“O Kgona Bjang?”

POTŠIŠO ye e bego e botšišwa ke mokgalabje-tsoko e ile ya makatša Muriel, mmago bana ba bararo ge a be a le lebenkeleng la go jela. Muriel o be a swaregile ka go iša bana ba gagwe ngakeng, gomme o be a šiilwe ke nako. Ba be ba se na nako ya go ya gae go yo ja dilalelo pele ba ka ya sebokeng sa bona sa Bokriste. Ka gona o ile a ya le bana lebenkeleng la go jela la kgaufsi e le gore ba ka hwetša sa go ja.

Ge ba dutše ba feleletša go ja, monna yo mongwe o ile a batamela Muriel gomme a re: “Ke be ke le lebeletše ga e sa le le tsena ka mono. Ke hlokometše phapano e kgolo kudu magareng ga bana ba gago le bao ke gahlanago le bona ka mehla. O ka bona kamoo bana bao ba swarago ditafola le ditulo ka gona. Ba bea maoto godimo ga ditafola. Ba kgorometša ditulo gohle. Eupša bana ba gago ba homotše e bile ba itshwere gabotse. O kgona bjang?”

Muriel o arabile ka gore: “Nna le monna wa-ka re ithuta Beibele ka mehla le bana ba rena, gomme re leka go diriša seo re ithutago sona maphelong a rena. Re Dihlatse tša Jehofa.” Monna yo o ile a re: “Ke Mojuda yo a phologilego Polao e Sehlogo. Ke gopola ke bona Dihlatse tša Jehofa di tlaišwa kua Jeremane. Gaešita le ka yona nako yeo, di ile tša dula di fapane. Boitshwaro bja bana ba gago bo nkgahlile e le ruri. Ke swanetše go nyakišiša ka bodumedi bja lena.”

Beibele ke puku e botse kudu ya tlhahlo go godišeng bana. Dihlatse tša Jehofa di rata go thuša ba bangwe gore ba holwe ke tlhahlo yeo e hwetšwago ka Mangwalong. Re go laletša ka borutho gore o arabele taletšong ye e latelago.