Keletšo e Bohlale ya Salomo

Mabapi Le Seo O Ka Se Balago

“GO DIRA dipuku tše ntši ga go fele, gomme go ithuta gagolo go lapiša mmele.” (Mmoledi 12:12, PK) Ge Kgoši Salomo yo bohlale wa Isiraele a be a ngwala mantšu ao nywageng e ka bago 3 000 e fetilego, o be a sa nyatše go bala. Go e na le moo, o be a bolelela go nyakega ga gore re be bao ba kgethago. A keletšo e lego nakong gakaakang lehono, ka ge go e-na le dilo tše dintši tše di balwago tšeo di gatišwago lefaseng ka bophara ngwaga le ngwaga!

Go molaleng gore “dipuku tše ntši” tšeo Salomo a bego a bolela ka tšona e be e se tše di agago goba tše di lapološago. Ka gona, o boletše gore go rata go di bala, ga go tliše mafelelo a mabotse le moputso wa sa ruri, go e na le moo go “lapiša mmele.”

Lega go le bjalo, na Salomo o be a bolela gore ga go na dipuku tšeo di neago tlhahlo e kwagalago, e ka botwago le yeo e ka holago mmadi? Aowa, ka gobane o ngwadile gape gore: “Mantšu a bahlale ké maxapeletši; le xôna a etša dimapolô tše di kokoteletšwexo felô xotee, tše di tlišitšwexo ke modiši o tee.” (Mmoledi 12:11) Ke therešo gore go na le mantšu a ngwadilwego ao bjalo ka “maxapeletši” a ka neago tutuetšo e holago. A ka tutueletša motho tseleng ya go loka. Go oketša moo, go etša “dimapolô tše di kokoteletšwexo,” a ka thuša go matlafatša boikemišetšo bja motho gomme a mo dira gore e be yo a tsepamego.

Mantšu a bjalo a bohlale re ka a hwetša kae? Go ya ka Salomo, mantšu a bohlokwa kudu go a bjalo a tšwa go Modiši o tee, e lego Jehofa. (Psalme 23:1) Ka gona, motho a ka dira gabotse kudu ka go kgetha puku yeo e buduletšwego ke Modimo e lego Beibele. Go bala mantšu a bjalo a buduletšwego ka mehla go ka thuša motho gore “e bê yo boló-ka-tlalô, a kxonišwê xo dira medirô e botse ka moka.”—2 Timotheo 3:16, 17.