Sepela Ka Go Botega

“Ge e le nna, ke tla sepela ka go botega.”—PSALME 26:11, NW.

1, 2. (a) Ke ka baka la’ng go botega ga batho e le karolo ya bohlokwa ya kgang mabapi le bogoši bja Modimo? (b) Dibopiwa tše bohlale di ka bontšha bjang gore di thekga bogoši bja Jehofa?

GE SATHANE a be a rabela tšhemong ya Edene, o ile a tsoša kgang ya legohle mabapi le go swanelega ga Modimo gore a buše dibopiwa tša Gagwe ka moka. Nakwana ka morago, o ile a rotoša tlhohlo ya gore batho ba be ba tla hlankela Modimo ge feela go dira bjalo go be go tla ba hola. (Jobo 1:9-11; 2:4) Ka gona, go botega ga batho go fetogile karolo ya bohlokwa ya kgang mabapi le bogoši bja Jehofa bja legohle.

² Le ge bogoši bja Modimo bo se bja ithekga ka go botega ga dibopiwa tša gagwe, batho gotee le bana ba Modimo ba moya ba ka bontšha moo ba emego gona ge e le mabapi le kgang ye. Bjang? Ka go kgetha go sepela ka go botega goba go se dire bjalo. Ka gona, go botega ga motho ke motheo wa bohlokwa wo a tlago go ahlolwa go ona.

3. (a) Ke’ng seo Jobo le Dafida ba bego ba nyaka gore Jehofa a se hlahlobe gomme a se ahlole? (b) Ke dipotšišo dife tšeo di rotogago tša mabapi le go botega?

³ Jobo o ile a bolela ka kgodišego gore: “[Jehofa] a nke ke êlwê ke kêlô ya xo loka, Modimo a mpônê xo hlôka bosodi [“ke botega,” NW].” (Jobo 31:6) Kgoši Dafida wa Isiraele ya bogologolo o ile a kgopela Jehofa gore a hlahlobe potego ya gagwe ge a be a rapela ka gore: “Morêna, nkahlolêlê, xobane ke swere ka tsela kè ila bosodi [“ke botega,” NW]; ke botile Wene Morêna, ka se kê ka thiša.” (Psalme 26:1) Ke gabohlokwa gakaakang gore le rena re sepele ka go botega! Eupša potego ke’ng, gomme go sepela ka go botega go bolela’ng? Ke’ng seo se tlago go re thuša gore re dule re sepela ka go botega?

‘Ke Sepetše ka go Botega’

4. Go botega go bolela’ng?

⁴ Go botega go na le kgopolo ya go loka, go hloka bosodi, go ba le toka le go hloka phošo. Lega go le bjalo, go botega go akaretša seo se fetago go fo dira se se lokilego. Ke go ba le kgopolo ya boitshwaro bjo bo swanetšego goba boineelo bja pelo ka moka go Modimo. Sathane o ile a belaela boikemišetšo bja Jobo ge a be a botša Modimo gore: “O k’O mo išê letsôxô O kxwathê mašapô a xaxwe [Jobo] le nama ya xaxwe, O bônê xe a tlo Xo hlala pepeneneng.” (Jobo 2:5) Go botega ga go nyake feela gore o gate mogato wo o swanetšego, eupša gape go nyaka gore o be le tutuetšo e swanetšego ya pelo.

5. Ke’ng se se bontšhago gore go dula ga rena re botega ga go bolele gore re swanetše go ba ba phethagetšego?

⁵ Lega go le bjalo, gore motho a dule a botega ga go bolele gore o swanetše go ba yo a phethagetšego. Kgoši Dafida e be e le motho yo a sa phethagalago gomme o ile a dira diphošo tše mmalwa tše dikgolo bophelong bja gagwe. Lega go le bjalo, Beibele e bolela ka yena e le monna yo a ilego a sepela ‘ka go botega ga pelo.’ (1 Dikxoši 9:4) Ka baka la’ng? Ka gobane Dafida o be a rata Jehofa. Pelo ya gagwe e be e ineetše go Modimo. O ile a amogela diphošo tša gagwe ka pelo e tšhweu, a amogela kgalemelo, gomme a lokiša ditsela tša gagwe. Ke therešo gore go botega ga Dafida go bonwa boineelong bja gagwe bja pelo ka moka le go rateng Modimo wa gagwe, Jehofa.—Doiteronomio 6:5, 6.

