Ke Mohuta Ofe wa Boemo bja Kgopolo bja go Leta Bjoo o Nago le Bjona?

LEFASENG la lehono, ke batho ba sego kae bao ba thabelago go leta motho yo mongwe goba selo se itšego. Go leta go leka go se fele pelo ga bona. Lega go le bjalo, Mangwalo a kgothaletša batho ba Modimo gore ba hlagolele “boemo bja kgopolo bja go leta.” Ka go fapana le batho bao ba mo dikologilego, moporofeta Mika o ile a bolela gore: “Ke tla bontšha boemo bja kgopolo bja go leta Modimo wa phološo ya-ka.”—Mika 7:7, NW; Dillo tša Jeremia 3:26.

Lega go le bjalo, go leta Jehofa go bolela’ng? Mokriste o swanetše go leta Modimo bjang? Na go na le ditsela tše di nepagetšego le tše di fošagetšego tša go dira se? Phihlelo ya moporofeta Jona wa lekgolong la bosenyane la nywaga B.C.E. e nea thuto tabeng ye.

Go Leta ka Tsela e Fošagetšego

Jehofa Modimo o ile a laela Jona gore a sepele gomme a yo dira boboledi go batho ba Ninife, e lego motse-mošate wa Mmušo wa Asiria. Ninife e be e tsebja e le “motse wa madi” ka baka la sehlogo le bošoro bja yona bjo bo lego molaleng, e lego therešo yeo e kgonthišeditšwego gabotse ke bo-radihistori le baepi ba marope. (Nahume 3:1) Jona mathomong o ile a leka go tšhabela kabelo ye, eupša Jehofa o ile a kgonthišetša gore moporofeta yo mafelelong o ya Ninife.—Jona 1:3–3:2.

“Jona a thôma xo thêtha le motse, a sepela letšatši le tee, a xoêlêla a re: Xo sa šetše matšatši a masome a manê; ké mo motse wa Ninife ò tl’o xo ribexetšwa!” (Jona 3:4) Maiteko a Jona a ile a tšweletša karabelo e makatšago: “Batho ba Ninife ba dumêla Modimo, ba xoêlêla xore xo ikônwê dijô, xo aparwê mankxeretla, ba baxolo le [ba] banyane.” (Jona 3:5) Ka baka leo, Jehofa, e lego Modimo yo a ‘sa ratego ge go na le ba ba lahlegago eupša a ratago ge bohle ba ka fihlelela tshokologo,’ o ile a se ke a fediša motse.—2 Petro 3:9.

Karabelo ya Jona e bile efe? Pego e re: “Jona, yêna tša mmefêla ka xoxolo, a kxarametšêxa.” (Jona 4:1) Ka baka la’ng? Jona a ka ba a ile a nagana gore go se phethagatšwe ga tsebišo ya gagwe ya mabapi le tshenyo ka letšatši le itšego go ile gwa mo nyatšiša bjalo ka moporofeta. Go bonagala a ile a tshwenyega kudu ka botumo bja gagwe go e na le go tshwenyega ka go gaugelwa le go phološwa ga ba bangwe.

Ke therešo gore Jona ga se a ka a ya bokgoleng bja go tlogela modiro wa go ba moporofeta. Lega go le bjalo, o ile a leta bakeng sa go “bôna se motse o tl’o xo dirwa sôna.” Ee, o ile a hlagolela mohuta wa boemo bja kgopolo bja go kgopišega bjo bo mo dirilego gore a tlogele go šoma gomme a lete gore a bone se se tlogo direga. Ge a lemoga gore dilo ga se tša direga ka tsela yeo a bego a e letetše, o ile a aga leobjana, a  dula ka tlase ga moriti gomme a leta a šulafaletšwe gore a bone se se tlogo direga. Lega go le bjalo, Jehofa ga se a ka a amogela boemo bja kgopolo bja Jona, ka gona ka lerato o ile a phošolla tsela e fošagetšego ya go nagana ya moporofeta wa gagwe.—Jona 4:5, 9-11.

Lebaka Leo ka Lona Jehofa a sa Felego Pelo

Gaešita le ge Ninife e ile ya itshola gomme ya se ke ya fedišwa, ka morago e ile ya boela ditseleng tša yona tše kgopo. Ka moporofeta Nahume le moporofeta Tsefanya, Jehofa o ile a bolela e sa le pele ka go fedišwa ga yona. Ge a bolela ka “motse wa madi,” Jehofa o ile a tsebatša gore o be a tla fediša Asiria gomme a dira gore Ninife e be marope. (Nahume 3:1; Tsefanya 2:13) Ka 632 B.C.E., Ninife e ile ya fedišwa, gomme ya se sa hlwa e e ba gona gape.

