“Ba Bolêta e tlo ba Bôná Beng ba Naxa”—Bjang?

“KA NTLE le pelaelo o tlwaelane le mantšu a Jesu a ruthetšago pelo ao a rego, ‘ba bolêta e tlo ba bôná beng ba naxa.’ Eupša ka baka la dilo tšohle tšeo batho ba diranago tšona le tšeo ba di dirago lefase, o nagana gore go tla šala’ng seo e tlago go ba bohwa bja baloki?”—Mateo 5:5; Psalme 37:11.

Myriam, e lego yo mongwe wa Dihlatse tša Jehofa o ile a diriša potšišo ye bakeng sa go thoma poledišano ya Beibele. Monna yo a bego a boledišana le yena o ile a araba ka gore ge e ba Jesu a holofeditše se, gona lefase le swanelwa ke go bitšwa bohwa e sego marope ao a sa swanelwego ke go ka dula batho.

Yeo ka ntle le pelaelo e be e le karabo e nago le kholofelo. Eupša na re na le lebaka la go ba le pono e bjalo e nepagetšego? Re tloga re e-na le lona, ka gobane Beibele e re nea mabaka a kwagalago a go dumela gore kholofetšo ye e tla phethagala. Ge e le gabotse, go phethagala ga kholofetšo yeo go tswalana kgaufsi le morero wa Modimo ka batho le ka lefase. Le gona re kgonthišetšwa gore seo Modimo a se rerago, o tla se phethagatša. (Jesaya 55:11) Ka gona, morero wa Modimo wa mathomong ka batho e be e le ofe, gomme o tla phethagala bjang?

Morero wa Modimo wa ka mo go sa Felego ka Lefase

Jehofa Modimo o bopile lefase a e-na le morero o kgethegilego ka lona. “Morêna Mo-hlôla-maxodimo, Yêna Modimo-dimo Mmopi wa lefase, a le dira a le thêkxa, a se le bope ya ba la lefêla, a le dirêla xo dulwa ke batho, ké Yêna a rexo: Morêna ké Nna, xa xo sa n’e yo mongwê.” (Jesaya 45:18) Ka go rialo, lefase le ile la bopša ka mo go kgethegilego gore le dulwe ke batho. Go oketša moo, ke morero wa Modimo gore lefase e be legae la ka mo go sa felego la batho. “Lefase, methêô ya lôna O e theile wa xo se šišinyêxe neng le neng.”—Psalme 104:5; 119:90.

Le gona morero wa Modimo ka lefase o bonagaditšwe taelong yeo a ilego a e nea batho ba babedi ba pele. Jehofa o boditše Adama le Efa gore: “Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” (Genesi 1:28) Lefase le leo Modimo a ilego a le nea Adama le Efa, e be e swanetše go ba legae la bona la sa ruri gotee le la bana ba bona. Nywaga-kgolo e mentši ka morago mopsalme o ile a bolela gore: “Maxodimo ké maxodimo a Morêna; ’me lefase ó le neetše bana ba batho.”—Psalme 115:16.

E le gore ba bone go phethagala ga kholofetšo  yeo e kgahlišago, Adama le Efa gotee le bana ba bona, yo mongwe le yo mongwe wa bona o be a swanetše go amogela Jehofa Modimo, Mmopi le Monei-Bophelo, e le Mmuši wa bona gomme ba ikemišetše go mo kwa. Jehofa ga se a tlogelela gore go be le pelaelo le ge e le efe tabeng ye ge a be a nea motho taelo ye ya gore: “Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.” (Genesi 2:16, 17) E le gore Adama le Efa ba tšwele pele ba phela tšhemong ya Edene, ba be ba swanetše go kwa taelo yeo e bonolo yeo gape e boletšwego ka mo go kwagalago. Go dira bjalo e be e tla ba go bontšha tebogo ya bona bakeng sa dilo ka moka tšeo Tate wa legodimong a ba diretšego tšona.

