“Xò Taxa Mokutwana Wa Moloki”

GE NTWA ya Haramagedone e hlasela le go fediša tshepedišo ya Sathane e mpe ya dilo, “ngwakô wa yo mobe ó tlo šwalalanywa.” Go thwe’ng ka “mokutwana wa moloki”? Go ba gona, o tla “taxa” lefaseng le lefsa le le dirilwego ke Modimo.—Diema 14:11.

Lega go le bjalo, go ba go fihla ka nako yeo ‘ba babe ba tlago go fedišwa mo nageng,’ bao ba se nago bosodi ba swanetše go phela le bona. (Diema 2:21, 22) Na baloki ba ka taga ka tlase ga maemo a? Ditemana 1 go ya go 11 tša kgaolo 14 pukung ya Beibele ya Diema di bontšha gore ka go dumelela bohlale gore bo hlahle seo re se bolelago le seo re se dirago, re ka thabela tekanyo e itšego ya katlego le go tsepama gaešita le gona bjale.

Ge Bohlale bo Aga Lapa

Ge a bolela ka tutuetšo yeo mosadi a ka bago le yona katlegong ya lapa, Kgoši Salomo wa Isiraele ya bogologolo o re: “Bohlale bya mosadi bo ikaxêla ngwakô; ’atla tša wa lešilo di a o rutla.” (Diema 14:1) Mosadi yo bohlale o aga lapa la gagwe bjang? Mosadi yo bohlale o hlompha thulaganyo ya Modimo ya bohlogo. (1 Ba-Korinthe 11:3) Ga a tutuetšwe ke moya wa go itaola wo o apareditšego lefaseng la Sathane. (Ba-Efeso 2:2) O ikokobeletša monna wa gagwe gomme o bolela gabotse ka yena, ka go rialo a godiša tlhompho yeo ba bangwe ba mo hlomphago ka yona. Mosadi yo bohlale o tšea karolo ka mafolofolo thutong ya moya le e holago ya bana ba gagwe. O šoma ka thata bakeng sa go hola lapa la gagwe, a dira gore legae e be lefelo le le kgahlišago le la boiketlo go ba lapa. Mokgwa wa gagwe wa go dira dilo o bonagatšwa ke bohlale le go seketša. Mosadi yo ruri a lego bohlale o tlaleletša katlegong le go tsepameng ga lapa la gagwe.

Mosadi wa lešilo ga a hlomphe thulaganyo ya Modimo ya bohlogo. Ga a dika-dike go bolela gampe ka monna wa gagwe. Ka ge a sa seketše, o bapala ka tšhelete ya lapa yeo e hweditšwego ka thata. O senya gape le nako. Mafelelo e ba gore ntlo ga e hlwekišwe le go hlokomelwa, gomme bana ba tlaišega mmeleng le moyeng. Ee, motho wa lešilo o rutla lapa la gagwe.

Lega go le bjalo, ke’ng se se bontšhago gore motho ke yo bohlale goba ke lešilo? Diema 14:2 e re: “Mo-ya-ka-tokô ó šia Morêna; wa tsela-kxôpô ó a mo nyatša.” Moloki o boifa Modimo wa therešo, le gona “xo boifa Morêna ké mathômô a bohlale.” (Psalme 111:10) Motho yo ruri a lego bohlale o tseba gore o swanetše go “boifa Modimo, [gomme a] lôtê taêlô tša xaxwe.” (Mmoledi 12:13) Ka lehlakoreng le lengwe, motho wa lešilo o latela tsela yeo e sa dumelelanego le ditekanyetšo tša Modimo tša go loka. Ditsela tša gagwe di kgopame. Motho  yo bjalo o nyatša Modimo, gomme pelong ya gagwe a ipotša gore: “Xa xo Modimo!”—Psalme 14:1.

Ge Melomo e Dišwa ka Bohlale

Go ka thwe’ng ka polelo ya motho yo a boifago Jehofa le ya yo a Mo nyatšago? Kgoši e re: “Kxati ya mo-itheti ké molomo wa lešilo; melomo ya bahlale e diša beng ba yôna.” (Diema 14:3) Ka baka la go se be le bohlale bjo bo tšwago godimo, motho wa lešilo ga a na khutšo le teka-tekano. Bohlale bjo bo hlahlago dikgato tša gagwe ke bja lefase, bja bophoofolo le bja botemona. O bolela mantšu ao a nago le ditshele le makoko. Boikgogomošo bjo bo lego molomong wa gagwe bo bakela yena le ba bangwe mathata a mantši.—Jakobo 3:13-18.

