Go Šireletša Leswao la Rena la Bokriste
Go Šireletša Leswao la Rena la Bokriste
“Morêna Yêna ó re: Lena Le dihlatse tša-ka.”—JESAYA 43:10.
1. Ke batho ba mohuta mang bao Jehofa a ba gogelago go yena?
GE O le Holong ya Mmušo, lebeledišiša bao ba go dikologilego. O bona bomang lefelong le la borapedi? O ka bona bafsa ba mafolofolo bao ka kelohloko ba monyago bohlale bja Mangwalo. (Psalme 148:12, 13) Go na le kgonagalo ya gore o ka bona gape le dihlogo tša malapa tšeo di katanelago go thabiša Modimo mola di dutše di phela lefaseng leo le hlomphollago bophelo bja lapa. Mohlomongwe o tla bona gape le batšofadi ba rategago, bao ba phelelago boineelo bja bona go Jehofa ka go tia go sa šetšwe malwetši a botšofadi. (Diema 16:31) Ka moka ba rata Jehofa kudu. Le gona o bone go swanetše gore a ba gogele tswalanong ya kgaufsi le yena. Morwa wa Modimo o itše: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.”—Johane 6:37, 44, 65.
2, 3. Ke ka baka la’ng e ka ba tlhohlo go kgomarela kwešišo e tiilego mabapi le seo re lego sona bjalo ka Bakriste?
2 Na ga re thabišwe ke go ba karolo ya batho bao ba amogelwago le go šegofatšwa ke Jehofa? Lega go le bjalo, go kgomarela kwešišo e tiilego mabapi le seo re lego sona bjalo ka Bakriste ‘mabakeng a a mathata’ ke tlhohlo. (2 Timotheo 3:1) Se e tloga e le sa therešo kudu ka bafsa bao ba godišwago malapeng a Bakriste. Mofsa yo mongwe yo bjalo o dumetše ka gore: “Gaešita le ge ke be ke e ba gona dibokeng tša Bokriste, ke be ke se na dipakane tše di kwagalago tša moya, gomme go bolela therešo ke be ke se na kganyogo e tiilego ya go nyaka go hlankela Jehofa.”
3 Ba bangwe, le ge ba be ba e-na le kganyogo e tšwago pelong ya go nyaka go hlankela Jehofa, ba ka ba ba ile ba arošwa ke kgateletšo e matla ya dithaka, ditutuetšo tša lefase le ditshekamelo tša sebe. Ge re le tlase ga kgateletšo, ganyenyane-ganyenyane e ka re dira gore re lahlegelwe ke leswao la rena la Bokriste. Ka mohlala, ba bantši lefaseng lehono ba lebelela ditekanyetšo tša Beibele tša boitshwaro e le tše di šiilwego ke nako goba tše di sa kwagalego lefaseng la rena la lehono. (1 Petro 4:4) Ba bangwe ba nagana gore ga go bohlokwa go rapela Modimo ka tsela yeo a e nyakago. (Johane 4:24) Lengwalong la gagwe le le yago go ba-Efeso, Paulo o bolela ka lefase e le leo le nago le “môya,” goba boemo bja kgopolo bjo bo apareditšego. (Ba-Efeso 2:2) Moya woo o gapeletša batho gore ba dumelelane le tsela ya go nagana ya lekoko la batho bao ba sa tsebego Jehofa.
