Jehofa Ke Mothuši Wa Rena

“Thušo ya-ka e tšwa go Jehofa, Modiri wa legodimo le lefase.”—Psalme 121:2, NW.

1, 2. (a) Ke ka baka la’ng go ka bolelwa gore ka moka ga rena re nyaka thušo ka dinako tše dingwe? (b) Jehofa ke Mothuši wa mohuta mang?

KE MANG gare ga rena yo a sa kego a nyaka thušo? Therešo ke gore ka moka ga rena re nyaka thušo ka dinako tše dingwe—gore re lebeletšane ka katlego le bothata bjo bogolo, re kgotlelele go lahlegelwa mo go kwešago bohloko le gore re kgotlelele teko e thata. Ge batho ba nyaka thušo, gantši ba ya go mogwera yo lerato. Go boledišana le mogwera yo bjalo ka mathata a gago go ka dira gore o kgone go kgotlelela gabonolo. Eupša thušo yeo batho ba ka e neago e lekanyeditšwe. Ga se ka mehla ba bangwe ba ka bago boemong bja go go thuša ge o le bothateng.

² Lega go le bjalo, go na le Mothuši yo a nago le matla gotee le thušo e sa lekanyetšwago. Go oketša moo, o re kgonthišetša gore a ka se ke a re lahla le ka mohla. Ke Yena yo mopsalme a mo hlalositšego ka kholofelo e feletšego ge a re: “Thušo ya-ka e tšwa go Jehofa.” (Psalme 121:2, NW) Ke ka baka la’ng mopsalme yo a be a kgodišegile gore Jehofa o tla mo thuša? E le go araba potšišo yeo, anke re ahla-ahleng Psalme 121. Go dira bjalo go tla re thuša go kwešiša lebaka leo ka lona le rena ka kholofelo re ka lebelelago go Jehofa e le Mothuši wa rena.

Mothopo o ka Botwago wa Thušo

3. Mopsalme o ile a lebelela dithabeng dife, gomme ka baka la’ng?

³ Mopsalme o thomile ka go šupa tabeng ya go ba ga Jehofa Mmopi e le motheo wa go ba le kholofelo ge a re: “Ke tla lebelela kua dithabeng. Thušo ya-ka e tlo tšwa kae? Thušo ya-ka e tšwa go Jehofa, Modiri wa legodimo le lefase. (Psalme 121:1, 2, NW) Mopsalme ga se a fo lebelela thabeng le ge e le efe. Ge mantšu a a be a ngwalwa, tempele ya Jehofa e be e le kua Jerusalema. Motse woo, wo o bego o agilwe godimo ga dithaba tša Juda, e be e le bodulo bja Jehofa bja seswantšhetšo. (Psalme 135:21) Mopsalme a ka ba a ile a lebelela dithabeng tša Jerusalema tšeo tempele ya Jehofa e bego e agilwe go tšona, a lebeletše ka kholofelo gore Jehofa a mo thuše. Ke ka baka la’ng mopsalme a be a kgodišegile gakaakaa gore Jehofa a ka kgona go mo thuša? Ka gobane ke Yena “Modiri wa legodimo le lefase.” Ge e le gabotse, mopsalme o be a bolela gore, ‘Ka kgonthe ga go na selo se se ka thibelago Mmopi yo matla a magolo gore a nthuše!’—Jesaya 40:26.

4. Mopsalme o ile a bontšha bjang gore Jehofa o lemoga dinyakwa tša batho ba gagwe, gomme ke ka baka la’ng kgopolo yeo e le e homotšago?

⁴ Se se latelago, mopsalme o ile a hlalosa gore Jehofa ka mehla o lemoga dinyakwa tša batho ba  gagwe ka gore: “Leoto la xaxo a ka se lese la thêlêla; Moleti wa xaxo xa a ôtsele. Aowaa, xa a ôtsele, xa a rôbale, Yêna Mo-leta-Isiraele.” (Psalme 121:3, 4) Modimo a ka se ke a dumelela bao ba mmotago gore ba ‘thelele’ goba gore ba we ka tsela yeo ba ka bago ba palelwa ke go tsoga. (Diema 24:16) Ke ka baka la’ng a ka se dire bjalo? Ka gobane Jehofa o swana le modiši yo a phakgamego ka mo go feletšego yo a hlapeditšego dinku tša gagwe. Na yeo ga se kgopolo e homotšago? Le ka mohla a ka se tlogele go hlokomela dinyakwa tša batho ba gagwe. O dula a ba šeditše mosegare le bošego.

