Holwa ke go Phegelela Dilo tša Bohlokwa tša Moya

“E a rataxo mahumô xa a hore ka ôna; mo-lla-boati xa a holexe selô.”—Mmoledi 5:9.

GO ŠOMA go feta tekano go ka baka kgateletšego, gomme kgateletšego e ka baka mathata a tša maphelo, ao ka dinako tše dingwe a lebišago lehung. Dinageng tše dintši, malapa a aroganywa ke tlhalo. Gantši kudu, masetlapelo a bjalo a bakwa ke go tshwenyega ka mo go feteletšego ka dilo tše di bonagalago. Go e na le go thabela seo a nago le sona, motho yo a nweletšego tabeng ya go nyaka go ba le dilo a ka ikhwetša ka mehla a nyaka go ba le tše di oketšegilego, le ge seo se mmea kotsing ya tša maphelo. Puku yeo o ikhweletšago thušo go yona e bolela gore: “Go se nyake go phalwa ke selo seo se dirwago ka kakaretšo nageng, gaešita le ge bao ba sa nyakego go phalwa ba šoma ka thata kudu mo ba bago kotsing ya go swarwa ke bolwetši bja pelo ge ba e-na le nywaga e 43.”

Go nyaka dilo tše dintši go ka fetoga megabaru, gwa amoga motho lethabo le ge e le lefe leo a bego a ka ba le lona. Mafokodi a rena batho tabeng ye gantši a dirišwa ka tsela ya go ikhola ka baka la tutuetšo e matla ya tša papatšo! Mananeo a thelebišene a tletše ka dipapatšo tšeo di go kgothaletšago gore o reke dilo tšeo mohlomongwe o  sa di nyakego le tšeo o ka no se kgonego go di lefelela. Tše ka moka di ka baka bohloko bjo bogolo.

Boithati bjo bo feteletšego bo ka ba le mafelelo ao a sa lemogegego go rena eupša e le ao a senyago mmeleng le boitshwarong. Ka mohlala, Kgoši e bohlale Salomo e boletše gore: “Pelo-thšweu ké ’phelô bya mmele.” (Diema 14:30) Ka mo go fapanego, go šoma ka mo go feteletšego, go belaela le dikgateletšo tša go nyaka go kgobela mahumo a dilo tše di bonagalago di ka senya bophelo bja rena bjo bobotse le lethabo. Ditswalano le tšona di kgomega o šoro ge dipakane tša dilo tše di bonagalago di tšea karolo e kgolo maphelong a rena. Le gona ge lapa la motho le tsela yeo a phelago ka yona di phuhlama, boemo bja bophelo bja gagwe ka kakaretšo le bjona bo kgomega o šoro.

Mohola o Mogolo wa Dilo tša Bohlokwa tša Moya

Nywaga-keteng e fetilego, moapostola Paulo o ile a lemoša ka gore: “Le se kê la ipapetša le ba mehla yeno.” (Ba-Roma 12:2) Lefase le rata bao ba phelago ka go dumelelana le ditekanyetšo tša lona. (Johane 15:19) Morero wa lona ke go go goga mahlo, go go dira gore o nyake go kgoma, go latswa, go dupelela le go kwa—ee, go phela bophelo bja go rata dilo tše di bonagalago. Le lebišitše tlhokomelo kudu ‘kganyogong ya mahlo’ e le gore wena le ba bangwe le ka phegelela go ba le dilo tše di bonagalago.—1 Johane 2:15-17.

Eupša go na le dilo tša bohlokwa go feta tšhelete, maemo a phagamego le go huma ka dilo tše di bonagalago. Nywaga-kgolong e fetilego, Kgoši Salomo o ile a kgoboketša dilo ka moka tše di bonagalago tšeo lefase le bego le e-na le tšona. O ile a aga dintlo gomme a ba le dirapana, dirapa tša dienywa, bahlanka, diruiwa, diopedi tša banna le tša basadi gotee le gauta e ntši le silifera. Salomo o ile a oketša dithoto tša gagwe gomme tša phala tša bao ba bego ba phetše pele ga gagwe. O be a humile le dinala. Salomo o be a e-na le mo e ka bago selo se sengwe le se sengwe seo se bego se ka kganyogwa. Lega go le bjalo, ge a be a lebelela dilo ka moka tšeo a di fihleletšego, o itše: “Ke hwetša è le lefêla, è le xo phuthêla phefô ka kobô.”—Mmoledi 2:1-11.

Ka bohlale bjo bo kgethegilego bjo a bilego le tokelo ya go bo hwetša, Salomo o be a tseba gore kgotsofalo e kgolo e tlišwa ke go phegelela dilo tša bohlokwa tša moya. O ngwadile gore: “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.”—Mmoledi 12:13.

