Bakriste—Ikgantšheng ka Seo le Lego Sona!

“E a ithêtaxo a ithêtê ka Morêna.”—1 BA-KORINTHE 1:31.

1. Ke tshekamelo efe yeo e bonagalago boemong bja batho bja kgopolo malebana le bodumedi?

“GO SE šetše.” Morago bjale, mohlalosi wa ditaba tša bodumedi o dirišitše polelwana ye go hlalosa boemo bja kgopolo bjo batho ba bantši ba nago le bjona ka ditumelo tša bona. O hlalositše gore: “Tshekamelo e kgolo kudu yeo e lego gona bodumeding bja mehleng yeno ga se ya bodumedi le gatee—ke boemo bja kgopolo bjoo bo ka hlaloswago gakaone e le ‘go se šetše.’” Ge a tlaleletša go se a se boletšego, o hlalositše go se šetše e le “kgetho ya motho ya go se nyake go ba le taba le gatee ka bodumedi bja gagwe ka noši.” O boletše gore, batho ba bantši “ba dumela go Modimo . . . ; ba fo ba ba se na taba gakaalo le yena.”

2. (a) Ke ka baka la’ng go sa makatše gore batho ba fetogile ba sa šetšego moyeng? (b) Ke kotsi efe yeo go se šetše go e bakago go Bakriste ba therešo?

² Tshekamelo ye ya go se šetše ga e makatše barutwana ba Beibele. (Luka 18:8) Le gona ge go tliwa tabeng ya bodumedi ka kakaretšo, go se be le kgahlego mo go bjalo go swanetše go letelwa. Bodumedi bja maaka bo arošitše batho ba bantši le go ba nyamiša ka nako e telele. (Kutollo 17:15, 16) Lega go le bjalo, go Bakriste ba therešo, moya wa go se dire dilo ka pelo ka moka le wa go hloka phišego o baka kotsi. Re ka se ke ra ba bao ba sa šetšego ge e le mabapi le tumelo ya rena gomme ra lahlegelwa ke phišego ya rena ya go fišegela go hlankela Modimo le go fišegela therešo ya Beibele. Jesu o lemošitše malebana le go ba bololo mo go bjalo ge a be a eletša Bakriste ba lekgolong la pele la nywaga bao ba bego ba dula Laoditsea ka gore: “Ke tseba xe O sa tonye, xe O sa fiše. E ka be e le kaone xe O tonya, xoba Ò fiša. . . . O . . . yo bololo fêla.”—Kutollo 3:15-18.

Go Kwešiša Seo re Lego Sona

3. Ke dikarolong dife moo Bakriste ba ka ikgantšhago ka seo ba lego sona?

³ E le gore ba lwantšhane le go se šetše moyeng, Bakriste ba swanetše go ba le kwešišo e botse ka seo ba lego sona, gomme ba swanetše go ikgantšha ka mo go swanetšego ka leswao la bona leo le ba hlaolago. Re le bahlanka ba Jehofa le barutiwa ba Kriste, re ka hwetša ditlhaloso ka Beibeleng mabapi le seo re lego sona. Re “dihlatse” tša Jehofa, “badirišani ba Modimo,” ge re dutše re abelana le ba bangwe ‘ditaba tše dibotse’ ka mafolofolo. (Jesaya 43:10; 1 Ba-Korinthe 3:9; Mateo 24:14, bapiša le NW.) Re batho bao ba ‘ratanago.’ (Johane 13:34) Bakriste ba therešo ke batho bao “ba ithutilexo ba tlwaêla xo kxetholoxanya botse le bobe.” (Ba-Hebere 5:14) Re “dietša lefaseng.” (Ba-Filipi 2:15) Re katanela go ‘tšea ka tsela e botse ge re le gare ga ba-Ntle.’—1 Petro 2:12; 2 Petro 3:11, 14.

