Kriste—Motheo wa Boporofeta
Kriste—Motheo wa Boporofeta
“Bohlatse bya Jesu ke Môya wa xo porofeta.”—KUTOLLO 19:10.
1, 2. (a) Go thoma ka 29 C.E., ba-Isiraele ba be ba lebeletšane le go dira phetho efe? (b) Go tla ahla-ahlwa’ng sehlogong se?
NGWAGA ke wa 29 C.E. Isiraeleng go tletše dipolelo tša mabapi le Mesia yo a holofeditšwego. Bodiredi bja Johane Mokolobetši bo godišitše moya wa go leta. (Luka 3:15) Johane o latola ka gore ga se yena Kriste. Go e na le moo, o šupa go Jesu wa Natsaretha, gomme o re: ‘Ke beile bohlatse ka re: Yo ke yena Morwa wa Modimo.’ (Johane 1:20, 34) Kapejana, mašaba a latela Jesu gore a theetše thuto ya gagwe le gore a a fodiše.
2 Dikgweding tše di latelago, Jehofa o nea bohlatse bjo bogolo mabapi le Morwa wa gagwe. Bao ba ithutilego Mangwalo gomme ba ela hloko mediro ya Jesu ba na le motheo o tiilego wa go dumela go yena. Lega go le bjalo, batho bao Modimo a dirilego kgwerano le bona ka kakaretšo ga ba na tumelo. Ke ba sego kae feela bao ba dumelago gore Jesu ke Kriste, Morwa wa Modimo. (Johane 6:60-69) O ka ba o ile wa dira’ng ge nkabe o be o phela ka nako yeo? Na nkabe o ile wa tutueletšega go amogela Jesu e le Mesia gomme wa ba molatedi wa gagwe yo a botegago? Nagana ka bohlatse bja mabapi le seo a lego sona bjo Jesu ka boyena a bo neago ge a pharwa ka molato wa go roba Sabatha, gomme ela hloko mabaka ao a a dirišago ka morago bakeng sa go nea bohlatse e le gore a matlafatše tumelo ya barutiwa ba gagwe ba botegago ka go se kwanantšhe.
Jesu ka Boyena o Nea Bohlatse
3. Ke maemo afe ao a tutueletšago Jesu go nea bohlatse mabapi le seo a lego sona?
3 Ke nako ya Paseka ya 31 C.E. Jesu o Jerusalema. O sa tšwa go fodiša motho yo a bego a babja ka nywaga e 38. Lega go le bjalo, ba-Juda ba Johane 5:1-9, 16-18) Ge Jesu a ikemelela tabeng ye o ba nea mabaka a mararo a matla ao a bego a tla kgodiša mo-Juda le ge e le ofe yo a botegago mabapi le seo Jesu ge e le gabotse a lego sona.
tlaiša Jesu ka baka la ge a dirile se ka Sabatha. Le gona, ba mmea molato wa thogako gomme ba nyaka go mmolaya ka gobane a bitša Modimo gore ke Tatagwe. (4, 5. Morero wa bodiredi bja Johane e be e le ofe, gomme o o phethile bjang ka katlego?
4 Sa pele, Jesu o šupa go bohlatse bja ketapele ya gagwe e lego Johane Mokolobetši, ge a re: “Le kile la roma batho ba ya xo Johane, ’me a hlatsêla therešô. Johane e be e le lebônê le le tukaxo la bônêxa; fêla, Le ratile xo hlalala seetšeng sa xaxwe lebakanyana fêla.”—Johane 5:33, 35.