Melomo ya motho yo bohlale e a mo hlahla goba go mo šireletša, gomme ya tlaleletša bophelong bja gagwe bjo bo thabišago. Bjang? Mangwalo a bolela gore: “Xo na le babolabodi ba ma-hlaba-wa-lerumô; xe e le leleme la mohlale ké moreku.” (Diema 12:18) Ge motho yo bohlale a bolela, ga a fo phatloga goba go gobatša ba bangwe. O a naganišiša pele a araba. (Diema 15:28) Polelo ya gagwe e nagannwego gabotse e a fodiša—e kgothatša ba meoya e gateletšegilego gomme e lapološa bao ba imelwago. Go e na le go galefiša ba bangwe, polelo ya gagwe e kgothaletša gore go be le khutšo le boiketlo.

Ge Bohlale bo Hlahla Maiteko a Motho

Se se latelago, Salomo o hlaba seema se se kgahlišago seo se bonagalago se bolela mabapi le go nyakega ga go bapetša mehola le dikotsi tša go dira modiro o itšego. O re: “Mo go se nago dipholo, sejelo se fela; eupša leruo le ata ka matla a dipholo.”—Diema 14:4, PK.

Ge e hlalosa seo se bolelwago ke seema se, nyakišišo e nngwe e hlalosa gore: “Legopo [sejelo] leo le se nago selo le bontšha gore ga go na dipholo [dikgomo] tšeo di swanetšego go fepša, gomme ka baka leo motho o lokologa bothateng bja go hlwekiša le go hlokomela diruiwa, gomme ditshenyagalelo di a fokotšega. Eupša ‘mohola’ wo o ganetšwa go temana 4b e rego: ge go se na dipholo, puno e ka se be e kgolo.” Rapolasa o swanetše go kgetha ka bohlale.

Na molao wa motheo wa seema se o ka se šome gape ge re nagana ka go nyaka mošomo o mongwe, go kgetha mohuta o itšego wa ntlo, go reka koloi, go ba le seruiwa le dilong tše dingwe tše di swanago le tšeo? Motho yo bohlale o tla bapetša mehola le dikotsi gomme a bona ge e ba maiteko a tloga a swanetše go dirwa le go baka ditshenyagalelo.

Ge Hlatse e le Bohlale

Salomo o tšwela pele ka gore: “Hlatse-potexi ké e sa akexo; mofereka-taba ké hlatse ya xo fora.” (Diema 14:5) Ruri maaka a hlatse ya maaka a ka gobatša kudu. Nabothe wa Jeseriele o ile a bolawa ka go kgatlwa ka mafsika ka baka la gore banna ba ba se nago mohola ba ile ba nea bohlatse bja maaka malebana le yena. (1 Dikxoši 21:7-13) Le gona na ga se therešo gore dihlatse tša maaka di ile tša bolela maaka phatlalatša malebana le Jesu, e lego seo se ilego sa lebiša lehung la gagwe? (Mateo 26:59-61) Dihlatse tša maaka di ile tša ba tša nea  bohlatse bja maaka malebana le Stefano—morutiwa wa pele wa Jesu yo a ilego a bolaelwa tumelo ya gagwe.—Ditiro 6:10, 11.

Motho wa maaka a ka no se lemogwe ka lebakanyana, eupša nagana ka bokamoso bja gagwe. Beibele e bolela gore Jehofa o hloile “hlatsi-phori kxêba-maaká.” (Diema 6:16-19) Kabelo ya motho yo bjalo e tla ba bodibeng bja mollo le tshebela—lehu la bobedi—gotee le badiradibe ba bjalo ka babolai, diotswa le ba medimo e šele.—Kutollo 21:8.