Ge Adama le Efa ka go rata ba be ba sa kwe Modimo ka go tshela taelo yeo ba bego ba e neilwe, ge e le gabotse ba ile ba furalela yo a ba neilego dilo ka moka tšeo ba bego ba e-na le tšona. (Genesi 3:6) Ka go dira bjalo, ba ile ba lahlegelwa ke legae la bona le lebotse la Paradeise, e sego feela bakeng sa bona ka noši eupša gape le bakeng sa bana ba bona. (Ba-Roma 5:12) Na go se kwe ga batho ba babedi ba pele go ile gwa šitiša morero wa Modimo go bopeng lefase?

Modimo yo a Sego a Fetoga

Modimo o ile a tsebiša ka moporofeta wa gagwe Maleaki gore: “Ke nna Jehofa, ga k’ešo ka fetoga.” (Maleaki 3:6, PK) Ge se bolela ka temana ye, seithuti sa Beibele sa mo-Fora e lego L. Fillion se boletše gore mantšu a a tswalana kgaufsi le go phethagatšwa ga dikholofetšo tša Modimo. Fillion o ngwadile gore: “Jehofa a ka be a ile a fediša batho ba gagwe ba marabele, eupša ka ge a sa fetoge dikholofetšong tša gagwe, go sa šetšwe selo le ge e le sefe, o tla phethagatša dikholofetšo tšeo a di holofeditšego nakong e fetilego.” Dikholofetšo tša Modimo di ka se lebalwe, eupša di tla phethagatšwa ka nako ya gagwe e beilwego, go sa šetšwe gore o holofeditše motho o tee, setšhaba goba batho ka moka. “Kxwêranô ya xaxwe xa a e lebale neng le neng, Lentšu lela a xo le laêla meloko e dikete.”—Psalme 105:8.

Lega go le bjalo, re ka kgonthišega bjang gore Jehofa ga se a fetoša morero wa gagwe wa mathomong mabapi le lefase? Re ka kgonthišega ka se ka gobane ka Lentšung la Modimo leo le buduletšwego, e lego Beibele, re hwetša go bolelwa ka morero wa Modimo wa go nea batho bao ba kwago lefase. (Psalme 25:13; 37:9, 22, 29, 34) Go oketša moo, Mangwalo a hlalosa bao ba šegofaditšwego ke Jehofa e le bao  ba dulago tšhireletšegong, yo mongwe le yo mongwe a dutše “meriting ya morara w’axwe, le mo moriting wa moxó wa xaxwe, xò se e a ba thšošaxo.” (Mika 4:4; Hesekiele 34:28) Bao ba kgethilwego ke Jehofa ‘ka kgonthe ba tla aga nywako gomme ba dula mo go yona; ba tlo lema dirapa tša merara gomme ba ja dienywa tša tšona.’ E bile ba tla thabela go dula ka khutšo le dibata tša naga.—Jesaya 11:6-9; 65:21, 25.

Beibele e nea ponelo-pele ya kholofetšo ya Modimo ka tsela e nngwe. Nakong ya pušo ya Kgoši Salomo, setšhaba sa Isiraele se ile sa thabela nako ya khutšo le ya katlego. Ka tlase ga pušo ya gagwe, “ba-Juda le Ba-Isiraele ba be ba dutše bà iketlile moriting wa merara ya bôná le wa mexó ya bôná, xo tloxa ka Dani xo fihla ka Bereseba mehla yohle ya xo phela xa Salomo.” (1 Dikxoši 4:25) Beibele e bolela gore Jesu ke “e moxolo xo Salomo,” gomme ge a bolela ka pušo ya gagwe, mopsalme o ile a bolela ka tsela ya boporofeta gore: “Mehleng ya xaxwe xo taxê moloki, moláô o xolê ò e-ya le dikxwedi di sa kxaotše xo balama.” Ka nako yeo “xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Luka 11:31; Psalme 72:7, 16.