5. Ke ka baka la’ng go bolelwa ka Jehofa e le yo a lego ka ‘letsogong le letona’?

⁵ A kgodišegile gore Jehofa ke Mošireletši yo a botegago ka go se kwanantšhe wa batho ba gagwe, mopsalme o ngwadile gore: “Morêna ké Yêna Moleti wa xaxo; Morêna ké Yêna moriti wa xaxo. Ó ’tsoxong la xaxo le letona. Letšatši mosexare le ka se Xo hlabe, le xe e le ngwedi bošexo.” (Psalme 121:5, 6) Go motho yo a sepelago ka maoto wa kua Bohlabela bja Magareng, lefelo leo le nago le moriti le ka mo šireletša letšatšing le le fišago tšhiri-tšhiri. Jehofa o bjalo ka moriti bathong ba gagwe, gomme o ba šireletša manyaming ao a ka ba gobatšago go etša letšatši le le fišago wa go ntšha hlapi ka meetseng. Ela hloko gore go bolelwa ka Jehofa e le yo a lego ka ‘letsogong le letona.’ Dintweng tša bogologolo, letsogo le letona la mohlabani ka tsela e itšego le be le sa šireletšwe ke kotse yeo e bego e swarwa ka letsogong le letshadi. Mogwera yo a botegago ka go se kwanantšhe a ka šireletša mohlabani yo ka go ema gomme a lwa ka lehlakoreng la gagwe le letona. Go etša mogwera yo bjalo yo a botegago ka go se kwanantšhe, Jehofa o ema le barapedi ba gagwe, gomme o ikemišeditše go ba thuša ka dinako tšohle.

6, 7. (a) Mopsalme o re kgonthišetša bjang gore Jehofa le ka mohla a ka se lese go thuša batho ba gagwe? (b) Ke ka baka la’ng re ka ba le kholofelo e swanago le ya mopsalme?

⁶ Na Jehofa o tla ka a lesa go thuša batho ba gagwe? Seo se ka se tsoge se diregile. Mopsalme o phethile ka gore: “Morêna ó tlo Xo efoša bobe byohle; ó tlo leta môya w’axo. Morêna a a Xo letê matšô le maboyô lehono le neng le neng.” (Psalme 121:7, 8) Ela hloko gore mongwadi mo ga se a ngwala a diriša lebaka la bjale eupša o dirišitše lebaka le le tlago. Pejana go temana 5, mopsalme o itše: “Morêna ké Yêna Moleti wa xaxo.” (Mongwalo o sekamego ke wa rena.) Eupša mo ditemaneng tše, mopsalme o ngwadile gore: ‘Morena o tlo go leta.’ Ka go rialo, barapedi ba therešo ba kgonthišetšwa gore ba tla hwetša thušo ya Jehofa le nakong e tlago. Go sa šetšwe gore ba ya kae goba gore ba lebeletšana le mathata a mohuta mang, ba tla dula ba hwetša thušo ya gagwe ka dinako tšohle.—Diema 12:21.

⁷ Mongwadi wa Psalme 121 o be a tloga a kgodišegile gore Mmopi yo matla ohle o hlokomela bahlanka ba gagwe ka botho bjo bo swanago le bja modiši yo lerato gomme o ba šetša go swana le mohlapetši yo a phakgamego. Re na le lebaka le le kwagalago la go ba le kholofelo e swanago le ya mopsalme, ka gobane Jehofa ga a fetoge. (Maleaki 3:6) Na se se bolela gore re tla dula re šireleditšwe mmeleng? Aowa, eupša ge feela re lebelela go yena e le Mothuši wa rena, o tla re šireletša malebana le dilo ka moka tšeo di ka re gobatšago moyeng. E fo ba ga tlhago go botšiša gore, ‘Jehofa o re thuša bjang?’ Anke re ahla-ahleng ditsela tše nne tšeo ka tšona a re thušago. Sehlogong se, re tla ahla-ahla kamoo a ilego a thuša bahlanka ba gagwe ba mehleng ya Beibele. Sehlogong se se latelago, re tla ahla-ahla kamoo a thušago batho ba gagwe lehono.

