O Ile a Boledišana le Bao a Tsenago le Bona ka Klaseng ka Ditumelo tša Gagwe

NA O tla rata go thuša bao o tsenago le bona ka klaseng gore ba be le kwešišo e kaone ka ditumelo tša gago tšeo di theilwego Beibeleng? Magdalena, e lego morutwana wa nywaga e 18 wa sekolong se se phagamego sa kua Poland, gantši o boledišana le bao a tsenago le bona ka klaseng ka ditumelo tša gagwe bjalo ka yo mongwe wa Dihlatse tša Jehofa. Ka baka leo, ka mehla o botšišwa dipotšišo tše bjalo ka, ‘Go bolela’ng go ba yo mongwe wa Dihlatse tša Jehofa?’ le ‘Na ga o dumele go Jesu Kriste?’ O be a ka thuša bjang bao a tsenago le bona ka klaseng? Magdalena o ile a rapelela tlhahlo go Jehofa gomme a dira dilo ka go dumelelana le dithapelo tša gagwe.—Jakobo 1:5.

Ka letšatši le lengwe, Magdalena o ile a kgopela morutišigadi yo a hlomphago ditumelo tša gagwe ge e ba a ka bontšha bao a tsenago le bona ka klaseng bidio ya Jehovah’s Witnesses—The Organization Behind the Name. * Morutišigadi o ile a dumelelana le se. Ke moka Magdalena o ile a botša bao a tsenago le bona ka klaseng gore: “Ke rulaganyetša gore mogwera wa-ka a tle go le nea lenaneo la metsotso e 90. Le tla akaretša pontšho ya bidio le poledišano ya mabapi le Dihlatse tša Jehofa. Na le tla rata go tla?” Yo mongwe le yo mongwe o ile a dumela. Magdalena le Wojciech, e lego moebangedi wa nako e tletšego yo a nago le phihlelo, ba ile ba thoma go lokišeletša pontšho ye.

Thulaganyo e be e le go thoma pontšho ka polelo ya metsotso e 20 yeo e theilwego go poroutšha ya Dihlatse tša Jehofa—Ke Bomang? Di Dumela Eng?* yeo e tlago go latelwa ke poledišano ya dipotšišo le dikarabo. Ke moka bidio e be e tla bontšhwa ka bokgobapukung bja sekolo. Morutwana yo mongwe le yo mongwe ka klaseng o be a tla newa mpho—enfelopo e kgolo yeo e nago le diporoutšha tše sego kae, puku ya Dipotšišo tša Bafsa le Dikarabo tše Šomago* le dipampišana tše itšego gotee le dimakasine.

Letšatšing la pontšho, batheetši ba be ba akaretša barutwana ba 14 bao a tsenago le bona ka klaseng, morutišigadi le barutwana ba bangwe ba 4 bao go diregilego gore ba be ka bokgobapukung. Sa pele, Wojciech o ile a hlalosa gore direti le bangwadi ba mmalwa ba Mapoliši ba ile ba diriša leina la Modimo, e lego Jehofa, ka dipukung tša bona. O ile a ba a bolela ka dipuku tše dingwe tša kgale tša Katholika tša katikasema tšeo di bego di e-na le leina la Modimo. Ge a hlalosa ka modiro wa mehleng yeno wa Dihlatse tša Jehofa, o ile a ba bontšha diporoutšha tša diofisi tše di fapa-fapanego tša makala le diswantšho tša Diholo tše mmalwa tša Kopano.

Poledišano e kgahlišago e ile ya latela. Magdalena le Wojciech ba ile ba diriša Beibele bakeng sa go araba dipotšišo. Se se ile sa kgahla batheetši gomme sa ba kgodiša gore Dihlatse tša Jehofa ga di rute dikgopolo tša tšona. Tše dingwe tša dipotšišo e be e le dife, gomme di ile tša arabja bjang?

Potšišo: Beibele e tletše ka dipolelo tše di sa kwagalego le ditshwantšhišo, tšeo di ka hlaloswago ka ditsela tše dintši. Go ka kgonega bjang gore motho a phele ka go dumelelana le Beibele?