Selo sa bohlokwa kudu go feta gauta goba silifera ke lehumo leo le ka hwetšwago ka Lentšung la Modimo, Beibele. (Diema 16:16) Ka go swana le mabenyabje, ditherešo tše di tseneletšego di a hwetšagala. Na o tla di tsoma le go di epa? (Diema 2:1-6) Mmopi wa rena, Mothopo wa dilo tša kgonthe tša bohlokwa, o go kgothaletša go dira bjalo, le gona o tla go thuša. Bjang?

Jehofa o nea ditherešo tša bohlokwa ka Lentšu  la gagwe, moya wa gagwe le mokgatlo wa gagwe. (Psalme 1:1-3; Jesaya 48:17, 18; Mateo 24:45-47; 1 Ba-Korinthe 2:10) Go hlahloba ditherešo tše tše di sa hwetšagalego gabonolo tša bohlokwa bjo bo sa lekanywego go go nea sebaka sa go kgetha ka bohlale tsela e kaone-kaone le e putsago kudu ya bophelo. Le gona seo se ka se be thata ka gobane Jehofa, Mmopi wa rena, o tseba seo re se nyakago gore re thabe e le ka kgonthe.

Beibele e Kgothaletša Ditekanyetšo tše di Phagamego Kudu

Kgothatšo goba keletšo e kwagalago yeo e lego ka Beibeleng ke e šomago le yeo e sa lekanywego le selo. Ditekanyetšo tša boitshwaro tšeo e di kgothaletšago ga di phalwe ke selo. Keletšo ya yona ke e holago ka mehla. E ipontšhitše e le ya therešo le e šomago ka nako e telele. Mehlala ya keletšo e kwagalago ya Beibele e kgothaletša go šoma ka thata, go botega, go diriša tšhelete ka bohlale le go phema bobodu.—Diema 6:6-8; 20:23; 31:16.

Ka go dumelelana le seo, Jesu o itše: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa.”—Mateo 6:19, 20.

Keletšo yeo e lego nakong e a šoma lehono go fo swana le ge e be e le bjalo nywageng e 2 000 e fetilego. Go e na le go nwelela tabeng ya go nyaka mahumo a dilo tše di bonagalago, re ka holega gona bjale ka go phegelela tsela e phagametšego tšohle ya bophelo. Taba-kgolo ke go kgobela mahumo a moya, ao a lebišago bophelong bja lethabo la kgonthe le kgotsofalo. Re ka dira bjalo bjang? Ka go bala Lentšu la Modimo, Beibele le ka go diriša seo le se rutago.

Ditekanyetšo tša Moya di Tliša Meputso

Ge ditekanyetšo tša moya di dirišwa ka mo go swanetšego, di a re hola mmeleng, maikwelong le moyeng. Go fo swana le ge legapi la ozone leo le lego kua godimo-dimo le re šireletša mahlaseding a gobatšago a letšatši, melao ya motheo e kwagalago ya boitshwaro e thuša go re šireletša ka go re lemoša ka mafelelo a kotsi a go rata dilo tše di bonagalago. Moapostola wa Mokriste Paulo o ngwadile gore: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong. Xobane mexabaru ké wôna modu wa bobe ka moka; xomme ba bangwê ba xo kêkêla xo tšôna ba aroxile tumêlô ba ikôbêla mehlakô e mentši.”—1 Timotheo 6:9, 10.

Go rata mahumo go goketša batho gore ba nyake lehumo le le oketšegilego, maemo le matla. Gantši kudu, go dirišwa mekgwa ya boradia le ya go se botege bakeng sa go fihlelela dipakane tše. Go rata dilo tše di bonagalago go ka amoga motho nako, matla le bokgoni. Go ka ba gwa hloba motho boroko. (Mmoledi 5:12) Go nyaka dilo tše di oketšegilego go tloga go šitiša tšwelopele ya moya. Motho yo a phagamego kudu yo a kilego a phela, Jesu Kriste, o bontšhitše gabotse tsela e kaone ge a be a re: “Ba lehlôxônôlô ké ba ba humanexilexo mo moyeng.” (Mateo 5:3) O be a tseba gore mahumo a moya a lebiša meputsong ya sa ruri gomme a tloga a le bohlokwa kudu go feta go hwetša dilo tše di bonagalago.—Luka 12:13-31.

Na Ruri go a Hola?

Greg o gopola ka gore: “Batswadi ba-ka ba ile ba leka ka matla go nkgodiša gore ditekanyetšo  tša moya ga di kwagale. Lega go le bjalo, ke bile le khutšo e kgolo ya monagano ka go phegelela dipakane tša moya ka gobane ke lokologile kgateletšong ya go phadišana le batho ka mahumo.”

