Go Tsoma “Pheta ya Thêkô e Kxolo” Lehono
Go Tsoma “Pheta ya Thêkô e Kxolo” Lehono
“Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse.”—MATEO 24:14, NW.
1, 2. (a) Ba-Juda ba mehleng ya Jesu ba be ba ikwa bjang ka Mmušo wa Modimo? (b) Jesu o ile a dira’ng e le gore a ba nee kwešišo e nepagetšego ka Mmušo, gomme ka mafelelo afe?
MMUŠO wa Modimo e be e le taba yeo e gogago kgahlego e kgolo gare ga ba-Juda nakong ya ge Jesu a be a le lefaseng. (Mateo 3:1, 2; 4:23-25; Johane 1:49) Lega go le bjalo, mathomong ba bantši ba bona ba be ba sa kwešiše ka mo go feletšego bogolo le matla a wona; e bile ba be ba sa kwešiše gore e be e tla ba mmušo wa legodimong. (Johane 3:1-5) Gaešita le ba bangwe bao ba ilego ba fetoga balatedi ba Jesu ba be ba sa kwešiše ka mo go feletšego seo Mmušo wa Modimo o lego sona goba seo ba swanetšego go se dira gore ba amogele tšhegofatšo ya go ba babuši-gotee le Kriste.—Mateo 20:20-22; Luka 19:11; Ditiro 1:6.
2 Ge nako e dutše e e-ya, Jesu ka go se fele pelo o ile a ruta barutiwa ba gagwe dithuto tše dintši, go akaretša le seswantšho sa pheta ya theko e kgolo seo se ahla-ahlilwego sehlogong se se fetilego, e le ge a ba bontšha bohlokwa bja gore ba katanele go tsoma Mmušo wa legodimong. (Mateo 6:33; 13:45, 46; Luka 13:23, 24) Se se swanetše go ba se ile sa kgoma dipelo tša bona kudu ka gobane kapejana ba ile ba fetoga bagoeledi ba ba sa lapego le ba sebete ba ditaba tše dibotse tša Mmušo dikarolong tša kgole tša lefase, e lego therešo yeo e hlatselwago ka botlalo ke puku ya Ditiro.—Ditiro 1:8; Ba-Kolose 1:23.
3. Ge e le mabapi le mehla ya rena, Jesu o itše’ng ka Mmušo?
3 Ka gona, go thwe’ng ka lehono? Batho ba dimilione ba botšwa ka ditšhegofatšo tša lefase la paradeise ka tlase ga Mmušo. Boporofeteng bja gagwe bjo bogolo bja mabapi le “bofêlô bya mabaka ano,” Jesu o boletše ka go lebanya gore: “Ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:3, 14, NW; Mareka 13:10) Le gona, o ile a hlalosa gore modiro wo o mogolo kudu o be o tla dirwa go sa šetšwe mapheko le ditlhohlo tše di boifišago, gaešita le tlaišo. Lega go le bjalo, o ile a nea kgonthišetšo ye e rego: “E a tl’o xo tiišetša xo fihla bofelong, ké yêna a tl’o xo phološwa.” (Mateo 24:9-13) Tše ka moka di be di nyaka gore motho a bontšhe boikgafo le boineelo bjo bo ilego bja bontšhwa ke mmapatši wa mosepedi wa seswantšhong sa Jesu. Na lehono go na le batho bao ba bontšhago tumelo le phišego e bjalo ya go fišegela go tsoma Mmušo?
Go Thabela go Hwetša Therešo
4. Ke mafelelo afe ao therešo ya Mmušo e bago le ona go batho lehono?
4 Mmapatši wa seswantšhong sa Jesu o be a tletše lethabo ge a be a hweditše seo a bego a tseba gore ke “pheta ya thêkô e kxolo.” Lethabo leo le ile la mo tutueletša gore a dire sohle seo a ka se kgonago gore a ikhweletše pheta yeo. (Ba-Hebere 12:1) Lehono, therešo mabapi le Modimo le Mmušo wa gagwe e kgahla batho gotee le go ba tutuetša. Se se re gopotša seo se boletšwego ke Ngwanabo rena A. H. Macmillan, yo a ngwadilego mabapi le lesolo la gagwe ka noši la go tsoma Modimo le morero wa Gagwe ka batho ka pukung ya Faith on the March. O itše: “Seo ke se hweditšego, batho ba dikete ba sa dutše ba se hwetša ngwaga le ngwaga. Le gona ke batho ba swanago le nna le wena, ka gobane ba tšwa ditšhabeng ka moka, merafong ka moka, maemong ka moka a bophelo e bile ke ba nywaga ka moka. Therešo ga e kgetholle motho. E kgahla batho ba mehuta ka moka.”