6, 7. Go sepela ka go botega go akaretša’ng?

⁶ Go botega ga go felele feela dikarolong tše itšego tša boitshwaro bja batho, tše bjalo ka go ineela bodumeding. Go akaretša ditsela ka moka tša rena tša bophelo. Dafida o ‘sepetše’ ka go botega. The New Interpreter’s Bible e re: “Lediri ‘sepela’ le bolela ‘tsela ya bophelo’ goba ‘mokgwa wa bophelo.’” Ge a bolela ka “ba-loka-ka-tsela,” mopsalme o opetše ka gore: “Ba lehlôxônôlô ké ba-lôta-mabohlatse-’axwe [Modimo], ba a nyaka ka pelo ka moka. Ké bao ba xo  ila bobe, ba tšea ka tsela ya xaxwe.” (Psalme 119:1-3) Go botega go nyaka gore ka mehla re nyake go dira thato ya Modimo gomme re sepele ka tsela ya gagwe.

⁷ Go sepela ka go botega go nyaka gore re ineele go Modimo ka go se kwanantšhe, gaešita le maemong a thata. Ge re kgotlelela diteko, re dula re tiile go sa šetšwe mathata goba re lwantšha dikgoketšo tša lefase le leo le sa boifego Modimo, go botega ga rena go tla thoma go bonagala. Re ‘thabiša pelo ya Jehofa’ ka gobane o kgona go fetola yo a mo nyatšago. (Diema 27:11) Ka gona, ka ge re e-na le lebaka le le kwagalago, re ka dira phetho e swanago le ya Jobo e rego: “Ke tlo hwa kè sešo ka re: Ke molato.” (Jobo 27:5) Psalme ya bo-26 e bontšha seo se tlago go re thuša gore re sepele ka go botega.

“Lekola ’Phsiô Tša-ka le Pelo Ya-ka”

8. O ithuta’ng kgopelong ya Dafida ya gore Jehofa a hlahlobe dipshio le pelo ya gagwe?

⁸ Dafida o rapetše ka gore: “Morêna, nnyakorêlê O mphêtlêkê; lekola ’phsiô tša-ka le pelo ya-ka.” (Psalme 26:2) Dipshio di ka gare-gare ga mmele. Dipshio ka tsela ya seswantšhetšo di emela dikgopolo le maikwelo a motho a ka gare-gare. Le gona, pelo ya seswantšhetšo ke motho yo a feletšego wa ka gare—tutuetšo, maikwelo le bohlale bja gagwe. Ge Dafida a be a kgopela gore Jehofa a mo hlahlobe, o be a rapelela gore dikgopolo le maikwelo a gagwe a ka gare-gare a lekolwe a be a seka-sekwe.

9. Ke ka tsela efe Jehofa a hlwekišago pelo le dipshio tša rena tša seswantšhetšo?

⁹ Dafida o ile a kgopela gore dipshio le pelo ya gagwe di hlwekišwe. Jehofa o hlwekiša bjang seo re lego sona ka gare? Dafida o opetše ka gore: “Ke tlo reta Jehofa e a nkeleditšego, e šita le dipshio tša-ka di lala di nthuta bošego.” (Psalme 16:7, PK) Seo se bolela’ng? Se bolela gore keletšo e tšwago go Modimo e ile ya fihla dikarolong tša ka gare-gare tša Dafida gomme ya dula moo, ya phošolla dikgopolo le maikwelo a gagwe a ka gare-gare. Go ka ba bjalo le ka rena ge e ba ka tebogo re naganišiša ka keletšo yeo re e hwetšago ka Lentšu la Modimo, ka baemedi ba gagwe le ka mokgatlo wa gagwe gomme ra e dumelela gore e dule ka gare-gare go rena. Go rapela Jehofa ka mehla gore a re hlwekiše ka tsela ye go tla re thuša gore re sepele ka go botega.