4. Morapedi wa Jehofa a ka tseba bjang seo a sego sona?

⁴ Le gona barapedi ba Jehofa ba therešo ba tseba seo ba sego sona. “Xa se ba lefase,” go etša ge Moetapele wa bona e lego Jesu Kriste, e be e se wa lefase. (Johane 17:16) Ba dula ba arogile go “ba-ntlê,” bao “Ba [fsifetšego] thlaoloxanyô, ba tloxêlane le bophelô bya Modimo.” (Ba-Efeso 4:17, 18) Ka baka leo, balatedi ba Jesu ba ‘lahla go nyatša Modimo le dikganyogo tša lefase gore  mehleng yeno ba phele ba eletšegile, ba lokile e bile ba e na le borapedi.’—Tito 2:12.

5. Ke’ng se se bolelwago ke keletšo ya gore re “ithêtê ka Morêna”?

⁵ Kwešišo ya rena e botse mabapi le seo re lego sona le tswalano ya rena le Mmuši yo a Phagamego wa legohle e re tutueletša gore re “ithêtê ka Morêna.” (1 Ba-Korinthe 1:31) Go itheta moo ke ga mohuta ofe? Re le Bakriste ba therešo, re ikgantšha ka go ba le Jehofa e le Modimo wa rena. Re latela keletšo e rego: “E a ithêtaxo a a ithêtê ka tšé: Ka xe a hlalefetše xo ntseba, Nna Morêna, ke dirišaxo kxauxêlô le molaô le xo loka mo ’faseng.” (Jeremia 9:23) Re ‘itheta’ ka tokelo ya go tseba Modimo le go dirišwa ke yena bakeng sa go thuša ba bangwe.

Tlhohlo

6. Ke ka baka la’ng ba bangwe ba hwetša go le thata go kgomarela pono e tsepamego mabapi le leswao la bona la Bokriste?

⁶ Ke therešo gore go kgomarela pono e tsepamego mabapi le leswao leo le re hlaolago la Bokriste ga go bonolo ka mehla. Lesogana le lengwe leo le godišitšwego e le Mokriste le gopola gore ka nako e telele le be le le boemong bja go fokola moyeng, le re: “Ka dinako tše dingwe, ke be ke nagana gore ga ke tsebe lebaka leo ka lona ke bego ke le yo mongwe wa Dihlatse tša Jehofa. Ke rutilwe therešo go tloga boseeng. Ka dinako tše dingwe ke be ke nagana gore e be e fo ba bodumedi bjo bongwe bjo bo hlomilwego bjo bo amogelegago.” Ba bangwe ba ka ba ba ile ba dumelela gore kwešišo ya bona ka seo ba lego sona e tutuetšwe ke boithabišo bja lefase, methopo ya ditaba le pono ya morago bjale ka bophelo ya go se boife Modimo. (Ba-Efeso 2:2, 3) Bakriste ba bangwe ka dinako tše dingwe ba ka lebeletšana le dinako tša go se ikholofele le tša go hlahloba ditekanyetšo le dipakane tša bona lefsa.

7. (a) Ke mohuta ofe wa go itlhahloba wo o swanetšego bahlanka ba Modimo? (b) Kotsi e iphihlile kae?

⁷ Na mogato wa go itlhahloba ka kelohloko ke o fošagetšego ka mo go feletšego? Aowa. O ka ba o gopola gore moapostola Paulo o ile a kgothaletša Bakriste gore ba tšwele pele ba itlhahloba ge a re: “Itebeledišeng lena beng Le bônê xe Le na le tumêlô; iphenyekeng!” (2 Ba-Korinthe 13:5) Moapostola mo o be a kgothaletša gore go dirwe maiteko a agago a go hwetša mafokodi le ge e le afe a moya ao a ka bago a le gona, ka morero wa go gata megato e swanetšego e le go a lokiša. Ge Mokriste a itlhahloba e le gore a bone ge e ba a le tumelong, o swanetše go tseba ge e ba mantšu le ditiro tša gagwe di dumelelana le seo a bolelago gore o a se dumela. Lega go le bjalo, ge e ba go dirwa ka morero o fošagetšego, go itlhahloba mo go re tutueletšago go tsoma seo go thwego ke “go hwetša seo re lego sona” goba go tsoma dikarabo tšeo di sa sepedišanego le tswalano ya rena le Jehofa goba le phuthego ya Bokriste, go tla ipontšha go se na mohola e bile go ka ba kotsi moyeng. * Le ka mohla re ka se nyake go ‘senyegelwa ke sekepe tumelong ya rena’!—1 Timotheo 1:19.

