Bahlanka Ba Jehofa Ba Thabilego
Bahlanka Ba Jehofa Ba Thabilego
“Ba thabilego ke bao ba lemogago dinyakwa tša bona tša moya.”—MATEO 5:3, NW.
1. Lethabo la kgonthe ke’ng, gomme le bonagatša’ng?
LETHABO ke selo sa bohlokwa seo batho ba Jehofa ba nago le sona. Mopsalme Dafida o itše: “Go thabile bao Modimo wa bona e lego Jehofa!” (Psalme 144:15, NW) Lethabo ke go ikwa o phetše gabotse. Lethabo le legolo—leo le tsenelelago ka gare-gare go rena—le tlišwa ke go lemoga gore re amogelwa ke Jehofa. (Diema 10:22) Lethabo le le bjalo le bonagatša tswalano ya kgaufsi yeo re nago le yona le Tatago rena wa legodimong le tsebo ya gore re dira thato ya gagwe. (Psalme 112:1; 119:1, 2) Ke mo go kgahlišago gore Jesu o ile a lokeletša mabaka a senyane a gore re be ba thabilego. Go ahla-ahlwa ga dilo tše tšeo go thwego ke tše di thabišago, goba ditlhaloso tše senyane tšeo go boletšwego ka tšona Thutong ya Thabeng mo sehlogong se le se se latelago, go tla re thuša go lemoga kamoo re ka bago ba thabilego ka gona ge e ba ka potego re hlankela ‘Modimo yo a thabilego,’ Jehofa.—1 Timotheo 1:11.
Go Lemoga Dinyakwa tša Rena tša Moya
2. Ke neng moo Jesu a ilego a bolela ka lethabo, gomme mantšu a gagwe a mathomo e be e le afe?
2 Ka 31 C.E., Jesu o ile a nea e nngwe ya dipolelo tše di tumilego kudu historing. E bitšwa Thuto ya Thabeng ka gobane Jesu o e neile a le godimo ga thaba e ukametšego Lewatle la Galilea. Ebangedi ya Mateo e hlalosa gore: “Xe [Jesu] a bôna mašaba, a rotoxêla thabeng a dula, ’me barutiwa ba xaxwe ba batamêla. A ahlama a ba ruta a re: Ba lehlôxônôlô ké ba ba humanexilexo mo moyeng [“ba thabilego ke bao ba lemogago dinyakwa tša bona tša moya,” NW], xobane bôná-bao mmušô wa maxodimo ké wa bôná.” (Mongwalo o sekamego ke wa rena.) Ge mantšu a Jesu a mathomo a fetolelwa ka go lebanya, a balega ka gore: “Ba thabilego ke badiidi (ge go tliwa) moyeng,” goba “Ba thabilego ke bakgopedi ba dilo tša moya.” (Mateo 5:1-3; mongwalo wa tlase wa Kingdom Interlinear) Today’s English Version e balega ka gore: “Ba thabilego ke bao ba tsebago gore ke badiidi moyeng.”
3. Go ba le boikokobetšo go tlaleletša bjang lethabong la rena?
3 Thutong ya gagwe ya Thabeng, Jesu o bontšhitše gore motho e ba yo a thabilego kudu ge a lemoga gore o a diila moyeng. Bakriste ba ikokobeditšego, bao ba lemogago ka mo go feletšego boemo bja bona bja sebe, ba kgopela Jehofa gore a ba lebalele motheong wa sehlabelo sa topollo sa Kriste. (1 Johane 1:9) Ka go rialo, ba hwetša khutšo ya monagano le lethabo la kgonthe. ‘Go thabile yo a lebaletšwego dikarogo, yo dibe tša gagwe di khupeditšwego.’—Psalme 32:1; 119:165.
4. (a) Ke ka ditsela dife re ka bontšhago gore re lemoga dinyakwa tša rena tša moya gotee le tša ba bangwe? (b) Ke’ng seo se tlaleletšago lethabong la rena ge re lemoga dinyakwa tša rena tša moya?