Karabo: Ba bangwe ba bolela gore Beibele e swana le violin yeo o ka bapalago mmino le ge e le ofe wo o o ratago ka yona. Eupša nagana: Ge e ba o nyaka go kwešiša seo mongwadi a se bolelago ka dipolelo tša gagwe, na ga go kaone go fo mmotšiša? Ka go fapana le bangwadi bao ba hwilego ba dipuku tša batho, Mongwadi wa Beibele,  e lego Jehofa Modimo, o a phela. (Ba-Roma 1:20; 1 Ba-Korinthe 8:5, 6) Dikagare tša lengwalo di ka bontšha tsela e nepagetšego ya go le hlalosa. Go oketša moo, Beibele gantši e ahla-ahla taba e swanago ka mangwalong a mmalwa, ka gona go a bapetša go be go tla thuša. Ka go rialo, re ka dumelela Modimo gore a hlahle dikgopolo tša rena, bjalo ka ge eka yena ka noši o be a re hlalosetša lengwalo leo. Ka go dira bjalo, re tla tseba thato ya gagwe gomme ra phela ka go dumelelana le yona go etša ge e utollwa ka Beibeleng, na re ka se dire bjalo?

Potšišo: Phapano ke efe magareng ga Bakriste le Dihlatse tša Jehofa?

Karabo: Rena re Bakriste! Eupša go e na le go fo ipolela e le Bakriste, Dihlatse tša Jehofa di katanela go phela ka go dumelelana le seo di se dumelago gotee le seo Modimo a di rutago sona e le gore di holege. (Jesaya 48:17, 18) Ka ge dithuto tša tšona ka moka di theilwe Beibeleng, di tseba gore di swere therešo.—Mateo 7:13, 14, 21-23.

Potšišo: Ke ka baka la’ng le batamela batho bao le tlogago le sa ba tsebe e bile le phegelela go boledišana le bona? Na seo ga se go gapeletša ba bangwe tumelo ya lena?

Karabo: Na o nagana gore ke phošo ge motho yo mongwe setarateng a bolela le wena ka tlhompho e bile a kgopela go tseba se o se naganago ka selo se itšego? (Jeremia 5:1; Tsefanya 2:2, 3) (Ke moka Wojciech le Magdalena ba ile ba bontšha kamoo ba ilego ba botšiša mofeti ka tsela ge e ba Modimo a e-na le taba le bao ba bego ba tlaišwa ke mafula a sa tšwago go ba gona kua Poland.) Ka morago ga ge re kwele kgopolo ya motho yo, re mmulela Beibele. Ge e ba motho a sa rate go boledišana le rena, re laelana le yena gomme ra tšwela pele. (Mateo 10:11-14) Na seo ke go gapeletša batho ba bangwe gore ba tsenele poledišano? Goba na batho ga se ba swanela go hlwa ba sa boledišana?

Potšišo: Ke ka baka la’ng le sa bine matšatši a maikhutšo?

Karabo: Re gopola tiragalo e nnoši yeo Beibele e re laelago gore re e bine—Segopotšo sa lehu la Jesu Kriste. (1 Ba-Korinthe 11:23-26) Ge e le mabapi le matšatši a maikhutšo, o ka nyakišiša mabapi le moo a thomilego gona ka go lebelela ka gare ga disaeklopedia le ka gare ga methopo e mengwe e botegago. Ge o dira bjalo, o tla kwešiša gabonolo lebaka leo ka lona re sa ketekego ditiragalo le ge e le dife tše bjalo.—2 Ba-Korinthe 6:14-18.

Dipotšišo tše dintši tše di oketšegilego di ile tša botšišwa gomme tša arabja. Poledišano ye e ile ya ba e telele kudu moo go bontšhwa ga bidio go ilego gwa swanelwa ke go šuthišetšwa pele nakong e tlago.

Dikarabelo tša barutwana e be e le dife? Anke re re Magdalena a re botše: “Ke ile ka makatšwa ke gore ba bangwe ba barutwana bao gantši ba dirago dilo tša bošilo gotee le go kwera ba bangwe ba be ba botšiša dipotšišo tša bohlokwa. Gaešita le ge ba be ba ipolela gore ke baila-Modimo, nakong ya poledišano ba ile ba bontšha tumelo ya bona go Modimo!” Bao ba bego ba le gona ba ile ba amogela dimpho ka tebogo—ba ile ba sepedišetšwa palo-moka ya dipuku tše 35, diporoutšha tše 63 le dimakasine tše 34.

A mafelelo a kgahlišago gakaakang ao a tšwago mošomong wa sekolo! Mošomo wo ga se wa fo thuša bao ba tsenago le Magdalena ka klaseng gore ba tsebe Dihlatse tša Jehofa le gore ba di kwešiše gakaone eupša gape o ile wa kgothaletša bafsa ba bantši gore ba nagane ka morero wa bophelo. Ke ka baka la’ng o sa katanele go thuša bao o tsenago le bona ka klaseng gore ba ithute mo go oketšegilego ka seo o se dumelago?

[Mengwalo ya ka tlase]

[Caption on page 31]

Magdalena le Wojciech ba lokišeletša poledišano