Hlatse e botegago ga e bolele maaka ge e nea bohlatse. Bohlatse bja yona ga bo šilafatšwe ke maaka. Lega go le bjalo, se ga se bolele gore e gapeletšega go nea tsebišo e tletšego go bao ba ka bago ba nyaka go gobatša batho ba Jehofa ka tsela e itšego. Mopatriareka Aborahama le mopatriareka Isaka ba ile ba se ke ba bolela ditaba ka botlalo go batho ba bangwe bao ba bego ba sa rapele Jehofa. (Genesi 12:10-19; 20:1-18; 26:1-10) Rahaba wa kua Jeriko o ile a šupa bakgomana ba kgoši tsela e fošagetšego. (Jošua 2:1-7) Jesu Kriste ka boyena o ile a gana go bolela tsebišo ka botlalo ge go dira bjalo go be go tla baka kgobalo e sa nyakegego. (Johane 7:1-10) O itše: “Se sekxêthwa Le se kê la se neêla dimpya.” Ke ka baka la’ng go sa swanela? E le gore “di se tlo . . . Le kutuloxêla ’me tša Le xobatša.”—Mateo 7:6.

Ge “Tsebo e se Thatana”

Na batho ka moka ba bohlale? Diema 14:6 (PK) e re: “Mokweri o tsoma bohlale, gomme ga a bo bone; eupša go e a nago le tlhaologanyo [tsebo, NW], go hwetša bohlale ga go thatana.” Mokweri goba monyatši a ka tsoma bohlale, eupša a palelwa ke go hwetša bohlale bja kgonthe. Ka ge mokweri ka makoko a nyatša dilo tša Modimo, o palelwa ke go hwetša senyakwa sa motheo sa bohlale—tsebo e nepagetšego ya Modimo wa therešo. Boikgogomošo bja gagwe le makoko di mo thibela go ithuta ka Modimo le go hwetša bohlale. (Diema 11:2) O itshwenyetša’ng a e hlwa a nyaka bohlale? Seema ga se nee karabo, eupša mohlomongwe o dira bjalo e le gore ba bangwe ba nagane gore o bohlale.

‘Tsebo ga se e thata’ go motho yo a nago le kwešišo. Go kwešiša go hlaloswa e le “go swara ka mogopolo, e lego: go hlaologanya,” “bokgoni bja go lemoga tswalano ya dilo tše itšego ka botlalo.” Ke bokgoni bja go kgokaganya dikarolo tše di fapa-fapanego tša taba gomme wa kwešiša taba ka botlalo, e sego feela dikarolo tše di aroganego. Seema se se bolela gore tsebo e hwetšwa gabonolo ke motho yo a nago le bokgoni bjo.

Tabeng ye, ela hloko phihlelo ya gago mabapi le go hwetša tsebo ya therešo ya Mangwalo. Ge o be o thoma go ithuta Beibele, go na le kgonagalo e kgolo ya gore dithuto tša motheo tša mabapi le Modimo, dikholofetšo tša gagwe le Morwa wa gagwe di be di le gare ga ditherešo tša mathomo tšeo o ithutilego tšona. Mathomong, o be o di bona e le dikarolo tše di aroganego. Eupša ge o be o tšwela pele o ithuta, o ile wa thoma go kgokaganya dikarolo tše gomme wa kgona go bona gabotse kamoo ditaba tše di fapa-fapanego di bego di tswalana  le morero ka moka wa Jehofa bakeng sa batho le lefase. Therešo ya Beibele e ile ya ba e kwagalago le e kgokaganego. Go ithuta le go gopola ditaba tše difsa go ile gwa thoma go ba bonolo ka gobane o ile wa kgona go bona kamoo di tswalanago ka gona le taba ka botlalo.

Kgoši e bohlale e lemoša mabapi le moo tsebo e ka se hwetšwego gona. E re: “Xe O tloxa mo O lebanexo le lešilo, O tloxa Ò hlokile melomo ya tsebô.” (Diema 14:7) Motho wa lešilo ga a na tsebo ya therešo. Melomo ya gagwe ga e bolele therešo. Re eletšwa gore re tloge go motho yo bjalo, gomme ke gabohlale go dula kgole le yena. Motho le ge e le ofe yo e lego “mokxônana-le-mašilo ó tlo thsereana.”—Diema 13:20.

