Na o ka Laola Pheletšo ya Gago?

NA PHELETŠO ya rena e rulaganyeditšwe e sa le pele? Na diphetho tše re di dirago bophelong ga di kgome bokamoso bja rena?

Anke re re motho ke yena a laolago pheletšo ya gagwe. Tabeng ye, na motho le ge e le ofe o be a ka kgethwa e sa le pele gore a phethe modiro o itšego goba go phethagatša boikarabelo bjo itšego? Le gona Modimo o be a ka phethagatša thato ya gagwe bjang mabapi le lefase ge e ba batho ba be ba ka fo laola pheletšo ya bona ka noši? Beibele e nea dikarabo tše di kgotsofatšago tša dipotšišo tše.

Pheletšo e Rulagantšwego e sa le Pele le Tokologo ya Boikgethelo—Na di Nepagetše?

Ela hloko kamoo Jehofa Modimo a re bopilego ka gona. Beibele e re: “A mmopa [motho] ka xo swanthša ka Yêna Modimo; a ba bopa monna le mosadi.” (Genesi 1:27) Ka ge re bopilwe ka go swana le Modimo, re kgona go bonagatša dika tša gagwe tše bjalo ka lerato, toka, bohlale le matla. Modimo gape o re neile mpho ya tokologo ya boikgethelo. Se se dira gore re be ba fapanego le dibopiwa tša gagwe tša lefaseng. Re ka kgetha ge e ba re tla latela tlhahlo ya Modimo mabapi le boitshwaro goba re ka se e latele. Ke ka baka leo moporofeta Moše a bego a ka bolela gore: “Lehono lexodimo le lefase ké dihlatse tša-ka xe ke beile bophelô le lehu, le thšexofatšô le thoxô, pele xa lena. Hlê ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena, Lè e-kwa se a se bolêlaxo, Lè mo xomaretše.”—Doiteronomio 30:19, 20.

Lega go le bjalo, mpho ya tokologo ya boikgethelo ga e bolele tokologo e feletšego. Ga e  re lokolle melaong ya tlhago le ya boitshwaro yeo Modimo a e beilego bakeng sa go tsepama le khutšo ya legohle. Melao ye e be e beilwe bakeng sa go re hola, gomme go e roba le ge e le gofe go ka lebiša mafelelong a kotsi. Nagana feela seo se bego se tla direga ge nkabe re ile ra kgetha go hlokomologa molao wa matlakgogedi gomme ra ikwišetša fase go tloga marulelong a moago o motelele!—Ba-Galatia 6:7.

Tokologo ya boikgethelo e bile e re rweša boikarabelo bjo itšego bjo dibopiwa tše di se nago tokologo e bjalo di se nago bjona. Mongwadi Corliss Lamont o botšiša gore: “Ke bjang re ka bolelago gore batho ba na le boikarabelo tabeng ya boitshwaro, gomme ra ba otla ka baka la go dira sebe, ge e ba re amogela . . . gore dikgetho le ditiro tša bona di rulagantšwe e sa le pele?” Ruri re ka se ke ra dira bjalo. Diphoofolo tše di laolwago ke maikwelo a tlhago ga di lebelelwe di ikarabela ka seo di se dirago, gaešita le di-computer ga di lebelelwe di ikarabela bakeng sa mediro yeo di rutwago go e dira. Ka gona, tokologo ya boikgethelo e re rweša morwalo o boima gomme e re dira gore re ikarabele bakeng sa ditiro tša rena.

Ruri Jehofa Modimo e tla ba e le yo a se nago lerato le yo a hlokago toka ge e ba a be a ka rulaganyetša e sa le pele tsela yeo re tlago go sepela ka yona pele ga ge re ka belegwa gomme a dira gore re ikarabele bakeng sa ditiro tša rena! Ga a dire se ka gobane “Modimo ké Yêna leratô,” le gona “’tsela tša’xwe tšohle di lokile.” (1 Johane 4:8; Doiteronomio 32:4) Ka ge a re neile tokologo ya boikgethelo, ga se a re ka nako e swanago a ‘rulaganyetša e sa le pele gore ke mang yo a tlago go mo phološa le gore ke mang yo a tlago go mo roga,’ go etša ge bao ba dumelago tabeng ya go rulaganyetšwa e sa le pele ba bolela. Tokologo ya boikgethelo ga e akaretše go rulaganyetšwa e sa le pele.

