Na o Nyaka go Phela ka mo go sa Felego?

MOKGEKOLO wa kua Japane o ile a bolela gore: “Ga ke boife go hwa. Eupša ke kwešwa bohloko ke gore ke tla swanelwa ke go arogana le matšoba a.” Modiredi wa Mokriste yo a bego a etetše legae la gagwe o ile a kwešiša tsela yeo a bego a ikwa ka yona, ka ge mokgekolo yo a be a e-na le serapana se sebotse. Bontši bja batho bao ba bolelago gore ga ba boife go hwa ba tloga ba thabela mediro e kgahlišago ya tlholo gomme ruri ba ka thabela go phela ka mo go sa felego.

Na go phela ka mo go sa felego go a kgonega? Ba bantši ba ka phaela kgopolo e bjalo ka thoko. Ba bangwe ba ka ba ba bolela gore ga ba kgahlegele go phela ka mo go sa felego. Ke ka baka la’ng motho a ka ikwa ka tsela yeo?

 Bophelo bjo bo sa Felego—Na bo Leša Bodutu?

Ba bangwe ba nagana gore go phela ka mo go sa felego go tla leša bodutu. Ba ka bolela ka bophelo bjo bo lešago bodutu bja batho ba bantši bao ba rotšego modiro ba ba se nago mo gontši mo ba ka go dirago ge e se go hlwa ba bogetše thelebišene. Ge e ba o ikwa ka tsela yeo, ela hloko seo molepi wa dinaledi Robert Jastrow a se boletšego ge a be a botšišwa ge e ba bophelo bjo bo sa felego e be e tla ba tšhegofatšo goba thogako. Jastrow o arabile ka gore: “E tla ba tšhegofatšo go bao ba nago le menagano ya go rata go tseba le kganyogo e sa felego ya go nyaka go ithuta. Kgopolo ya gore ba na le nako e sa felego ya go monya tsebo e be e tla ba e kgothatšago kudu go bona. Eupša go ba bangwe bao ba naganago gore ba ithutile dilo ka moka le bao ba tšwafago go nagana, bophelo bjo bo sa felego e be e tla ba thogako e šoro. Ba be ba ka se tsebe gore ba diriše nako ya bona bjang.”

Gore o tla bona bophelo bjo bo sa felego e le bjo bo lešago bodutu goba bjo bo sa lešego bodutu go ithekgile kudu ka boemo bja gago bja kgopolo. Ge e ba o e-na le ‘monagano wa go nyaka go tseba le kganyogo e sa felego ya go nyaka go ithuta,’ nagana ka seo o ka se fihlelelago tabeng ya bokgabo, mmino, go thala dipolane, go hlokomela serapana goba selo le ge e le sefe se se swanetšego seo o nyakago go se fihlelela. Bophelo bjo bo sa felego lefaseng bo tla nea ditebelelo tše dibotse tša go godiša bokgoni bja gago dikarolong tše di fapa-fapanego tša modiro.

Go kgona go bontšha lerato le go ba le lona ka mo go sa felego go tla dira gore bophelo bjo bo sa felego e be bjo bo kgotsofatšago e le ka kgonthe. Re bopilwe re e-na le bokgoni bja go bontšha lerato, gomme re a thaba ge re ikwa re ratwa. Go bontšhana lerato la kgonthe go tliša kgotsofalo e tseneletšego yeo e sa hwelelego ge nako e dutše e e-ya. Go phela ka mo go sa felego ga go re nee feela sebaka se se sa felego sa go rata magagabo rena, eupša gape le sa go rata Modimo ka mo go kgethegilego. Moapostola Paulo o boletše gore: “Fêla motho e a rataxo Modimo, ké yêna a tsebilwexo ke Modimo.” (1 Ba-Korinthe 8:3) A tebelelo e botse gakaakang—go tseba le go tsebja ke Mmuši wa legohle! Go feta moo, thuto ga e golelwe ge e le mabapi le go ithuta ka Mmopi wa rena yo lerato. Ka gona, ke bjang bophelo bjo bo sa felego e ka bago bjo bo lešago bodutu le bjo bo sa putsego?