5. Ke mafelelo afe a mabotse ao a bonwago pegong ya ngwaga wa tirelo wa 2004?
5 Therešo ya mantšu ao e bonwa ge ngwaga le ngwaga batho ba dipelo tše di botegago ba dikete tše makgolo ba tutuetšwa ke ditaba tše dibotse tša Mmušo wa Modimo gore ba neele maphelo a bona go Jehofa le go dira thato ya gagwe. Ngwaga wa tirelo wa 2004, wo o thomilego ka September 2003 go ya go August 2004, o be o sa fapane le e mengwe. Dikgweding tšeo tše 12, batho ba 262 416 ba ile ba bontšha boineelo bja bona go Jehofa phatlalatša ka go kolobetšwa meetseng. Se se diregile dinageng tše 235, tšeo go tšona Dihlatse tša Jehofa di swarago dithuto tša magae tša Beibele tše 6 085 387 beke le beke e le gore di thuše batho ba tšwago maemong ka moka a bophelo le ba tšwago ditšhabeng, melokong le malemeng a mantši gore ba amogele therešo e neago bophelo e tšwago Lentšung la Modimo.—Kutollo 7:9.
6. Ke’ng se se dirilego gore go be le dikoketšego tše di tšwelago pele go theoša le nywaga?
6 Ke’ng se se dirilego gore tše ka moka di kgonege? Ga go pelaelo gore Jehofa o gogela batho ba bao ba sekametšego go lokeng go yena. (Johane 6:65; Ditiro 13:48) Lega go le bjalo, seo se sa swanelago go tšeelwa fase ke moya wa go hloka boithati le maiteko a go se lape ga bao ba dirilego boikgafo lesolong la go tsoma Mmušo. Ge a e-na le nywaga e 79, Ngwanabo Rena Macmillan o ngwadile gore: “Go tloga nakong ya ge ke be ke tseba la mathomo ka dikholofetšo tšeo di holofetšwago batho ba babjago le ba hwago, kholofelo ya-ka molaetšeng wo Beibele e o utollotšego ga se ya fokotšega. Go tloga ka yona nako yeo ke ile ka ikemišetša go tseba mo go oketšegilego ka seo Beibele e se rutago e le gore nka kgona go thuša ba bangwe bao ba swanago le nna ba ba nyakago go tseba ka Modimo yo Matla ohle, Jehofa le ka merero ya gagwe e mebotse ka batho.”
7. Ke phihlelo efe yeo e bontšhago lethabo le phišego ya bao ba hwetšago therešo ya Beibele?
7 Phišego yeo e bonwa gape go bahlanka ba Jehofa ba mehleng yeno. Tšea ka mohlala Daniela yo a tšwago Vienna, Austria. O itše: “Ga e sa le go tloga bjaneng bja-ka, Modimo e be e dutše e le yena mogwera wa-ka wa pelo-bohloko. Ka mehla ke be ke nyaka go tseba leina la gagwe ka gobane go nna go fo re Modimo go be go kwagala eka o kgole kudu. Eupša ke ile ka swanelwa ke go leta go ba go fihla ge ke e-na le nywaga e 17, ge Dihlatse tša Jehofa di be di tlile ga gešo. Di ile tša ntlhalosetša dilo tšohle tšeo ke bego ke nyaka go di tseba mabapi le Modimo. Mafelelong, ke be ke hweditše therešo, gomme e be e kgahliša kudu! Ke be ke thabile kudu moo ke ilego ka thoma go dira boboledi go motho yo mongwe le yo mongwe.” Go se go ye kae, phišego ya gagwe e ile ya dira gore bao a tsenago le bona sekolo ba mo kwere. Daniela o tšwetše pele ka gore: “Lega go le bjalo, go nna go be go le bjalo ka ge eka ke bona go phethagala ga boporofeta bja Beibele, ka gobane ke be ke ithutile gore Jesu o boditše balatedi ba gagwe gore ba be ba tla hloiwa le go tlaišwa ka baka la leina la gagwe. Ke be ke thabile e bile ke maketše kudu.” Go se go ye kae, Daniela o ile a neela bophelo bja gagwe go Jehofa, a kolobetšwa, gomme a thoma go phegelela pakane ya go ba tirelong ya boromiwa. Ka morago ga ge a nyetšwe, Daniela le monna wa gagwe e lego Helmut ba ile ba thoma go dira modiro wa boboledi go ma-Afrika, ma-China, ma-Philippine le ma-India ao a agilego kua Vienna. Daniela le Helmut mo nakong ye ba hlankela e le baromiwa ka borwa-bodikela bja Afrika.