Le Rena re Lebeletšana le Ditlhohlo

8, 9. (a) Moše o ile a hlalosa bjang maikwelo a gagwe a go se ikholofele? (b) Jehofa o ile a arabela bjang maikwelong a Moše a go dika-dika? (c) O kgongwa bjang ke dikgonthišetšo tša Jehofa?

⁸ Na Bakriste bao nako le nako ba lebeletšanago le go se ikholofele ba swanetše go nagana gore ba paletšwe? Ga go bjalo le gatee! Ke therešo gore ba ka homotšwa ke go tseba gore maikwelo a bjalo ga se a mafsa. Dihlatse tša Modimo tše di botegago tša mehleng ya bogologolo di ile tša lebeletšana le ona. Tšea ka mohlala Moše yo a ilego a bontšha tumelo e matla ka go fetišiša, go botega ka go se kwanantšhe le boineelo. Ge a be a neilwe kabelo yeo e bego e bonagala e le thata, Moše ka go se ikholofele o ile a botšiša gore: “Ké nna mang?” (Ekisodo 3:11) Go bonagala karabo yeo a bego a e naganne e be e le ya gore, ‘Ga ke motho wa selo!’ goba ‘Ga ke na bokgoni!’ Dintlha tše mmalwa tša mabapi le setlogo sa Moše di ka ba di ile tša mo dira gore a ikwe a sa swanelege: E be e le wa setšhaba sa makgoba. O be a lahlilwe ke ba-Isiraele. O be a sa kgone go bolela gabotse. (Ekisodo 1:13, 14; 2:11-14; 4:10)  E be e le modiši, e lego modiro woo o bego o hloilwe ke ba-Egipita. (Genesi 46:34) Ga go makatše ge a be a ikwa a sa swanelegele go ba molopolodi wa batho ba Modimo bao ba bego ba dirilwe makgoba!

⁹ Jehofa o ile a kgonthišetša Moše ka go mo nea dikholofetšo tše pedi tše matla tša gore: “Ke tlo ba le wêna; xomme bohlatse bya xo re ké Nna ke Xo romilexo še-bo: E tlo re xe O nthšitše sethšaba sa-ka Egipita, Le tlo tla la dirêla Modimo thabeng yé.” (Ekisodo 3:12) Modimo o be a botša mohlanka wa gagwe yo a dika-dikago gore O be a tla ba le yena ka mehla. Go oketša moo, Jehofa o be a bontšha gore o be a ka se palelwe ke go lokolla batho ba gagwe. Go theoša le nywaga, Modimo o ile a nea kholofetšo e swanago ya gore o tla thekga batho ba gagwe. Ka mohlala, ge setšhaba sa Isiraele se be se le kgaufsi le go tsena Nageng ya Kholofetšo, ka Moše o ile a se botša gore: “Tiišang, Le dirê senna; . . . xobane e a sepelaxo le lena ké Yêna Morêna Modimo wa lena. A ka se kê a Xo lahletša, a ka se kê a Xo tloxêla.” (Doiteronomio 31:6) Jehofa gape o ile a kgonthišetša Jošua gore: “Xa xo na e a tl’o xo êma xe O fihla mehla yohle ya xo phela xa xaxo. Ke tlo êma le wêna . . . Nka se kê ka Xo lahla; nka se kê ka Xo tloxêla.” (Jošua 1:5) Le gona o holofetša Bakriste gore: “Nka se kê ka Xo lahla; nka se kê ka Xo tloxêla.” (Ba-Hebere 13:5) Go ba le thekgo e bjalo e matla go swanetše go re dira gore re ikwe re ikgantšha ka go ba Bakriste!