Bophelo—Ke bjo Bokopana le bjo Bohlokwa

Ba bangwe ba nagana gore go ba ga bophelo bjo bokopana ke gona go dirago gore e be bjo bohlokwa ka tsela ye. Ba ka bapiša bophelo le gauta, yeo e bago gona feela ka ditekanyo tše sego kae. Ba bolela gore ge e ba gauta e be e ka hwetšwa gohle, bohlokwa bja yona bo be bo tla fokotšega. Lega go le bjalo, gauta e be e tla no ba e botse. Ka kgonthe seo ke sa therešo le ka bophelo.

Re ka bapiša go thabela bophelo bjo bo sa  felego le go ba le moya o montši. Basesiši ba dikepe tšeo di sepelago feela ka tlase ga meetse ba tla lebelela moya e le o bohlokwa ka mo go kgethegilego. Ka morago ga go thušwa go tšwa ka meetseng, na o nagana gore ba tla belaela ka ntle le go hloka tebogo mabapi le go thabela gape moya o montši? Ga go bjalo le gatee!

Ka go swana le basesiši ba bjalo, re ka phološwa, e sego feela ka tebelelo ya go phela ka nywaga feela e sego kae, eupša ka tebelelo e kgolo ya go phela ka mo go sa felego. Moapostola Paulo o ngwadile gore: “Moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.” (Ba-Roma 6:23) Ka sehlabelo sa Jesu sa topollo, Modimo o tla tloša go se phethagale le lehu bathong gomme o tla nea bao ba kwago mpho ya bophelo bjo bo sa felego. Re swanetše go ba bao ba lebogago gakaakang ka baka la tokišetšo e bjalo e lerato!

Go Thwe’ng ka Batho Bao o ba Ratago?

Batho ba bangwe ba ka nagana gore: ‘Go thwe’ng ka batho bao ke ba ratago? Bophelo bjo bo sa felego lefaseng bo ka se bolele selo gakaalo go nna ge e ba ba tla ba ba se gona.’ Mohlomongwe o šetše o montše tsebo ya Beibele gomme o ithutile ka kgonagalo ya go thabela bophelo bjo bo sa felego lefaseng la paradeise. (Luka 23:43; Johane 3:16; 17:3) Ka tlhago, o nyaka gore ditho tša kgaufsi tša lapa leno, ba bangwe bao o ba ratago le bagwera ba bohlokwa ba be gona, ba thabele dilo tšeo o holofelago go di hwetša lefaseng le lefsa la go loka la Modimo leo a le holofeditšego.—2 Petro 3:13.

Eupša go thwe’ng ge e ba bagwera ba gago le batho bao o ba ratago ba sa bontšhe kgahlego ya go phela ka mo go sa felego lefaseng la paradeise? O se ke wa dumelela seo se go dira gore o nyame. Tšwela pele o monya tsebo e nepagetšego ya Mangwalo, gomme o dire dilo ka go dumelelana le yona. Moapostola Paulo o ngwadile gore: “Wene mosadi, O tseba’ng? Mohlomong O tlo phološa monna eo. Le wene monna, O tseba’ng? Mohlomong O tlo phološa mosadi eo.” (1 Ba-Korinthe 7:16) Batho ba ka fetoga. Ka mohlala, monna yo mongwe yo a kilego a ganetša Bokriste o ile a fetoga gomme ka morago ya ba mogolo ka phuthegong ya Bokriste. O re: “Ke thabile kudu gore lapa la-ka le le rategago le ile la emela melao ya motheo ya Beibele ka potego e sa kwanantšhego kganetšong ya-ka ka moka.”

Modimo o kgomegile kudu ka bophelo bja gago le maphelo a batho bao o ba ratago. Ka kgonthe, “Morêna . . . xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Jehofa Modimo o nyaka gore wena le batho bao o ba ratago le phele ka mo go sa felego. Lerato la gagwe ke le legolo kudu go feta la batho bao ba sa phethagalago. (Jesaya 49:15) Ka gona, ke ka baka la’ng o sa hlagolele tswalano e botse le Modimo? Ka go rialo o ka kgona go thuša batho bao o ba ratago go dira se se swanago. Gaešita le ge ga bjale ba se na kholofelo ya go phela ka mo go sa felego, boemo bja bona bja kgopolo bo ka fetoga ge ba go bona o dira dilo ka go dumelelana le tsebo e nepagetšego ya Beibele.