Ka ge a phethagatša seo a se boletšego, Jehofa Modimo o tla kgonthišetša gore bohwa bja gagwe bjo bo holofeditšwego ga bo hwetšagale feela eupša bo tsošološwa ka letago la bjona ka moka. Go Kutollo 21:4, Lentšu la Modimo le re botša gore lefaseng le lefsa leo le holofeditšwego, Modimo “ó tlo phomola mexôkxô ka moka mahlong a [batho]; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” Seo se holofeditšwego e tla ba Paradeise ya kgonthe.—Luka 23:43.

Kamoo o ka Hwetšago Bohwa bjo bo Holofeditšwego

Go fetošwa ga lefase gore e be paradeise go tla direga ka tlase ga mmušo woo o bušago o le legodimong, Mmušo woo Kgoši ya wona e lego Jesu Kriste. (Mateo 6:9, 10) Sa pele, Mmušo woo o tla “senya basenya-lefase.” (Kutollo 11:18; Daniele 2:44) Ke moka, e le “Kxoši ya kaxišô,” Jesu Kriste o tla phethagatša mantšu a a boporofeta ao a rego: “Mmušô wó ké wa kênêlô, wa khutšô ye e sa felexo.” (Jesaya 9:5, 6) Ka tlase ga Mmušo woo, batho ba dimilione go akaretša le bao ba tlago go bušetšwa bophelong ka tsogo, ba tla ba le sebaka sa go tšea lefase ya ba bohwa bja bona.—Johane 5:28, 29; Ditiro 24:15.

 Ke bomang bao ba tlago go thabela bohwa bjoo bjo bo kgahlišago? Ela hloko mantšu a Jesu a rego: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” (Mateo 5:5) Go ba yo boleta go bolela’ng? Ka kakaretšo dipukuntšu di hlalosa “boleta” goba “bonolo,” e le botho, go leka-lekana, go ikokobetša, go homola gaešita le go ba le dihlong. Lega go le bjalo, lentšu la Segerika la mathomong leo le dirišitšwego mo le na le tlhaloso e tseneletšego kudu. New Testament Wordbook yeo e ngwadilwego ke William Barclay e re: “Ka kua ga seka sa bonolo go na le matla a tšhipi.” Se bontšha tshekamelo ya monagano yeo e dirago gore motho a kgone go kgotlelela kgobalo a se a befelwa goba go nagana ka go itefeletša, tše ka moka e le ka baka la go ba le tswalano e botse le Modimo, gomme tswalano yeo e ba mothopo wa matla go yena.—Jesaya 12:2; Ba-Filipi 4:13.

Motho yo boleta o amogela ditekanyetšo tša Modimo ka boikokobetšo dibopegong ka moka tša bophelo bja gagwe; ga a gapeletše go dira dilo go ya ka pono ya gagwe goba go ya ka dikgopolo tša batho ba bangwe. Le gona ke yo a rutegago gabonolo, yo a ikemišeditšego go rutwa ke Jehofa. Mopsalme Dafida o ngwadile gore: “[Jehofa] ó hlahla babôtlana xo lokeng; bôná babôtlana ó ba ruta tsela y’axwe.”—Psalme 25:9; Diema 3:5, 6.

Na o tla ba gare ga ba “bolêta” bao ba tlago go tšea lefase ya ba bohwa bja bona? Ka go tseba Jehofa le thato ya gagwe ka go ithuta Lentšu la gagwe ka phišego le ka go diriša seo o ithutago sona, le wena o ka lebelela pele gore o hwetše bohwa bja lefase la paradeise gomme o dule go lona ka mo go sa felego.—Johane 17:3.

[Seswantšho go letlakala 5]

Morero wa Modimo ka lefase o bonagala taelong yeo a ilego a e nea Adama le Efa

[Seswantšho go letlakala 6, 7]

Khutšo le polokego tša pušong ya Salomo di ile tša nea ponelo-pele ya bohwa bjo bo holofeditšwego

[Methopo]

Sheep and background hill: Pictorial Archive (Near Eastern History) Est.; Arabian oryx: Hai-Bar, Yotvata, Israel; farmer plowing: Garo Nalbandian

[Seswantšho go letlakala 7]

Lefase le lefsa la go loka le ka pele—na o tla ba fao?