Dipotšišo tše Tšwago go Babadi

Ke ka baka la’ng Jesu yo a tsošitšwego a ile a dumelela Tomase gore a mo sware mola pejana a ile a ganetša Maria Magdalena go dira bjalo?

Diphetolelo tše dingwe tša kgale tša Beibele di re nea kgopolo ya gore Jesu o boditše Maria Magdalena gore a se ke a mo swara. Ka mohlala, Beibele ya Sepedi e fetolela mantšu a Jesu ka gore: “Se nthswarê; xobane ke sa tlo rotoxêla xo Tate.” (Johane 20:17) Lega go le bjalo, lediri la mathomo la Segerika leo gantši le fetolelwago e le ‘go swara,’ le bolela “go kgomarela, go ngaparela, go gokarela, go kakatlela goba go swara ka go tia.” Ke mo go kwagalago gore Jesu o be a sa ganetše Maria Magdalena gore a fo mo swarwa, ka ge a ile a dumelela basadi ba bangwe bao ba bego ba le lebitleng gore ba ‘sware maoto a gagwe.’—Mateo 28:9.

Diphetolelo tše dintši tša leleme la mehleng yeno, tše bjalo ka New World Translation of the Holy Scriptures, The New Jerusalem Bible le The New English Bible, di re thuša go kwešiša seo ge e le gabotse se bolelwago ke mantšu a Jesu ka go a fetolela ka gore: “Se nkgomarele.” Ke ka baka la’ng Jesu a be a ka rialo go Maria Magdalena, yo e bego e le mogwera wa gagwe wa kgaufsi?—Luka 8:1-3.

Go molaleng gore Maria Magdalena o be a boifa gore Jesu o be a le kgaufsi le go tloga gomme a rotogela legodimong. A tutuetšwa ke kganyogo ya gagwe e matla ya go nyaka go ba le Morena wa gagwe, o ile a kgomarela Jesu ka go tia, a se mo dumelele gore a sepele. E le go mo kgonthišetša gore e be e se ya tšwa e e-ba nako ya gore a sepele, Jesu o ile a laela Maria gore a se mo kgomarele eupša go e na le moo a sepele gomme a yo tsebiša barutiwa ba gagwe ditaba tša go tsoga ga gagwe.—Johane 20:17.

Poledišano magareng ga Jesu le Tomase e be e le e fapanego. Ge Jesu a be a iponagatša go barutiwa ba bangwe, Tomase o be a se gona. Ka morago, Tomase o ile a bontšha go se kgolwe ga gagwe gore Jesu o tsogile ka go bolela gore o be a tla dumela ge feela a bone dintho tša Jesu tša dipikiri e bile a tsentše seatla sa gagwe lehlakoreng la Jesu leo le hlabilwego. Matšatšing a seswai ka morago, Jesu o ile a iponagatša gape go barutiwa. Mo nakong ye, Tomase o be a le gona, gomme Jesu o ile a mo dumelela gore a sware dintho tša gagwe.—Johane 20:24-27.

Ka go rialo, boemong bja Maria Magdalena, Jesu o be a lebeletšane le kganyogo e fošagetšego ya go nyaka go mo thibela go sepela; boemong bja Tomase, Jesu o be a thuša motho yo a bego a e-na le dipelaelo. Maemong ka bobedi, Jesu o be a e-na le mabaka a kwagalago a go gata mogato ka mokgwa wo a dirilego ka wona.