Dipotšišo tše Tšwago go Babadi

Phuthego ya Bokriste e lebelela bojato bjang?

Lentšu la Modimo le ganetša botagwa le bojato gomme le tšea mekgwa ye ka bobedi e sa amogelege go batho bao ba hlankelago Modimo. Ka gona, phuthegong ya Bokriste motho yo a itlwaeditšego bojato le yoo a tlwaetšego go tagwa ba a swana. Motho wa setagwa goba wa sejato, e ka se be karolo ya phuthego ya Bokriste.

Diema 23:20, 21, (PK) e re: “O se ke wa tlwaelana le dihuri tša beine, le ba ba jago dinama ka bojato. Gobane dihuri le dijato di tlo diila, gomme serokoroko se tlo apara mankgeretla.” Go Doiteronomio 21:20 re bala ka motho wa ‘moarogi le wa senganga,’ yoo go ya ka molao wa Moše a bego a swanetše go bolawa. Go ya ka temana ye, dilo tše pedi tšeo di bego di dira gore motho yo e be lerabele le gore a se itshole ke ‘go ba sejato le go ba setagwa.’ Go molaleng gore Isiraeleng ya bogologolo bojato bo be bo tšewa e le mokgwa o mobe go bao ba nyakago go hlankela Modimo.

Ka gona-ge, sejato ke’ng, gomme Mangwalo a Bokriste a Segerika a re’ng ka taba ye? Sejato se hlaloswa e le “motho yo a ineetšego megabarung le go phakeng dijo le dino.” Ka gona, ntlha ke gore bojato ke mokgwa o mongwe wa megabaru gomme Lentšu la Modimo le re botša gore “[batho] ba mexabaru” ke mohuta wa batho bao ba ka se tsenego Mmušong wa Modimo. (1 Ba-Korinthe 6:9, 10; Ba-Filipi 3:18, 19;  1 Petro 4:3) Ka godimo ga moo, moapostola Paulo o ile a bolela ka “botaxwa, le bohori, le tše di swanaxo le tšeo” ge a be a lemoša Bakriste ka “medirô ya nama.” (Ba-Galatia 5:19-21) Gantši go ja kudu go sepedišana le botagwa le mašata. Ka mo go swanago, ga go pelaelo gore bojato bo akareditšwe polelwaneng ya Paulo e rego, “le tše di swanaxo le tšeo.” Go etša e mengwe ya “medirô ya nama,” Mokriste yoo a tumilego ka bojato gomme a sa nyake go fetola mokgwa wa gagwe wa megabaru, o swanetše go kgaolwa phuthegong.—1 Ba-Korinthe 5:11, 13. *

Gaešita le ge Lentšu la Modimo le bea botagwa legorong letee le bojato, go bonolo go lemoga ge motho e le setagwa go feta ge e le sejato. Maswao a bontšhago gore motho o tagilwe gantši a bonagala gabotse. Lega go le bjalo, go tseba bokgole bjoo go bjona motho a ka tlogago a lebelelwa e le sejato go ka ba thata kudu ka gobane bojato ga bo bonwe ka go fo lebelela motho. Ka gona, go nyakega gore bagolo ba phuthego ge ba swaragana le taba ye go bolelwago ka yona, ba be šedi kudu gomme ba diriše temogo.

Ka mohlala, go nona ka mo go feteletšego e ka ba pontšho ya gore motho ke sejato, eupša ga se ka mehla go lego bjalo. Ka dinako tše dingwe ge motho a nonne ka mo go feteletšego e ka ba ka baka la bolwetši. Maemo a leabela le ona a ka dira gore motho a none ka mo go feteletšego. Le rena re swanetše go gopola gore go nona ka mo go feteletšego ke boemo bja mmele, mola bojato e le tshekamelo. Go nona ka mo go feteletšego go hlaloswa e le “boemo bjo bo lemogwago ka go ba le makhura a mantši mmeleng,” mola bojato e le “megabaru goba go ikgotsofatša go feta tekano.” Ka gona, bojato ga bo lemogwe go ya ka bogolo bja mmele eupša bo lemogwa go ya kamoo motho a sekametšego ka gona go jeng. Motho a ka ba le mmele wa go itekanela goba a ba yo mosesane eupša a ba sejato. Ka godimo ga moo, gore motho o na le mmele wa go itekanela go ka fapa-fapana kudu go ya ka mafelo.

Ke maswao afe a bontšhago gore motho ke sejato? Gantši motho wa sejato ga a kgone go itshwara, a ka ja kudu go ba go fihlela a bipetšwe e bile a sellega. Go palelwa ke go itshwara mo ga gagwe, go bontšha gore ga a iše felo ka gore o nyatšiša leina la Jehofa le gore o theoša botumo bjo bobotse bja batho ba Gagwe. (1 Ba-Korinthe 10:31) Ka lehlakoreng le lengwe, ga go bolele gore motho yoo ka dinako tše dingwe a jago kudu o tla tšewa e le “wa mexabaru.” (Ba-Efeso 5:5) Lega go le bjalo, go ya ka Ba-Galatia 6:1, Mokriste yo bjalo a ka no swanelwa ke gore a thušwe. Paulo o re: “Bana bešo, xe motho a thšoxa à wetše molatong, lena ba Le lexo ba Môya, Le mo tsošê ka môya o bonôlô; xomme le lena Le itôtê, xore Le se wêlê molekong.”

Ke ka baka la’ng keletšo ya Beibele ya mabapi le go phema go ja go feta tekano e le ya bohlokwa gakaakaa lehono? Ke ka gobane Jesu o ile a lemoša, kudu-kudu mabapi le mehleng ya rena gore: “Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša bophelô byono, ’me letšatši leo la tlo Le wêla sehloxo. Xobane le tlo etša sefu xe le [le] wêla.” (Luka 21:34, 35) Go phema go ipolaiša dijo ke tsela e nngwe e bohlokwa ya go phema mokgwa wa bophelo woo o senyago boemo bja moya.

Go lekanyetša ke seka se sebotse sa Bokriste. (1 Timotheo 3:2, 11) Ka gona, ruri Jehofa o tla thuša bohle bao ba ikemišeditšego go diriša keletšo ya Beibele tabeng ya go lekanyetša mekgweng ya go ja le ya go nwa.—Ba-Hebere 4:16.

[Mengwalo ya ka tlase]