Thušo ka Barongwa

8. Ke ka baka la’ng go sa makatše gore barongwa ba kgahlegela kudu katlego ya bahlanka ba Modimo ba lefaseng?

⁸ Jehofa o laola barongwa ba dimilione tše dintši. (Daniele 7:9, 10) Bana ba ba moya ba phetha thato ya gagwe ka go botega. (Psalme 103:20) Ba tseba gabotse gore Jehofa o tloga a rata batho ba gagwe bao ba mo rapelago le gore o nyaka go ba thuša. Ga go makatše gore barongwa ba kgahlegela kudu katlego ya bahlanka ba Modimo ba lefaseng. (Luka 15:10) Ka gona, ke therešo gore barongwa ba swanetše go ba ba thabela go dirišwa ke Jehofa bakeng sa go thuša batho. Ke ka ditsela dife Jehofa a ilego a diriša barongwa go thuša batho ba gagwe bao ba mo hlankelago ba mehleng ya bogologolo?

9. Nea mohlala wa kamoo barongwa ba ilego ba matlafatšwa ke Modimo ka gona e le gore ba šireletše batho ba botegago.

 ⁹ Barongwa ba ile ba matlafatšwa ke Modimo gore ba šireletše ba be ba lokolle batho ba botegago. Barongwa ba babedi ba ile ba thuša Lota le barwedi ba gagwe go phonyokga tshenyego ya Sodoma le Gomora. (Genesi 19:1, 15-17) Morongwa o tee o ile a bolaya bahlabani ba 185 000 ba Asiria bao ba bego ba nyaka go hlasela Jerusalema. (2 Dikxoši 19:35) Ge Daniele a be a lahletšwe ka moleteng wa ditau, Jehofa “[o ile a roma] Morongwa wa xaxwe a khuparetša melomo ya ditau.” (Daniele 6:22, 23) Morongwa o ile a lokolla moapostola Petro kgolegong. (Ditiro 12:6-11) Beibele e bolela ka mehlala e mengwe e mentši ya tšhireletšo yeo e ilego ya newa ke barongwa, yeo e kgonthišetšago seo se bolelwago ke Psalme 34:7 ge e re: “Morongwa wa Morêna ó xoraxorêla ba ba mmoifaxo; ó a ba namolêla.”

10. Jehofa o ile a diriša morongwa bjang gore a matlafatše moporofeta Daniele?

¹⁰ Ka nako e nngwe, Jehofa o ile a diriša barongwa gore ba kgothatše ba be ba matlafatše batho ba botegago. Mohlala o kgomago pelo o hwetšwa go Daniele kgaolo 10. Ka nako yeo, Daniele a ka ba a be a batamela nywaga e 100. Go bonagala moporofeta a be a nyamišitšwe kudu ke marope a Jerusalema le go diega ga go agwa ga tempele lefsa. Le gona, o ile a tshwenyega kudu ka morago ga go bona pono e boifišago. (Daniele 10:2, 3, 8) Modimo ka lerato o ile a roma morongwa gore a yo mo kgothatša. Morongwa o ile a gopotša Daniele ka makga a mmalwa gore ke “monna wa moratexi” mahlong a Modimo. Mafelelo e bile afe? Moporofeta yo a tšofetšego o ile a botša morongwa gore: “O mphile matla.”—Daniele 10:11, 19.

11. Ke mohlala ofe o mongwe wa kamoo barongwa ba ilego ba dirišwa ka gona gore ba hlahle batho modirong wa go bolela ka ditaba tše dibotse?

¹¹ Le gona Jehofa o ile a diriša barongwa gore ba hlahle batho modirong wa go bolela ka ditaba tše dibotse. Morongwa o ile a hlahla Filipi gore a yo boledišana le molaki wa Ethiopia ka Kriste, yo ka morago a ilego a kolobetšwa. (Ditiro 8:26, 27, 36, 38) Go se go ye kae ka morago ga moo, e be e le thato ya Modimo gore ditaba tše dibotse di bolelwe go ba-Ntle bao ba sa bollago. Ponong, morongwa o ile a tšwelela go Koronelio, e lego yo mongwe wa ba-Ntle yo a boifago Modimo, gomme a mo laela gore a romele batho go moapostola Petro. Ge batseta bao ba tšwago go Koronelio ba hweditše Petro, ba ile ba re: “Koronelio . . . ó laetšwe ke Morongwa e mokxêthwa, a thwe a Xo bitšê O tlê ngwakong wa xaxwe, a kwê ditaba xo wene.” Petro o ile a ya, gomme ka go rialo ba-Ntle ba pele bao ba sa bollago ba ile ba fetoga karolo ya phuthego ya Bokriste. (Ditiro 10:22, 44-48) Akanya kamoo o bego o ka ikwa ka gona ge o be o ka tseba gore morongwa o go thušitše gore o gahlane le motho yo a sekametšego go lokeng!

