Nako ya Dijo—Ga e fo ba Feela Nako ya go ja!

YO MONGWE le yo mongwe o thabela dijo tše bose. Nakong ya dijo, e-ba le poledišano e botse le bogwera bjo borutho le bao o ba ratago, gomme se se tla dira gore e be nako e kgahlišago yeo e kgotsofatšago go feta go fo tlatša mpa. Malapa a mantši a go dira setlwaedi go kopana bonyenyane gatee ka letšatši bakeng sa go ja gotee. Nako ya dijo e nea lapa sebaka se sebotse sa go boledišana ka ditiragalo tša letšatši goba ka seo le rerago go se dira. Batswadi bao ba theetšago bana ba bona ge ba bolela ba ka kgona go kwešiša ganyenyane seo bana ba bona ba se naganago le kamoo ba ikwago ka gona. Ge nako e dutše e e-ya, bogwera bjo bo lapološago bjoo bo thabelwago nakong ya dijo bo ka aga maikwelo a tšhireletšego, a go botana le a lerato ao a tlaleletšago go tsepameng ga botee bja lapa.

Lehono, ka ge ditho tše dintši tša malapa di dula di swaregile ka mehla, di hwetša go le thata go ba gotee bakeng sa dijo. Dikarolong tše dingwe tša lefase, ditšo tše dingwe di nyatša lapa leo le dulago gotee bakeng sa dijo goba leo le boledišanago nakong ya dijo. Malapa a mangwe a na le mokgwa wa go lebelela thelebišene nakong ya dijo, gomme ka go rialo a itima sebaka le ge e le sefe sa go ba le poledišano e holago.

Lega go le bjalo, batswadi ba Bakriste ka mehla ba phafogela dibaka tša go aga ba lapa la bona. (Diema 24:27) Nakong e fetilego, batswadi ba ile ba botšwa gore sebaka se sebotse sa go boledišana ka lentšu la Modimo le bana ba bona ke ge ba ‘dutše ngwakong wa bona.’ (Doiteronomio 6:7) Go dula gotee ka mehla bakeng sa dijo go nea batswadi sebaka se se kgethegilego sa go tsenya ka baneng ba bona lerato le le tseneletšego la go rata Jehofa le melao ya gagwe ya motheo ya go loka. Ka go hlagolela boemo bja lethabo le bja go iketla, o ka dira gore nako ya dijo e be phihlelo e thabišago le e agago gaešita le go ba lapa la gago. Ee, dira gore nako ya dijo e se be feela nako ya go ja!