Dipotšišo tše Tšwago go Babadi

Ke ka baka la’ng banna ba ba-Isiraele ba be ba dumeletšwe go nyala basadi ba baditšhaba bao e lego mathopša gaešita le ge Molao wa Moše o be o laetše gore ba se ke ba tšeana le baditšhaba?—Doiteronomio 7:1-3; 21:10, 11.

Lebaka leo ka lona se se bego se dumeletšwe le akaretša maemo a kgethegilego. Jehofa o be a laetše ba-Isiraele gore ba fediše metse ya ditšhaba tše šupago nageng ya Kanana, ba bolaye badudi ba yona ka moka. (Doiteronomio 20:15-18) Tabeng ya ditšhaba tše dingwe, batho ba bagolo ba nnoši bao ba bego ba phologa e be e le dikgarebe tšeo di thopilwego. (Numeri 31:17, 18; Doiteronomio 20:14) Monna wa mo-Isiraele o be a ka nyala mosadi yo bjalo, eupša ge feela mosadi yo a gatile megato e itšego.

Beibele e bolela mabapi le megato yeo mosadi yo bjalo a bego a swanetše go e gata ka gore: “A boolwê hlôxô, a sêtê dinala tša xaxwe; a apolê diaparô tša bothopya bya xaxwe; a dulê lapeng la xaxo a llêlê tat’axwe le mm’axwe a fetšê kxwedi. O kxonê xo mo tšea, wa ba monna wa xaxwe, yêna a ba mosadi wa xaxo.”—Doiteronomio 21:12, 13.

Kgarebe ya lethopša yeo monna wa mo-Isiraele a bego a nyaka go e nyala e be e swanetše go beola hlogo ya yona. Go kota moriri e be e le go bontšha go lla goba go nyama. (Jesaya 3:24) Ka mohlala, ge mopatriareka Jobo a be a lahlegetšwe ke bana ba gagwe ka moka le thoto ya gagwe, o ile a kota hlogo ya gagwe e le go bontšha go lla. (Jobo 1:20) Le gona mosadi yo wa moditšhaba o be a swanetše go hlokomela dinala tša gagwe, mohlomongwe ‘a sete dinala tša gagwe gore e be tše kopana,’ e le gore gaešita le ge di pentilwe, diatla tša gagwe e se be tše di tanyago kgahlego. (Doiteronomio 21:12) “Diaparô tša bothopya bya xaxwe” tšeo mosadi yo a bego a swanetše go di apola e be e le eng? E be e le mo go tlwaelegilego gore basadi ba metseng ya baheitene bao ba bego ba le kgaufsi le go thopša ba apare diaparo tša bona tše botse kudu. Ba be ba dira se ka kholofelo ya go tanya kgahlego ya bathopi ba bona. Mosadi yo a thopilwego o be a swanetše go apola diaparo tše bjalo ge a lla.

Mosadi wa lethopša yoo e bego e tla ba mosadi wa monna wa mo-Isiraele o be a swanetše go llela bahu ba gabo ka lebaka la kgwedi e tee ya modikologo wa go dula ga kgwedi. Metse yeo e fentšwego e be e swanetše go fedišwa ka mo go feletšego moo e lego gore bohle bao e bego e le ba gabo le bagwera ba gagwe ba be ba ka se sa ba gona. Ka ge bahlabani ba ba-Isiraele ba tla be ba šetše ba fedišitše diswantšho tša medimo ya gagwe, didirišwa tša gagwe tša borapedi di tla ba di sa hlwe di le gona. Le gona kgwedi ya go lla e be e le lebaka la go hlwekišwa leo ka lona mosadi yo a thopilwego a bego a tla itokolla dibopegong ka moka tša boineelo bja gagwe bja bodumedi bja nakong e fetilego.

Lega go le bjalo, boemo e be e le bjo bo fapanego tabeng ya basadi ba baditšhaba ka kakaretšo. Tabeng ye, go be go šoma molao wo wa motheo: “Le se kê la tšeana nabô’; Le se kê la ba nea barwedi ba lena ya ba basadi ba barwa ba bôná; xomme Le se kê la tšeiša barwa ba bôná barwedi ba lena.” (Doiteronomio 7:3) Lebaka la thibelo ye e be e le lefe? Doiteronomio 7:4 e re: “Ka xobane ba tlo aroša barwa ba lena ba nthlanoxêla, ba dirêla medimo e šele.” Ka gona, thibelo ye e be e le bakeng sa go šireletša ba-Isiraele go šilafatšweng ke bodumedi. Lega go le bjalo, mosadi wa moditšhaba yo a lego maemong ao a hlalositšwego go Doiteronomio 21:10-13 o be a se kotsi. Ba leloko la gabo ka moka ba be ba hwile, le gona diswantšho tšeo di emelago medimo ya gagwe di be di fedišitšwe. Go be go se na mo a kopanago gona le bodumedi bja maaka. Mo-Isiraele o be a dumeletšwe go nyala moditšhaba ka tla se ga maemo a bjalo.