4. Jesu o ile a gatelela bjang go nyakega ga gore re šireletše leswao la rena le le bonagalago la Bokriste?
4 Lega go le bjalo, ka ge re le bahlanka ba Jehofa ba ineetšego, re lemoga gore go lahlegelwa ke leswao la rena la Bokriste go be go tla bakela mang le mang wa rena masetlapelo—ba bafsa goba ba bagolo. Pono e nepagetšego ka seo re lego sona bjalo ka Bakriste e ka thewa feela ditekanyetšong tša Jehofa le go seo a se letetšego go rena. Go ba gona, re bopilwe ka seswantšho sa gagwe. (Genesi 1:26; Mika 6:8) Beibele e swantšha leswao la rena la Bokriste le seaparo sa ka ntle, seo se aparelwago gore se bonwe ke bohle. Jesu o lemošitše mabapi le mehla ya rena gore: “Tsebang, ke e-tla byalo ka lehodu. Wa lehlôxônôlô ke eo a phakxamaxo, a lôtôla diaparô tša xaxwe, a se tlo sepela à hlobotše, ba mmôna dihlong tša xaxwe.” * (Kutollo 16:15) Ga re nyake go lahla dika tša rena tša Bokriste le ditekanyetšo tša boitshwaro gomme ra dumelela lefase la Sathane gore le re fetoše. Ge e ba seo se be se ka direga, re be re tla lahlegelwa ke “diaparô” tše. Boemo bjo bo bjalo e be e tla ba bjo bo sa thabišego le bjo bo lešago dihlong.
5, 6. Ke ka baka la’ng go tsepama moyeng go le bohlokwa?
5 Kwešišo e tiilego ka seo re lego sona bjalo ka Bakriste e kgoma kudu tsela yeo motho a tlago go phela bophelo bja gagwe ka yona. Go bjalo bjang? Ge e ba morapedi wa Jehofa a be a ka lahlegelwa ke kwešišo ya gagwe e botse ka seo a lego sona, o be a ka feleletša a arogile, a se na morero goba dipakane tšeo di beilwego gabotse. Beibele e lemoša leboelela malebana le boemo bjo bjalo bja go se kgonthišege. Morutiwa Jakobo o lemošitše ka gore: “E a dikadikaxo ó swana le lephoto la lewatlê, le le tsošwaxo ke phefô la akxa-akxwa ke yôna. Motho yo byalo a se kê a re ó tlo fiwa selô ke Morêna; Monna wa pelo-pedi, ditseleng tša xaxwe xa a loke.”—Jakobo 1:6-8; Ba-Efeso 4:14; Ba-Hebere 13:9.
6 Re ka šireletša bjang leswao la rena la Bokriste? Ke’ng se se ka re thušago go kaonefatša kwešišo ya rena ya go kwešiša tokelo e kgolo yeo re nago le yona ya go ba barapedi ba yo Godimo-dimo? Hle ela hloko ditsela tše di latelago.
Hloma Leswao la Gago la Bokriste ka go Tia
7. Ke ka baka la’ng e le mo go holago go kgopela Jehofa gore a re hlahlobe?
7 Tšwela pele o matlafatša tswalano ya gago le Jehofa. Selo sa bohlokwa kudu seo Mokriste a nago le sona ke tswalano ya gagwe le Modimo. (Psalme 25:14; Diema 3:32) Ge e ba re thoma go ba le dipelaelo tše di hlobaetšago mabapi le leswao la rena la Bokriste, re swanetše go hlahlobišiša boemo le go tsenelela ga tswalano ye. Mopsalme o kgopetše ka mo go swanetšego gore: “Morêna, nnyakorêlê O mphêtlêkê; lekola ’phsiô tša-ka le pelo ya-ka.” (Psalme 26:2) Ke ka baka la’ng tlhahlobo e bjalo e le ya bohlokwa? Ka gobane rena ka noši re ka se be baahlodi ba ka botwago ba merero le ditshekamelo tša rena ka noši tša ka gare-gare. Ke Jehofa feela yo a kgonago go kwešiša motho yo re lego yena ka gare—merero ya rena, dikgopolo le maikwelo.—Jeremia 17:9, 10.
8. (a) Go hlahlobja ke Jehofa go ka re hola bjang? (b) O thušitšwe bjang gore o dire tšwelopele bjalo ka Mokriste?
8 Ka go kgopela Jehofa gore a re hlahlobe, re mo laletša gore a re leke. A ka dumelela gore go tšwelele maemo ao a utollago merero ya rena ya kgonthe le boemo bja dipelo tša rena. (Ba-Hebere 4:12, 13; Jakobo 1:22-25) Re swanetše go amogela diteko tše bjalo ka gobane di re nea sebaka sa go bontšha go tsenelela ga potego ya rena ya go botegela Jehofa ka go se kwanantšhe. Diteko tše bjalo di ka bontšha ge e ba re le ‘ba bolo ka botlalo ba ba se nago senyalo, go se na le mo re hlaetšago.’ (Jakobo 1:2-4) Le gona ge nako e dutše e e-ya, re ka gola moyeng.—Ba-Efeso 4:22-24.