4 Go lemoga dinyakwa tša rena tša moya go re tutueletša go bala Beibele letšatši le letšatši, go ja dijo tša moya tšeo di abjago ke “molaki e a bôtêxaxo yo bohlale” ka “lebaka la xôna” le go ba gona dibokeng tša Bokriste ka mehla. (Mateo 24:45; Psalme 1:1, 2; 119:111; Ba-Hebere 10:25) Go rata moagišani go re dira gore re lemoge dinyakwa tša moya tša ba bangwe e bile go re tutueletša go ba mafolofolo modirong wa boboledi le go ruteng ka ditaba tše dibotse tša Mmušo. (Mareka 13:10; Ba-Roma 1:14-16) Go boledišana le ba bangwe ka ditherešo tša Beibele go a re thabiša. (Ditiro 20:20, 35) Lethabo la rena le gola ka mo go oketšegilego ge re naganišiša ka kholofelo e kgahlišago ya Mmušo le ka ditšhegofatšo tšeo Mmušo woo o tlago go di tliša. Go “mohlatswana” wa Bakriste ba tloditšwego, kholofelo ya Mmušo e bolela bophelo bja go se hwe legodimong e le karolo ya pušo ya Mmušo wa Kriste. (Luka 12:32; 1 Ba-Korinthe 15:50, 54) Go “dinku tše dingwê” e bolela bophelo bjo bo sa felego lefaseng la paradeise ka tlase ga pušo yeo ya Mmušo.—Johane 10:16; Psalme 37:11; Mateo 25:34, 46.
Kamoo Bao ba Nyamilego e ka Bago ba Thabilego
5. (a) Polelwana “ba ba nyamilexo” e bolela’ng? (b) Batho ba bjalo ba nyamilego ba homotšwa bjang?
5 Mantšu a tlhaloso e latelago yeo Jesu a boletšego ka yona Thutong ya Thabeng a bonagala e le a gakantšhago. O itše: ‘Ba thabilego ke bao ba nyamilego gobane bona bao ba tlo homotšwa.’ (Mateo 5:4) Ke bjang motho e ka bago yo a nyamilego gomme ka nako e swanago a ba yo a thabilego? E le go kwešiša seo se bolelwago ke mantšu a Jesu, re swanetše go ela hloko mohuta wa go nyama wo a bolelago ka ona. Morutiwa Jakobo o hlalosa gore boemo bja rena bja sebe bo swanetše go re dira gore re nyame. O ngwadile gore: “Hlapang diatla, lena Ba-dira-dibe! Hlapišang dipelo, lena ba pelo-pedi. Ipôneng bobôtlana, Le hlokofalê Le llê. Dithsêxô tša lena a di fetoxê nyamô; thabô ya lena e fetoxê thlokofalô. Ikokobetšeng pele xa Morêna; ké mo a tl’o xo Le xodiša.” (Jakobo 4:8-10) Bao ba tlogago ba nyamišitšwe ke boemo bja bona bja sebe ba homotšwa ke go lemoga gore ba ka lebalelwa dibe tša bona ge e ba ba bontšha tumelo sehlabelong sa topollo sa Kriste e bile ba bontšha go itshola e le ka kgonthe ka go dira thato ya Jehofa. (Johane 3:16; 2 Ba-Korinthe 7:9, 10) Ka go rialo, ba ka ba le tswalano e bohlokwa le Jehofa gomme ba ba le kholofelo ya go phela ka mo go sa felego e le gore ba mo hlankele le go mo tumiša. Se se ba tlišetša lethabo le legolo la ka gare.—Ba-Roma 4:7, 8.