Go thwe’ng ka bao o ba ratago bao ba ka bago ba go lahlegetše ka lehu? Beibele e swaretše ba dimilione bao ba hwilego kholofelo e botse kudu ya tsogo—go tsošwa lehung le go phela lefaseng la Paradeise. Jesu Kriste o holofeditše gore: “Xo tla lebaka leo bohle ba lexo mabitleng ba tl’o xo . . . tšwa.” (Johane 5:28, 29) Gaešita le bao ba hwilego ba sa tsebe Modimo ba tla tsošetšwa bophelong, ka gobane Beibele e re: “Bahu ba tlo tsoxa, bohle, baloki le ba s’a lokaxo.” (Ditiro 24:15) E tla ba mo go thabišago gakaakang go amogela batho ba bjalo gape bophelong!

Bophelo bjo bo sa Felego—Tebelelo e Thabišago

Ge o ka hwetša lethabo le kholofelo gona bjale go sa šetšwe mathata ka moka a lefase le, ruri o tla kgona go thabela bophelo bjo bo sa felego lefaseng la paradeise. Lega go le bjalo, ge yo mongwe wa Dihlatse tša Jehofa a be a bontšha ditšhegofatšo tšeo bophelo bjo bo sa felego bo tlago go di tliša, mosadi yo mongwe o itše: “Ga ke nyake go phela ka mo go sa felego. Bophelo bjo bja nywaga e 70 goba e 80 bo ntekane.” Mogolo wa Mokriste yo go diregilego gore a be gona moo o ile a mmotšiša gore: “Na o kile wa nagana  mabapi le kamoo bana ba gago ba bego ba tla ikwa ka gona ge o tla be o hwile?” O ile a sekiša megokgo ge a be a nagana ka manyami ao ba bego ba tla ba go ona ka baka la go lahlegelwa ke mmago bona. O dumela ka gore: “E be e le la mathomo ke lemoga kamoo ke bego ke e-na le boithati ka gona, gomme ke ile ka kgona go bona gore bophelo bjo bo sa felego ga se kholofelo ya boithati eupša bo akaretša ditswalano tša rena le ba bangwe.”

Ba bangwe ba ka nagana gore ga go na taba go motho le ge e le ofe gore o a phela goba o a hwa. Lega go le bjalo, go na le taba go Monei-Bophelo wa rena yo a rego: “Ka bophelô bya-ka . . . ruri xa ke kxahlwe ke lehu la mo-dira-dibe. Se se nkxahlaxo ké xe mo-dira-dibe à boa, a lahla tsela yeo ya xaxwe, a phela.” (Hesekiele 33:11) Ka ge Modimo a kgomegile gakaalo ka bophelo bja gaešita le batho ba kgopo, ruri o tloga a e-na le taba ka mo go tseneletšego ka bao ba mo ratago.

Kgoši Dafida wa Isiraele ya bogologolo o be a e-na le kholofelo tlhokomelong e lerato ya Jehofa. Dafida o kile a bolela gore: “Xobane tate le mmê bôná ba ntloxetše; ’me Wêna Morêna O a nkamoxela.” (Psalme 27:10) Go bonagala Dafida a be a kgonthišegile ka lerato leo batswadi ba gagwe ba bego ba mo rata ka lona. Eupša gaešita le ge batswadi ba gagwe—batho ba lego kgaufsi kudu le yena—ba be ba ka mo tlogela, o be a tseba gore Modimo a ka se mo lahle. Ka baka la lerato le go kgomega ga gagwe, Jehofa o re nea bophelo bjo bo sa felego le bogwera bja sa ruri le yena. (Jakobo 2:23) Na ga se ra swanela go amogela ka tebogo dimpho tše tše di kgahlišago?

[Caption on page 7]

Go rata Modimo le moagišani go tla dira gore go phela ka mo go sa felego go be le mohola