Thušo ka Moya o Mokgethwa

12, 13. (a) Ke ka baka la’ng baapostola ba Jesu ba be ba e-na le lebaka le le kwagalago la go dumela gore moya o mokgethwa o ka ba thuša? (b) Moya o mokgethwa o ile wa matlafatša Bakriste ba lekgolong la pele la nywaga ka tsela efe?

¹² Go se go ye kae pele Jesu a e-hwa, o ile a kgonthišetša baapostola ba gagwe gore ba be ba ka se tlogelwe ba se na mothuši. Tate o be a tla ba nea ‘mothuši, e lego moya o mokgethwa.’ (Johane 14:26) Baapostola ba be ba e-na le lebaka le le kwagalago la go dumela gore moya o mokgethwa o ka ba thuša. Godimo ga moo, Mangwalo a buduletšwego a tletše ka mehlala ya kamoo Jehofa a ilego a diriša moya o mokgethwa, e lego matla a magolo ka go fetišiša, go thuša batho ba gagwe.

¹³ Maemong a mantši, moya o mokgethwa o ile wa dirišwa gore o matlafatše batho gore ba kgone go dira thato ya Jehofa. Moya o mokgethwa o ile wa matlafatša Baahlodi gore ba lokolle Isiraele. (Baahlodi 3:9, 10; 6:34) Moya o swanago o ile wa matlafatša Bakriste ba lekgolong la pele la nywaga gore ba tšwele pele ba dira boboledi ka sebete go sa šetšwe mekgwa ka moka ya kganetšo. (Ditiro 1:8; 4:31) Go atlega ga bona go phetheng bodiredi go neile bohlatse bjo matla bja go šoma ga moya o mokgethwa. Go be go ka hlaloswa bjang kamoo batho ‘bao e bego e se ba mangwalo e bile e se dirutegi’ ba bego ba kgona go phatlalatša molaetša wa Mmušo lefaseng la mehleng yeo?—Ditiro 4:13; Ba-Kolose 1:23.

14. Jehofa o ile a diriša bjang moya wa gagwe o mokgethwa gore a sedimoše batho ba gagwe?

¹⁴ Le gona Jehofa o ile a diriša moya wa gagwe  o mokgethwa gore a sedimoše batho ba gagwe. Ka thušo ya moya wa Modimo, Josefa o ile a kgona go hlatholla ditoro tša Farao tša boporofeta. (Genesi 41:16, 38, 39) Ka moya wa gagwe, Jehofa o ile a dira gore merero ya gagwe e utollwe go baikokobetši eupša e utelwe baikgogomoši. (Mateo 11:25) Ka go rialo, moapostola Paulo o ile a bolela mabapi le dilo tšeo Jehofa a di neago “ba ba mo rataxo” gore: “Modimo ó re utolletše tšôna ka Môya wa xaxwe.” (1 Ba-Korinthe 2:7-10) Ke feela ka thušo ya moya o mokgethwa moo motho a ka kgonago go kwešiša thato ya Modimo e le ka kgonthe.

Thušo ka Lentšu la Modimo

15, 16. Jošua o ile a botšwa gore a dire’ng e le gore a tle a kgone go dira dilo ka bohlale?

¹⁵ Lentšu la Jehofa le le buduletšwego le “hola batho ka xo ruta,” gomme le thuša bahlanka ba Modimo gore e be ‘ba bolo ka botlalo, ba kgonišwe go dira mediro e botse ka moka.’ (2 Timotheo 3:16, 17) Beibele e na le mehlala e mentši ya kamoo batho ba Modimo ba mehleng ya bogologolo ba ilego ba thušwa ka gona ke dikarolo tšeo di bego di šetše di ngwadilwe tša Lentšu la gagwe.