6. Ke ka kgopolo efe ba bangwe e lego ba nyamilego, gomme ba homotšwa bjang?
6 Le gona mantšu a Jesu a akaretša bao ba nyamišitšwego ke makgapha ao a apareditšego lefaseng. Jesu o ile a lebiša boporofeta bja Jesaya 61:1, 2 go yena ka noši, bjo bo rego: “Môya wa Morêna Mong’a bohle o mo xo nna, xobane Morêna ó mpeetše xo bexêla babôtlana ’taba tše di botse; O nthometše xo alafa ba dipelo tše robexilexo, . . . xore xo homotšwê bohle ba ba nyamilexo.” Taelo yeo e šoma gape go Bakriste ba tloditšwego ba ba sa dutšego ba le lefaseng, bao ba e phethago ka thušo ya badirišani-gotee le bona, e lego “dinku tše dingwê.” Ka moka ba tšea karolo modirong wa go swaya ka tsela ya seswantšhetšo diphatla tša ‘batho bao ba llago e bile ba hlokofetše ka go bona makgapha a a dirwago ka gare ga Jerusalema ya bohlanogi yeo e swantšhetšago Bojakane.’ (Hesekiele 9:4) Batho ba bjalo ba nyamilego ba homotšwa ke ‘ditaba tše dibotse tša mmušo.’ (Mateo 24:14, bapiša le NW.) Ba thabišwa ke go tseba gore tshepedišo e kgopo ya dilo ya Sathane go se go ye kae e tla tšeelwa sebaka ke lefase le lefsa la Jehofa la go loka.
Ba Thabilego ke ba Boleta
7. Lentšu “bolêta” ga le bolele’ng?
7 Jesu o ile a tšwetša pele Thuto ya gagwe ya Thabeng ka gore: ‘Ba thabilego ke ba boleta , ka ge ba tla tšea lefase ya ba kabelo ya bona.’ (Mateo 5:5) Go ba le moya o boleta ka dinako tše dingwe go naganwa gore go bolela go ba le seka sa bofokodi. Eupša, ga go bjalo. Seithuti se sengwe sa Beibele ge se hlalosa seo se bolelwago ke lentšu leo le fetoletšwego e le “bolêta,” se ngwadile gore: “Seka se segolo sa motho yo a nago le [moya o boleta] ke gore ke motho yo a nago le boitshwaro ka mo go feletšego. Go ba le moya o boleta ga se go ba le botho bjo bo bontšhago bofokodi, go ba le maikwelo a lerato e bile ga se go homola kudu. Ke go ba le matla ao a lego ka tlase ga taolo.” Jesu o boletše mabapi le yena ka noši gore: ‘Ke yo boleta le wa pelo e kokobetšego.’ (Mateo 11:29) Lega go le bjalo, Jesu o ile a bontšha sebete ge a be a emelela melao ya motheo ya go loka.—Mateo 21:12, 13; 23:13-33.
8. Moya o boleta o tswalana kgaufsi le eng, gomme ke ka baka la’ng re nyaka seka se ditswalanong tša rena le ba bangwe?
8 Ka gona, go ba le moya o boleta go tswalana kgaufsi le boitshwaro. Ge e le gabotse, moapostola Paulo o lokeleditše boleta le boitshwaro kgaufsi le kgaufsi ge a be a bolela ka “dienywa tša Môya.” (Ba-Galatia 5:22, 23) Moya o boleta o swanetše go hlagolelwa ka thušo ya moya o mokgethwa. Ke seka sa Bokriste seo se dirago gore re be le khutšo le bao e sego badumedi gaešita le bao ba lego ka phuthegong. Paulo o ngwadile gore: “Aparang kxauxêlô le botho le boikokobetšô le bolêta le xo se fêle pelo. Le fêlê Lè rwalana; Le lebalêlanê xe xo na le e a naxo le taba le e mongwê.”—Ba-Kolose 3:12, 13.
9. (a) Ke ka baka la’ng go ba le moya o boleta go sa felele fela tswalanong ya rena le batho ba bangwe? (b) Ke ka tsela efe ba boleta ba tlogo “tšea lefase ya ba kabêlô ya bôná”?
