“Thušo Ya-ka E Tšwa Go Jehofa”

Ge Botšofadi bo Fetoga “’Ala sa Bothšephi”

MURIEL wa nywaga e 101 o boletše gore: “Ke bophelo bjo bokaone kudu.” Theodoros wa nywaga e 70 o bea ditaba ka tsela ye: “E tloga e le tokelo.” Maria wa nywaga e 73 o boletše gore: “Ke tloga ke dumela gore ke dirišitše bophelo bja-ka ka tsela e kaone.” Ka moka ga bona ba feditše maphelo a bona ba le tirelong ya Jehofa Modimo.

Batšofadi ba bjalo ke ba bangwe ba barapedi ba mafolofolo ba Jehofa lefaseng ka bophara. Go sa šetšwe botšofadi, mathata a tša maphelo le maemo a mangwe a thata, ba sa dutše ba hlankela Modimo ka moya ka moka. Ka phuthegong ya Bokriste, batšofadi ba bjalo ba botegago ke mehlala e hlompšhago ya boineelo go Modimo. Jehofa o tšeela tirelo ya batšofadi godimo kudu, gaešita le ge maemo a bona a dira gore ba se kgone go dira mo gontši. *—2 Ba-Korinthe 8:12.

Puku ya Psalme e bolela ka mo go swanetšego mabapi le boemo bja bophelo bjo batšofadi ba ka letelago go ba le bjona. Ba ka swana le sehlare se segolo se se tšofetšego seo se dulago se enywa dienywa. Mopsalme o ile a opela mabapi le batšofadi ba ba botegago gore: “Le xe e ka ba ba batála, ba enywa dienywa, ba hloxa botalá ba taxa.”—Psalme 92:14.

Ba bangwe ba ka boifa gore ba tla lahlwa le go hlokomologwa ge ba felelwa ke matla ka baka la botšofadi. Dafida o ile a lopa Modimo ka gore: “Se ntahlê byale xe ke tšofala; O se ntloxêlê byale xe matla a-ka a fêlêla.” (Psalme 71:9) Ke’ng se se dirago phapano magareng ga go palelwa le go atlega nywageng ya botšofadi? Ke go ekiša Modimo ka go ba ba ba lokilego. Mopsalme o ile a opela ka gore: “Moloki ó tlo taxa byalo ka sehlare sa molala.”—Psalme 92:12.

Bao ba ilego ba fetša maphelo a bona ba le tirelong e botegago go Modimo ba sekametše go tšweleng pele ba enywa dienywa tše dibotse nywageng ya bona ya botšofadi. Ge e le gabotse, bontši bja dipeu tšeo ba di bjetšego maphelong a bona ka noši goba a ba bangwe di a mela gomme tša gola gore e tle e be puno e botse. (Ba-Galatia 6:7-10; Ba-Kolose 1:10) Ke therešo gore batho bao ba kilego ba senya maphelo a bona ka go phegelela dilo tša boithati tšeo di ba dirago gore ba hlokomologe ditsela tša Modimo gantši ba ba le mohola o monyenyane ge ba dutše ba tšofala.

Le ka pukung ya Diema go sa dutše go gatelelwa gore go loka go kgabiša botšofadi. Moo re bala gore: “Hlôxô-pududu ké ’ala sa bothšephi; se hwetšwa tseleng ya xo loka.” (Diema 16:31) Ee, go loka ke ponagatšo ya botse bja ka gare. Go phegelela tsela e lokilego nakong ya bophelo bjo botelele go dira gore motho a hlompšhe. (Lefitiko 19:32) Hlogo-tšhweu e feleletša ka go hlompšha ge e sepedišana le bohlale gotee le bokwala.—Jobo 12:12.

Jehofa o lebelela bophelo bjo bo lokilego bjo bo fetšwago tirelong ya gagwe e le bjo bo kgahlišago kudu. Mangwalo a re: “Le tlo ba la tšofala kè sa fêla kè le [Jehofa] Yêna-é, kè Le kuka Lè le ’hlôxô tše pududu. Ké Nna ke di dirilexo. Ké Nna ke tl’o xo kuka; ké Nna kè tl’o xo rwala ka phološa.” (Jesaya 46:4) Ruri go a kgothatša go tseba gore Tatago rena yo lerato wa legodimong o holofetša go matlafatša le go thekga batho ba gagwe  ba ba botegago ka go se kwanantšhe ge ba le nywageng ya bona ya botšofadi!—Psalme 48:14.