5 Johane Mokolobetši e be e le “lebônê le le tukaxo” ka gobane pele a golegwa ke Heroda ka mo go sa swanelago, o be a phethile taelo e tšwago go Modimo ya gore a lokišeletše Mesia tsela. Johane o itše: “Tše nna ke tletšexo tšôna ka kolobetša ka meetse, ké xore [Mesia] a bônaxalê mo xo Isiraele. . . . Ke bone Môya ò theoxa lexodimong ò le byalo ka leeba, wa tla wa dula ò mo okametše. Le nna ke be ke sa mo tsebe. Fêla, e a nthomilexo xo kolobetša ka meetse, ó be a mpoditše a re: Yo O mmônaxo Môya ò mo theoxêla, wa dula ò mo okametše, ké Yêna wa xo kolobetša ka Môya o mokxêthwa. Xomme ke di bone ka bea bohlatse ka re: Yó ké Yêna Morwa-Modimo.” * (Johane 1:26-37) Johane o ile a hlaola Jesu ka go lebanya e le Morwa wa Modimo—Mesia yo a holofeditšwego. Bohlatse bja Johane bo be bo tloga bo kwagala moo e lego gore dikgweding tše seswai ka morago ga lehu la gagwe, ba-Juda ba bantši ba botegago ba ile ba dumela ka gore: “Johane . . . ó rerešitše ka tšohle tše a di boletšexo à e-ra motho é.”—Johane 10:41, 42.
6. Ke ka baka la’ng mediro ya Jesu e swanetše go ba e ile ya kgodiša batho gore o thekgwa ke Modimo?
6 Se se latelago, Jesu o diriša mokgwa o mongwe wa go nea mabaka e le go kgonthišetša go swanelega ga gagwe e le Mesia. O šupa go mediro ya gagwe ka noši e mebotse e le bohlatse bja gore o thekgwa ke Modimo. O re: “Ke na le bohlatse byo bo fetaxo byoo bya Johane; xobane medirô ye Tate a nneilexo yôna xore ke e phêthê, yôna medirô yé ke e diraxo, e hlatsêla Nna xore Tate ó nthomile.” (Johane 5:36) Gaešita le manaba a Jesu a be a ka se kgone go ganetša bohlatse bjo, bjoo bo bego bo akaretša mehlolo e mentši. Ba bangwe ka morago ba ile ba botšiša gore: “Re tlo re’ng? Motho é ó dira mehlôlô e mentši.” (Johane 11:47) Lega go le bjalo, ba bangwe ba ile ba araba gabotse gomme ba re: “Kriste, mohla a tlaxo, a ó tlo dira mehlôlô e kaxo feta Ye e dirilwexo ke Yêna-yó?” (Johane 7:31) Batheetši ba Jesu ba be ba le boemong bjo bobotse bja go lemoga dika tša Tate go Morwa.—Johane 14:9.
7. Mangwalo a Sehebere a hlatsela Jesu bjang?
7 Mafelelong, Jesu o lebiša tlhokomelo ya bona bohlatseng bjo bo sa belaetšego. O oketša ka gore: “[Mangwalo], . . . ké ôna-xê a a hlatsêlaxo Nna. Xobane xe Le ka be Le dumêla Mošê, le Nna Le ka be Le ntumêla, xobane Mošê ó mpoletše ka mangwalô a xaxwe.” (Johane 5:39, 46) Ke therešo gore Moše e be e fo ba yo mongwe wa dihlatse tša pele ga Bokriste tšeo di ngwadilego mabapi le Kriste. Mangwalo a tšona a akaretša diporofeto tše makgolo le dipego tše di feletšego tša mašika, tšeo ka moka di šupago go Mesia. (Luka 3:23-38; 24:44-46; Ditiro 10:43) Le gona, go thwe’ng ka Molao wa Moše? Moapostola Paulo o ngwadile gore: “Molaô [ke] moetetši wa xo re iša xo Kriste.” (Ba-Galatia 3:24) Ee, “bohlatse bya Jesu ke Môya [goba, ke tshekamelo ka moka, boikemišetšo le morero] wa xo porofeta.”—Kutollo 19:10.
8. Ke ka baka la’ng ba-Juda ba bantši ba be ba sa dumele go Mesia?
8 Na bohlatse bjo ka moka—bohlatse bja Johane bjo bo lego molaleng, mediro ya Jesu ka noši e matla le dika tša Modimo tšeo a bego a di bonagatša le bohlatse bjo bogolo bja Mangwalo—bo be bo ka se go kgodiše gore Jesu e be e le yena Mesia? Motho le ge e le ofe yo a bego a Johane 5:42) Go e na le gore ba “nyake xo rêtwa ke Modimo fêla” e be e le “ba xo bata xo rêtana.” Ga go makatše ge ba be ba sa dumelelane le Jesu, yo go etša Tatagwe a bego a hlaswa kgopolo e bjalo!—Johane 5:43, 44; Ditiro 12:21-23.