9 Lega go le bjalo, go ba le moya o boleta ga go felele fela tswalanong ya rena le batho ba bangwe. Ka go ikokobeletša bogoši bja Jehofa ka go rata, re bontšha gore re ba boleta. Mohlala o mogolo tabeng ye ke Jesu Kriste, yo nakong ya ge a be a le mo lefaseng a ilego a bontšha moya o boleta le go ikokobeletša thato ya Tatagwe ka mo go feletšego. (Johane 5:19, 30) Selo sa bohlokwa kudu ke gore Jesu o tšea lefase e le bohwa bja gagwe, ka ge e le Mmuši wa lona yo a kgethilwego. (Psalme 2:6-8; Daniele 7:13, 14) Bohwa bjo o bo abelana le ba 144 000 e lego “ba xo ja bohwa le Kriste,” bao ba kgethilwego “bathong” gore “ba tlo buša mo lefaseng.” (Ba-Roma 8:17; Kutollo 5:9, 10; 14:1, 3, 4; Daniele 7:27) Kriste le babuši-gotee le yena ba tla buša banna le basadi ba dimilione ba swanago le dinku bao go bona go tlago go phethagala ka lethabo boporofeta bja psalme bjo bo rego: “Ba bolêta e tlo ba bôná beng ba naxa; ba tlo thaba ka botlalô bya moláô.”—Psalme 37:11; Mateo 25:33, 34, 46.
Ba Thabilego ke Bao ba Swerwego ke Tlala ya Gore ba Loke
10. Ke tsela efe e nngwe yeo ka yona bao ba ‘swerwego ke tlala ya gore ba loke le bao ba nyoretšwego go loka’ ba tlago go horišwa?
10 Tlhaloso e latelago yeo Jesu a e akareditšego ge a be a nea polelo thabeng yeo ya Galilea ke e rego: ‘Ba thabilego ke bao ba swerwego ke tlala ya gore ba loke le bao ba nyoretšwego go loka, ka gobane bona bao ba tlo horišwa.’ (Mateo 5:6) Jehofa ke yena a beelago Bakriste ditekanyetšo tša go loka. Ka go rialo, bao ba swerwego ke tlala ya gore ba loke le bao ba nyoretšwego go loka ge e le gabotse ba swerwe ke tlala e bile ba nyoretšwe tlhahlo e tšwago go Modimo. Batho ba bjalo ba tloga ba lemoga dibe tša bona gotee le go se phethagale ga bona gomme ba hlologelwa go ba boemong bja go ba ba amogelegago go Jehofa. E ba ba thabilego gakaakang ge ba e-kwa go tšwa Lentšung la Modimo gore ge e ba ba itshola e bile ba nyaka tebalelo motheong wa sehlabelo sa topollo sa Kriste, ba tla ba boemong bja go ba ba lokilego pele ga Modimo!—Ditiro 2:38; 10:43; 13:38, 39; Ba-Roma 5:19.
11, 12. (a) Ke ka tsela efe Bakriste ba tloditšwego ba fihlelelago go loka? (b) Go nyorelwa go loka ga badirišani-gotee le batlotšwa go tlošwa bjang?
11 Jesu o boletše gore batho ba bjalo ba be ba tla thaba, ka ge ba tlo “horišwa.” (Mateo 5:6) Bakriste ba tloditšwego bao ba bileditšwego go “buša” le Kriste legodimong ba bolelwa e le ba “tokafalo e išaxo bophelong.” (Ba-Roma 5:1, 9, 16-18) Jehofa e ba tatago bona, ka go rialo o ba thwala e le bana ba gagwe ba moya. Ba fetoga baja-bohwa-gotee le Kriste, bao ba bileditšwego go ba dikgoši le baperisita pušong ya gagwe ya Mmušo wa legodimong.—Johane 3:3; 1 Petro 2:9.
12 Badirišani-gotee le batlotšwa ga se ba tšwa ba bolelwa e le ba tokafalo e išago bophelong. Lega go le bjalo, ba na le tekanyo e itšego ya toka yeo ba e neilwego ke Jehofa ka baka la tumelo ya bona mading a tšholotšwego a Kriste. (Jakobo 2:22-25; Kutollo 7:9, 10) Ba lebelelwa e le ba lokilego bjalo ka bagwera ba Jehofa bao ba tlago go phološwa “tlaišexong e kxolo.” (Kutollo 7:14) Ka tlase ga “maxodimo a mafsa,” go nyorelwa ga bona go loka go tla tlošwa ka mo go oketšegilego ge ba fetoga karolo ya lefase le lefsa leo go lona “xo axilexo tokô.”—2 Petro 3:13; Psalme 37:29.