Ka ge bophelo bjo bo fetšwago tirelong e botegago ya Jehofa e le bjo bobotse go yena, na ga se bja swanela go hlompšha ke ba bangwe? Ka ge re bonagatša pono ya Modimo, re tšeela godimo badumedi-gotee le rena ba ba tšofetšego. (1 Timotheo 5:1, 2) Ka gona, anke re lebeleleng ditsela tše šomago tšeo ka tšona re ka bonagatšago lerato la Bokriste ka go hlokomela dinyakwa tša bona.

Go Sepela Tseleng ya go Loka Botšofading

Salomo o re kgonthišetša gore: “Bophelô bo mmileng wa tokô.” (Diema 12:28) Botšofadi ga bo thibele motho gore a se ke a sepela mmileng wo ge a šetše a tšofetše. Ka mohlala, kua Moldova, mokgalabje wa nywaga e 99 o ile a neela bofsa bja gagwe go tšwetšeng pele dikgopolo tša Bokomanisi. O be a ikgantšha ka gore yena ka noši o bile le dipoledišano le baetapele ba Bokomanisi ba ba tumilego ba bjalo ka V. I. Lenin. Lega go le bjalo, ge Bokomanisi bo be bo fokotšega le go phuhlama, bophelo bja mokgalabje yo bo ile bja se sa ba le morero. Eupša ge Dihlatse tša Jehofa di be di mmontšha gore Mmušo wa Modimo ke tharollo e nnoši ya kgonthe bakeng sa mathata a batho, o ile a amogela therešo ya Beibele gomme ya ba morutwana yo mafolofolo wa Mangwalo. Se se nyamišago ke gore o ile a hwa pele a ka ba mohlanka wa Jehofa yo a kolobeditšwego.

Ge mokgekolo wa nywaga e 81 wa kua Hungary a be a ithuta ka dinyakwa tša Modimo tša boitshwaro, o ile a lemoga gore o be a swanetše go nyalana le monna yo a bego a dula le yena ka nywaga e mmalwa. Mokgekolo yo o ile a rapa sebete gomme a hlalosetša monna yo pono ya gagwe ye e theilwego Beibeleng. O ile a makatšwa kudu le go thabišwa ke gore monna yo o ile a dumela go nyalana le yena. Ka morago ga ge ba nyalane semolao, o ile a dira tšwelopele ya moya ka pela. Dikgweding tše seswai ka morago ga go thoma ga gagwe go ithuta Beibele, o ile a ba mogoeledi yo a sa kolobetšwago, gomme o ile a kolobetšwa kapejana ka morago ga moo. Ruri e tloga e le therešo gore go loka go ka apeša batšofadi ka bobotse bja kgonthe!

Ee, Bakriste ba botegago bao ba tšofetšego ba ka kgonthišega ka taba ya gore Modimo o a ba kgahlegela. Jehofa a ka se ke a lahla bao ba dulago ba mmotegela ka go se kwanantšhe. Go e na le moo, o holofetša go ba hlahla, go ba thekga le go ba matlafatša gaešita le nywageng ya botšofadi. Le gona ba dumelelana le mantšu a mopsalme a rego: “Thušo ya-ka e tšwa go Jehofa.”—Psalme 121:2, NW.

[Mongwalo wa tlase]

[Ntlhakgolo go letlakala 9]

“Hlôxô-pududu ké ’ala sa bothšephi; se hwetšwa tseleng ya xo loka.”—DIEMA 16:31

[Lepokisi go letlakala 8]

JEHOFA O HLOKOMELA BAHLANKA BA GAGWE BA BA TŠOFETŠEGO

“Xe O lebana le hlôxô e pududu O êmê; sefahloxô sa mokxalabyê O se hlomphê.”—Lefitiko 19:32.

“Le tlo ba la tšofala kè sa fêla kè le Yêna-é, kè Le kuka Lè le ’hlôxô tše pududu.”—Jesaya 46:4.