Go Dira Boboledi ga Saulo go Tsoša Bonaba

BA-JUDA ba kua Damaseko ba be ba sa kwešiše taba ye. Go tla bjang gore molwedi yo mafolofolo wa ditumelo tša setšo a fetoge mohlanogi? E be e le Saulo, monna yo a kilego a tlaiša bao ba bego ba bolela ka leina la Jesu kua Jerusalema. O be a tlile Damaseko gore a tlo tlaiša barutiwa ba gona moo. Eupša ga bjale yena ka noši o be a dira boboledi bja gore sona sesenyi se se se nyatšegago seo se kokotetšwego koteng ka baka la thogako e be e le Mesia! Na Saulo o be a gafa?—Ditiro 9:1, 2, 20-22.

Mohlomongwe go be go e-na le lebaka la se. Go na le kgonagalo e kgolo ya gore ba bangwe bao ba ilego ba sepela le Saulo leetong la go ya Jerusalema ba boletše mabapi le se se diregilego tseleng. Ge ba be ba dutše ba batamela Damaseko, gatee-tee ba ile ba bonegelwa ke seetša se se phadimago, gomme ka moka ga bona ba ile ba wela fase. Go be go e-na le modumo wa lentšu. Go be go se na motho yo a gobetšego ntle le Saulo. O be a rapaletše tseleng. Ge mafelelong a be a tsoga, basepedi ba bangwe ba ile ba mo iša Damaseko, ka ge a be a se sa bona.—Ditiro 9:3-8; 26:13, 14.

Moganetši o Fetoga Mmoleledi

Saulo o diragaletšwe ke’ng tseleng e yago Damaseko? Na mohlomongwe leeto le letelele goba phišo ya letšatši la mosegare wa sekgalela di be di mo feditše matla? Ka boikemišetšo bja go hwetša ditlhaloso tše di kwagalago, bantšha-diphošo ba mehleng yeno ba bolela ka ditiragalo tše di akaretšago go tšewa ke samadikwe, go bona dilo tše di sego gona, go hlakana hlogo mo go bakilwego ke go jewa ga Saulo ke letswalo, tšharakano ya monagano le kgopolo ya gore mohlomongwe a ka ba a be a swerwe ke dithunthwane.

Ge e le gabotse, Jesu Kriste o iponagaditše go Saulo seetšeng seo se se foufatšago, a mo kgodiša gore e be e le Yena Mesia. Tiragalong ye, diswantšho tše dingwe tša bokgabo di bontšha Saulo a e-wa godimo ga pere. Gaešita le ge seo se ka kgonega, Beibele e bolela feela gore o ile a “wêla fase.” (Ditiro 22:6-11) Go sa šetšwe tsela ya kgonthe yeo Saulo a welego ka yona, go wa ga gagwe boemong bjo a kilego a ba go bjona e be e le mo gogolo. Ga bjale o ile a swanelwa ke go lemoga gore se balatedi ba Jesu ba bego ba se bolela e be e le therešo. Selo feela seo Saulo a bego a swanetše go se dira e be e le go fo ba tlatša. Go tloga go beng lenaba le legolo la molaetša wa Jesu, Saulo o ile a ba yo mongwe wa bathekgi ba wona ba matla. Ka morago ga go foufollwa le go kolobetšwa, “Saulo yêna matla a xaxwe a fêla a tiêlêla, a tlaba Ba-Juda ba Damaseko, ba šitwa xo mo fetola xe a ba hlalosetša xore Jesu ké Yêna Kriste.”—Ditiro 9:22.

Maano a Polao a a Folotša

Saulo yo ka morago a ilego a bitšwa Paulo o ile a leba kae ka morago ga ge a sokologile? Ge a be a ngwalela ba-Galatia, o itše: “Ka ya Arabia, ka buša ka boêla Damaseko.” (Ba-Galatia 1:17) Lentšu “Arabia” le ka bolela leeto la go ya karolong le ge e le efe ya Pheninsula ya Arabia. Diithuti tše dingwe di bolela gore Paulo a ka ba a ile a ya Leganateng la Siria goba felo-tsoko mmušong wa ba-Nabatha wa Aretas IV. Go na le kgonagalo e kgolo kudu ya gore Saulo o ile a ya lefelong  le le homotšego bakeng sa go naganišiša ka morago ga gore a kolobetšwe, go fo swana le ge Jesu a ile a ya lešokeng ka morago ga kolobetšo ya gagwe.—Luka 4:1.

Ge Saulo a be a boela Damaseko, “ba-Juda ba mo lakana, ba rata xo mmolaya.” (Ditiro 9:23) Mmuši yo a ilego a hlankela e le moemedi wa Kgoši Areta kua Damaseko o be a hlapeditše motse e le gore a sware Saulo. (2 Ba-Korinthe 11:32) Eupša nakong ya ge manaba a be a loga leano la go bolaya Saulo, barutiwa ba Jesu ba ile ba loga leano la go mo tšhabiša.

Go bao ba ilego ba thuša Saulo go tšhaba go be go e-na le Anania le barutiwa bao moapostola a ilego a thabela go ba le bona gatee-tee ka morago ga ge a sokologile. * (Ditiro 9:17-19) Ba bangwe bao e kilego ya ba badumedi ka baka la go dira boboledi ga Saulo kua Damaseko ba ka ba ba ile ba mo thuša, ka gobane Ditiro 9:25 e re: “Barutiwa [“ba gagwe,” NW] ba mo tšea è le bošexo, ba mo sediša morakô wa motse, ba mo fološa a le ka sešexong.” Mantšu a rego ‘barutiwa ba gagwe’ a ka ba a bolela ka bao Saulo a ilego a ba ruta. Boemong le ge e le bofe, go atlega ga bodiredi bja gagwe go bonagala go ile gwa gakatša bonaba bjo bo bego bo šetše bo le gona malebana le yena.

Thuto ye e Swanetšego go Ithutwa

Ge re hlahloba tše dingwe tša ditiragalo tše di lego mabapi le go sokologa ga Saulo le go kolobetšwa ga gagwe, re bona gabotse gore o be a sa tshwenyege ka mo go feteletšego mabapi le kamoo ba bangwe ba bego ba mo lebelela ka gona; ga se a ka a tlogela ka baka la kganetšo e šoro. Selo se e bego e le sa bohlokwa kudu go Saulo e be e le thomo ye a e amogetšego ya go dira boboledi.—Ditiro 22:14, 15.

Na o sa tšwa go kgodišwa ka bohlokwa bja go bolela ditaba tše dibotse? Ge e ba go le bjalo, o a tseba gore Bakriste ka moka ba therešo ba swanetše go ba baboledi ba Mmušo. Ga se wa swanela go makala ge bodiredi bja gago ka dinako tše dingwe bo tsoša ditiro tša bonaba. (Mateo 24:9; Luka 21:12; 1 Petro 2:20) Tsela yeo Saulo a ilego a arabela ka yona kganetšong ke mohlala go rena. Bakriste bao ba kgotlelelago tlaišo ba sa lape ba tla amogelwa ke Modimo. Jesu o boditše barutiwa ba gagwe gore: “Le tlo ba ba ba hloilwexo ke bohle ka ’baka la Leina la-ka.” Lega go le bjalo, o ile a ba kgonthišetša gore: “Bophelô bya lena Le tlo bo rua ka kxotlêlêlô.”—Luka 21:17-19.

[Mongwalo wa tlase]

[Seswantšho go letlakala 28]

Saulo o ile a “wêla fase” ge Jesu a be a tšwelela go yena

[Seswantšho go letlakala 29]

Saulo o ile a phonyokga maano a polao kua Damaseko