9. Na go kgolwa therešo ya Beibele ke taba ya boikgethelo? Hlalosa.
9 Kgolwa therešo ya Beibele. Kwešišo ya rena mabapi le seo re lego sona bjalo ka bahlanka ba Jehofa e ka fokola ge e ba e sa thewa ka go tia tsebong ya Mangwalo. (Ba-Filipi 1:9, 10) Mokriste yo mongwe le yo mongwe—yo mofsa goba yo a godilego—o swanetše go kgolwa go fihla a kgotsofala gore seo a se dumelago e tloga e le therešo go etša ge e hwetšwa ka Beibeleng. Paulo o kgothaleditše badumedi-gotee le yena gore: “Lekang tšohle, Le šalê Lè swere tše boló.” (1 Ba-Thesalonika 5:21) Bakriste bao e lego bafsa bao ba tšwago malapeng a boifago Modimo ba swanetše go lemoga gore ba ka se phele feela ka tumelo ya batswadi ba bona. Tatago Salomo e lego Dafida, o ile a mo kgothaletša gore “tseba Modimo wa tat’axo, O mo hlankêlê ka pelo yohle.” (1 Koronika 28:9, mongwalo o sekamego ke wa rena.) E be e ka se be mo go lekanego gore Salomo yo mofsa a lebelele kamoo tatagwe a bego a aga tumelo ka gona go Jehofa. Yena ka boyena o be a swanetše go tseba Jehofa, gomme o ile a dira bjalo. O ile a kgopela Modimo gore: “Byale mphê bohlale le temoxô, ke kxônê xo tšwa le xo tsêna pele xa sethšaba sé.”—2 Koronika 1:10.
10. Ke ka baka la’ng e se phošo go botšiša dipotšišo tše di tšwago pelong ka morero o swanetšego?
10 Tumelo e tiilego e agwa tsebong. Paulo o itše: “Tumêlô e tšwa xo kweng.” (Ba-Roma 10:17) O be a bolela’ng ge a rialo? O be a bolela gore ka go iphepa ka Lentšu la Modimo, re aga tumelo le kholofelo ya rena go Jehofa, go dikholofetšo tša gagwe le go mokgatlo wa gagwe. Go botšiša dipotšišo tše di tšwago pelong mabapi le Beibele go ka re lebiša dikarabong tše di kgonthišetšago. Go oketša moo, go Ba-Roma 12:2 re hwetša keletšo ya Paulo e rego: “Le hlaoloxanyê se e lexo thatô ya Modimo, e lexo se botse le se se kxahlišaxo.” Eupša re ka fihlelela seo bjang? Ka go ba le “tsebô ya therešô.” (Tito 1:1) Moya wa Jehofa o ka re thuša go kwešiša gaešita le ditaba tše thata. (1 Ba-Korinthe 2:11, 12) Re swanetše go rapelela thušo ya Modimo ge re e-na le mathata a go kwešiša selo se itšego. (Psalme 119:10, 11, 27) Jehofa o nyaka gore re kwešiše Lentšu la gagwe, re le dumele, gomme re le kwe. O amogela dipotšišo tše di tšwago pelong tšeo di botšišwago ka morero o swanetšego.
Ikemišetše go Thabiša Modimo
11. (a) Ke kganyogo efe ya tlhago yeo e ka re tanyago? (b) Ke bjang re ka rapago sebete sa go kgotlelela kgateletšo ya dithaka?
