Ke Mang Yo E Lego ‘Modimo Wa Makgonthe Le Bophelo Bjo Bo Sa Felego’?

JEHOFA, Tatago Morena wa rena Jesu Kriste, ke yena Modimo wa therešo. Ke Mmopi, yo a neago bao ba mo ratago bophelo bjo bo sa felego. Ye ke tsela yeo ba bantši bao ba balago le ba dumelago Beibele ba tlago go araba potšišo ye e botšišitšwego sehlogong se se lego ka mo godimo. Ee, Jesu ka boyena o ile a re: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Mongwalo o sekamego ke wa rena.)—Johane 17:3.

Lega go le bjalo, ba bantši bao ba tsenago kereke ba kwešiša mantšu a ka tsela e fapanego. Mantšu ao a lego sehlogong a tšwa go 1 Johane 5:20, yeo karolo ya yona e rego: “Byale re ba Yêna Morereši, re ba Morwa wa xaxwe Jesu Kriste. Yêna-eo ké Modimo wa makxonthe; ké Yêna bophelô byo bo sa felexo.”

Bao ba dumelago thuto ya Boraro botee ba bolela gore lešala-šupi “Yêna-eo” (houʹtos) le šupa go leina leo le tlago pele ga lona e lego Jesu Kriste. Ba bolela ka go tia gore Jesu ke ‘Modimo wa makgonthe le bophelo bjo bo sa felego.’ Lega go le bjalo, tlhaloso ye e ganetšana le Mangwalo a mangwe ka moka. Diithuti tše dintši tše di phagamego ga di dumelelane le pono ye ya Boraro botee. Seithuti sa Yunibesithing ya Cambridge e lego B. F.Westcott se ngwadile gore: “Tsela e kwagalago kudu ya go šupa [lešala e lego houʹtos] ke ka go le šupa go leina leo moapostola a bego a naganne ka lona, e sego leo le lego kgaufsi le lešala-šupi.” Ka gona, moapostola Johane o be a naganne ka Tatago Jesu. Rathutatumelo wa mo-Jeremane e lego Erich Haupt o ile a ngwala gore: “Go swanetšwe go lebelelwa ge e ba [houʹtos] ya lekgokedi le le latelago e šupa go leina leo le lego kgaufsi le lona le leo le le latelago . . . goba e šupa go yo go boletšwego ka yena pejana e lego Modimo. . . . Go kwešiša lengwalo le e le bohlatse bjo bo šupago go Modimo a nnoši wa therešo go bonagala go dumelelana kudu le temošo ya mafelelo malebana le medimo ya diswantšho, go feta go hlatsela gore Kriste ke Modimo.”

Gaešita le puku ya A Grammatical Analysis of the Greek New Testament, yeo e gatišitšwego ke Pontifical Biblical Institute ya Roma e bega gore: “Bjalo ka ge [houʹtos] e le ntlha ya bohlokwa go [ditemana] 18-20 ga go na pelaelo gore e šupa go Modimo wa kgonthe le wa therešo, yo a fapanego le boheitene (t. 21).”

Gantši houʹtos, yeo ka tlwaelo e fetolelwago e le “yêna” goba “yêna yo,” ga e šupe go leina leo le latelago ka morago ga yona lefokong. Mangwalo a mangwe a dira gore ntlha ye e kwagale. Go 2 Johane 7, moapostola yena yoo a ngwadilego 1 Johane o ngwadile gore: “Lefaseng lé xo tsene baaroši, ba ba sa emexo ka la xo re: Jesu Kriste ó tlile a ba motho. Motho e a sa emexo ka Lentšu lé ké yêna [houʹtos] Mo-lwa-le-Kriste.” Mo lešala le ka se šupe go leina leo go boletšwego pele ka lona—Jesu. Ke mo go lego molaleng gore “yêna” e šupa go bao ba ilego ba gana Jesu. Ba bitšwa ka moka gore ke ‘balwa le Kriste.’

Moapostola Johane o ile a ngwala ka Ebangeding ya gagwe gore: “E mongwê wa bôná [ba] babedi bao ba xo kwa Johane ’me ba latêla Jesu, e be e le Andrea, ngwan’abô Simone Petro. Yêna-yo [houʹtos] a thôma xo hwetša Simone moxol’waxwe.” (Johane 1:40, 41, mongwalo o sekamego ke wa rena.) Go a bonagala gore “yêna-yo” ga e šupe go motho wa mafelelo yo go boletšwego ka yena, eupša e šupa go Andrea. Go 1 Johane 2:22, moapostola o diriša lešala le ka tsela e swanago.

