Beibele ya Berleburg

BODUMEDI bja Piet e be e le mokgatlo wa bodumedi woo o ilego wa gola gare ga Kereke ya Luthere kua Jeremane lekgolong la bo-17 le la bo-18 la nywaga. Balatedi ba bangwe ba mokgatlo wo ba ile ba kwerwa goba gaešita le go tlaišwa ka baka la tumelo ya bona. Diithuti tše mmalwa tše di lego bodumeding bja Piet di ile tša tšhabela kua Berleburg, dikhilomithareng tše ka bago 150 ka leboa la (noka) e Kgolo ya Frankfurt. Di ile tša newa ngwako wa botšhabelo ke mokgomana wa lefelong leo e lego Mohlomphegi Casimir von Wittgenstein Berleburg, yo a bego a tšeela bodumedi godimo kudu. Go ba gona ga baboledi ba le diithuti tše kua Berleburg go ile gwa lebiša phetolelong e mpsha ya Beibele, yeo lehono e tsebjago e le Beibele ya Berleburg. Go tlile bjang gore e fetolelwe?

Yo mongwe wa batho bao ba tsomago botšhabelo e be e le Johann Haug, yo a ilego a gapeletšwa go tloga legaeng la gagwe kua Strasbourg ka baka la gore baithuta-tumelo ba lefelong leo ba be ba sa kgone go mo kgotlelela. Haug e be e le seithuti se se rutegilego le setsebi sa maleme. O ile a botša diithuti-gotee le yena kua Berleburg ka kganyogo ya gagwe “ya go nyaka go tšweletša phetolelo e sekilego ya Beibele, bakeng sa go phošolla phetolelo ya Luther, e le gore a bee ditaba ka mo go nepagetšego go ya ka seo se bolelwago ke mantšu a Lentšu la Modimo.” (Die Geschichte der Berlenburger Bibel [Histori ya Beibele ya Berleburg]) Pakane e be e le go tšweletša Beibele ye e nago le dintlha tše di neago tsebišo le ditlhaloso, gomme e be e swanetše go kwešišwa ke motho yo mongwe le yo mongwe. Haug o ile a lokeletša diithuti tša dinaga tše dingwe tša Yuropa tše di bego di tla mo thuša, gomme o ile a šoma mošomo wo ka nywaga e 20. Beibele ya Berleburg e ile ya gatišwa go tloga ka 1726. Ka baka la ditlhaloso tša yona tše di oketšegilego, go ile gwa nyakega gore e gatišwe ka dibolumo tše seswai.

Ruri Beibele ya Berleburg e na le dintlha tše dingwe tše di kgahlišago. Ka mohlala, Ekisodo 6:2, 3 e balega ka gore: “Go feta moo Modimo o ile a bolela le Moše gomme a re: Ke nna MORENA! Gomme ke tšweletše go Aborahama/go Isaka le go Jakobo/ke le Modimo yo a phagamego ka go fetišiša: eupša ga se ka ka ka ba tsebiša leina la-ka la JEHOFA.” Tsebišo e hlalosa gore: “Leina JEHOFA . . . , ke leina le le hlaotšwego/goba/leina le le tsebaditšwego.” Leina la Modimo, Jehofa, le bile le tšwelela ditlhalosong tša Ekisodo 3:15 le Ekisodo 34:6.

Ka gona Beibele ya Berleburg e ile ya ba e nngwe ya Dibeibele tša Jeremane tšeo di kilego tša diriša leina Jehofa, e ka ba tabeng e kgolo, mengwalong ya tlase goba ditlhalosong. E nngwe ya diphetolelo tše oketšegilego tša mehleng yeno tše di neago tlhompho e swanetšego leineng la Modimo ke New World Translation of the Holy Scriptures, ye e gatišitšwego ke Dihlatse tša Jehofa.