11 Tsoma go thabiša Modimo, e sego batho. E fo ba ga tlhago gore re itlhaole re le karolo ya sehlopha go fihla bokgoleng bjo itšego. Motho yo mongwe le yo mongwe o nyaka bagwera, gomme go amogelwa go re dira gore re ikwe re thabile. Nywageng ya mahlalagadi—gotee le ka morago bophelong—kgateletšo ya dithaka e ka ba e matla kudu, ya tsoša kganyogo e dirago gore motho a be tlalelong ya go nyaka go ekiša goba go kgahliša ba bangwe. Eupša bagwera le dithaka ga se ka dinako tšohle ba re kganyogelago tše botse. Ka dinako tše dingwe ba fo nyaka gore re ba tlatše go direng se se fošagetšego. (Diema 1:11-19) Ge Mokriste a ineela kgateletšong e sa kgahlišego ya dithaka, gantši o leka go uta seo a lego sona. (Psalme 26:4) Moapostola Paulo o lemošitše gore: “Le se kê la ipapetša le ba mehla yeno.” (Ba-Roma 12:2) Jehofa o re nea matla ao re a nyakago a ka gare e le gore re kgone go lwantšha kgateletšo le ge e le efe ya ka ntle ya gore re itumelelanye le boemo.—Ba-Hebere 13:6.
12. Ke molao ofe wa motheo le gona ke mohlala ofe wo o ka re matlafatšago gore re dule re tiile ge go bota ga rena Modimo go akaretšwa?
12 Ge kgateletšo ya ka ntle e nyaka go senya kwešišo ya rena mabapi le seo re lego sona bjalo ka Bakriste, re swanetše go gopola gore go botegela ga rena Modimo ka go se kwanantšhe go bohlokwa kudu go feta pono ya batho goba ditshekamelo tše di tlwaelegilego. Mantšu a Ekisodo 23:2 a šoma e le molao wa motheo o šireletšago, a re: “O se kê wa latêla bontši xe bo senya.” Ge ba-Isiraele-gotee le yena ba bantši ba be ba belaela bokgoni bja Jehofa bja go phethagatša dikholofetšo tša Gagwe, Kalebe o ile a gana ka go tia go ya le mogofe. O be a kgodišegile gore dikholofetšo tša Modimo e be e le tše di ka botwago, gomme o ile a putswa ka mo go humilego bakeng sa boemo bja gagwe. (Numeri 13:30; Jošua 14:6-11) Na le wena o ikemišeditše go gana go gateletšwa ke kgopolo e tlwaelegilego e le gore o šireletše tswalano ya gago le Modimo?
13. Ke ka baka la’ng e le gabohlale gore re tsebiše ba bangwe gore re Bakriste?
13 Dira gore o tsebje o le Mokriste. Polelwana ya gore tsela e kaone ya go itšhireletša ke tsela e botse ya go itwela e ba ya therešo ge re šireletša leswao la rena la Bokriste. Ge maiteko a bona a go nyaka go dira thato ya Jehofa a be a ganetšwa mehleng ya Esera, ba-Isiraele ba botegago ba ile ba re: “Rena re bahlanka ba Modimo wa lexodimo le lefase.” (Esera 5:11) Ge e ba re kgongwa ke dikarabelo le go swaiwa diphošo ke batho ba tletšego bonaba, re ka fetšwa matla ke poifo. Ge e ba ka mehla re leka go thabiša motho yo mongwe le yo mongwe, seo se tla fokodiša katlego ya rena. Ka gona o se ke wa tšhoga. Ke mo gobotse gore ka mehla o tsebiše ba bangwe ka mo go kwagalago gore o yo mongwe wa Dihlatse tša Jehofa. Ka tsela e hlomphegago le e tiilego, o ka hlalosetša ba bangwe ditekanyetšo tša gago, ditumelo tša gago le boemo bja gago bjalo ka Mokriste. Tsebiša ba bangwe gore o ikemišeditše go kgomarela ditekanyetšo tša Jehofa tše di phagamego ditabeng tša boitshwaro. Bolela ka mo go kwagalago gore o ka se ke wa kwanantšha potego ya gago ya Bokriste. Bontšha gore o ikgantšha ka ditekanyetšo tša gago tša boitshwaro. (Psalme 64:10) Go tsebja o le Mokriste yo a tiilego go ka go matlafatša, gwa go šireletša, gwa ba gwa tutueletša ba bangwe gore ba nyakišiše ka Jehofa le batho ba gagwe.