Le gona ditekanyetšo tša moya di ka aga ditswalano tše kaone tša motho ka noši. Bagwera ba kgonthe ba go ratela seo o lego sona, e sego seo o nago le sona. Beibele e kgothaletša gore: “Šika le bahlale O hlalefê; mokxônana-le-mašilo ó tlo thsereana.” (Diema 13:20) Go oketša moo, lapa le le atlegago le agwa ka bohlale le lerato, e sego ka go ba le dilo tše di bonagalago.—Ba-Efeso 5:22–6:4.

Ga se ra belegwa re e-na le ditekanyetšo. Re swanetše go ithuta tšona dithakeng tša rena goba mothopong o phagamego. Ke ka baka leo thuto e theilwego Beibeleng e ka fetošago pono ya rena mabapi le dilo tše di bonagalago. Don, yo a kilego a šoma pankeng, o re: “Ke ile ka thušwa go nagana lefsa ka dilo tša-ka tšeo di lego bohlokwa, gomme ke ile ka ithuta go kgotsofalela dilo tše di nyakegago.”

Phegelela Mahumo a Moya ao a Swarelelago

Dilo tša bohlokwa tša moya di lebiša tlhokomelo meputsong ya nako e telele, e sego lethabong la nakwana. Paulo o ngwadile gore: “Tše di bônwaxo ka mahlô [dilo tše di bonagalago] ké tša lebaka leno fêla; ’me tše di sa bonwexo [dilo tša moya] ké tša neng le neng.” (2 Ba-Korinthe 4:18) Ke therešo gore go phegelela dilo tše di bonagalago go ka kgotsofatša dikganyogo ka nakwana, eupša go ba le megabaru go ka se hole motho ka nako e telele. Dilo tša bohlokwa tša moya ke tša sa ruri.—Diema 11:4; 1 Ba-Korinthe 6:9, 10.

Beibele e ganetša taba ya go lebiša tlhokomelo dilong tše di bonagalago tšeo di tumilego kudu  mehleng yeno. E re ruta kamoo re ka ganetšago kganyogo ya boithati ka go boloka leihlo la rena le le bonolo, e bile le lebišitše tlhokomelo dilong tša bohlokwa kudu, e lego mahumo a moya. (Ba-Filipi 1:10) E bontšha seo megabaru e tlogago e le sona—go itira modimo. Ge re dutše re diriša seo re ithutago sona ka Lentšung la Modimo, re hwetša lethabo le legolo. Dikgopolo tša rena di tloga go amogeleng gomme tša ya go neeng. A tutuetšo e matla gakaakang ya go bea dilo tša bohlokwa tša moya legatong la boithati!

Ke therešo gore tšhelete e ka ba tšhireletšo go fihla bokgoleng bjo itšego. (Mmoledi 7:12) Eupša Beibele ka kgonthe e bolela gore: “La široxa; la phorolla diphêxô bo-ka lenong, la hlatloxêla sebakeng.” (Diema 23:5) Batho ba gafile dilo tša bona tša bohlokwa e le gore ba hwetše dilo tše di bonagalago—bophelo bjo bobotse, malapa gaešita le letswalo le lebotse—ka mafelelo a kotsi. Ka lehlakoreng le lengwe, go ba le boemo bjo bobotse bja moya go kgotsofatša dinyakwa tša rena tša bohlokwa kudu—senyakwa sa lerato, senyakwa sa go ba le morero bophelong le senyakwa sa go rapela Modimo yo lerato, Jehofa. Go bile go bontšha tsela e išago bophelong bjo bo sa felego lefaseng la paradeise ge batho ba tla ba ba phethagetše—kholofelo yeo Modimo a re holofetšago yona.

Go se go ye kae, kganyogo ya batho ya go nyaka go atlega e tla kgotsofatšwa ka botlalo lefaseng le lefsa la Modimo. (Psalme 145:16) Ka nako yeo, lefaseng ka moka “xo tseba Morêna xo tlo tlala.” (Jesaya 11:9) Dilo tša bohlokwa tša moya di tla atlega. Go rata dilo tše di bonagalago le mafelelo a gona a gobatšago go tla fedišetšwa sa ruri. (2 Petro 3:13) Ka nako yeo, dilo tšeo di dirago gore bophelo e be bjo bo kgotsofatšago kudu—bophelo bjo bo phethagetšego, modiro o kgotsofatšago, boiketlo bjo bo agago, ditswalano tše borutho tša lapa le bogwera bja sa ruri le Modimo—di tla tlišetša batho lethabo la kgonthe la ka mo go sa felego.