¹⁶ Mangwalo a ile a thuša barapedi ba Modimo ka go ba nea tlhahlo e kwagalago. Ge Jošua a be a newa boikarabelo bja go etelela ba-Isiraele pele, o ile a botšwa gore: “Puku yé ya melaô O se kê wa bá wa lesa xo e bolêla; O e akanyê mosexare le bošexo, xore O kxônê xo hlôkômêla tšohle tše di ngwadilwexo mo xo yôna, ’me wa dira tšôna. Ké mo O tl’o xo ba le mahlatse ditseleng tša xaxo, ké mo O tl’o xo lêtlêxêlwa [“dira dilo ka bohlale,” NW].” Ela hloko gore Modimo ga se a holofetša Jošua gore o tla mo nea bohlale ka mohlolo. Go e na le moo, ge e ba Jošua a be a ka bala gomme a naganišiša ka ‘puku ya melao,’ gona o be a tla dira dilo ka bohlale.—Jošua 1:8; Psalme 1:1-3.

17. Daniele le Kgoši Josia ba ile ba thušwa bjang ke dikarolo tša Mangwalo tšeo ba bego ba e-na le tšona?

¹⁷ Le gona, Lentšu la Modimo le le ngwadilwego le ile la thuša go utolla thato ya gagwe le morero wa gagwe. Ka mohlala, Daniele o ile a kgona go tseba go tšwa mangwalong a Jeremia gore Jerusalema e be e tla dula e le marope ka lebaka le lekaakang. (Jeremia 25:11; Daniele 9:2) Le gona, ela hloko seo se ilego sa direga nakong ya ge go be go buša Kgoši Josia wa Juda. Ka nako yeo, setšhaba se be se šetše se hlanogetše Jehofa, gomme go bonagala dikgoši di ile tša palelwa ke go ingwalela kopi ya Molao le go e latela. (Doiteronomio 17:18-20) Eupša nakong ya ge tempele e be e tsošološwa, go ile gwa hwetšwa “puku ya melaô” yeo mohlomongwe e bego e ngwadilwe ke Moše. (2 Dikxoši 22:8; 23:1-7) Ye mohlomongwe e be e le puku ya mathomo, yeo e bego e ngwadilwe nywageng e ka bago e 800 pejana. Ka morago ga go kwa ge e balwa, Josia o ile a lemoga kamoo ruri setšhaba se bego se tlogetše go dira thato ya Jehofa, gomme kgoši e ile ya gata megato e tiilego bakeng sa go dira seo se ngwadilwego ka pukung ye. (2 Dikxoši 22:8; 23:1-7) Na ga go molaleng gore batho ba Modimo ba mehleng ya bogologolo ba ile ba thušwa ke dikarolo tša Mangwalo a Makgethwa tšeo ba bego ba e-na le tšona?

Thušo ka Badumedi-gotee

18. Ke ka baka la’ng re ka bolela gore nako le nako ge morapedi wa therešo a thuša yo mongwe, ge e le gabotse thušo yeo e tšwa go Jehofa?

¹⁸ Thušo yeo Jehofa a e neago gantši e tla ka badumedi-gotee le rena. Nako le nako ge morapedi yo mongwe wa therešo a thuša yo mongwe, ge e le gabotse thušo yeo e tšwa go Modimo. Ke ka baka la’ng re ka bolela bjalo? Go na le mabaka a mabedi. La pele ke gore moya o mokgethwa wa Modimo o a akaretšwa. Moya woo o tšweletša dienywa, go akaretša lerato le botho, go bao ba nyakago go tutuetšwa ke wona. (Ba-Galatia 5:22, 23) Ka go rialo, ge mohlanka wa Modimo a tutueletšega go thuša yo mongwe, bjo ke bohlatse bja gore moya wa Jehofa o a šoma. La bobedi ke gore re bopilwe ka seswantšho sa Modimo. (Genesi 1:26) Se se bolela gore re na le bokgoni bja go bonagatša  dika tša gagwe, go akaretša botho le kwelobohloko ya gagwe. Ka gona, nako le nako ge mohlanka wa Jehofa a thuša yo mongwe, Mothopo wa kgonthe wa thušo e bjalo ke yoo go bonagatšwago semelo sa gagwe.

19. Go ya ka pego ya Beibele, Jehofa o ile a nea thušo bjang ka badumedi-gotee?

¹⁹ Mehleng ya Beibele, Jehofa o ile a nea thušo bjang ka badumedi-gotee? Jehofa gantši o be a dira gore yo mongwe wa bahlanka ba gagwe a nee keletšo go yo mongwe, go etša ge Jeremia a ile a nea Baruke keletšo e phološago bophelo. (Jeremia 45:1-5) Ka dinako tše dingwe, barapedi ba therešo ba ile ba tutueletšega go nea thušo ya dilo tše di bonagalago go badumedi-gotee le bona, go etša nakong ya ge Bakriste ba Matsedonia le ba Akaya ba be ba fišegela go thuša bana babo bona bao ba hlokago ba Jerusalema. Moapostola Paulo o ile a bolela gore go nea mo go bjalo ka seatla se se bulegilego ge e le gabotse go be go tšweletša ‘ditebogo tše yago go Modimo.’—2 Ba-Korinthe 9:11.

