Na re tla ka ra Thabela Tšhireletšego ya Kgonthe?

KE MANG yo a sa thabelego go bona bana ba bapala ka lethabo le batswadi ba bona ba lerato? Bana ba ikwa ba šireletšegile ka mo go feletšego ge ba e-na le batswadi ba bona ba lerato. Lega go le bjalo, go bana ba bantši, dinako tše bjalo tša lethabo di ba gona ka sewelo. Go sa dutše go le bjalo, bana ba bangwe ba swanetše go tshwenyega letšatši le letšatši mabapi le gore ba tla robala kae bošego. Na go na le kholofelo le ge e le efe bakeng sa bana bao ba se nago magae le batho ba bangwe bao ba phelago ba sa šireletšega?

Le ge bokamoso bo ka bonagala e se bjo bo kgahlišago, Lentšu la Modimo le nea kholofelo. Moporofeta Jesaya o boletše e sa le pele gore letšatši le tla tla leo ka lona bohle ba tlago go phela ka tlase ga tšhireletšego e feletšego. O ngwadile gore: “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.”—Jesaya 65:21, 22.

Eupša na kholofelo ye e na le motheo o tiilego? Ge e le gabotse, lentšu “kholofelo” ga se gantši le bolelago go kgonthišega. Ka mohlala, kua Brazil, motho a ka kwa mantšu a go swana le a: “A esperança é a última que morre.” Ka go lebanya a bolela gore, “Kholofelo ke selo sa mafelelo se se hwago.” Se se bontšha gore batho ba bantši ba dula ba e-na le kholofelo gaešita le ge go se na motheo wa kgonthe wa kholofelo. Lega go le bjalo, kholofelo yeo Modimo yo a phelago a re neago yona ke e fapanego. Moapostola Paulo o ngwadile gore: “E a dumêlaxo a ka se lešwe dihlong.” (Ba-Roma 10:11) Diporofeto tša Beibele tše di šetšego di diregile di re nea kgonthišetšo ya gore dikholofetšo tšeo Jehofa Modimo a di holofeditšego le tšona di tla phethagala. Ge dikholofetšo tšeo di phethagala, maemo ao a gapeletšago bana go dula setarateng e tla ba selo sa nako e fetilego.

Gaešita le lehono, keletšo e šomago e hwetšwago ka Beibeleng e ka thuša bao ba se nago kholofelo gore ba kaonefatše maphelo a bona gomme ba hwetše tšhireletšego ya kgonthe. Seo se ka kgonega bjang? Dihlatse tša Jehofa tša lefelong la geno di tla thabela go go thuša gore o hwetše karabo ya potšišo ye.