‘Tšwelang Pele Le Tielela Moreneng’
‘Tšwelang Pele Le Tielela Moreneng’
‘Tšwelang pele le tielela Moreneng le thateng ya matla a gagwe.’ —BA-EFESO 6:10.
1. (a) Ke ntwa efe e makatšago yeo e ilego ya lwewa nywageng e ka bago e 3 000 e fetilego? (b) Ke ka baka la’ng Dafida a ile a ba mofenyi?
NYWAGENG e ka bago e 3 000 e fetilego, bahlabani ba babedi ba ile ba lwa go tšwa dihlopheng tše pedi tša madira ao a lwago mogoleng wa ntwa. Yo monyenyane go bona e be e le mošemane wa modiši yo a bitšwago Dafida. Pele ga gagwe go be go eme Goliata, monna wa matla gotee le leemo le le sa tlwaelegago. Seaparo sa gagwe sa go iphemela se be se imela dikhilograma tše ka bago 57, gomme o be a swere lerumo le legolo leo le imelago kudu le tšhoša e kgolo. Dafida o be a se a apara seaparo sa go iphemela le gatee, gomme sebetša sa gagwe se nnoši e be e le seraga-mabje. Senatla sa mo-Filisita e lego Goliata se ile sa ikwa se nyaditšwe ka ge mophenkgišani wa sona wa mo-Isiraele e be e fo ba mošemanyana. (1 Samuele 17:42-44) Go babogedi bao ba lego ka mahlakoreng a mabedi, go bonagala mafelelo a swanetše go ba a ile a tsebja e sa pele. Eupša ga se ka mehla mogale a fenyago ntweng. (Mmoledi 9:11) Dafida o ile a ipontšha e le mofenyi ka gobane o be a e-lwa ka matla a Jehofa. O itše: “Thlabanô yé ké ya Morêna.” Pego ya Beibele e bolela gore “ké wona mokgwa wo Dafida a fentšexo Mo-Filisita eo ka wôna, ka se-raxa-mabyê le ka lexakabyê.”—1 Samuele 17:47, 50.
2. Ke ntwa ya mohuta mang yeo e lwewago ke Bakriste?
2 Bakriste ga ba lwe ntwa ya kgonthe. Gaešita le ge ba phedišana gabotse goba ka khutšo le batho ka moka, ba lwa ntwa ya moya kgahlanong le baphenkgišani ba matla kudu. (Ba-Roma 12:18) Kgaolong ya mafelelo ya lengwalo la gagwe leo le yago go ba-Efeso, Paulo o hlalositše ntwa yeo e lwewago ke Mokriste yo mongwe le yo mongwe. O ngwadile gore: “Thlabanô ya rena xa se ya xo lwa le madi le nama; re lwa le mebušô le ba matla le balaola-mafase ba lefsifsi; re lwa le meôya ya bobe e lexo sebakeng sa xodimo.”—Ba-Efeso 6:12.
3. Go ya ka Ba-Efeso 6:10, re nyaka’ng e le gore re kgonthišetše katlego ya rena?
3 ‘Meoya yeo ya bobe’ ke Sathane le batemona, bao ba kganyogago go fediša tswalano ya rena le Jehofa Modimo. Ka ge ba le matla go re feta, re ikhwetša re le boemong bjo bo swanago le bja Dafida, gomme re ka se atlege ge e ba re sa ithekge ka Modimo bakeng sa matla. Ge e le gabotse, Paulo o re kgothaletša gore re ‘tšwele pele re tielela Moreneng le thateng ya matla a gagwe.’ (Ba-Efeso 6:10) Ka morago ga go nea keletšo yeo, moapostola o hlalosa dithušo tša moya le dika tša Bokriste tšeo di re thušago gore re be bafenyi.—Ba-Efeso 6:11-17.
4. Ke dintlha dife tše dikgolo tšeo re tlago go di ahla-ahla sehlogong se?
4 Gabjale anke re hlahlobeng seo Mangwalo a se bolelago ka dilo tšeo lenaba la rena le lego matla go tšona gotee le ka maano a lona. Ke moka re tla ahla-ahla mokgwa wa go iphemela wo re swanetšego go o diriša e le gore re itšhireletše. Ge e ba re latela ditaelo tša Jehofa, re ka kgonthišega gore manaba a rena a ka se re fenye.