Ba Thabilego ke Bagaugedi
13, 14. Ke ka ditsela dife tše šomago re swanetšego go ipontšha re le ba nago le kgaugelo, gomme se se tla re hola bjang?
13 Ge Jesu a tšwetša pele Thuto ya gagwe ya Thabeng, o itše: ‘Ba thabilego ke bagaugedi, gobane bona bao ba tlo gaugelwa.’ (Mateo 5:7) Go ya ka molao, kgaugelo go naganwa gore e lebišitšwe go kwelobohloko ya moahlodi yo a tlogelago go nea mofoši kotlo e feletšego yeo e dumeletšwego ka tlase ga molao. Lega go le bjalo, mantšu a mathomo ao a fetoletšwego e le “kxauxêlô” go etša ge a dirišitšwe ka Beibeleng a bolela kudu ka go bontšha go naganela ka tsela e botho goba kwelobohloko yeo e tlišago kimollo go badiidi. Ka go rialo, bagaugedi ba bontšha gore ba na le kwelobohloko. Seswantšho sa Jesu sa Mosamaria wa kgaugelo se nea mohlala o mobotse wa motho yo a “dirilexo ka kxauxêlô” go motho yo a bego a le bothateng.—Luka 10:29-37.
14 E le gore re be le lethabo leo le tlišwago ke go bontšha kgaugelo, re swanetše go tšea karolo ditirong tše dibotse tša go bontšha botho go bao ba lego bothateng. (Ba-Galatia 6:10) Jesu o ile a kwela batho bao a ba bonego bohloko. O ile “a ba šôkêlwa xobane ba be ba le byalo ka dinku tše di se naxo modiši; a thôma xo ba ruta ka ditaba tše ntši.” (Mareka 6:34) Jesu o ile a lemoga gore dinyakwa tša bohlokwa kudu go batho e be e le tša moya. Le rena re ka ipontšha re le ba nago le kwelobohloko gotee le kgaugelo ka go boledišana le ba bangwe ka dilo tšeo ba tlogago ba di nyaka—‘ditaba tše dibotse tša mmušo.’ (Mateo 24:14, bapiša le NW.) Le gona re ka nea thušo e šomago go Bakriste-gotee le rena ba tšofetšego, bahlologadi le ditšhiwana gomme re “tsošê ba dipelo tše di tapilexo.” (1 Ba-Thesalonika 5:14; Diema 12:25; Jakobo 1:27) Se se ka se re tlišetše lethabo feela eupša gape se tla re dira gore re amogele kgaugelo ya Jehofa.—Ditiro 20:35; Jakobo 2:13.
Ba Pelo-tshekegi le Badira-khutšo
15. Ke ka tsela efe re ka bago ba pelo-tshekegi le badira-khutšo?
15 Thutong ya Thabeng Jesu o akareditše tlhaloso ya botshelela le ya bošupa ka mokgwa o latelago: ‘Ba thabilego ke ba pelo-tshekegi gobane bona bao ba tlo bona Modimo. Ba thabilego ke badira-khutšo, gobane bona bao ba tlo bitšwa bana ba Modimo.’ (Mateo 5:8, 9) Pelo e sekilego ga se yeo e hlwekilego feela boitshwarong eupša gape e hlwekile le moyeng gomme ke e kopanego boineelong bja yona go Jehofa. (1 Koronika 28:9; Psalme 86:11) Badira-khutšo ba phela ka khutšo le bana babo bona ba Bakriste, gomme ba phela ka khutšo le baagišani ba bona ge e ba go kgonega. (Ba-Roma 12:17-21) Ba ‘nyaka khutšo gomme ba a e kganyelela.’—1 Petro 3:11.
