Bagoeledi Ba Mmušo Ba A Bega

Lengwalo le le Tšwago go Alejandra

GO NGWALA mangwalo go ipontšhitše e le mokgwa o atlegago wa go nea bohlatse. Le ge ka dinako tše dingwe mafelelo a ka bonagala a sa kgonthišetšwa, bao ba phegelelago go diriša mokgwa wo ba ile ba šegofatšwa kudu. Ba gopola keletšo e bohlale ya Beibele e rego: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela; xoba xo tlo mela yeno xoba yela, xoba ka dipedi.”—Mmoledi 11:6.

Alejandra, e lego mofsa wa Hlatse yo a bego a dutše a hlankela ofising ya lekala ya Dihlatse tša Jehofa ya Mexico ka nywaga e ka bago e lesome, o be a alafša kankere ka dikhemikhale. Boemo bja gagwe bo ile bja mpefala, gomme o ile a fokola kudu moo a ilego a se sa kgona go šoma mešomo ya gagwe ya letšatši le letšatši. Lega go le bjalo, ka ge Alejandra a be a sa nyake go tlogela bodiredi bja gagwe, o ile a phetha ka go ngwala mangwalo. O ile a ngwala mabapi le thulaganyo ya thuto e sa lefelelwego ya legae ya Beibele gomme a ngwala le nomoro ya mmagwe ya mogala. Ke moka o ile a nea mmagwe mangwalo a gore a a tlogele mafelong a bodulo ao go ona a sa hwetšego batho gae ge a le bodireding bja gagwe bja ntlo le ntlo.

Ge nako e dutše e e-ya, Diojany, e lego mosetsana yo monyenyane yo a tšwago Guatemala, o ile a ya go yo šoma e le mohlokomedi wa legae kua Cancún, Mexico. Ge a dutše a le moo, o ile a gahlana le Dihlatse tša Jehofa, gomme a thabela go ba le dipoledišano tša Beibele le tšona. Ka morago, bathwadi ba gagwe ba ile ba dira phetho ya go hudugela Motseng o mogolo wa Mexico gomme ba be ba nyaka gore a sepele le bona. Diojany o ile a dika-dika go huduga ka gobane se se be se tla bolela gore a ka se sa ikgokaganya le Dihlatse.

Bathwadi ba gagwe ba ile ba mo kgonthišetša ka gore: “O se ke wa tshwenyega, Dihlatse di gona gohle. Re tla di nyaka kapejana ge re se no fihla moo.” A e-na le tebelelo yeo e thabišago, Diojany o ile a dumela go sepela le bona. Ge ba le Motseng o mogolo wa Mexico, bathwadi ba Diojany ba ile ba tsoma Dihlatse. Ka lebaka le sa tsebjego, ba ile ba palelwa ke go di hwetša, gaešita le ge motseng woo o mogolo go be go e-na le Dihlatse tše ka godimo ga tše 41 000 le diphuthego tše 730.

Go se go ye kae, Diojany o ile a thoma go nyama ka ge a be a sa kgone go hwetša Dihlatse e le gore a tsošološe dipoledišano tša gagwe tša Beibele. Ka letšatši le lengwe, mosadi yo e lego mothwadi wa gagwe o ile a tla go yena, a re: “Ke go swaretše ditaba tše dibotse! Modimo wa gago o arabile dithapelo tša gago.” Ge a mo nea lengwalo, o ile a re: “Dihlatse di go tlogeletše lengwalo le.” E be e le lengwalo le le tšwago go Alejandra.

Diojany o ile a ikgokaganya le mmago Alejandra le ngwanabo, e lego Blanca, gomme a amogela thuto ya Beibele. Ka morago ga dibeke tše itšego, o ile a gahlana le Alejandra gomme a ba le ketelo e thabišago. Alejandra o ile a mo kgothaletša gore a tšwele pele a ineela thutong ya gagwe ya Beibele e le gore a kgone go dira tšwelopele ya moya.

Dikgweding tše sego kae ka morago, ka July 2003, Alejandra o ile a hwa, gomme a tlogelela badumedi-gotee le yena mohlala o mobotse wa tumelo le sebete. Polokong ya gagwe, ba bantši ba ile ba kgongwa kudu ke ge ba gahlana le Diojany gomme ba mo kwa a re: “Alejandra le ba lapa la gabo ba bile mohlala o mobotse kudu go nna. Ke ikemišeditše go hlankela Jehofa le go kolobetšwa go se go ye kae. Ke hlologelwa gakaakang go bona Alejandra gape Paradeiseng yeo e tlago!”

Ee, lengwalo e ka ba e le selo se senyenyane. Lega go le bjalo le ka ba le mafelelo a mabotse le a sa ruri gakaakang!