10, 11. Asafa wa mo-Lefi o ile a thušwa bjang go kgomarela boemo bjo bo nepagetšego bja kgopolo mabapi le go ba bohlokwa ga tirelo ya gagwe go Jehofa?

¹⁰ Mo e ka bago nywaga-kgolo e mehlano ka morago ga Moše, mo-Lefi yo a botegago yo a bitšwago Asafa o ile a ngwala ka go lebanya ka dipelaelo tša gagwe mabapi le go ba bohlokwa ga go phegelela tsela e lokilego. Ge a be a dutše a katanela go hlankela Modimo go sa šetšwe mathata le diteko, Asafa o ile a bona ba bangwe bao ba bego ba nyatša Modimo e e-ba ba matla kudu e bile ba atlega. Asafa o ile a kgomega bjang? O dumetše ka gore: “’Me nna ke nyakil’o kxopya, ’naô la-ka le nyakil’o thedimoxa, Xe ke pelokxolêla baipoti, kè bôna ba babe bà dula bà thabile.” O ile a thoma go belaela go ba bohlokwa ga go ba morapedi wa Jehofa. Asafa o be a nagana gore: “Hleng e ke ké lefêla xe ke seketša pelo ya-ka, xe ke hlapa diatla ka xo ila dibe? Le xe xo le byalo ke a ôtlwa ka matšatši ohle.”—Psalme 73:2, 3, 13, 14.

¹¹ Asafa o ile a lebeletšana bjang le maikwelo a ao a hlobaetšago? Na o ile a gana gore o ikwa ka tsela yeo? Aowa. O ile a a botša Modimo ka thapelo, go etša ge re bona go Psalme ya bo-73. Asafa o ile a dira phetogo e kgolo ge a be a etetše sekgethweng sa tempele. Ge a be a le moo, o ile a lemoga gore boineelo go Modimo e sa dutše e le tsela e kaone-kaone. A tsošološitše tebogo ya gagwe ya go leboga dilo tša moya, o ile a kwešiša gore Jehofa o be a hloile bobe le gore ka nako e swanetšego ba kgopo ba be ba tla otlwa. (Psalme 73:17-19) Ge nako e dutše e e-ya, Asafa o ile a matlafatša kwešišo ya gagwe mabapi le seo a lego sona bjalo ka mohlanka wa Jehofa yo a neilwego tokelo. O boditše Modimo gore: “Xe e le nna ke dula kè na naxô’; O nthswere ka seatla sa-ka sa le letona. O nthsepediša ka morêrô w’axo, wa tlo bá wa nkamoxêla wa nkxodiša.” (Psalme 73:23, 24) Asafa o ile a ikgantšha ka Modimo wa gagwe gape.—Psalme 34:2.

 Ba be ba Tloga ba Kwešiša Seo ba Lego Sona

12, 13. Nea mehlala ya baanegwa ba ka Beibeleng bao ba ilego ba ikgantšha ka tswalano ya bona le Modimo.

¹² Tsela e nngwe ya go matlafatša kwešišo ya rena ka seo re lego sona bjalo ka Bakriste ke go hlahloba le go ekiša tumelo ya barapedi ba botegago ka go se kwanantšhe, bao ba ilego ba ikgantšha e le ka kgonthe ka tswalano ya bona le Modimo go sa šetšwe mathata. Nagana ka Josefa, morwa wa Jakobo. Ge e be e sa le yo monyenyane o ile a rekišwa ka tsela ya boradia gore e be lekgoba gomme a išwa Egipita, dikhilomithara tše makgolo kgole le tatagwe yo a boifago Modimo gomme a išwa lefaseng leo le lego kgole le legae la gabo le le lego borutho le leo le nago le thekgo. Ge a dutše a le Egipita, Josefa o be a se na motho yo a bego a ka retologela go yena gore a hwetše keletšo e tšwago go Modimo, gomme o ile a swanelwa ke go lebeletšana le maemo a thata ao a bego a leka boitshwaro le go ithekga ga gagwe ka Modimo. Lega go le bjalo, go molaleng gore o ile a dira boiteko bjo a bo nagannego e sa le pele bja go kgomarela seo a lego sona bjalo ka mohlanka wa Modimo, gomme o ile a tšwela pele a botegela seo a bego a tseba gore ke se se lokilego. O be a ikgantšha ka go ba morapedi wa Jehofa gaešita le tikologong e tletšego bonaba, gomme ga se a ka a dika-dika go hlalosa kamoo a bego a ikwa ka gona.—Genesi 39:7-10.

