Ga e fo ba Papadi

BANA ba rata go bapala. Eupša puku ya The Developing Child e hlalosa gore, “wo ga se modiro wa lefela goba wa go se re selo. Go bonagala e le motheo wo temogo e kgolo ya ngwana e agwago go wona.” Ka go bapala, bana ba ithuta go diriša dikwi tša bona, go kwešiša tikologo ya bona le go dirišana le ba bangwe.

Go tloga ge ba e na le nywaga e mene goba e mehlano, bana ba tla thoma go bapala dipapadi tša bona ba ekiša batho ba bagolo. Ka nako e nngwe Jesu o ile a bolela ka bana bao ba bapalago. Ba bangwe ba be ba nyaka go bapala tša manyalo, ba bangwe ba be ba nyaka go bapala tša poloko ya bahu, gomme go etša ge bana gantši ba dira, ba ile ba ngangišana seng sa bona ka ge ba bangwe ba be ba sa nyake go tšea karolo. (Mateo 11:16, 17) Mohuta wo wa papadi o ka thuša go dira gore dikarolo tše ba di bapalago di dulele ruri ka dikgopolong tša bana tšeo di sa dutšego di gola.

Bana ba o ba bonago diswantšhong tše di lego letlakaleng le, ba bapala dikarolo tša go ba morutiši wa Beibele le morutwana. Thuto ya bona ya Beibele ga se ya kgonthe, eupša kgopolo ya go boledišana le ba bangwe ka molaetša wa Beibele ba e kwešiša gabotse. Thuto ye ke ya bohlokwa, ka ge Jesu a ile a laela balatedi ba gagwe go dira barutiwa le go ruta batho go boloka tšohle tše a ba rutilego tšona.—Mateo 28:19, 20.

Batswadi bao bana ba bona ba ratago go bapala ka go ekišetša boemo bja go swara dithuto tša Beibele, go nea dipolelo goba go dira boboledi ka ntlo le ntlo ba swanetše go ikwa ba kgotsofetše ka mo go swanetšego. Ka tlhago, bana ba rata go ekiša seo ba se bonago bathong ba bagolo bao ba ba dikologilego. Dipapadi tša bana tša Beibele di bontšha gore ba godišitšwe ‘ka go rutwa le go eletšwa tša Morena.’—Ba-Efeso 6:4.

Jehofa o nyaka gore bana ba tšee karolo borapeding bja therešo. O ile a botša Moše gore a akaretše “le bana” ge go balwa Molao. (Doiteronomio 31:12) Ge bana ba banyenyane ba ikwa ba akaretšwa, mohlomongwe dipapadi tša bona di tla bontšha seo. Le gona, ngwana yo a bapalago e le modiredi wa Modimo, o gata mogato wa mathomo tseleng ya gore a fetoge yena.