rata Modimo go tšwa pelong e bile a rata Lentšu la gagwe o be a tla lemoga se gabonolo gomme a bontšha tumelo go Jesu e le Mesia yo a holofeditšwego. Lega go le bjalo, lerato le le bjalo le be le tloga le se gona Isiraeleng. Go baganetši ba gagwe, Jesu o itše: “Se ke se lemoxilexo, ké xe mo xo lena xò se na leratô la Modimo.” (Ba Matlafaditšwe ke Pono ya Boporofeta
9, 10. (a) Ke ka baka la’ng pontšho e tlile ka nako e bohlokwa kudu go barutiwa ba Jesu? (b) Ke kholofetšo efe e kgahlišago yeo Jesu a e holofeditšego barutiwa ba gagwe?
9 Go fetile lebaka la ka godimo ga ngwaga ga e sa le go tloga ge Jesu a neile bohlatse bjo go boletšwego ka bjona e sa le pele bja go ba ga gagwe Mesia. Paseka ya ngwaga wa 32 C.E. e fetile. Ba bantši bao ba bego ba dumela ba kgaoditše go mo latela, mohlomongwe ka baka la tlaišo, go rata dilo tše di bonagalago goba dipelaelo tša bophelo. Ba bangwe ba ka ba ba be ba gakanegile goba ba nyamile ka gobane Jesu a ile a gana maiteko a batho a go nyaka go mo dira kgoši. Ge a be a hlohlwa ke baetapele ba bodumedi ba ba-Juda, o ile a gana go dira pontšho e tšwago legodimong yeo a bego a tla itlišetša letago ka yona. (Mateo 12:38, 39) Go gana mo go ka ba go ile gwa gakantšha ba bangwe. Go oketša moo, Jesu o be a thomile go utollela barutiwa ba gagwe selo se sengwe seo ba ilego ba hwetša go le thata go se kwešiša—‘o swanetše go ya Jerusalema le go tlaišwa ka tše ntši ke ba bagolo le baperisita ba bagolo le ba mangwalo, gomme a bolawe.’—Mateo 16:21-23.
10 Dikgweding tše dingwe tše senyane go ya go tše lesome, e be e tla ba nako ya ‘Jesu ya gore a tloge lefaseng le gomme a ye go Tatagwe.’ (Johane 13:1) A tshwenyegile kudu ka barutiwa ba gagwe ba botegago ka go se kwanantšhe, Jesu o holofetša ba bangwe ba bona selo seo a gannego go se direla ba-Juda bao ba se nago tumelo—pontšho e tšwago legodimong. Jesu o re: “Ruri ke a Le botša, mo xo ba ba emexo fá xo na le ba ba tl’o xo bôna Morwa-motho à e-tla à le mmušong wa xaxwe, bôná ba sešo ba kwa lehu.” (Mateo 16:28) Go molaleng gore Jesu ga a bolele gore barutiwa ba gagwe ba itšego ba tla phela go ba go fihla ge Mmušo wa Mesia o hlongwa ka 1914. Seo Jesu a nagannego ka sona ke go nea barutiwa ba gagwe ba bararo bao a ntšhanago le bona sa inong ponelo-pele e kgahlišago ya letago la gagwe a le matleng a Mmušo. Ponelo-pele ye e bitšwa go fetošwa lebopo.
11. Hlalosa pono ya go fetošwa lebopo.
11 Matšatšing a tshela ka morago, Jesu o tšea Petro, Jakobo le Johane gomme o ya le bona thabeng e telele—mohlomongwe tlhoreng ya Thaba ya Heremone. Gona moo, Jesu a “fetoxa lebopô bà mo lebeletše, sefahloxô sa xaxwe sa phadima byalo ka letšatši, diaparô tša xaxwe tša šweufala wa seetša.” Moporofeta Moše le moporofeta Eliya le bona ba a tšwelela, gomme ba bolela le Jesu. Go bonagala tiragalo ye e makatšago e direga bošego, e lego seo se dirago gore e tloge e bonagala e le ya kgonthe kudu. Ge e le gabotse, e bonagala e le ya kgonthe kudu moo e lego gore Petro o ithapela go Mateo 17:1-6.