¹³ Nywaga-kgolong e seswai ka morago, ngwanenyana wa lethopša wa mo-Isiraele yo a ilego a ba lekgoba la molaodi wa Madira wa mo-Siria e lego Naamane ga se a ka a lebala seo a lego sona bjalo ka morapedi wa Jehofa. Ge sebaka se be se tšwelela, ka sebete o ile a nea bohlatse bjo bobotse ka Jehofa ge a be a hlaola Elisa e le moporofeta wa Modimo wa therešo. (2 Dikxoši 5:1-19)  Nywaga e mentši ka morago ga moo, Kgoši Josia yo monyenyane, go sa šetšwe go ba ga gagwe tikologong e gobogilego, o ile a ntšha molao wa go mpshafatšwa ga bodumedi moo go tšerego nako e telele, a lokiša tempele ya Modimo, gomme a etelela setšhaba pele gore se boele go Jehofa. O ile a ikgantšha ka tumelo le borapedi bja gagwe. (2 Koronika, dikgaolo 34, 35) Ge ba le Babele, Daniele le bagwera ba gagwe ba bararo ba ba-Hebere ga se ba ka ba lebala seo ba bego ba le sona bjalo ka bahlanka ba Jehofa, gomme gaešita le tlase ga kgateletšo le teko, ba ile ba tšwela pele ba botega. Go molaleng gore ba be ba ikgantšha ka go ba bahlanka ba Jehofa.—Daniele 1:8-20.

Ikgantšhe ka Seo o Lego Sona

14, 15. Go ikgantšha ka leswao la rena la Bokriste go akaretša’ng?

¹⁴ Bahlanka ba ba Modimo ba be ba atlega ka gobane ba be ba e-na le kgopolo e botse ka boikgantšho ge ba le pele ga Modimo. Go thwe’ng ka rena lehono? Go ikgantšha ka leswao la rena la Bokriste go akaretša’ng?

¹⁵ Ge e le gabotse, go akaretša go ba le tebogo e kgolo ya go leboga ge o le yo mongwe wa batho bao ba bitšwago ka leina la Jehofa, o hwetša tšhegofatšo ya gagwe e bile o amogelwa ke yena. Modimo ga a na pelaelo mabapi le bao e lego ba gagwe. Moapostola Paulo, yo a phetšego mehleng ya kgakanego e kgolo ya bodumedi, o ngwadile gore: “Morêna ó tseba ba xaxwe!” (2 Timotheo 2:19; Numeri 16:5) Jehofa o ikgantšha ka “ba xaxwe!” O re: “Mo-kxwatha-lena ó a [mphahla].” (Sakaria 2:12) Go molaleng gore Jehofa o a re rata. Le rena, tswalano ya rena le yena e swanetše go thewa leratong le le tseneletšego la go mo rata. Paulo o itše: “Motho e a rataxo Modimo, ké yêna a tsebilwexo ke Modimo.”—1 Ba-Korinthe 8:3.

16, 17. Ke ka baka la’ng Bakriste, ba bafsa le ba bagolo, ba ka ikgantšha ka bohwa bja bona bja moya?