14. Na go kwerwa goba go ganetšwa go swanetše go re nyamiša? Hlalosa.
14 Ee, ba bangwe ba ka go kwera goba ba go ganetša. (Juda 18) Ge e ba ba bangwe ba sa arabele gabotse ge o dira maiteko a go ba hlalosetša mabapi le ditekanyetšo tša gago, o se ke wa nyama. (Hesekiele 3:7, 8) Go sa šetšwe gore o ikemišeditše gakaakang, o ka se ke wa kgodiša batho bao ba sa nyakego go kgodišwa. Gopola Farao. Ga go na kotlo goba mohlolo—gaešita le go lahlegelwa ke leitšibolo la gagwe—yeo e ilego ya kgona go kgodiša Farao gore Moše e be e le mmoleledi wa Jehofa. Ka gona, o se ke wa dumelela poifo ya go boifa batho e go fetša matla. Go bota Modimo le go dumela go yena go tla re thuša go fenya poifo.—Diema 3:5, 6; 29:25.
Ithute go tšwa Phihlelong, Ikagele Bokamoso
15, 16. (a) Bohwa bja rena bja moya ke’ng? (b) Re ka holwa bjang ke go naganišiša ka bohwa bja rena bja moya ge re diriša Lentšu la Modimo?
15 Thabela bohwa bja gago bja moya. Ka go diriša Lentšu la Modimo, Bakriste ba tla holwa ke go naganišiša ka bohwa bja bona bjo bohlokwa bja moya. Bohwa bjo bo akaretša therešo ya Lentšu la Jehofa, kholofelo ya bophelo bjo bo sa felego le tokelo ya go emela Modimo re le bagoeledi ba ditaba tše dibotse. Na o kgona go bona karolo yeo o e kgathago gare ga Dihlatse tša gagwe, sehlopheng sa batho ba ba nago le tokelo bao ba neilwego thomo ya go dira modiro o phološago maphelo wa go bolela ka Mmušo? Gopola gore ga go yo mongwe ge e se Jehofa yo a rego: “Le dihlatse tša-ka.”—Jesaya 43:10.
16 O ka ipotšiša dipotšišo tše bjalo ka tše: ‘Bohwa bjo bja moya bo bohlokwa gakaaka’ng go nna? Na ke bo tšeela godimo ka mo go lekanego moo ke dirago gore go dira thato ya Modimo e be selo seo se tlago pele bophelong bja-ka? Na tebogo ya-ka ya go bo leboga ke e matla ka mo go lekanego gore e ka mmatlafatša gore ke kgone go gana teko le ge e le efe yeo e ka dirago gore bo ntahlegele?’ Le gona, bohwa bja rena bja moya bo ka tsenya ka go rena maikwelo a tseneletšego a go ikwa re šireletšegile moyeng ao a ka thabelwago feela ke bao ba lego ka mokgatlong wa Jehofa. (Psalme 91:1, 2) Go hlahloba ditiragalo tše di makatšago tša histori ya mehleng yeno ya mokgatlo wa Jehofa go ka tsenya ka go rena kgopolo ya gore ga go motho goba selo seo se ka fedišago batho ba Jehofa lefaseng.—Jesaya 54:17; Jeremia 1:19.
17. Ke’ng se sengwe se se nyakegago go feta go fo ithekga ka bohwa bja rena bja moya?
17 Ke therešo gore re ka se kgone go ithekga feela ka bohwa bja rena bja moya. Yo mongwe le yo mongwe wa rena o swanetše go hlagolela tswalano ya kgaufsi le Modimo. Ka morago ga ge Paulo a šomile ka thata gore a matlafatše tumelo ya Bakriste ba kua Filipi o ile a ba ngwalela gore: “Ké xôna, Baratwa ba-ka, xe ka mehla Le bile ba ba kwaxo, è se mola kè na le lena fêla, Lè le ba ba kwaxo xaxolo byale kè le kxolê le lena; phološô ya lena e phêxêleleng ka poifô le ka thšoxô.” (Ba-Filipi 2:12) Re ka se ithekge ka motho yo mongwe bakeng sa phološo ya rena.