Go lwa le Meoya e Matla ya Bobe
5. Tsela yeo ntwa e swantšhitšwego ka gona lelemeng la mathomo leo Ba-Efeso 6:12 e ngwadilwego ka lona e re thuša bjang go lemoga maano a Sathane?
5 Paulo o hlalosa gore re “lwa le meôya ya bobe e lexo sebakeng sa xodimo.” Ke therešo gore moya o mogolo wa bobe ke Sathane Diabolo, e lego “kxoši ya meôya e mebe.” (Mateo 12:24-26) Lelemeng la mathomo la Beibele, ntwa ya rena e swantšhwa le papadi ya go penyana, goba ntwa ya matsogo. Dipapading tša go penyana tša kua Gerika ya bogologolo, motšea-karolo yo mongwe le yo mongwe o be a leka go fokodiša mophenkgišani wa gagwe e le gore a mo wišetše fase. Ka mo go swanago, Diabolo o nyaka gore re lahlegelwe ke teka-tekano ya rena ya moya. A ka re dira bjang gore re dire se?
6. Bontšha go tšwa Mangwalong kamoo Diabolo a ka dirišago maano a sa swanego e le gore a fokodiše tumelo ya rena.
6 Diabolo a ka itira eka ke noga, tau e bopago goba gaešita le morongwa wa seetša. (2 Ba-Korinthe 11:3, 14; 1 Petro 5:8) A ka diriša batho gore ba re tlaiše goba ba re nyamiše. (Kutollo 2:10) Ka ge Sathane a buša lefase ka moka, a ka diriša dikganyogo le dikgoketšo tša lona ka mo go feletšego e le gore a re tanye. (2 Timotheo 2:26; 1 Johane 2:16; 5:19) A ka diriša tsela ya lefase goba ya bohlanogi ya go nagana e le gore a re timetše, go fo etša ge a ile a radia Efa.—1 Timotheo 2:14.
7. Ke mafokodi afe ao batemona ba nago le ona, gomme ke mehola efe yeo re e thabelago?
7 Gaešita le ge dibetša le matla a Sathane le batemona ba gagwe di ka bonagala di fetša matla, di na le mafokodi a tšona. Meoya ye ya bobe e ka se re gapeletše go dira dilo tše mpe tšeo di nyamišago Tatago rena wa legodimong. Re dibopiwa tšeo di nago le tokologo ya boikgethelo, e bile re laola dikgopolo gotee le ditiro tša rena. Go oketša moo, ga re lwe re le noši. Seo e bego e le sa therešo mehleng ya Elisa ke sa therešo le mehleng ya rena: “Ba ba naxô le rena ba feta ba ba naxo le bala.” (2 Dikxoši 6:16) Beibele e re kgonthišetša gore ge e ba re ikokobeletša Modimo gomme re ganetša Diabolo, o tla re tšhaba.—Jakobo 4:7.
Go Lemoga Makatika a Sathane
8, 9. Ke diteko dife tšeo Sathane a ilego a di tlišetša Jobo e le gore a robe potego ya gagwe, gomme ke dikotsi dife tša moya tšeo re lebeletšanago le tšona lehono?
8 Re tseba makatika a Sathane ka gobane Mangwalo a utolla maano a gagwe a motheo. (2 Ba-Korinthe 2:11) Malebana le monna wa go loka e lego Jobo, Diabolo o ile a diriša mathata a magolo a tša boiphedišo, lehu la baratiwa, kganetšo e tšwago go ba lapa, go tlaišega mmeleng le go ntšha diphošo mo go se nago bohlatse ga bagwera ba maaka. Jobo o ile a gateletšega a ba a nagana gore Modimo o mo lahlile. (Jobo 10:1, 2) Gaešita le ge lehono Sathane a ka se re tlišetše mathata a ka go lebanya, mathata a bjalo a tloga a kgoma Bakriste ba bantši, gomme Diabolo a ka a dirišetša go ikhola.
9 Dikotsi tša moya di oketšegile mehleng ye ya bofelo. Re phela lefaseng leo go phegelela dilo tše di bonagalago go tlago pele ga dipakane tša moya. Mokero wa ditaba ka mehla o bontšha dikopano tša botona le botshadi tšeo di gobogilego e le mothopo wa lethabo go e na le go di bontšha e le mothopo wa manyami. Le gona ba bantši ba fetogile batho “ba xo iphsina ba lahlile Modimo.” (2 Timotheo 3:1-5) Tsela ye ya go nagana e ka bea teka-tekano ya rena ya moya kotsing ge e ba re sa ‘lwele tumelo ka go tia.’—Juda 3.