Ga ba Langwe
8. Ke tsela efe e nngwe e putsago yeo ka yona ba bantši ba bontšhitšego lerato la bona go Modimo le go botegela Mmušo wa gagwe ka go se kwanantšhe?
8 Ke therešo gore tirelo ya boromiwa ke e nngwe ya ditsela tšeo ka tšona batho ba Jehofa lehono ba bontšhago lerato la bona go Modimo le go botegela Mmušo wa gagwe ka go se kwanantšhe. Go etša mmapatši wa seswantšhong sa Jesu, bao ba tsenelago tirelo ye ba ikemišeditše go ya mafelong a kgole ka baka la Mmušo. Ke therešo gore baromiwa ba ga ba sepelele go yo tsoma ditaba tše dibotse tša Mmušo; ba di iša go batho bao ba dulago dikarolong tšeo di lego lekatana tša lefase, ba ba ruta le go ba thuša go ba barutiwa ba Jesu Kriste. (Mateo 28:19, 20) Dinageng tše dintši, ba swanelwa ke go kgotlelela mathata a magolo kudu. Eupša kgotlelelo ya bona e putswa ka mo go humilego.
9, 10. Ke diphihlelo dife tše di kgahlišago tšeo di thabetšwego ke baromiwa bao ba lego mafelong a kgole a bjalo ka Repabliki ya Afrika Bogare?
9 Tšea ka mohlala Repabliki ya Afrika Bogare, yeo go yona ngwagola palo ya bao ba bilego gona Segopotšong sa lehu la Kriste e bego e le ba 16 184, mo e ka bago palo e fetago ya bagoeledi ba Mmušo ba nageng yeo ga šupa. Ka ge dikarolo tše dintši tša naga yeo di se na mohlagase, batho gantši ba dira mešomo ya bona ya letšatši le letšatši ka ntle tlase ga moriti wa sehlare. Ka gona e fo ba ga tlhago gore baromiwa ba dire modiro wa bona ka tsela e swanago—ba sware dithuto tša Beibele ka ntle tlase ga moriti wa sehlare. Ga se feela gore ka ntle go na le seetša e bile go fodile eupša gape go na le mohola o mongwe. Batho ba na le lerato la tlhago la go rata Beibele, gomme go boledišana ka ditaba tša bodumedi go tlwaelegile go etša ge go boledišana ka tša dipapadi goba boemo bja leratadima go tlwaelegile ditšong tše dingwe. Gantši, bafeta-ka-tsela ba lemoga seo se diregago gomme ba fo tsena ba tšea karolo thutong.
10 Ka gona, ge moromiwa yo mongwe a be a swere thuto ya Beibele ka ntle, lesogana le lengwe leo le bego le dula go selaganya le setarata le ile la tla gomme la bolela gore ka ge moromiwa a sa ka a le etela, o be a swanetše go tla gomme a ithute Beibele le lona. Go molaleng gore moromiwa o ile a thabela go dira bjalo, gomme lesogana le dira tšwelopele ka lebelo. Nageng yona yeo, maphodisa gantši a emiša Dihlatse tseleng, e sego bakeng sa go di nea ditaelo goba go di lefiša tšhelete ya kotlo, eupša bakeng sa go kgopela ditokollo tša morago-rago tša makasine wa Morokami le wa Phafoga! goba go di leboga bakeng sa sehlogo seo a tlogago a se thabetše.
