Dipotšišo tše Tšwago go Babadi

Ge moapostola Johane a be a ngwala gore “leratô xe e le la botlalô le raka poifô,” o be a bolela’ng ge a re “leratô xe e le la botlalô,” gomme ka go rialo ke “poifô” efe yeo e rakwago?

Moapostola Johane o ngwadile gore: “Leratô xa le na poifô. Leratô xe e le la botlalô le raka poifô; xobane poifô e a hlokofatša; ’me e a boifaxo ó sa hlaêlwa ke leratô.”—1 Johane 4:18.

Taba e dikologilego e bontšha gore Johane o be a ahla-ahla taba ya go bolela ka bolokologi—ka mo go kgethegilego tswalano magareng ga lerato la go rata Modimo le go bolela le Yena ka bolokologi. Se se ka bonwa go tšwa go seo re se balago go temana 17 yeo e rego: “Mo xo rena leratô e bile la botlalô, xore mohla wa kahlolô re [bolele ka bolokologi, NW].” Tekanyo yeo ka yona Mokriste a ratago Modimo le go bona lerato la Modimo go yena e kgoma ka go lebanya go bolela ga gagwe ka bolokologi—goba go hlaelelwa ke seo—ge a batamela Modimo ka thapelo.

Polelwana e rego “leratô xe e le la botlalô” e na le seo e se bolelago. Bjalo ka ge le dirišwa ka Beibeleng, lentšu “botlalô” ga se ka mehla le bolelago go phethagala ka kgopolo e feletšego, e lego gore go fihla tekanyong e phagamego, eupša gantši ke ka kgopolo e lekanyeditšwego. Ka mohlala, Thutong ya gagwe ya Thabeng Jesu o itše: “Byalo bang ba-boló-ka-tlalô, byalo ka Tata-weno wa maxodimong e le Yo-boló-ka-tlalô.” Jesu o be a botša balatedi ba gagwe gore ge e ba ba be ba rata feela bao ba ba ratago, lerato la bona e tla ba leo le sa felelago, leo le hlaelago le leo le solegago. Ba swanetše go dira gore lerato la bona e be le le phethagetšego, goba gore e be la botlalo ka go rata gaešita le manaba a bona. Ka gona, ka mo go swanago ge Johane a be a ngwala gore “leratô xe e le la botlalô,” o be a bolela ka lerato la go rata Modimo leo e lego la pelo ka moka, leo le feletšego le leo le akaretšago dibopego ka moka tša bophelo bja motho.—Mateo 5:46-48; 19:20, 21.

Ge a batamela Modimo ka thapelo, Mokriste o lemoga gabotse gore o na le dibe le gore ga se a phethagala. Lega go le bjalo, ge e ba lerato la gagwe la go rata Modimo le go bona ga gagwe lerato la Modimo go yena e le tše di feletšego, ga a šitišwe ke poifo ya go ka solwa goba go se amogelwe. Go e na le moo, o thabela go bolela ka bolokologi ge a bolela seo se lego ka pelong ya gagwe le go kgopela tebalelo motheong wa sehlabelo sa topollo, seo Modimo a se neilego ka lerato ka Jesu Kriste. O ikwa a kgodišegile gore Modimo o kwa dikgopelo tša gagwe ka mo go nepagetšego.

Ke bjang motho a ka ‘dirwago yo botlalo leratong’ gomme ka go rialo ‘a raka’ poifo ya go solwa goba go se amogelwe? Moapostola Johane o itše: “Yo leratô la Modimo le tletšexo xo Yêna sa ruri, ké yo a yaxo ka Lentšu la xaxwe [Modimo].” (1 Johane 2:5) Ela hloko se: Ge e ba Modimo a re ratile ge re be re sa dutše re le badiradibe, na a ka se re rate le go feta ge e ba re itshola e le ka kgonthe gomme re ‘e-kwa lentšu la gagwe’ ka kelohloko? (Ba-Roma 5:8; 1 Johane 4:10) Ka kgonthe, ge feela re dula re botega, re ka ba le kgonthišego e swanago le yeo moapostola Paulo a bego a e-na le yona ge a be a bolela mabapi le Modimo gore: “Yêna, e a sa kaxo a tsebafa Morwa wa xaxwe wa ruri, a mo xafa ka ’baka la rena ka moka, a ka lesa bya’ng xo re nea tšohle ka Yêna”?—Ba-Roma 8:32.