Beibele e bontšha gabotse gore dikgetho tše re di dirago di tla fetoša pheletšo ya rena. Ka mohlala, Modimo o ipiletša go badiradibe ka gore: “Boang! Motho a a lahlê tsela e mpe ya xaxwe, . . . ke se tlo Le šulafatša.” (Jeremia 25:5, 6) Boipiletšo bjo e be e ka se be bjo bo kwagalago ge nkabe Modimo a be a šetše a rulagantše pheletšo ya motho yo mongwe le yo mongwe. Go feta moo, Lentšu la Modimo le re: “Ké xôna ithsoleng-xê, Le sokoloxê, xore Le phomolwê dibe tša lena. Xore xo tlê mabaka a tapoloxô e tšwaxo xo Morêna.” (Ditiro 3:19, 20a) Ke ka baka la’ng Jehofa a ka kgopela batho gore ba itshole gomme ba sokologe ge e ba a be a tsebile e sa le pele gore ba ka se ke ba dira selo le gatee gore ba fetoše pheletšo ya bona?

Mangwalo a bolela ka ba bangwe bao ba laletšwago ke Modimo gore ba buše e le dikgoši legodimong le Jesu Kriste. (Mateo 22:14; Luka 12:32) Lega go le bjalo, Beibele e bolela gore ba tla lahlegelwa ke tokelo yeo ge ba ka se kgotlelele go  fihla bofelong. (Kutollo 2:10) Ke ka baka la’ng Modimo a be a ka ba laletša ge e ba a be a šetše a dirile phetho ya gore ba ka se kgethwe? Le gona ela hloko mantšu ao moapostola Paulo a a boditšego badumedi-gotee le yena. O ngwadile gore: “Xe re senya ka boomo xe re šetše re filwe xo tseba therešô, xôna xa xo sa na sedimo sa xo hlatswa sebe seo.” (Ba-Hebere 10:26) Temošo e bjalo e be e ka se be le mohola ge e ba Modimo a be a rulagantše pheletšo ya bona e sa le pele. Eupša na Modimo ga se a ka a rulaganyetša e sa le pele bonyenyane batho ba itšego gore ba yo buša le Jesu Kriste?

Na Bao ba Bego ba Rulaganyeditšwe e sa le Pele e be e le Motho ka o Tee ka o Tee Goba Sehlopha?

Moapostola Paulo o ngwadile gore: “[Ke Modimo] e a re šexofaditšexo ka dithšexofatšô tšohle tša Môya ka tša maxodimong ka Kriste, Ka mo a re kxethilexo ka Yêna Kriste mola lefase lè sešo la thêwa, . . . ó re hlaoletše xo ba bana ba xaxwe ka Jesu Kriste.” (Ba-Efeso 1:3-5) Ke’ng se Modimo a se hlaotšego e sa le pele, gomme go kgethwa “lefase lè sešo la thêwa” go bolela’ng?

Ditemana tše di bontšha gore Modimo o kgethile ditlogolo tše dingwe tša motho wa pele e lego Adama, gore di buše le Kriste magodimong. (Ba-Roma 8:14-17, 28-30; Kutollo 5:9, 10) Lega go le bjalo, kgopolo ya gore Jehofa Modimo o kgethile batho ba itšego nywageng e dikete pele ba ka belegwa gore ba amogele tokelo ye e thulana le taba ya gore batho ba neilwe tokologo ya boikgethelo. Seo Modimo a se kgethilego e sa le pele e be e le sehlopha, e sego batho ka o tee ka o tee.

Ka mohlala: Anke re re mmušo o dira phetho ya go hloma mokgatlo o itšego. O rulaganya e sa le pele mediro ye mokgatlo o tlago go e dira, baetapele ba yona le bogolo bja yona. Mafelelong mokgatlo o thoma go šoma ka morago ga ge o rulagantšwe nakong e fetilego, gomme ditho tša wona di bolela gore: “Mmušo o rulagantše nywageng e mmalwa e fetilego gore mošomo wa rena e tla ba ofe. Ga bjale re thoma mošomo wo re o abetšwego.” Na o be o tla phetha ka gore mmušo o ile wa rulaganya nywageng e mmalwa e sa le pele gore ditho tša mokgatlo wo e tla ba bomang? Ga go bjalo le gatee. Ka mo go swanago, Jehofa o rulagantše e sa le pele gore o tla hloma mokgatlo o kgethegilego gore o fediše mafelelo ao sebe sa Adama se bilego le ona. O ile a rulaganyetša e sa le pele sehlopha sa batho bao ba bego ba tla hlankela mokgatlong woo—eupša e sego motho ka o tee ka o tee. Ba be ba tla kgethwa ka morago, gomme dikgetho tšeo ba bego ba tla di dira bophelong di be di tla feleletša ka gore ba a amogelwa goba aowa.

Moapostola Paulo o be a naganne ka lefase lefe ge a be a re: ‘Modimo o re kgethile ka yena Kriste mola lefase le sešo la thewa’? Lefase le Paulo a bolelago ka lona mo ga se lefase le Modimo a le thomilego ge a be a bopa Adama le Efa. Lefase leo e be e le le “botse kudu”—le tloga le se na sebe le kgobogo. (Genesi 1:31) Le be le sa nyake go ‘lopollwa’ sebeng.—Ba-Efeso 1:7.

