‘Ke Thabetše Tlwaetšo Ya-ka’

KAZUNA yo monyenyane o be a maketše ge morutiši wa gagwe a be a šišinya gore a tsenele phadišano ya go nea polelo ka Seisemane. Phadišano e be e buletšwe dikolo ka moka tše di phagamego tša sehlakahlakeng se segolo sa ka leboa sa Hokkaido kua Japane, eupša sekolo se a tsenago go sona se be se sa ka sa ngwadiša morutwana nakong e fetilego. Ka letšatši la phadišano, Kazuna o be a tšhogile ka gobane o be a swanetše go phadišana le barutwana ba bangwe ba ka bago ba 50. O ile a tšhoga le go feta ge a bona baahlodi ba babedi bao leleme la bona la setlogo e lego Seisemane.

Bathopa-sefoka ba ile ba tsebišwa, go thongwa ka mothopa-sefoka wa maemo a tlase. Ge mafelelong leina la Kazuna le be le bitšwa, o be a maketše. Yena le morutiši wa gagwe, yo a bego a dutše kgaufsi le yena, ba ile ba lebelelana ka go makala. A sa tšhogile, Kazuna o ile a ya sethaleng go yo amogela sefoka sa gagwe—moputso wa pele!

Kazuna yo a thabilego o hlalosa gore: “Se se ile sa kgonega feela ka baka la tlwaetšo yeo mokgatlo wa Jehofa o e neago ka Sekolo sa Bodiredi sa Pušo ya Modimo. Ke thabile kudu gore ke ile ka hwetša tlwaetšo ye.” Sekolo seo Kazuna a ilego a ingwadiša go sona go tloga e sa le yo monyenyane, ke se sengwe sa diboka tšeo di swarwago phuthegong ya Dihlatse tša Jehofa. Ge Kazuna a itokišeletša phadišano, o ile a ela hloko ka mo go kgethegilego go dirišwa ga maekrofone, go bolela ka borutho le ka mafolofolo, boitšhišinyo bja mmele, go lebelela batheetši le dithuto tše dingwe tšeo di rutwago Sekolong sa Bodiredi sa Pušo ya Modimo.

Hle amogela taletšo ya rena ya gore o be gona sekolong se, se se swarwago beke e nngwe le e nngwe Holong ya Mmušo ya Dihlatse tša Jehofa lefelong la geno. O bone ka noši kamoo batho ba bagolo le ba banyenyane ba holegago ka gona. Seboka se bulegetše bohle. Bakeng sa go hwetša tsebišo e oketšegilego ka sekolo se se lego kgaufsi le mo o dulago gona, hle ikopanye le Dihlatse tša Jehofa tša lefelong la geno.