11. Go sa šetšwe mathata, baromiwa ba nako e telele ba ikwa bjang ka tirelo ya bona?
11 Ba bantši ba bao ba tsenetšego tirelo ya boromiwa nywageng e 40 goba e 50 e fetilego ba sa dutše ba hlankela tšhemong ka potego. A mohlala o mobotse gakaakang wa tumelo le kgotlelelo bakeng sa rena ka moka! Nywageng ya ka godimo ga e 42 e fetilego, banyalani ba bangwe ba hlanketše gotee e le baromiwa dinageng tše tharo. Monna o re: “Go be go e na le mathata. Ka mohlala, re ile ra lwantšhana le bolwetši bja malaria ka nywaga e 35. Lega go le bjalo, ga se ra ka ra itshola ka baka la phetho yeo re e dirilego ya go ba baromiwa.” Mosadi wa gagwe o oketša ka gore: “Ka mehla go be go e na le dilo tše dintši tšeo re ka di lebogago. Bodiredi bja tšhemo bo re thabiša kudu, gomme go bonolo go thoma dithuto tša Beibele. Ge o bona barutwana ba e-tla dibokeng gomme ba tsebana, okare ke pokano ya lapa nako le nako.”
Ba ‘Bona Tšohle e le Lefeela’
12. Go lemoga e le ka kgonthe gore Mmušo ke wa bohlokwa go bontšhwa bjang?
12 Ge mmapatši wa mosepedi a be a hwetša pheta ya theko e kgolo o ile “a tloxa a y’o rekiša thoto ya xaxwe ka moka, a rêka yôna pheta yeo.” (Mateo 13:46) Boikemišetšo bjo bja go rata go gafa dilo tšohle tšeo di ka lebelelwago e le tša bohlokwa ke seka seo se hlaolago bao ba tlogago ba lebelela Mmušo e le wa bohlokwa. Ka ge e be e le yo mongwe yo a bego a tla ba le Kriste letagong la Mmušo, moapostola Paulo o itše: “Ke sa tiiša ke re ké thsenyêxêlô [“ke lefeela,” NW], xe ke di bapetša le boxolo bya tsebô ya xo tseba Jesu Kriste Mong wa-ka; ka ’baka la xaxwe ka re: Tšeo ka moka ké thsenyêxêlô; ka re: Ké maudi fêla, xore ke tlê ke humê ka Kriste.”—Ba-Filipi 3:8.
13. Motho yo mongwe kua Repabliking ya Czechoslovakia o ile a bontšha bjang lerato la gagwe la go rata Mmušo?
13 Ka tsela e swanago, ba bantši lehono ba ikemišeditše go dira diphetogo tše dikgolo maphelong a bona e le gore ba hwetše ditšhegofatšo tša Mmušo. Ka mohlala, ka October 2003, monna wa nywaga e 60 yo e lego hlogo ya sekolo sa Repabliking ya Czechoslovakia o ile a hwetša thušo ya go ithuta Beibele ya Tsebo e Išago Bophelong bjo bo sa Felego. Ka morago ga go e bala, kapejana o ile a ikgokaganya le Dihlatse tša Jehofa tša tikologong ya gabo gore a swarelwe thuto ya Beibele. O ile a tšwela pele gabotse moyeng gomme go se go ye kae o ile a thoma go ba gona dibokeng ka moka. Lega go le bjalo, go thwe’ng ka dithulaganyo tša gagwe tša go nyaka go kgethwa e le ramotse le tša go nyaka go tsenela dikgetho e le gore a be setho sa mokgatlo wa dipolitiki? O ile a kgetha go tsenela modiro o fapanego—lebelo la bophelo, go ba mogoeledi wa Mmušo. O itše, “Ke ile ka kgona go sepediša dipuku tše dintši tša Beibele go barutwana ba sekolong sa-ka.” O ile a bontšha boineelo bja gagwe go Jehofa ka go kolobetšwa meetseng kopanong ya July 2004.
14. (a) Ditaba tše dibotse tša Mmušo di tutueleditše ba dimilione gore ba dire’ng? (b) Ke dipotšišo dife tša bohlokwa tšeo yo mongwe le yo mongwe wa rena a ka ipotšišago tšona?
