‘Le Rapele ka Tsela ye’

NA O tseba mantšu a Thapelo ya Morena? Ke thapelo ya mohlala yeo e rutilwego ke Jesu Kriste. Thutong ya gagwe e Tumilego ya Thabeng, Jesu o itše: ‘Le rapele ka tsela ye.’ (Mateo 6:9) Ka ge e le Jesu a ilego a ruta ka yona ka lekga la pele, gantši e bitšwa Thapelo ya Morena, le gona e tsebja e le thapelo ya Tatawešo.—Latin, Paternoster.

Batho ba dimilione lefaseng ka bophara ba tseba Thapelo ya Morena ka hlogo gomme ba e boeletša gantši, mohlomongwe letšatši le letšatši. Nywageng ya morago bjale, ba bantši ba ile ba boeletša thapelo ye dikolong gotee le meletlong ya setšhaba. Ke ka baka la’ng Thapelo ya Morena e tšeelwa godimo gakaakaa?

Rathutatumelo wa lekgolong la boraro la nywaga e lego Cyprian o ngwadile gore: “Ke thapelo efe yeo e ka bago e le bohlokwa kudu bodumeding go feta yeo re e rutilwego ke Kriste . . . ? Ke go rapela Tate gofe moo e ka bago ga therešo kudu go feta moo re go rutilwego ke Morwa yo e lego Therešo?”—Johane 14:6.

Thutong ya yona ya katikasema, Kereke ya Roma Katholika e lebelela thapelo ya Tatawešo e le “thapelo ya motheo ya Bokriste.” The World Book Encyclopedia e dumela go ba le karolo e bohlokwa ga thapelo ye madumeding ka moka a Bojakane, e e bitša gore ke e nngwe ya “dipolelo tša motheo tša tumelo ya Bokriste.”

 Lega go le bjalo, go swanetše go dumelwa gore ba bantši bao ba rapelago Thapelo ya Morena ga ba e kwešiše ka mo go feletšego. Ottawa Citizen, e lego kuranta ya kua Canada e re: “Ge e ba o e-na le mohuta le ge e le ofe wa setlogo sa Bokriste o ka ba o kgona go bolela Thapelo ya Morena ka lebelo ka ntle le go khutša gore o heme, eupša o ka ba le bothata bja go e bolela ka go iketla le ka kwešišo.”

Na e tloga e le gabohlokwa go kwešiša dithapelo tša rena tše di yago go Modimo? Ke ka baka la’ng Jesu a ile a re ruta Thapelo ya Morena? E bolela’ng go wena? Gabjale anke re ahla-ahleng dipotšišo tše.