10-12. (a) Ke temošo efe yeo Jesu a e neilego seswantšhong sa gagwe sa mobjadi? (b) Bontšha kamoo mediro ya moya e ka fokodišwago ka gona.
10 Le lengwe la maano a Sathane ao a atlegago kudu ke la go re dira gore re nwelele lefaseng le gotee le go phegeleleng ga lona dilo tše di bonagalago. Seswantšhong sa gagwe sa mobjadi, Jesu o lemošitše gore maemong a mangwe ‘lentšu la Mmušo le tla bipša ke dipelaelo tša bophelo bjono le bofora bja lehumo.’ (Mateo 13:18, 22) Lentšu la Segerika leo mo le fetoletšwego e le ‘bipša’ le bolela “go kgama ka mo go feletšego.”
11 Dithokgweng tša molatšatšing, motho a ka hwetša sehlare seo se bitšwago strangler fig. Sehlare se se gola ka go nanya ge se dutše se tatetša kutu ya sehlare seo se melago go sona. Ganyenyane-ganyenyane, se tatetša sehlare seo se melago go sona ka medu yeo e tšwelago pele e tia. Medu e mentši-ntši ya strangler fig mafelelong e monya karolo e kgolo ya dijo tšeo di lego mobung wa ka tlase ga sehlare seo se metšego go sona, mola moriti wa strangler fig o šira sehlare seo se metšego go sona gore se se hwetše seetša. Mafelelong sehlare seo se metšego go sona se a hwa.
12 Ka mo go swanago, dipelaelo tša tshepedišo ye le go tsoma mahumo le bophelo bja manobonobo di ka fetša nako ya rena e ntši gotee le matla a rena ganyenyane-ganyenyane. Ge tlhokomelo ya rena e fapogetše dilong tša lefase, re ka hlokomologa gabonolo thuto ya motho ka noši ya Beibele gomme ra go dira tlwaelo go se be gona dibokeng tša Bokriste, ka gona ra aroganywa le dijo tša moya. Dipakane tša go nyaka go hwetša dilo tše di bonagalago gabjale di tšeela mediro ya moya sebaka, gomme mafelelong re ba bahlaselwa ba bonolo ba Sathane.
Re Swanetše go Ema re Tiile
13, 14. Ke mogato ofe wo re swanetšego go o gata ge re hlaselwa ke Sathane?
13 Paulo o ile a kgothaletša badumedi-gotee le yena gore ba ‘eme ba tiile gore ba kgone go fenya dipogo tša Diabolo.’ (Ba-Efeso 6:11) Ke therešo gore re ka se fediše Diabolo le batemona ba gagwe. Modimo o abetše Jesu Kriste modiro woo. (Kutollo 20:1, 2) Lega go le bjalo, re swanetše go ‘ema re tiile’ go ba go fihla ge Sathane a fedišitšwe e le gore re se ke ra fenywa ke ditlhaselo tša gagwe.
14 Moapostola Petro le yena o ile a gatelela go nyakega ga go ema re tiile kgahlanong le Sathane. Petro o ngwadile gore: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša. Lwang le yêna Lè tiile tumelong; Le fêlê Lè tseba xore ké tšôna ditlaišêxô tše di wêlaxo le bana beno ba ba lexo mo lefaseng.” (1 Petro 5:8, 9) Ge e le gabotse, thekgo ya bana babo rena ba moya gotee le dikgaetšedi ke ya bohlokwa go emeng ga rena re tiile ge Diabolo a hlasela go etša tau e bopago.
15, 16. Nea mohlala wa Mangwalo wo o bontšhago kamoo thekgo ya badumedi-gotee le rena e ka re thušago ka gona gore re eme re tiile.
15 Ge tau e lego kgaufsi e bopa melaleng ya Afrika, kgama e ka arabela ka go tšhaba ka lebelo kudu go ba go fihla ge e se sa le kotsing. Lega go le bjalo, ditlou di nea mohlala wa thekgo e feletšego. Puku ya Elephants—Gentle Giants of Africa and Asia e hlalosa gore: “Mokgwa wa go iphemela wo mohlape o tlwaelegilego wa ditlou gantši o o dirišago ke go ema di dirile ntikodiko, tše di godilego di lebeletšane le kotsi gomme tše dinyenyane di šireletšegile ka gare ga ntikodiko.” Ge di lebeletšane le ponagatšo e bjalo ya matla le thekgo, ke ka sewelo ditau di hlaselago gaešita le ditlou tše dinyenyane.