hloma mekutwana e meraro—o mongwe e be wa Jesu, o mongwe e be wa Moše gomme o mongwe e be wa Eliya. Ge Petro a dutše a bolela, leru le le editšego la ba khupetša gomme gwa kwagala lentšu le re: “Yó ké Yêna Morwa-moratwa wa-ka, yo ke kxahlwaxo ke Yêna; Le mo kwê.”—12, 13. Barutiwa ba Jesu ba ile ba kgongwa bjang ke pono ya go fetošwa lebopo, gomme ka baka la’ng?
12 Ke therešo gore Petro o be a sa tšwa go nea bohlatse bja gore Jesu ke “Kriste Morwa wa Modimo a phelaxo.” (Mateo 16:16) Eupša akanya o e-kwa Modimo ka boyena a nea bohlatse bja go kgonthišetša seo Morwa wa gagwe yo a tloditšwego a lego sona le karolo yeo a e kgathago! Pono ya go fetošwa lebopo e tloga e le phihlelo e matlafatšago tumelo gakaakang go Petro, Jakobo le Johane! Ka ge tumelo ya bona e matlafaditšwe kudu, mo nakong ye ba itlhamile gakaone bakeng sa seo se letšego ka pele le bakeng sa karolo e bohlokwa yeo ba tlago go e kgatha phuthegong yeo e tlago go hlongwa.
13 Pono ya go fetošwa lebopo e dula megopolong ya barutiwa. Nywageng e 30 ka morago, Petro o ngwala gore: “[Jesu] boxolo le borêna ó neilwe ke Modimo Tat’axwe mola a tlêlwa ke Lentšu le lexolo lela la xo tšwa letaxong le lexolo le le šiišaxo la re: Yó ké Yêna Morwa-moratwa wa-ka, yo ke kxahlwaxo ke Yêna! Lentšu leo re le kwile lè e-tšwa lexodimong mola rè na le Yêna thabeng yela e kxêthwa.” (2 Petro 1:17, 18) Johane le yena o kgahlilwe ke tiragalo ye ka mo go swanago. Nywageng ya ka godimo ga e 60 ka morago ga ge e diregile, go bonagala a bolela a lebišitše go yona ge a re: “Ra boxêla letaxô la xaxwe, letaxô la Mo-tswalwa-esi wa Tat’axwe, Mo-tlala-kxauxêlô-le-therešô.” (Johane 1:14) Lega go le bjalo, pono ya go fetošwa lebopo ga se pono ya mafelelo yeo e ilego ya newa balatedi ba Jesu.
Tshedimošo e Oketšegilego go Batho ba Modimo ba Botegago
14, 15. Ke ka tsela efe moapostola Johane a phelago go ba go fihla ge Jesu a e-tla?
14 Ka morago ga tsogo ya gagwe, Jesu o tšwelela go barutiwa ba gagwe Lewatleng la Galilea. Gona moo o botša Petro gore: “Xe nka rata xore mohla ke tlaxo ke mo hwetšê [Johane] à le xôna, a ke taba ya xaxo?” (Johane 21:1, 20-22, 24) Na mantšu a a bontšha gore moapostola Johane o be a tla phela nako e telele go feta baapostola ba bangwe? Go bonagala go le bjalo ka gobane o hlankela Jehofa ka potego ka nywaga e mengwe gape e ka bago 70. Lega go le bjalo, go na le mo gontši mantšung a Jesu.
15 Polelwana e rego “mohla ke tlaxo” e re gopotša mantšu a Jesu ge a be a bolela ka taba ya ge “Morwa-motho à e-tla à le mmušong wa xaxwe.” (Mateo 16:28) Johane o phela go ba go fihla ge Jesu a e-tla ka kgopolo ya gore ka morago o newa pono ya boporofeta ya ge Jesu a e-tla a le matleng a Mmušo. Go ya bofelong bja bophelo bja Johane, ge a le kgolegong sehlakahlakeng sa Patimo, o amogela Kutollo yeo e nago le dipontšho ka moka tše di kgahlišago tša ditiragalo tšeo di tlago go direga ka “letšatši la Morêna.” Johane o kgongwa kudu ke dipono tše tše di kgahlišago moo e lego gore ge Jesu a bolela gore: “Ke tla tloxa kè e-tla,” Johane o re: “Amene! Tlaa Morêna Jesu!”—Kutollo 1:1, 10; 22:20.