16, 17. (a) Ke ka baka la’ng batlotšwa ba bitšwa “bana ba Modimo,” gomme ba “bôna Modimo” ka tsela efe? (b) “Dinku tše dingwê” di “bôna Modimo” ka tsela efe? (c) Ke neng moo “dinku tše dingwê” di tlago go fetoga “bana ba Modimo” ka kgopolo e feletšego le gona bjang?
16 Badira-khutšo ba pelo-tshekegi ba holofetšwa gore ba “tlo bitšwa bana ba Modimo” gomme “ba tlo bôna Modimo.” Bakriste ba tloditšwego ba tlotšwa ka moya gomme ba thwalwa ke Jehofa e le “bana” ba gagwe ba sa dutše ba le lefaseng. (Ba-Roma 8:14-17) Ge ba tsošetšwa gore ba yo ba le Kriste legodimong, ba hlankela mo Jehofa a lego gona gomme ba Mmona e le ka kgonthe.—1 Johane 3:1, 2; Kutollo 4:9-11.
17 “Dinku tše dingwê” tšeo di nago le khutšo di hlankela Jehofa ka tlase ga Modiši yo Botse, Jesu Kriste, yo a fetogago ‘Tatago tšona ka mo go sa felego.’ (Johane 10:14, 16; Jesaya 9:5) Bao ba fetago tekong ya mafelelo ka katlego ka morago ga Nywaga e Sekete ya Pušo ya Kriste ba tla thwalwa e le bana ba Jehofa ba lefaseng gomme ba ba “le tokoloxô ya xe bana ba Modimo bà e-ya letaxong.” (Ba-Roma 8:21; Kutollo 20:7, 9) Ka ge ba fagahlela se, ba bitša Jehofa gore ke Tatago bona, ka gobane ba neela maphelo a bona go yena, ba lemoga gore ke yena Monei-Bophelo wa bona. (Jesaya 64:8) Go etša Jobo le Moše ba bogologolo, ba ka kgona go “bôna Modimo” ka mahlo a tumelo. (Jobo 42:5; Ba-Hebere 11:27) Ka ‘mahlo a dipelo tša bona’ le ka tsebo e nepagetšego ya Modimo, ba lemoga dika tša Jehofa tše di kgahlišago gomme ba leka ka matla go mo ekiša ka go dira thato ya gagwe.—Ba-Efeso 1:18; Ba-Roma 1:19, 20; 3 Johane 11.
18. Go ya ka ditlhaloso tša pele tše šupago tšeo Jesu a di akareditšego Thutong ya Thabeng, ke bomang bao ba hwetšago lethabo la kgonthe lehono?
18 Re bone gore bao ba lemogago dinyakwa tša bona tša moya, bao ba nyamilego, ba boleta, bao ba swerwego ke tlala ya gore ba loke le bao ba nyoretšwego go loka, bagaugedi, ba pelo-tshekegi le badira-khutšo ba hwetša lethabo la kgonthe ka go hlankela Jehofa. Lega go le bjalo, batho ba bjalo ba be ba dutše ba lebeletšana le kganetšo, gaešita le tlaišo ka dinako tšohle. Na se se šitiša lethabo la bona? Potšišo yeo e tla ahla-ahlwa sehlogong se se latelago.
[Dipotšišo tša Thuto]
[Caption on page 10]
‘Ba thabilego ke bao ba lemogago dinyakwa tša bona tša moya’
[Caption on page 10]
‘Ba thabilego ke bagaugedi’
[Caption on page 10]
‘Ba thabilego ke bao ba swerwego ke tlala ya gore ba loke le bao ba nyoretšwego go loka’
E le go Boeletša
• Ke lethabo la mohuta ofe leo le hwetšwago ke bao ba lemogago dinyakwa tša bona tša moya?
• Bao ba nyamilego ba homotšwa ka ditsela dife?
• Re bontšha moya o boleta bjang?
• Ke ka baka la’ng re swanetše go ba bagaugedi, ba pelo-tshekegi le badira-khutšo?