“Ke Itebanya le Botho bya Xaxo”

10. Ke’ng se se ilego sa thuša Dafida gore a sepele therešong ya Modimo?

¹⁰ Dafida o tšwetše pele ka gore: “Ke itebanya le botho bya xaxo; ke ithsepeletše therešong ya xaxo.” (Psalme 26:3) Dafida o be a tseba gabotse ka ditiro tša Modimo tša go bontšha botho bjo lerato, gomme o ile a naganišiša ka tšona ka tebogo. O ile a opela ka gore: “Môya wa-ka, rêta Morêna! O se lebalê tše di botse tše a Xo diretšexo tšohle.” Ge a gopola se sengwe sa dilo tšeo Modimo ‘a di dirilego,’ Dafida o ile a tšwela pele  ka gore: “Mo-dira-ka-xo-loka-le-molaô ké Morêna, xe a ahlolêla ba ba hlakišwaxo. Ditsela tša xaxwe ó di tsebišitše Mošê; Ba-Isiraele ó ba tsebiša ’tirô tša xaxwe.” (Psalme 103:2, 6, 7) Mohlomongwe Dafida o be a nagana ka mokgwa wo ba-Isiraele ba bego ba hlalefetšwa ke ba-Egipita ka gona mehleng ya Moše. Ge e ba go le bjalo, go naganišiša ka mokgwa wo Jehofa a ilego a tsebatša ditsela tša gagwe tša phološo ka gona go Moše go swanetše go ba go ile gwa kgoma pelo ya Dafida gomme gwa matlafatša go ikemišetša ga gagwe go sepela therešong ya Modimo.

11. Ke’ng se se ka re thušago gore re sepele ka go botega?

¹¹ Le gona, go ithuta Lentšu la Modimo ka mehla le go naganišiša ka seo re ithutago sona go lona go tla re thuša gore re sepele ka go botega. Ka mohlala, go gopola gore Josefa o ile a tšhaba ge mosadi wa Potifara a be a leka go mo gokeletša boitshwarong bjo bo gobogilego ruri go tla re kgothaletša gore re tšhabe maiteko a swanago lefelong la rena la mošomo, sekolong goba mafelong a mangwe. (Genesi 39:7-12) Go thwe’ng ge e ba re gokwa ke dibaka tša go atlega ka dilo tše di bonagalago goba maemo a go ba bao ba tsebegago le bao ba tutuetšago ba bangwe lefaseng? Re na le mohlala wa Moše, yo a ilego a tlogela botumo bja Egipita. (Ba-Hebere 11:24-26) Ga go pelaelo gore go dula re gopola ka kgotlelelo ya Jobo go tla re thuša go matlafatša boikemišetšo bja rena bja go dula re botegela Jehofa ka go se kwanantšhe go sa šetšwe malwetši le mathata. (Jakobo 5:11) Go thwe’ng ge e ba re tlaišwa? Ee, go gopola phihlelo ya Daniele ka moleteng wa ditau go tla re nea sebete!—Daniele 6:16-22.

“Xa k’a Dula le Batho ba Maaká”

12, 13. Ke bagwera ba mohuta mang bao re swanetšego go ba phema?

¹² Ge a bolela ka selo se sengwe seo se ilego sa matlafatša potego ya gagwe, Dafida o itše: “Xa k’a dula le batho ba maaká; xa nka ka ya le ba bomenetša. Ke hloile pitšô ya ba babe; xa ke dule le bakxôpô.” (Psalme 26:4, 5) Dafida o be a tloga a sa nyake go dula le ba kgopo. O be a hloile go gwerana le batho ba babe.