14 Batho ba bangwe ba dimilione go dikologa lefase ba arabetše ditabeng tše dibotse tša Mmušo ka tsela e swanago. Ba tšwile lefaseng le kgopo, ba apotše semelo sa bona sa kgale, ba tlogetše bagwera ba bona ba pele e bile ba tlogetše le mekgwa ya lefase. (Johane 15:19; Ba-Efeso 4:22-24; Jakobo 4:4; 1 Johane 2:15-17) Ke ka baka la’ng ba dira tše ka moka? Ka gobane ba tšeela godimo ditšhegofatšo tša Mmušo wa Modimo go feta selo le ge e le sefe seo tshepedišo ya gona bjale ya dilo e ka se neago. Na o ikwa ka mo go swanago ka ditaba tše dibotse tša Mmušo? Na di go tutueletša go dira diphetogo tše di nyakegago e le gore mokgwa wa gago wa bophelo, ditekanyetšo tša gago le dipakane tša gago di dumelelane le seo Jehofa a se nyakago? Go dira bjalo go tla dira gore o hwetše ditšhegofatšo tše di humilego, ga bjale le nakong e tlago.
Puno e Fihla Bofelong
15. Go be go porofetilwe gore batho ba Modimo ba tla dira’ng mehleng ya bofelo?
15 Mopsalme o ngwadile gore: “Mohla Ò e-tšwa dirá, sethšaba sa xaxo se tlo ithapa.” Bao ba ithapilego ba akaretša ‘bafsa ba bjalo ka phoka’ le ‘bagoeledi ba bantši’ ba ‘basadi bao ba kwatšago ditaba tše dibotse.’ (Psalme 68:11; 110:3) Mafelelo a phišego le boikgafo bja batho ba Jehofa—banna le basadi, ba bafsa le ba bagolo—e bile afe mehleng ye ya bofelo?
16. Nea mohlala wa kamoo bahlanka ba Modimo ba katanelago go thuša ba bangwe go ithuta ka Mmušo.
16 Mmulamadibogo, goba mogoeledi wa Mmušo wa nako e tletšego, kua India o be a tshwenyegile mabapi le kamoo difoa tša ka godimo ga dimilione tše pedi tša nageng yeo di bego di ka thušwa go ithuta ka Mmušo. (Jesaya 35:5) O ile a dira phetho ya go ingwadiša lenaneong la thuto la go ithuta polelo ya diatla kua Bangalore. Moo o ile a kgona go boledišana le difoa tše dintši ka kholofelo ya Mmušo, gomme dihlopha tša dithuto tša Beibele di ile tša thongwa. Dibekeng tše sego kae, batho ba ka godimo ga ba 12 ba ile ba thoma go tla dibokeng Holong ya Mmušo. Ka morago, monyanyeng wa lenyalo, mmulamadibogo o ile a gahlana le lesogana la sefoa le le tšwago Calcutta leo le bego le e-na le dipotšišo tše dintši e bile le ipontšha le kgahlegela kudu go tseba mo go oketšegilego ka Jehofa. Lega go le bjalo, go be go e na le bothata. Lesogana le le be le swanetše go boela Calcutta, yeo e lego bokgole bja dikhilomithara tše ka bago 1 600, gore le yo tsena kholetšhe, gomme moo go be go se na Dihlatse tšeo di bego di tseba polelo ya diatla. Ka boiteko bjo bogolo, le ile la phegelela tatago lona gore a upše a le dumelele go yo tsena sekolo Bangalore e le gore le tle le kgone go tšwela pele ka thuto ya lona ya Beibele. Le ile la tšwela pele gabotse moyeng, gomme ka morago ga mo e ka bago ngwaga, le ile la neela bophelo bja lona go Jehofa. Ka morago le ile la ba le dithuto tša Beibele le difoa tše dintši, go akaretša le mogwera wa lona wa bjaneng. Ofisi ya lekala ya India mo nakong ye e rulaganyetša gore babulamadibogo ba ithute polelo ya diatla e le gore ba thuše tšhemong yeo.
17. Hlalosa seo o hwetšago e le se se kgothatšago ka mo go kgethegilego mabapi le pego ya ngwaga wa tirelo wa 2004 go matlakala 19 go ya go 22.