16 Ge re tšhošetšwa ke Sathane le batemona ba gagwe, le rena ka mo go swanago re swanetše go ipopa ngatana e tee, re bapelane ka magetla le bana babo rena bao ba tiilego tumelong. Paulo o ile a amogela gore Bakriste-gotee le yena ba itšego ba ile ba ipontšha e le “thušo e matlafatšago” go yena nakong ya ge a golegilwe kua Roma. (Ba-Kolose 4:10, 11, NW) Lentšu la Segerika leo le fetoletšwego e le “thušo e matlafatšago” le tšwelela gatee feela ka Mangwalong a Bakriste a Segerika. Go ya ka Expository Dictionary of New Testament Words ya Vine, “mohuta o bolelwago wa lentšu le o šupa go dihlare tšeo di okobatšago bohloko.” Go etša sehlare seo se okobatšago bohloko, thekgo ya barapedi ba Jehofa ba godilego ka tsebo e ka okobatša bohloko bjo bo bakilwego ke go tlaišega maikwelong goba mmeleng.
17. Re ka thušwa ke’ng gore re botegele Modimo?
17 Kgothatšo e tšwago go Bakriste-gotee le rena lehono e ka matlafatša boikemišetšo bja rena bja go nyaka go hlankela Modimo ka potego. Bagolo ba Bakriste ka mo go kgethegilego ba fišegela go nea thušo ya moya. (Jakobo 5:13-15) Dithušo tšeo di lebišago potegong di akaretša thuto ya ka mehla ya Beibele le go ba gona dibokeng tša Bokriste, dikopanong tše dikgolo le tše dinyenyane. Tswalano ya rena ya kgaufsi le Modimo e tla re thuša gore re dule re mmotegela. Ge e le gabotse, re ka ba re e-ja, re e-nwa goba re dira selo le ge e le sefe se sengwe, re swanetše go nyaka go dira dilo tšohle bakeng sa gore go retwe Modimo. (1 Ba-Korinthe 10:31) Ge e le gabotse, go ithekga ka Jehofa ka thapelo ke gabohlokwa e le gore re tšwele pele tseleng yeo e mo thabišago.—Psalme 37:5.
18. Ke ka baka la’ng re sa swanela go lahlela toulo gaešita le ge maemo a nyamišago a re fetša matla?
18 Ka dinako tše dingwe ditlhaselo tša Sathane di tšwelela ge re ikwa re fokola moyeng. Tau e tabogela godimo ga phoofolo yeo e feditšwego matla. Mathata a lapa, mathata a tša boiphedišo goba bolwetši a ka re fetša matla a moya. Eupša anke re se ke ra lesetša go dira seo se thabišago Modimo, ka gobane Paulo o itše: “Xe ke fôkôla ké mo ke naxo le matla.” (2 Ba-Korinthe 12:10; Ba-Galatia 6:9; 2 Ba-Thesalonika 3:13) O be a bolela’ng? O be a bolela gore matla a Modimo a ka tšeela mafokodi a rena legato, ge feela re retologela go Jehofa bakeng sa matla. Go fenywa ga Goliata ke Dafida go bontšha gore Modimo a ka matlafatša batho ba gagwe e bile o dira bjalo. Dihlatse tša Jehofa lehono di ka hlatsela gore dinakong tša mathata a magolo, di ile tša ipona di matlafatšwa ke Modimo.—Daniele 10:19.
19. Nea mohlala e le go bontšha kamoo Jehofa a ka matlafatšago bahlanka ba gagwe.
19 Mabapi le thekgo yeo Modimo a ilego a ba nea yona, banyalani ba bangwe ba ngwadile gore: “Go theoša le nywaga, re be re hlankela Jehofa re le monna le mosadi gomme re thabetše ditšhegofatšo tše dintši le go tseba batho ba bantši ba kgahlišago. Le gona re ile ra tlwaetšwa le go matlafatšwa ke Jehofa e le gore re kgotlelele mathata ka katlego. Go etša Jobo, ga se ka dinako tšohle re bego re kwešiša lebaka leo ka lona dilo di bego di direga ka tsela yeo di bego di direga ka gona, eupša re be re tseba gore Jehofa o be a ikemišeditše go re thuša ka dinako tšohle.”