¹³ Go thwe’ng ka rena? Na re gana go ikgweranya le batho ba maaka ka mananeo a thelebišene, dibidio, difilimi, mekero ya Internet goba ka mekgwa e mengwe? Na re katoga batho bao ba utago seo ba lego sona? Ba bangwe sekolong goba mafelong a rena a mošomo ba ka itira eka ke bagwera ba rena ka maikemišetšo a boradia. Na re tloga re nyaka go aga segwera sa kgaufsi le batho bao ba sa sepelego therešong ya Modimo? Le ge bahlanogi ba ipolela e le bao ba nago le maikemišetšo a mabotse, ba ka uta morero wa bona wa go nyaka go re dira gore re se sa  hlankela Jehofa. Go thwe’ng ge e ba go e na le ba bangwe ka phuthegong ya Bokriste bao ba phelago maphelo a mabedi? Le bona ba ka uta seo ba tlogago ba le sona. Jayson, yo ga bjale a hlankelago e le mohlanka wa bodiredi, o be a e-na le bagwera ba bjalo bofseng bja gagwe. O bolela mabapi le bona gore: “Ka letšatši le lengwe yo mongwe wa bona o ile a re go nna: ‘Seo re se dirago gona bjale ga se sa bohlokwa ka gobane ge tshepedišo e mpsha e e-tla, re tla ba re šetše re hwile. Re ka se tsebe ge e ba go na le seo se re hlaetšego.’ Polelo e bjalo e ile ya mphafoša. Ga ke nyake gore ge tshepedišo e mpsha e e-tla e nkhwetše ke hwile.” Jayson ka bohlale o ile a fediša segwera sa gagwe le batho ba bjalo. Paulo o lemošitše ka gore: “Le se kê la forwa; mehlamo e mebe e senya bokwala.” (1 Ba-Korinthe 15:33) Ke gabohlokwa kudu gakaakang gore re pheme go gwerana le batho ba babe!

‘Ke tla Anegela Batho Mehlolo ya Gago ka Moka’

14, 15. Re ka ‘batamela aletare ya Jehofa’ bjang?

¹⁴ Dafida o tšwetše pele ka gore: “Ke hlapa diatla ka xo ila bobe, ka tseb’o batamela aletare ya xaxo, Morêna.” Ka baka la’ng? “Ka kxôna xo kwatša lentšu la xo leboxa, ka anêxêla batho mehlôlô ya xaxo ka moka.” (Psalme 26:6, 7) Dafida o be a nyaka go dula a hlwekile boitshwarong e le gore a kgone go rapela Jehofa le go tsebatša boineelo bja gagwe go Yena.

¹⁵ Dilo ka moka tše di tswalanago le borapedi bja therešo tšeo di bego di le kua tabarenakeleng gomme ka morago tša ba kua tempeleng e be e le “seswanthšô le moriti wa tša kwa lexodimong.” (Ba-Hebere 8:5; 9:23) Aletare e be e swantšhetša go rata ga Jehofa go amogela sehlabelo sa Jesu Kriste sa go lopolla batho. (Ba-Hebere 10:5-10) Re hlapa diatla tša rena ka go ila bobe gomme ra “tseb’o batamela aletare [ya Jehofa]” ka go ba le tumelo sehlabelong seo.—Johane 3:16-18.

16. Go tsebatša mediro ya Modimo e kgahlišago go ba bangwe go re hola bjang?

¹⁶ Ge re nagana ka dilo ka moka tšeo topollo e dirago gore di kgonege, na dipelo tša rena ga di tlale ka tebogo ya go leboga Jehofa le Morwa wa gagwe yo a tswetšwego a nnoši? Ka gona, re tletše tebogo dipelong tša rena anke re tsebišeng ba bangwe mediro ya Modimo e kgahlišago—go tloga go bopšeng ga batho tšhemong ya Edene go fihla go tsošološweng ga dilo ka moka ka mo go feletšego lefaseng la Modimo le lefsa. (Genesi 2:7; Ditiro 3:21) Le gona, modiro wa go bolela ka Mmušo le wa go dira barutiwa o re nea tšhireletšo e kgolo gakaakang ya moya! (Mateo 24:14; 28:19, 20) Go swarega modirong wo go re thuša go kgomarela kholofelo yeo re nago le yona ka bokamoso bjo bo kgahlišago, go matlafatša tumelo ya rena dikholofetšong tša Modimo e bile go boloka lerato la rena la go rata Jehofa le magagabo rena le tuka.