17 Go matlakala 19 go ya go 22 a makasine wo, o tla hwetša pego ya lefase ka bophara ya modiro wa tšhemo wa Dihlatse tša Jehofa ngwageng wa tirelo wa 2004. Iphe nako ya go e hlahloba, gomme o bone ka noši bohlatse bja gore batho ba Jehofa go dikologa lefase ba lebišitše tlhokomelo ya bona e kgolo lesolong la go tsoma “pheta ya thêkô e kxolo” lehono.
Dulang ‘le Tsoma Mmušo Pele’
18. Ke tsebišo efe yeo Jesu a sa kago a e akaretša seswantšhong sa mmapatši wa mosepedi, gomme ka baka la’ng?
18 Ge re nagana gape ka seswantšho sa Jesu sa mmapatši wa mosepedi, re hlokomela gore Jesu ga se a bolela selo mabapi le kamoo mmapatši a bego a tla itlhokomela ka gona bophelong ka morago ga go rekiša tšohle tšeo a bego a e-na le tšona. Ge e le gabotse, ba bangwe ba ka botšiša gore: ‘Mmapatši o be a tla hwetša bjang dijo, diaparo le bodulo ka ge mo nakong ye a se sa na selo? Pheta yeo ya bohlokwa e be e tla mo hola ka’ng?’ Tšeo e be e tla ba dipotšišo tše di kwagalago go ya ka pono ya batho. Eupša na Jesu ga se a ka a kgothaletša barutiwa ba gagwe gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka”? (Mateo 6:31-33) Ntlha ya bohlokwa ya seswantšho se ke go nyakega ga go bontšha boineelo bja pelo ka moka go Modimo le phišego ya go fišegela Mmušo. Na go na le thuto yeo re ka ithutago yona mo?
19. Ke thuto efe ya bohlokwa yeo re ithutago yona seswantšhong sa Jesu sa pheta ya theko e kgolo?
19 Go sa šetšwe gore re sa tšwa go ithuta ka ditaba tše dibotse tše di kgahlišago goba re be re dutše re tsoma Mmušo e bile re botša ba bangwe ka ditšhegofatšo tša wona ka nywaga e mentši, re swanetše go tšwela pele re lebiša kgahlego ya rena le tlhokomelo Mmušong. Tše ke dinako tša mathata, eupša re na le mabaka a tiilego a go dumela gore seo re se tsomago ke sa kgonthe e bile ke seo se sa lekanywego le selo—go etša phetha yeo mmapatši a ilego a e hwetša. Ditiragalo tša lefase le diporofeto tša Beibele tše di šetšego di phethagaditšwe di re nea bohlatse bjo bo kgodišago bja gore re phela ‘bofelong bja mabaka ano.’ (Mateo 24:3) Anke go etša mmapatši wa mosepedi, re bontšhe phišego ya pelo ka moka ya go fišegela Mmušo wa Modimo gomme re thabele tokelo ya go tsebatša ditaba tše dibotse.—Psalme 9:1, 2.
Na o a Gopola?
• Go theoša le nywaga, ke’ng se se dirilego gore go be le koketšego barapeding ba therešo?
• Ke moya ofe wo o bonwago go bao ba hlankelago e le baromiwa?
• Ke diphetogo dife tšeo ba bangwe ba di dirilego ka baka la ditaba tše dibotse tša Mmušo?
• Ke thuto efe ya bohlokwa yeo re ka ithutago yona seswantšhong sa Jesu sa pheta ya theko e kgolo?
[Dipotšišo tša Thuto]
[Tšhate go letlakala 19-22]
PEGO YA NGWAGA WA TIRELO WA 2004 YA DIHLATSE TŠA JEHOFA LEFASENG KA BOPHARA
(See bound volume)
[Seswantšho go letlakala 14]
“Therešo . . . e kgahla batho ba mehuta ka moka.”—A. H. Macmillan
[Seswantšho go letlakala 15]
Daniela le Helmut ba ile ba dira boboledi tšhemong ya leleme le šele kua Vienna
[Diswantšho go letlakala 16, 17]
Go etša mmapatši wa mosepedi, baromiwa lehono ba šegofaditšwe ka mo go humilego
[Seswantšho go letlakala 17]
“Sethšaba sa xaxo se tlo ithapa”