¹⁶ Bafsa bao ba godišitšwego e le Dihlatse tša Jehofa ba swanetše go hlahloba ge e ba leswao la bona la Bokriste le matlafala go ithekgile ka tswalano ya bona ka noši le Modimo. Ba ka se fo ithekga ka tumelo ya batswadi ba bona. Paulo o ngwadile mabapi le mohlanka yo mongwe le yo mongwe wa Modimo gore: “Xe a êma ó êmêla Mong wa xaxwe; xe a e-wa ó wêla Mong wa xaxwe.” Ka gona, Paulo o tšwela pele ka gore: “Motho mang le mang wa rena ó tlo iphetolêla pele xa Modimo.” (Ba-Roma 14:4, 12) Go molaleng gore go tšwetša pele motlwae wa lapa eupša o se ka pelo ka moka go seo o se dirago go ka se dire gore o be le tswalano ya kgaufsi le ya nako e telele le Jehofa.

¹⁷ Go theoša le histori, go be go dutše go e na le dihlatse tša Jehofa tše dintši. Di thomile ka monna yo a botegago e lego Abele—mo e ka bago nywaga-kgolo e 60 e fetilego—go ya go “lešaba le lexolo” la Dihlatse tša mehleng yeno go tšwela pele go ya go mašaba a barapedi ba Jehofa bao ba tlago go thabela bokamoso bja sa ruri. (Kutollo 7:9; Ba-Hebere 11:4) Re ba morago-rago go barapedi ba ba bantši ba botegago. Ruri re na le bohwa bjo bohlokwa gakaakang bja moya!

18. Ditekanyetšo tša rena le melao ya motheo di re dira bjang gore re fapane le lefase?

¹⁸ Le gona, leswao la rena la Bokriste le akaretša ditekanyetšo, maswao, melao ya motheo le dika tšeo di re hlaolago re le Bakriste. Ke “tsela,” tsela e nnoši e atlegago ya bophelo le ya go thabiša Modimo. (Ditiro 9:2, PK; Ba-Efeso 4:22-24) Bakriste “lekang tšohle” gomme “le šalê Lè swere tše boló.” (1 Ba-Thesalonika 5:21) Re na le kwešišo e botse ka phapano e kgolo yeo e lego gona magareng ga Bokriste le lefase leo le furaletšego Modimo. Jehofa o dira gore go be le phapano e sa belaetšego magareng ga borapedi bja  therešo le bja maaka. Ka moporofeta wa gagwe Maleaki, o itše: “Le tlo buša Lè hlatha moloki le e a sa lokaxo, Lè hlaoloxanya mo-dirêla-Morêna le e a sa Mo direlexo.”—Maleaki 3:18.

19. Ke’ng se Bakriste ba therešo ba ka se kego ba ba sona?

¹⁹ Ka ge go ikgantšha ka Jehofa go le bohlokwa kudu lefaseng le le le gakanegilego, ke’ng se se ka re thušago go kgomarela boikgantšho bjo bo swanetšego ka Modimo wa rena gomme re be le kwešišo e botse ka leswao la rena la Bokriste? Ditšhišinyo tše di holago di hwetšwa sehlogong se se latelago. Ge o dutše o di ahla-ahla, o ka kgodišega ka se: Bakriste ba therešo le ka mohla ba ka se ke ba ba bahlaselwa ba “go se šetše.”

[Mongwalo wa ka tlase]

Na o a Gopola?

• Ke bjang Bakriste ba ka ‘ithetago ka Morena’?

• O ithutile’ng mohlaleng wa Moše le wa Asafa?

• Ke baanegwa bafe ba Beibele bao ba ilego ba ikgantšha ka tirelo ya bona go Modimo?

• Go ikgantšha ka leswao la rena la Bokriste go akaretša’ng?

[Dipotšišo tša Thuto]

[Seswantšho go letlakala 14]

Ka nakwana, Moše o ile a ba le maikwelo a go se ikholofele

[Diswantšho go letlakala 15]

Bahlanka ba Jehofa ba bantši ba bogologolo ba ile ba ikgantšha ka leswao la bona le le ba hlaolago