“Ke Rata Maaxô a Ngwakô wa Xaxo”

17, 18. Ke boemo bja kgopolo bofe bjo re swanetšego go ba le bjona mabapi le diboka tša rena tša Bokriste?

¹⁷ Tabarenakele gotee le aletare ya yona yeo e dirišetšwago dihlabelo, e be e le lefelo la borapedi bja Jehofa kua Isiraele. Ge a hlalosa go rata ga gagwe go ba lefelong leo, Dafida o rapetše ka gore: “Morêna, ke rata maaxô a Ngwakô wa xaxo le felô mo xo dutšexo ’taxô la xaxo.”—Psalme 26:8.

¹⁸ Na re rata go kopana mafelong ao go ona re ithutago ka Jehofa? Holo e nngwe le e nngwe ya Mmušo yeo e nago le lenaneo la yona la ka mehla la thuto ya moya e šoma e le lefelo la borapedi bja therešo setšhabeng. Go oketša moo, re na le dikopano tša rena tše dikgolo tša ngwaga le ngwaga, dikopano tša tikologo le dikopano tša matšatši a kgethegilego. Dibokeng tše bjalo go ahla-ahlwa ‘dikgopotšo’ tše tšwago go Jehofa. Ge e ba re itlwaetša go di “rata xa-xolo,” re tla fišegela go ba gona dibokeng le go theetša ka kelohloko ge re le moo. (Psalme 119:167) Ke mo go lapološago gakaakang go ba le badumedi-gotee le rena bao ba kgahlegelago go bona re atlega le bao ba re thušago gore re dule re sepela ka go botega!—Ba-Hebere 10:24, 25.

‘O se ke wa Fediša Bophelo Bja-ka’

19. Dafida o be a sa nyake go hwetšwa a e-na le molato wa dibe dife?

¹⁹ Ka ge a be a tseba ka mo go feletšego ka mafelelo  a go fapoga tseleng ya go sepela therešong ya Modimo, Dafida o ile a lopa ka gore: “O se kê wa ola môya wa-ka xotee le ba-dira-dibe, le xe e le bophelô bya-ka xotee le banna ba madi, Bao diatla tša bôná di naxo le bohlôla, le matsôxô a bôná a tlala ka mphô-mpe.” (Psalme 26:9, 10) Dafida o be a sa nyake go akaretšwa gare ga batho ba ba sa boifego Modimo bao ba nago le molato wa boitshwaro bjo bo gobogilego goba letsogo-le-kobong.

20, 21. Ke’ng seo se ka re dirago gore re phele go etša batho bao ba sa hlankelego Modimo?

²⁰ Lefase lehono le tletše ka mekgwa e mentši ya boitshwaro bjo bo gobogilego. Thelebišene, dimakasine le difilimi di kgothaletša boitshwaro bjo bo gobogilego—“bootswa, le dithšila, le bohlôtlôlô.” (Ba-Galatia 5:19) Ba bangwe ba fetogile makgoba a diswantšho tše di kgothaletšago bootswa tšeo gantši di lebišago boitshwarong bjo bo gobogilego. Bafsa ka mo go kgethegilego ke bahlaselwa ba bonolo ba ditutuetšo tše bjalo. Dinageng tše dingwe, go beana mabaka go tlwaelegile, gomme bafsa bao ba lego mahlalagading ba ikwa ba gapeletšega go nagana gore ba swanetše go beana mabaka. Bafsa ba bantši ba thoma go bontšhana lerato, gaešita le ge e le ba banyenyane kudu gore ba ka nyalana. E le go kgotsofatša dikganyogo tša bona tša botona le botshadi tšeo di golago ka gare ga bona, kapejana ba tsena boitshwarong bjo bo gobogilego go fihla bokgoleng bja go dira bootswa.