16. Ke ka baka la’ng e le gabohlokwa gore re tšwele pele re matlafatša tumelo ya rena?
16 Ba dipelo tše di botegago bao ba phelago lekgolong la pele la nywaga ba amogela Jesu e le Mesia gomme ba dumela go yena. Ka baka la go hloka tumelo ga ba bantši bao ba ba dikologilego,
bao ba fetogago badumedi ba swanetše go matlafaletšwa modiro wo ba swanetšego go o dira le diteko tšeo di letšego ka pele. Jesu o neile bohlatse bjo matla bja go ba ga gagwe Mesia gomme o neile dipono tša boporofeta tše di sedimošago bakeng sa go kgothatša balatedi ba gagwe ba botegago ka go se kwanantšhe. Lehono re ka gare-gare ga “letšatši la Morêna.” Go se go ye kae, Kriste o tla fediša tshepedišo ka moka e kgopo ya dilo ya Sathane gomme a phološa batho ba Modimo. Le rena re swanetše go matlafatša tumelo ya rena ka go diriša ka mo go feletšego ditokišetšo ka moka tša Jehofa bakeng sa bophelo bja rena bjo bobotse bja moya.Go Phološwa Lefsifsing le Masetlapelong
17, 18. Ke phapano efe e kgolo yeo e bilego gona lekgolong la pele la nywaga magareng ga balatedi ba Jesu le bao ba bego ba ganetša merero ya Modimo, gomme mafelelo e bile afe go sehlopha se sengwe le se sengwe?
17 Ka morago ga lehu la Jesu, barutiwa ka sebete ba kwa taelo ya gore ba nee bohlatse ka yena “motseng wa Jerusalêma le naxeng ka moka ya Juda le ya Samaria, xo fihla maxomong a lefase.” (Ditiro 1:8) Go sa šetšwe ditlaišo tše dikgolo, Jehofa o šegofatša phuthego yeo e sa tšwago go hlongwa ya Bokriste ka tshedimošo ya moya le ka barutiwa ba bantši ba bafsa.—Ditiro 2:47; 4:1-31; 8:1-8.
18 Ka lehlakoreng le lengwe, ditebelelo tša bao ba ganetšago ditaba tše dibotse di tšwela pele di fsifala. Diema 4:19 e re: “Tsela ya bakxôpô e byalo ka lefsifsi; xa ba tsebe se se t’lo xo ba kxopa.” “Lefsifsi” le gakala ka 66 C.E. ge madira a Roma a dikologa Jerusalema. Ka morago ga go boela morago ka nakwana ka lebaka leo le sa tsebjego, ba-Roma ba boa ka 70 C.E., gomme mo nakong ye ba fediša motse. Go ya ka radihistori wa mo-Juda e lego Josephus, ba-Juda ba ka godimo ga milione ba a hwa. Lega go le bjalo, Bakriste ba botegago ba a phonyokga. Ka baka la’ng? Ka gobane ge madira a Roma a boela morago, ba kwa taelo ya Jesu ya gore ba tšhabe.—Luka 21:20-22.
19, 20. (a) Ke ka baka la’ng batho ba Modimo ba se na lebaka la go tšhoga ge tshepedišo ye ya gona bjale e le kgaufsi le go fela? (b) Ke kwešišo efe e kgahlišago yeo Jehofa a ilego a e nea batho ba gagwe nywaga-someng ya pele ga 1914?
