke ikwa ke nyamile, ke retologela go Jehofa ka thapelo. Ga go motho yo a ka nthušago go mo feta. Therešo ke gore go na le dinako tšeo ke ikwago ke se sa kgona go kgotlelela go ya pele. Eupša nako le nako ka morago ga go rapela Jehofa, ke be ke e-kwa matla a-ka a tsošološitšwe e bile ke ikwa ke le kaone.”
19, 20. Re nyaka’ng e le gore re be bafenyi ntweng ya rena kgahlanong le Sathane?
19 Diabolo o tseba gore nako ya gagwe ke e kopana, gomme o tiiša maiteko a gagwe a go nyaka go re fenya. (Kutollo 12:12, 17) Re swanetše go ganetša lenaba le le matla gomme re ‘hlabane tlhabano e botse ya tumelo.’ (1 Timotheo 6:12) Se se nyaka matla a fetago a tlwaelegilego. (2 Ba-Korinthe 4:7) Le gona re nyaka thušo ya moya o mokgethwa wa Modimo gomme ka go rialo re swanetše go o rapelela. Jesu o itše: “Xe ešita lena Le lexo ba babe, Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.”—Luka 11:13.
20 Go molaleng gore ke gabohlokwa go apara ditlhamo tšohle tšeo Jehofa a re neago tšona. Go apara ditlhamo tše tša moya go nyaka gore re hlagolele dika tša Modimo, tše bjalo ka tumelo le go loka. Go nyaka gore re rate therešo bjalo ka ge eka re itlemile ka yona, gore re itokišeletše go phatlalatša ditaba tše dibotse ka dinako tšohle le gore re tšwele pele re gopola kholofelo yeo e lego ka pele. Re swanetše go ithuta go diriša tšhoša ya moya ka bokgoni. Ka go apara ditlhamo tšohle tša Modimo, re ka ba bafenyi ntweng yeo re e lwago kgahlanong le meoya ya bobe gomme ka kgonthe ra tliša theto leineng la Jehofa le lekgethwa.—Ba-Roma 8:37-39.
[Mengwalo ya ka tlase]
^ ser. 6 Boporofeteng bja Jesaya, Jehofa ka boyena o hlaloswa a apere “diphêmô tša tokô.” Ka gona, o nyaka gore balebeledi ba phuthego ba diriše toka ba be ba gate mogato ka go loka.—Jesaya 59:14, 15, 17.
[Dipotšišo tša Thuto]
O tla Araba Bjang?
• Ke mang yo a neago mohlala o mokaone wa go apara ditlhamo tša moya, gomme ke ka baka la’ng re swanetše hlahloba mohlala wa gagwe ka kelohloko?
• Re ka šireletša bjang menagano le dipelo tša rena tša seswantšhetšo?
• Re ka ba bjang le bokgoni bja go diriša tšhoša ya moya?
• Ke ka baka la’ng re swanetše go tšwela pele re rapela ka dinako tšohle?
[Caption on page 17]
Go ithuta Beibele ka phišego go ka re tutueletša go tsebatša ditaba tše dibotse ka dinako tšohle
[Caption on page 18]
Kholofelo ya rena yeo e kgonthišeditšwego e ka re thuša go lebeletšana le mathata
[Caption on page 19]
Na o diriša “thšoša ya môya” bodireding?