²¹ Ga se gore batho ba bagolo bona ga ba kgongwe ke ditutuetšo tše mpe. Mekgwa ya kgwebo ya go se botege le tshekamelo ya go dira diphetho tša boithati ke dilo tšeo di bontšhago go hloka potego. Go sepela ditseleng tša lefase go tla fo re kgaoganya le Jehofa. Anke re ‘hloyeng tše mpe, re rateng tše botse’ gomme re dule re sepela ka go botega.—Amosi 5:15.

“Mphološê o Ntirê ka Botho”

22-24. (a) Ke kgothatšo efe yeo o ka e hwetšago mantšung a go phetha a Psalme 26? (b) Ke moreo ofe wo o tlago go ahla-ahlwa sehlogong se se latelago?

²² Dafida o ile a phetha seo a bego a se botša Modimo ka gore: “Xe e le nna ke nama kè ila bosodi. Mphološê O ntirê ka botho. A dinaô tša-ka di êmê moláleng; ke Xo rêtê, Morêna, kè le mo diphuthexong.”  (Psalme 26:11, 12) Go ikemišetša ga Dafida gore a dule a botega go tswalana kgaufsi le kgopelo ya gagwe ya go nyaka go lopollwa. Seo ke se se kgothatšago gakaakang! Go sa šetšwe boemo bja rena bja sebe, Jehofa o tla re thuša ge e ba re ikemišeditše go sepela ka go botega.

²³ Eka mokgwa wa rena wa bophelo o ka bontšha gore re hlompha bogoši bja Modimo le go bo tšeela godimo dibopegong ka moka tša bophelo bja rena. Ka moka ga rena re ka kgopela Jehofa ka thapelo gore a hlahlobe a be a hlwekiše dikgopolo le maikwelo a rena a ka gare-gare. Re ka nagana ka therešo ya Modimo ka mehla ka go ithuta Lentšu la gagwe ka mafolofolo. Ka gona, anke re direng sohle seo re ka se kgonago gore re pheme go gwerana le batho ba babe eupša re rete Jehofa diphuthegong. Eka re ka tšea karolo ka phišego modirong wa go bolela ka Mmušo le wa go dira barutiwa, gomme le ka mohla re se ke ra dumelela lefase gore le bee tswalano ya rena ya bohlokwa le Modimo kotsing. Ge re dutše re dira sohle seo re ka se kgonago gore re sepele ka go botega, re ka kgonthišega gore Jehofa o tla re amogela.

²⁴ Ka ge go botega go akaretša dikarolo ka moka tša bophelo, re swanetše go hlokomela moreo o bolayago—go dirišwa gampe ga dino-tagi. Se se tla ahla-ahlwa sehlogong se se latelago.

[Dipotšišo tša Thuto]

[Caption on page 14]

Na o kgopela Jehofa ka mehla gore a hlahlobe dikgopolo tša gago tša ka gare-gare?

[Caption on page 14]

Na o dula o nagana ka ditiro tša Jehofa tša botho bjo lerato?

[Caption on page 15]

Go dula ga rena re botega ge re lekwa go thabiša pelo ya Jehofa

[Caption on page 17]

Na o diriša dithulaganyo tša Jehofa ka tsela e holago go go thuša gore o sepele ka go botega?

Na o a Gopola?

• Ke ka baka la’ng dibopiwa tše bohlale di ka ahlolwa ka mo go swanetšego motheong wa potego ya tšona?

• Go botega go bolela’ng, gomme go sepela ka go botega go akaretša’ng?

• Ke’ng seo se tlago go re thuša gore re sepele ka go botega?

• E le gore re dule re botega, ke dikotsi dife tšeo re swanetšego go di hlokomela le go di phema?