[Lepokisi go letlakala 6]

Diriša Tšhelete ya Gago ka Bohlale!

Tseba dinyakwa tša gago. Jesu o re rutile go rapela ka gore: “O re fê lehono boxôbê bya rena bya ka mehla.” (Luka 11:3, mongwalo o sekamego ke wa rena.) O se ke wa lebelela dilo tšeo o di ratago e le dilo tšeo o swanetšego go ba le tšona. Gopola gore bophelo bja gago ga bo tšwe go tšeo o nago le tšona.—Luka 12:16-21.

E-ba le thulaganyo ya go diriša tšhelete. O se ke wa ineela kganyogong ya go reka o sa ikemišetša. Beibele e re: “’Kêlêllô tša serôtô di iša mokhoreng; e a pôtlakaxo ó y’o hlôka.” (Diema 21:5) Jesu o ile a eletša batheetši ba gagwe go bala ditshenyagalelo pele ba thoma modiro le ge e le ofe wo o nyakago tšhelete.—Luka 14:28-30.

Phema dikoloto tše di sa nyakegego. Mo go kgonegago, boloka tšhelete ya go reka dilo go e na le go di reka ka sekoloto. Seema se bea taba ka tsela ye: “Moadingwa ó tlo hlankêla moadimi.” (Diema 22:7) Ka go bontšha boitshwaro le go reka feela ka tšhelete yeo o nago le yona, o ka ba wa dira thulaganyo e atlegilego ya go reka dilo tše dikgolo.

Phema go senya. Dira gore dilo tšeo o šetšego o e-na le tšona di swarelele ka go di hlokomela gabotse, gomme ka baka leo wa fokotša go di senya. Jesu o bontšhitše tsela e kaone ya go hlokomela dilo tšeo a bego a di diriša.—Johane 6:10-13.

Dula o etiša dilo tša bohlokwa pele. Motho yo bohlale o tla ‘thakanela sebaka’ sa go phegelela dipakane tša bohlokwa kudu.—Ba-Efeso 5:15, 16.

[Lepokisi go letlakala 7]

Go na le Tsela e Kaone ya go Ithuta go e na le go Ithuta go tšwa Phihlelong

Phihlelo ya motho ka noši—e ka ba e botse le e kwešago bohloko—e ka re ruta dithuto tša bohlokwa. Eupša go ya ka seema se se tlwaelegilego, na ke therešo gore bohlale bo tšwa lebading? Ga go bjalo, ka gobane go na le mothopo o mogolo kudu wa tlhahlo. Mopsalme o ile a lemoga mothopo woo ge a be a rapela ka gore: “’Ntšu la xaxo ké lebônê la dinaô tša-ka, ké seetša tseleng ya-ka.” (Mongwalo o sekamego ke wa rena.)—Psalme 119:105.

Ke ka baka la’ng go ithuta go tšwa tlhahlong ya Modimo go le kaone kudu go feta go ithuta go tšwa phihlelong ya motho ka noši? Lebaka ke gore, go ithuta feela phihlelong—go leka mekgwa e fapa-fapanego ya go rarolla mathata—e ka ba mo go gobatšago le mo go kwešago bohloko. E bile ga go nyakege. Modimo o ile a botša ba-Isiraele ba bogologolo gore: “Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.”—Jesaya 48:18.

Lebaka leo ka lona Lentšu la Modimo e lego mothopo o mogolo wa tlhahlo ke gore le hupere pego ya kgale le e nepagetšego ya phihlelo ya batho. Mohlomongwe o a lemoga gore go ithuta ka ntle le go kwa bohloko go atlegeng le diphošong tša ba bangwe go kaone go e na le gore wena ka noši o dire diphošo tša bona. (1 Ba-Korinthe 10:6-11) Sa bohlokwa ke gore ka Beibeleng Modimo o re nea melao e phalago yohle le melao ya motheo yeo e re hlahlago ye e ka botwago ka mo go feletšego. “Molaô wa Morêna xa o na bosodi . . . Bohlatse bya Morêna bo a bôtêxa, bo hlalefiša [e] a se naxo maanô.” (Psalme 19:7, mongwalo o sekamego ke wa rena.) Ka gona, go ithuta bohlaleng bja Mmopi wa rena yo lerato ke tsela e phalago tšohle ya go ithuta.

[Caption on page 4]

Lefase le nyaka gore o be le mokgwa wa lona wa bophelo wa go rata dilo tše di bonagalago

[Caption on page 5]

Selo sa bohlokwa kudu go feta gauta goba silifera ke lehumo le le hwetšwago ka Beibeleng