Salomo o tšwela pele ka gore: “Bohlale bya Matsebe ké xo tseba tsela y’axwe; bošilo bya ditlatla ké xe ba iphora.” (Diema 14:8) Motho yo bohlale o naganišiša ka seo a tlago go se dira. O ela hloko dikgetho tše di fapa-fapanego tšeo a nago le tšona gomme a naganišiša ka mafelelo a ka bago gona go e nngwe le e nngwe. O kgetha tsela ya gagwe ka bohlale. Go thwe’ng ka motho wa lešilo? O kgetha tsela ya bošilo, a dumela gore o tseba seo a se dirago le gore o dira kgetho e kaone-kaone. Bošilo bja gagwe bo a mo fora.

Ge Bohlale bo Šireletša Ditswalano

Motho yo a hlahlwago ke bohlale o na le ditswalano tša khutšo le ba bangwe. Kgoši ya Isiraele e bolela gore: “Lešilo le kwêrwa xe le lefišwa; baloki ba a kxahlišana.” (Diema 14:9) Go ikwa o le molato goba go itshola ke taba e segišago go motho wa lešilo. O sentše ditswalano ka gae le mafelong a mangwe ka gobane a “dira molato motlae” gomme ga a tsome khutšo. (PK) Moloki o ikemišeditše go kgotlelela mafokodi a ba bangwe. O ikemišeditše go lebalela le go lokiša ditaba ge e ba yena ka noši a fošitše. Ka baka la ge a phegelela khutšo, o thabela ditswalano tše di thabišago le tše di tsepamego le ba bangwe.—Ba-Hebere 12:14.

Se se latelago, Salomo o bolela ka taba e beago mellwane ditswalanong tša batho. O re: “Pelo e tseba bohloko bya yôna; le thabô ya yôna xa e tsênwe ke o šele.” (Diema 14:10) Na ka mehla re ka kgona go ntšhetša ba bangwe sa mafahleng—e ka ba se se nyamišago goba se se thabišago—gomme ra ba botša e le ka kgonthe seo re lebeletšanago le sona? Le gona, na ka mehla motho o tla kwešiša kamoo motho yo mongwe a ikwago ka gona? Karabo dipotšišong tše ka bobedi ke aowa.

E le mohlala, nagana ka maikwelo a go nyaka go ipolaya. Yo a nago le maikwelo a a ka se a bolele ka mo go kwagalago go setho sa lapa goba mogwera. Le gona ga se ka mehla ba bangwe ba ka lemogago ditšhupo tša maikwelo a bjalo go bagwera ba bona. Ga se ra swanela go ikwa re e-na le molato ge re sa bone ditšhupo tše gomme re palelwa ke go gata mogato wa go thuša. Seema se se bile se ruta gore gaešita le ge e le mo go homotšago go retologela go mogwera yo a nago le kwelobohloko bakeng sa kgothatšo, batho ba ka se kgone go go homotša ka mo go feletšego. Re ka swanelwa ke go ithekga ka Jehofa feela ge go tliwa tabeng ya go kgotlelela mathata a mangwe.

“Ka Ngwakong wa Xaxwe xo tlo ba le Lešexo le Menônô”

Kgoši ya Isiraele e re: “Ngwakô wa yo mobe ó tlo šwalalanywa; xo šala xò taxa mokutwana wa moloki.” (Diema 14:11) Motho yo kgopo a ka no atlega tshepedišong ye ya dilo gomme a ka no ba a dula ntlong e botse, eupša tšeo di tla mo hola ka’ng ge a tla be a se gona? (Psalme 37:10) Ka lehlakoreng le lengwe, lefelo leo moloki a ka bago a dula go lona e ka ba e tloga e le la bobotlana. Eupša Psalme 112:3 e re, “ka ngwakong wa xaxwe xo tlo ba le lešexo le menônô.” Dilo tše ke’ng?

Ge mantšu a rena le mediro di hlahlwa ke bohlale, re na le “mahumô le kxodišô” tšeo di tlišwago ke bohlale. (Diema 8:18) Di akaretša tswalano ya khutšo le Modimo gotee le magagabo rena, e lego maikwelo a lethabo le go tsepama ka tekanyo e itšego. Ee, “mokutwana wa moloki” o ka taga gaešita le gona bjale.

[Caption on page 27]

Mosadi yo bohlale o aga lapa la gagwe

[Caption on page 28]

“Leleme la mohlale ké moreku”