18. Mediro ya rena ya Bokriste e ka kaonefatša bjang leswao la rena la Bokriste?
18 Tšea karolo ka mo go feletšego medirong ya Bokriste. Go boletšwe gore “modiro e be e dutše e le tutuetšo e matla ya seo motho a lego sona.” Bakriste lehono ba neilwe thomo ya go dira modiro o bohlokwa wa go bolela ka ditaba tše dibotse tša Mmušo o hlomilwego wa Modimo. Paulo o itše: “Ke . . . moapostola wa ba-ntlê, ’me ke fêla ke tumiša modirô wa-ka.” (Ba-Roma 11:13) Modiro wa rena wa boboledi o re hlaola lefaseng, gomme go tšea ga rena karolo go wona go kgatha tema e kgolo leswaong la rena la Bokriste. Go tšea ga rena karolo ka mo go feletšego medirong e mengwe ya pušo ya Modimo, e bjalo ka diboka tša Bokriste, mananeo a go aga mafelo a borapedi, maiteko a go thuša bao ba hlokago, bjalo bjalo, go ka nweletša kwešišo ya rena ka seo re lego sona bjalo ka Bakriste.—Ba-Galatia 6:9, 10; Ba-Hebere 10:23, 24.
Leswao le le Bonagalago le Tliša Ditšhegofatšo tša Kgonthe
19, 20. (a) Ke mehola efe yeo wena ka noši o e thabetšego ka baka la go ba Mokriste? (b) Ke’ng se se re neago motheo wa seo re tlogago re le sona?
19 Iphe nako ya go nagana ka mehola e mentši yeo re e thabelago ka gobane re le Bakriste ba therešo. Re na le tokelo ya go tsebja ke Jehofa. Moporofeta Maleaki o itše: “Ba-šia-Modimo, xe bôná ba boledišana, Morêna ó a theetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.” (Maleaki 3:16) Modimo a ka re lebelela re le bagwera ba gagwe. (Jakobo 2:23) Maphelo a rena a kaonefatšwa ke go ikwa re e-na le morero o kwagalago, go ba bohlokwa kudu le dipakane tše di holago le tše di tšweletšago mafelelo a mabotse. Le gona re neilwe kholofelo ya bophelo bjo bo sa felego.—Psalme 37:9.
20 Gopola gore seo o tlogago o le sona le go ba bohlokwa ga gago go ithekgile ka tekanyo ya Modimo ya gore o bohlokwa gakaakang, e sego ka seo batho ba bangwe ba ka bago ba se nagana ka wena. Ba bangwe ba ka ba ba re tšeela godimo go ya ka ditekanyetšo tše di sa swanelago tša batho. Eupša lerato la Modimo le kgahlego ya gagwe ka rena di re nea motheo wa kgonthe wa gore re ba bohlokwa—re ba gagwe. (Mateo 10:29-31) Ka baka leo, lerato la rena ka noši go Modimo le ka re nea kwešišo e kgolo kudu ka seo re lego sona le morero o kwagalago kudu maphelong a rena. “Motho e a rataxo Modimo, ké yêna a tsebilwexo ke Modimo.”—1 Ba-Korinthe 8:3.
[Mengwalo ya ka tlase]
^ ser. 4 Mantšu a a ka ba a šupa go mediro ya mohlankedi wa thabeng ya tempele ya Jerusalema. Nakong ya ge a hlapeditše bošego, o be a e-ya ka tempeleng go yo bona ge e ba bahlapetši ba ba-Lefi ba be ba sa tsogile goba ba robetše dikabelong tša bona. Mohlapetši le ge e le ofe yoo a bego a hwetšwa a robetše o be a bethwa ka patla gomme diaparo tša gagwe di be di ka fišwa e le go mo otla ka tsela e lešago dihlong.
Na o a Gopola?
• Ke ka baka la’ng go le bohlokwa go Bakriste gore ba šireletše leswao la bona la moya?
• Re ka hloma bjang leswao la rena la Bokriste ka go tia?
• Ge re lebeletšane le potšišo ya gore re kgahliše mang, ke dilo dife tšeo di ka re thušago go dira phetho e nepagetšego?
• Kwešišo e tiilego mabapi le seo re lego sona bjalo ka Bakriste e ka aga bjang bokamoso bja rena?
[Dipotšišo tša Thuto]
[Diswantšho go letlakala 21]
Go tšea ga rena karolo ka mo go feletšego medirong ya Bokriste go tla kaonefatša leswao la rena la Bokriste