Bohwa bjo o ka bo Holofelago

“GE E ba o amogela tsebišo ka lengwalong leo le tšwago go motho yo a itšego le go botša gore go na le bohwa bjo go se nago motho yo a bo tšerego bjo bo go letetšego, o hlokomele. O ka ba mohlaselwa wa moradia yo bohlale.”

Yeo ke temošo ye United States Postal Inspection Service e ilego ya e tsenya mokerong wa yona wa Web. Ka baka la’ng? Ka gobane batho ba dikete ba ile ba amogela tsebišo ka lengwalong leo le bego le ba botša gore, ‘Yo mongwe wa ba leloko la geno o hwile gomme o go tlogeletše bohwa.’ Ka baka leo, ba bantši ba ile ba romela R210 goba go feta fao e le gore ba hwetše ‘pego ya mabapi le dilo tšeo e lego bohwa,’ yeo e bego e tla hlalosa gore bohwa bjoo bo kae le gore bo ka hwetšwa bjang. Ba ile ba nyama kudu. Ka moka bao ba arabetšego ba ile ba hwetša pego e swanago—le gona go be go tloga go se na kgonagalo ya gore motho le ge e le mang a hwetše bohwa bja selo le ge e le sefe.

Maano a bjalo a ipiletša kganyogong ya batho ya tlhago ya go nyaka go amogela bohwa. Lega go le bjalo, Beibele e bolela ka mo go nepagetšego ka bao ba neago bohwa ge e re: “Bohwa bya moloki ké bya bana ba bana.” (Diema 13:22) Ge e le gabotse, ga go na yo mongwe ka ntle le Jesu Kriste ka noši yoo a boletšego mantšu a a tumilego le ao a ratwago kudu Thutong ya gagwe ya Thabeng ao a rego: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.”—Mateo 5:5.

Mantšu a Jesu a re gopotša seo Kgoši Dafida wa Isiraeleng ya bogologolo a ilego a budulelwa go se ngwala nywaga-kgolo pejana: “Baloki ba tlo tšea naga ya ba kabelo ya bona, ba tlo e thabela khutšong e kgolo.”—Psalme 37:11, PK.

“Go tšea lefase ya ba kabelo”—a tebelelo e kgahlišago gakaakang! Eupša na re ka kgodišega gore tebelelo ye ga se feela le lengwe la maano a boradia ao a hlametšwego go amoga batho selo se itšego? Ee, re ka kgodišega ka seo. Ka ge lefase e le karolo ya tlholo e kgahlišago ya Jehofa, yena bjalo ka Mohlodi le Mong wa lona o na le tshwanelo ya semolao ya go le nea motho le ge e le ofe yoo a mo kgethago gore e be bohwa bja gagwe. A diriša Kgoši Dafida, Jehofa o ile a bolela kholofetšo ye ya boporofeta go Morwa wa Gagwe yo a rategago, e lego Jesu Kriste ka gore: “Nkxopêlê, ke Xo fê dithšaba, e be lefa l’axo, le maxomô a lefase e bê a xaxo.” (Psalme 2:8) Ka lebaka leo, moapostola Paulo o ile a hlalosa Jesu e le “yo [Modimo] a mmeilexo mo-ja-bohwa wa tšohle.” (Ba-Hebere 1:2) Ka go rialo, re ka ba le kgodišego e feletšego ya gore ge Jesu a be a re baloki “ba tlo tšea lefase ya ba kabêlô ya bôná,” o be a bolela bjalo e le ka kgonthe, gomme o na le matla a swanetšego a bolaodi a go phethagatša kholofetšo ya gagwe.—Mateo 28:18.

Ka go rialo, potšišo ya bohlokwa ke ya gore,  Kholofetšo yeo e tla phethagala bjang? Kae le kae moo re lebelelago gona lehono, go bonagala batho ba šoro le bao ba ikgogomošago ba atlega kudu gomme ba tšea seo ba se nyakago. Baloki ba tla šalelwa ke’ng seo e tlago go ba bohwa bja bona? Go oketša moo, lefase le tletše ka mathata a šoro gotee le tšhilafalo, le gona ditšweletšwa tša lona di dirišwa ka tsela ya go ikhola ke bao ba nago le megabaru le bao ba bonelago dilo kgaufsi. Na go tla ka gwa ba le lefase leo le swanelwago ke go amogelwa e le bohwa? Re go laletša gore o bale sehlogo se se latelago e le gore o hwetše dikarabo tša dipotšišo tše gotee le tše dingwe tše bohlokwa.

[Caption on page 3]

Na o tla amogela bohwa bja kgonthe?