Luka o diriša lešala le ka tsela e swanago, ka ge re bona go Ditiro 4:10, 11 mo re balago gore: “Xe motho é à êma fá pele xa lena à fodile, ké ka Leina la Jesu Kriste wa Natsaretha, yo Le mmapotšexo,  yo Modimo a mo tsošitšexo bahung. Ké Yéna [houʹtos] lefsika le baaxi ba le nyaditšexo; le bile mothêô wa sekhutlô.” (Mongwalo o sekamego ke wa rena.) Go molaleng gore lešala “yêna” ga le šupe go motho yo a ilego a fodišwa, gaešita le ge go boletšwe ka yena kapejana ka morago ga houʹtos. Ka kgonthe, “yêna” go temana 11 e šupa go Jesu Kriste wa Natsaretha, yo e lego ‘lefsika la motheo’ leo phuthego ya Bokriste e theilwego go lona.—Ba-Efeso 2:20; 1 Petro 2:4-8.

Ditiro 7:18, 19 (PK) le yona e bontšha ntlha ye ka mo go kwagalago ge e re: “Kgoši e šele [ya Egipita] ya tsoga yeo e sa tsebego Josefa. Yena a dira ka maano go moloko wa gešo.” (Mongwalo o sekamego ke wa rena.) “Yena” yo a bego a gateletše ba-Juda e be e se Josefa, eupša e be e le Farao, kgoši ya Egipita.

Ditemana tše bjalo di tiišetša nyakišišo yeo e dirilwego ke seithuti sa mo-Gerika e lego Daniel Wallace, yo a bolelago gore ge go dirišwa mašala-šupi a Segerika, “seo e ka bago leetetši la kgaufsinyana go lešupi tabeng e dikologilego ga se gantši le šupago go seo mongwadi a bego a naganne ka sona.”

“Yêna Morereši”

Ka ge moapostola Johane a ngwadile, “Yêna Morereši” ke Jehofa Tatago Jesu Kriste. Ke yena Modimo a nnoši wa therešo, Mmopi. Moapostola Paulo o ile a dumela ka gore: “Wa rena Modimo ké o tee fêla, Yêna Tata wešo, Yêna thlaxô ya tšohle le boyô bya rena bohle.” (1 Ba-Korinthe 8:6; Jesaya 42:8) Lebaka le lengwe leo go bolelwago ka lona go 1 Johane 5:20 la gore Jehofa ke “Yêna Morereši” ke gore ke yena Mothopo wa therešo. Mopsalme o ile a bitša Jehofa gore ke “Modimo-mmotexi” ka baka la gore O a botega dilong ka moka tšeo A di dirago e bile a ka se aketše. (Psalme 31:5; Ekisodo 34:6; Tito 1:2) Morwa ge a be a šupa go Tatagwe wa legodimong o ile a re: “Lentšu la xaxo ké yôna therešô.” Gomme ge a bolela ka thuto ya gagwe ka noši Jesu o ile a re: “Thutô ya-ka xa se ya-ka; ké ya E a nthomilexo.”—Johane 7:16; 17:17.

Jehofa gape ke “Yêna bophelô byo bo sa felexo.” Ke Mothopo wa bophelo, Yena yo a bo neago e le mpho ye e sa swanelago ka Kriste. (Psalme 36:9; Ba-Roma 6:23) Ka mo go lemogegago, moapostola Paulo o ile a bolela gore Modimo “ba ba Mo nyakaxo ó a ba putsa.” (Ba-Hebere 11:6, mongwalo o sekamego ke wa rena.) Modimo o ile a putsa Morwa wa gagwe ka go mo tsoša bahung, gomme Tate o tla putsa bao ba Mo hlankelago ka dipelo tša bona ka moka ka bophelo bjo bo sa felego.—Ditiro 26:23; 2 Ba-Korinthe 1:9.

Ka baka leo, ke phetho efe yeo re swanetšego go e fihlelela? Ke ya gore Jehofa, e sego motho le ge e le ofe, ke ‘Modimo wa makgonthe le bophelo bjo bo sa felego.’ Yena a nnoši o swanelwa ke gore bao a ba bopilego ba mo rapele ka mo go feletšego.—Kutollo 4:11.