19 Boemo bja rena ke bjo bo swanago. Masetlapelo a magolo ao a tlago a tla bolela phedišo ya tshepedišo ka moka e kgopo ya Sathane. Eupša batho ba Modimo ga se ba swanela go boifa ka gobane Jesu o holofeditše gore: “Tsebang, ke na le lena ka mehla xo fihla bofelong bya lefase.” (Mateo 28:20) E le go matlafatša tumelo ya barutiwa ba gagwe ba pele le go ba hlamela seo se letšego ka pele, Jesu o ile a ba nea ponelo-pele ya letago la gagwe a le legodimong e le Kgoši Mesia. Go thwe’ng ka lehono? Ka 1914 ponelo-pele yeo e ile ya phethagala. Le gona e be e tloga e le go phethagala mo go matlafatšago tumelo gakaakang go batho ba Modimo! Go phethagala moo go swere kholofelo ya bokamoso bjo bo kgahlišago, gomme bahlanka ba Jehofa ba neilwe kwešišo e oketšegilego mabapi le se. Lefaseng la lehono leo le tšwelago pele le fsifala, “mmila wa baloki ó étša boka mahuba xe a hlatloxa, ’tšatši la bá la hlaba.”—Diema 4:18.
20 Gaešita le pele ga 1914, sehlopha se senyenyane sa Bakriste bao ba tloditšwego se ile sa thoma go kwešiša ditherešo tša bohlokwa tša mabapi le maboo a Morena. Ka mohlala, ba ile ba lemoga gore maboo a gagwe a be a ka se bonagale, go etša ge seo se ile sa bolelwa ke barongwa ba babedi bao ba ilego ba tšwelela go Ditiro 1:9-11.
barutiwa ka 33 C.E. ge Jesu a be a rotogela legodimong. Ka morago ga ge leru le rotošeditše Jesu godimo gomme barutiwa ba se sa mmona, barongwa ba ile ba re: “Yêna Jesu yó, e a tlošitšwexo xo lena a išwa lexodimong, ó tlo boa ka wôna mokxwa wo Le mmonexo à e-ya lexodimong ka wôna.” (Mongwalo o sekamego ke wa rena.)—21. Go tla ahla-ahlwa’ng sehlogong se se latelago?
21 Go tloga ga Jesu go ile gwa bonwa feela ke balatedi ba gagwe ba botegago ka go se kwanantšhe. Ka mo go swanago, nakong ya pono ya go fetošwa lebopo go be go se gwa tlala batho; lefase ka kakaretšo le be le sa tsebe seo se diregilego. Go tla ba bjalo ge Kriste a boa a le matleng a Mmušo. (Johane 14:19) Ke feela barutiwa ba gagwe ba botegago ba tloditšwego bao ba tlago go lemoga go ba gona ga gagwe e le Kgoši. Sehlogong se se latelago re tla bona kamoo kwešišo yeo e ba kgomago kudu ka gona, gomme ya dira gore go kgoboketšwe batho ba dimilione bao ba tlago go ba balata ba Jesu ba lefaseng.—Kutollo 7:9, 14.
[Mongwalo wa tlase]
^ ser. 5 Go molaleng gore ge Jesu a be a kolobetšwa, ke Johane feela yo a ilego a kwa lentšu la Modimo. Ba-Juda bao Jesu a bego a bolela le bona ‘ba be ba sešo ba kwa lentšu la Modimo goba go bona sebopego sa gagwe.’—Johane 5:37.
Na o a Gopola?
• Ge Jesu a be a pharwa ka molato wa go roba Sabatha le wa thogako, ke bohlatse bofe bjo a ilego a bo nea bakeng sa go bontšha gore e be e le yena Mesia?
• Barutiwa ba Jesu ba pele ba ile ba holwa bjang ke pono ya go fetošwa lebopo?
• Jesu o be a bolela’ng ge a be a re Johane o tla phela go ba go fihla ge a e-tla?
• Ka 1914, ke ponelo-pele efe yeo e ilego ya phethagala?
[Dipotšišo tša Thuto]
[Diswantšho go letlakala 10]
Jesu o ile a nea bohlatse bja gore ke yena Mesia
[Seswantšho go letlakala 12]
Pono ya go fetošwa lebopo e be e matlafatša tumelo
[Seswantšho go letlakala 13]
Johane o be a swanetše go phela go ba go fihla ge Jesu a ‘e-tla’