Ka tsela e swanago, lefase lehono le na le molato wa go tšholla madi ka boomo ka tekanyo e kgolo kudu go feta ya Ninife ya bogologolo. Ka lebaka le gotee le mabaka a mangwe, Jehofa o laetše gore tshepedišo ya gona bjale ya dilo e tla fedišwa ‘masetla-pelong a magolo’ a sa kago a bonwa le ka mohla.—Mateo 24:21, 22.

Lega go le bjalo, Jehofa ga se a tšwa a phethagatša phedišo e holofeditšwego e le gore batho ba dipelo tše di lokilego lehono, go etša basokologi ba kua Ninife, ba ka sokologa gomme ba se ke ba fedišwa. Moapostola Petro o bolela ka go se fele pelo ga Modimo ka mantšu a: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.”—2 Petro 3:9, 10, 13.

Go Leta ka Tsela e Nepagetšego

Petro o tšwela pele ka gore: “Byalo xe dilô tše e le tša xo tlo xašanywa, xo swanetše ruri-ruri xe Le le ba xo swara ka tsela e kxêthwa ya borapedi, Lè le ba xo letêla le xo phafoxêla xo tla xa letšatši leo la Modimo!” (2 Petro 3:11, 12) Ela hloko gore ge re dutše re letile letšatši la Jehofa, re swanetše go bontšha “tsela e kxêthwa ya borapedi”—go šoma, ke gona mo go swanetšego, e sego go se šome.

Ee, boemo bja kgopolo bjo bo nepagetšego bja go leta bo bontšha gore motho o na le kholofelo e feletšego ya gore letšatši la Jehofa le tla tla ka yona nako yeo Jehofa a e rerilego. Tumelo e bjalo e tšweletša ditiro tše kgethwa le tša boineelo go Modimo, gomme tiro e bohlokwa go ditiro tše ke ya go bolela ka ditaba tše dibotse tša Mmušo wa Modimo. Jesu o beile mohlala o mobotse boboleding, gomme o laetše balatedi ba gagwe ba ba tloditšwego gore: “Dulang Lè itlemile mathêka, le mabônê a lena à tuka. Le etšê batho ba ba letetšexo mong wa bôná, xore xe a boa monyanyeng a tla a ôpa-ôpa, ba akxofê ba mmulêlê. Ba lehlôxônôlô ké bahlanka bao, mong wa bôná xe a e-tla, a ba hwetša bà phakxame.”—Luka 12:35-37.

Makgoba a lekgolong la pele la nywaga a be a tla ‘itlema matheka’ ka go tsenya merumo ya diaparo tša ona ka tlase ga lepanta e le gore a kgone go dira modiro o thata. Ka gona, Mokriste o swanetše go ba mafolofolo, a fišege medirong e mebotse. O swanetše go lwantšha tshekamelo le ge e le efe ya ‘go tšwafa’ medirong ya moya, mohlomongwe ka go fapošetša  matla a gagwe go phegeleleng maipshino goba dilo tše di bonagalago. Go e na le moo, o swanetše gore a “tiêlêlê modirong wa Morêna” ge a dutše a letile letšatši le legolo le le le boifišago la Jehofa.—Ba-Roma 12:11; 1 Ba-Korinthe 15:58.

Go Swarega Modirong ge o Dutše o Letile

Dihlatse tša Jehofa di be di swaregile modirong ge di dutše di letile letšatši la Jehofa. Ka mohlala, ngwageng wa tirelo wa 2003 di feditše palo-moka ya diiri tše 3 383 000 letšatši le letšatši di bolela ka lentšu la Jehofa. Akanya, motho o tla swanelwa ke go dira boboledi ka nywaga e 386 a sa kgaotše e le gore a phethe seo se dirilwego ka letšatši le tee!

Lega go le bjalo, re swanetše go ipotšiša gore, ‘Ke mohuta ofe wa boemo bja kgopolo bja go leta bjo ke nago le bjona?’ Jesu o neile seswantšho se se hlalosago go šoma ka thata moo go letetšwego go Bakriste ba botegago ba tloditšwego. O boletše ka bahlanka ba bararo gore: “[Morena] a nea e mongwê dikete tše thlano; e mongwê a mo nea tše pedi; e mongwê a mo nea se tee; e mongwê le e mongwê a ba lekanyetša matla a bôná; a tseb’o wêla tsela. Yola wa xo fiwa dikete tše thlano, a sepela a šaba ka tšôna, a rua dikete tše dingwê tše thlano. Le yola wa dikete tše pedi a rua tše dingwê tše pedi. Xe e le yola wa xo fiwa sekete se tee, a ya a êpa molete, a fíhla thšêlêtê ya mong wa xaxwe. Xe xo fetile lebaka le letelele morêna wa bahlanka bao a xôrôxa, ’me a xopola thšêlêtê ya xaxwe le bôná.”—Mateo 25:15-19.