20. Ke bohlatse bofe bja Mangwalo bjo bo bontšhago gore Jehofa o thekga batho ba gagwe ka dinako tšohle?
20 Letsogo la Jehofa ga se le lekopana kudu go thušeng le go matlafatšeng batho ba gagwe ba botegago. (Jesaya 59:1) Mopsalme Dafida o opetše ka gore: “Morêna ó thêkxa bohle ba ba waxo, ó tsoša bohle ba xo bôkalêla.” (Psalme 145:14) Ke therešo gore Tatago rena wa legodimong “ó re rwala ka mehla” le gore o re nea dilo tšeo re tlogago re di nyaka.—Psalme 68:19.
Re Nyaka “Dithlamô Tšohle tša Modimo”
21. Paulo o ile a gatelela bjang go nyakega ga ditlhamo tša moya?
21 Re ahla-ahlile e mengwe ya mekgwa yeo Sathane a e dirišago gomme re bone go nyakega ga gore re eme re tiile go sa šetšwe ditlhaselo tša gagwe. Gabjale re swanetše go ahla-ahla thušo e nngwe ya bohlokwa yeo e ka re thušago gore re šireletše tumelo ya rena ka katlego. Moapostola Paulo ka lengwalong la gagwe leo le yago go ba-Efeso o boletše gabedi ka selo sa bohlokwa seo se tlago go re thuša gore re eme re tiile kgahlanong le maano a Sathane le gore re atlege ntweng ya rena kgahlanong le meoya ya bobe. Paulo o ngwadile gore: “Aparang dithlamô tšohle tša Modimo, xore Le kxônê xo fenya dipoxo tša Diabolo. . . . Ithlameng ka marumô ohle a Modimo, xore ka mohla-mobe Le kxônê xo phema, Le šalê Lè eme Lè fentše tšohle.”—Ba-Efeso 6:11, 13.
22, 23. (a) Ditlhamo tša rena tša moya di akaretša’ng? (b) Re tla ahla-ahla’ng sehlogong se se latelago?
22 Ee, re swanetše go apara “dithlamô tšohle tša Modimo.” (Mongwalo o sekamego ke wa rena.) Ge Paulo a be a ngwala lengwalo la gagwe leo le yago go ba-Efeso, o be a hlapeditšwe ke mohlabani wa Roma, yoo ka dinako tše dingwe a ka bago a be a apara ditlhamo tše di feletšego. Lega ga go le bjalo, e be e le ka pudulelo ya Modimo moo moapostola a ilego a tutueletšega go ahla-ahla ditlhamo tša moya tšeo di tlogago di nyakwa ke mohlanka yo mongwe le yo mongwe wa Jehofa.
23 Ditlhamo tše tšeo re di neilwego ke Modimo di akaretša dika tšeo Mokriste a swanetšego go ba le tšona gotee le ditokišetšo tša moya tšeo di dirilwego ke Jehofa. Sehlogong se se latelago, re tla ahla-ahla karolo e nngwe le e nngwe ya ditlhamo tša moya. Se se tla re thuša go tseba gore re swanetše go itlhamela ntwa ya rena ya moya go fihla bokgoleng bofe. Ka nako e swanago, re tla bona kamoo mohlala o kgahlišago wa Jesu Kriste o re thušago gore re atlege go ganetšeng Sathane Diabolo.
[Dipotšišo tša Thuto]
[Caption on page 11]
Bakriste ba ‘lwa ntwa kgahlanong le meoya e matla ya bobe’
[Caption on page 12]
Dipelaelo tša tshepedišo ye di ka bipa lentšu la Mmušo
[Caption on page 13]
Bakriste-gotee le rena ba ka ba “thušo e matlafatšago”
[Caption on page 14]
Na o rapelela matla go Modimo?
O tla Araba Bjang?
• Ke ntwa efe yeo e lwewago ke Bakriste ka moka?
• Hlalosa a mangwe a maano a Sathane.
• Re ka matlafatšwa bjang ke thekgo ya badumedi-gotee le rena?
• Re swanetše go ithekga ka matla a mang, gomme ka baka la’ng?