Lefase leo Paulo a bego a bolela ka lona ke leo le bilego gona ka morago ga ge Adama le Efa ba be ba rabela kua Edene—e lego lefase le le fapanego kudu le leo le bego le rulagantšwe ke Modimo go tloga mathomong. E be e le lefase le le thomilego nakong ya bana ba Adama le Efa. Lefase leo le be le e-na le batho bao ba bego ba furaletše Modimo gomme e le makgoba a sebe le kgobogo. Ka go fapana le badiradibe ba ka boomo e lego Adama le Efa, e be e le lefase la batho bao ba bego ba ka lopollwa.—Ba-Roma 5:12; 8:18-21.

Jehofa Modimo ka go akgofa o ile a kgona go rarolla bothata bjo bo bakilwego ke borabele bja kua Edene. Gatee-tee ge go be nyakega selo se itšego, o ile a rulaganyetša e sa le pele mokgatlo o kgethegilego—Mmušo wa Mesia wo o laolwago ke Jesu Kriste—wo a bego a tla o diriša bakeng sa go lokolla batho sebeng sa Adama. (Mateo 6:10) Modimo o dirile se “lefase” la batho bao ba swanelwago ke topollo “lè sešo la thêwa,” e lego se se bolelago gore pele Adama le Efa bao e lego marabele ba ka belega bana.

Ka tlwaelo batho ba swanetše go rulaganya dilo e le gore ba phethe se ba nyakago go se dira. Go rulaganyetšwa e sa le pele go tswalanywa le kgopolo ya gore Modimo o swanetše go ba a ile a ba le thulaganyo e rulagantšwego mabapi le legohle moo selo se sengwe le se sengwe se rulaganywago  e sa le pele. Roy Weatherford o ngwala gore: “Go bo-radifilosofi ba bantši go ile gwa bonagala eka selo le ge e le sefe seo se sa akaretšego tlhaloso e feletšego ya tiragalo e nngwe le e nngwe e be e tla ba seo se sa dumelelanego le Bogolo bja Modimo.” Na ruri Modimo o swanetše go hlalosa tiragalo e nngwe le e nngwe e sa le pele?

Ka ge a e-na le matla a sa felego le bohlale bjo bo sa bapišwego, Jehofa a ka lebeletšana ka katlego le boemo le ge e le bofe bja tšhoganetšo goba maemo a sa letelwago ao a ka tšwelelago ge dibopiwa tša gagwe di dutše di diriša tokologo ya boikgethelo. (Jesaya 40:25, 26; Ba-Roma 11:33) A ka dira se ka go akgofa e bile a sa rulaganya e sa le pele. Ka go se swane le batho ba ba sa phethagalago gotee le bokgoni bja bona bjo bo lekanyeditšwego, Modimo Ramatla-ohle ga a nyake thulaganyo e feletšego, ye e tsepamego yeo e hlalosago e sa le pele pheletšo ya motho yo mongwe le yo mongwe lefaseng. (Diema 19:21) Diphetolelong tše mmalwa tša Beibele, Ba-Efeso 3:11 e bolela ka go ba ga Modimo le ‘morero wa sa ruri’ go e na le thulaganyo ye e sa fetogego.

Kamoo o ka Fetolago Bokamoso bja Gago ka Gona

Modimo o na le morero ka lefase, le gona morero o bjalo o rulagantšwe e sa le pele. Kutollo 21:3, 4 e re: “Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” Ee, lefase le e tla ba paradeise, go fo etša ge Jehofa a be a rerile bjalo mathomong. (Genesi 1:27, 28) Potšišo ke gore, Na o tla ba gona? Seo se ithekgile ka dikgetho tše o di dirago gona bjale. Jehofa ga se a dira gore pheletšo ya gago e se ke ya fetoga.

Sehlabelo sa topollo sa Morwa wa Modimo, Jesu Kriste, se dira gore go kgonege go motho le ge e le ofe yo a bontšhago tumelo go yena gore a hwetše bophelo bjo bo sa felego. (Johane 3:16, 17; Ditiro 10:34, 35) Beibele e re: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna; se se tl’o xo dula sè mo okametše ké boxale bya Modimo.” (Johane 3:36) O ka kgetha bophelo ka go ithuta ka Modimo, ka Morwa wa gagwe, ka thato ya Gagwe ka Beibeleng le ka go diriša seo o ithutago sona. Motho yo a dirago dilo ka go dumelelana le bohlale bja kgonthe bjo bo begilwego ka Lentšung la Modimo o kgonthišetšwa gore “ó tlo dula a iketla, ó ikaxêla à sa šie kotsi.”—Diema 1:20, 33.

[Diswantšho go letlakala 5]

Ka go se swane le diphoofolo, batho ba a ikarabela ka ditiro tša bona

[Mothopo]

Eagle: Foto: Cortesía de GREFA