20, 21. Ke ka tlase ga maemo afe moo moapostola Paulo a ilego a matlafatšwa ke bana babo ba ba tšwago Roma?

²⁰ Dipego tše di kgomago pelo ka mo go kgethegilego ke tša kamoo bahlanka ba Jehofa ba ilego ba dira maiteko a gore ba matlafatšane ba be ba kgothatšane. Nagana ka mohlala wo o akaretšago moapostola Paulo. Ge Paulo a be a le tseleng ya go ya Roma e le mogolegwa, o ile a sepela tseleng ya lephefo ya Roma yeo e tsebjago e le Appian Way. Karolo ya mafelelo ya leeto e be e le e tlogago e sa thabiše, ka gobane basepedi ba ile ba swanelwa ke go sepela molaleng o tletšego mohlaka. * Bana babo Paulo ba phuthegong ya Roma ba be ba tseba gore o a tla. Ba be ba tla dira’ng? Na ba be ba tla emela Paulo ba iketlile magaeng a bona motseng go fihlela ge a goroga ke moka ba tšwa go tlo mo dumediša?

²¹ Mongwadi wa Beibele e lego Luka, yo a ilego a sepela le Paulo leetong le, o re botša seo se diragetšego ka gore: “Badumedi ba xôna xe ba re kwa, ba tšwa ba re xahlanetša rè sa tla Apiforo le Teretaberene.” Na o ka bopa seswantšho-kgopolo sa tiragalo  ye? Ka ge se be se tseba gore Paulo o a tla, sehlopha sa bana babo se ile sa tloga Roma sa ya go mo gahlanetša. Karolo e nngwe ya sehlopha seo e be e letile kua Mmarakeng wa Apiforo, e lego lefelo le le tumilego la go khutša leo le lego ka ntle ga Roma ka dikhilomithara tše ka bago 74. Bana babo ba bangwe ka moka ba be ba letile kua Teretaberene, e lego lefelo la go khutša leo le bego le le ka ntle ga motse ka dikhilomithara tše ka bago 58. Paulo o ile a arabela bjang? Luka o bega gore: “Paulo xe a ba bôna, a leboxa Modimo, a tia kholofêlô.” (Ditiro 28:15) Nagana feela—go fo bona bana babo bao ba bego ba dirile maiteko a go tšea leeto go tla go yena go ile gwa matlafatša Paulo gwa ba gwa mo kgothatša! Le gona, Paulo o ile a leboga mang bakeng sa thekgo ye e thušago? O ile a leboga yo a mo neilego yona e lego Jehofa Modimo.

22. Temana ya rena ya ngwaga ya 2005 ke efe, gomme ke’ng se se tlago go ahla-ahlwa sehlogong se se latelago?

²² Go molaleng gore pego e buduletšwego ya mabapi le tsela yeo ka yona Modimo a dirišanago le batho e a itlhatsela. Ke Mothuši yo a sa bapišwego. Ka mo go swanetšego, temaneng ya tšona ya ngwaga ya 2005 Dihlatse tša Jehofa di tla diriša mantšu a Psalme 121:2 (NW) a rego: “Thušo ya-ka e tšwa go Jehofa.” Eupša Jehofa o re thuša bjang lehono? Se se tla ahla-ahlwa sehlogong se se latelago.

[Mengwalo ya ka tlase]

[Dipotšišo tša Thuto]

Temana ya ngwaga ya 2005 e tla ba e rego: “Thušo ya-ka e tšwa go Jehofa.”—Psalme 121:2, NW.

[Caption on page 16]

Paulo o ile a leboga Modimo bakeng sa thušo yeo a e neilwego ke bana babo ba Roma

Na o a Gopola?

Ke ka ditsela dife Jehofa a ilego a nea thušo—

• ka barongwa?

• ka moya o mokgethwa?

• ka Lentšu la gagwe le le buduletšwego?

• ka badumedi-gotee?