Dipotšišo tše Tšwago go Babadi

Ge Jesu a be a laela balatedi ba gagwe gore ba ‘adime ba bangwe ka ntle le go holofela go boelwa,’ na o be a bolela gore ga se ba swanela go nyaka go bušetšwa gaešita le tšhelete yeo ba ba adimilego yona?

Mantšu a Jesu ao a begilwego go Luka 6:35 a kwešišwa gakaone go ya ka Molao wa Moše. Modimo moo o laetše ba-Isiraele gore ba adimane ka tšhelete ka ntle le go nyaka tswalo go ba-Isiraele-gotee le bona bao ba bego ba se na tšhelete gomme ba nyaka thušo. (Ekisodo 22:25; Lefitiko 25:35-37; Mateo 5:42) Go adimana ka tšhelete ka tsela ye go be go sa swanelwa go dirišetšwa merero ya kgwebo. Go e na le moo, go adima motho tšhelete mo go bjalo o sa boelwe ke tswalo go be go dirišetšwa go fokotša bodiidi goba mathata. Go feta moo, e be e ka se be go bontšha lerato go nyaka tswalo go moagišani yo a nago le mathata a tša boiphedišo. Lega go le bjalo, yo a adimago motho tšhelete o swanetše go boelwa ke tšhelete yeo a mo adimilego yona, gomme ka dinako tše dingwe go ka dirwa keno (e lego kgonthišetšo ya gore tšhelete e tla bušwa).—Doiteronomio 15:7, 8.

Le ge a be a thekga Molao, Jesu o ile a katološa tsela yeo o bego o dirišwa ka yona, ka go bolela gore yo a neago thušo ga se a swanela go holofela go “boêlwa.” Go etša ba-Isiraele, ka dinako tše dingwe Bakriste ba ka lebeletšana le mathata a tša boiphedišo goba maemo a mangwe ao a ka ba tlogelago e le badiidi e bile ba hloka. Ge e ba ngwanabo rena wa Mokriste yo a lego bothateng bjo bo bjalo a nyaka thušo ya tša ditšhelete, na e be e ka se be botho go mo thuša? Ke therešo gore lerato la kgonthe le tla tutuetša Mokriste-gotee gore a nyake go thuša ngwanabo rena yo ka baka la maemo a itšego a lego bothateng bjo bogolo bja tša ditšhelete. (Diema 3:27) Go ka ba go kgonega gore a nee thušo ya tša ditšhelete go ngwanabo rena yo bjalo yo a lego mathateng, gaešita le ge tšhelete ye e ka ba e nyenyane go feta yeo motho a ka nyakago go e adingwa.—Psalme 37:21.

Lekgolong la pele la nywaga C.E., moapostola Paulo le Baranaba ba ile ba laelwa gore ba tšee meneelo e tšwago go Bakriste ba Asia Minor ba e iše go bana babo bona ba kua Judea bao ba bego ba le tlaleng. (Ditiro 11:28-30) Ka mo go swanago le lehono, ge go tšwelela masetla-pelo, Bakriste gantši ba neela ka tšhelete go bana babo rena bao ba lego mathateng. Le gona ba nea bohlatse bjo bobotse go ba bangwe ge ba dira bjalo. (Mateo 5:16) Ke therešo gore go swanetšwe gore go naganišišwe ka boemo bja kgopolo bja motho yo a nyakago thušo le ka boemo bjo a lego go bjona. Ke ka baka la’ng a nyaka thušo? Mantšu a Paulo a rego: “Mo-xana-modirô, le xo ja a lesê,” ke a bohlokwa.—2 Ba-Thesalonika 3:10.

Ge e ba ngwanabo rena yo a kgopelago go adingwa tšhelete a se mathateng a magolo eupša a fo nyaka thušo ya nakwana gore maemo a gagwe a boele sekeng ka morago ga mathata ao a bilego le ona a tša ditšhelete, gona go ka bonagala e le mo go swanetšego go mo adima tšhelete ka ntle le go nyaka go boelwa ke tswalo. Ka tlase ga maemo a bjalo, go adima motho tšhelete ka morero wa gore e bušwe e feletše ga go thulane le mantšu a Jesu ao a hwetšwago go Luka 6:35. Tumelelano e swanetše go ngwalwa fase, gomme yo a adingwago tšhelete o swanetše go iteka ka matla gore a e buše go ya kamoo go dumelelanwego ka gona. Ke therešo gore lerato la Bokriste le swanetše go tutuetša yo a adingwago tšhelete gore a e buše go fo etša ge le tutueditše yo a mo adimago gore a mo adime yona.

Le gona yo a naganago ka go adima motho tšhelete (goba go mo thuša ka tša ditšhelete) o swanetše gore a hlahlobe boemo bja lapa la gagwe. Ka mohlala, na o be a ka ipea kotsing ya gore a se kgone go hlokomela ditho tša lapa la gagwe, e lego seo Mangwalo a rego ke sa bohlokwa kudu? (2 Ba-Korinthe 8:12; 1 Timotheo 5:8) Ge e le gabotse, Bakriste ba tsoma dibaka tša go bontšhana lerato, gomme ba bontšha lerato leo ka ditsela tše di šomago tšeo di dumelelanago le melao ya motheo ya Beibele.—Jakobo 1:27; 1 Johane 3:18; 4:7-11.