Bahlanka ba bararo ka moka ba be ba letile go boa ga morena wa bona. Ba babedi bao ba ilego ba swarega modirong ge ba dutše ba letile morena wa bona, ge a fihla o ile a re go bona: “Axee, mohlanka o botse e a bôtêxaxo.” Lega go le bjalo, yo a ilego a leta a sa dire selo o ile a swarwa ka tsela e fapanego. Morena o itše: “Mohlanka eo e sexo wa selô mo kxoromeletšeng lefsifsing la kua ntlê-ntlê.”—Mateo 25:20-30.

Gaešita le ge seswantšho se se šoma go Bakriste ba tloditšwego, go na le thuto yeo ka moka re ka ithutago yona go sa šetšwe kholofelo ya rena. Morena, Jesu Kriste, o letetše gore yo mongwe le yo mongwe wa rena a šome ka mafolofolo tirelong ya gagwe ge a dutše a letile go tla ga letšatši la Jehofa le legolo. O tšeela godimo mošomo wa yo mongwe le yo mongwe ‘go ya ka matla a gagwe’ le maemo a gagwe. E tla ba mo go thabišago gakaakang go kwa “axee” e tšwago go Morena ge go leta mafelelong go fedile!

 Go se Fele Pelo ga Morena wa Rena go Bolela Phologo

Go thwe’ng ge e ba tshepedišo ye ya dilo e tšere nako e telele go feta kamoo re kilego ra nagana ka gona goba kamoo re bego re lebeletše ka gona? Go na le lebaka. Moapostola Petro o ngwadile gore: “Le tsebê xore se se Le phološaxo ké xo se fêle pelo xa Morêna.” (2 Petro 3:15) Tsebo e nepagetšego ya merero ya Modimo le go lemoga ka boikokobetšo gore ga re bohlokwa ge re bapetšwa le go phethagatšwa ga morero wa Modimo e tla re thuša gore re se fele pelo go fihla bokgoleng bjoo Jehofa a bonago go swanetše gore a se felele tshepedišo ye ya kgale pelo.

E le go kgothaletša Bakriste gore ba se fele pelo, mongwadi wa Beibele e lego Jakobo o neile seswantšho. O ngwadile gore: “Bônang molemi xe a letêla dienywa tše di ratêxaxo tša lefase, xa a di fêlêle pelo, tša bá tša fiwa pula ya thseola le ya selemô. Le lena se feleng pelo. Tiišang dipelo tša lena, xobane xo tla xa Morêna xo kxaufsi.”—Jakobo 5:7, 8.

Jehofa Modimo ga a nyake gore re lape goba re lahlele toulo ge re dutše re letile. O na le mošomo wo a nyakago re o dira gomme o thabišwa ke ge re diriša nako ye ya go leta bakeng sa go dira modiro woo ka mafolofolo. O nyaka gore re be gare ga bao moapostola Paulo a ba hlalosago ka lengwalong la gagwe le le yago go ba-Hebere ge a re: “Se re se dumaxo ké xore ka moka xa lena Le bônwê Lè na le phišêxô e byalo, xo fêlê xo phêthêxa se re se holofetšexo, xo bê xo fihlê bofêlô, Xore Le se kê la ba ba botšwá, eupya ka tumêlô Le kxôtlêlêlê Le be baetši ba bao ba ruilexo tše di holofedišitšwexo.”—Ba-Hebere 6:11, 12.

Ka gona anke re se ke ra lapa. Go e na le moo, eka tswalano ya rena le Jehofa Modimo, tumelo ya rena sehlabelong sa topollo sa Jesu le kholofelo ya rena e kgahlišago tshepedišong e mpsha ya dilo e ka ba tšeo di re matlafatšago bophelong. Go etša ‘bahlanka ba botse le ba botegago’ ba seswantšhong sa Jesu, eka re ka ipontšha re swanelwa ke theto le moputso wa go tšwela pele re swaregile ka go tumiša Modimo wa rena, go etša ge go dirile bjalo mopsalme yo a boletšego gore: “’Me nna ke dula kè Xo lebeletše; ke tlo fêla ke atiša dithêtô tša xaxo ka moka.”—Psalme 71:14.

[Caption on page 21]

A nyamile, Jona o ile a leta gore a bone se se tlogo diragalela Ninife

[Caption on page 22]

Anke re bontšheng mediro ya boineelo go Modimo ge re dutše re letile letšatši la Jehofa