Ke Mang yo a Tlago go Fepa Lefase?

GO YA ka dikakanyetšo tše di dirilwego ke Lenaneo la Lefase la Kabo ya Dijo, mokgatlo wa Ditšhaba tše di Kopanego wa go lwantšha tlala, o re batho ba dimilione tše 800—kudu-kudu bana—ba kgaufsi le go bolawa ke tlala. Morago bjale, mokgatlo wona woo o itše, dithušo gaešita le tlhokomelo yeo ditšhaba tše di hlabologilego di bego di ka e tšweletša e šitišwa ke mathata a mangwe a go swana le botšhošetši. Go phatlalala ga malwetši ao a fetelago go atišitše mathata. Mokgatlo wa Global School Feeding Report ge o bolela ka dinaga tša Afrika tšeo go tšona AIDS e phatlaletšego o re: “Moloko ka moka wa batswadi o hwile. Bana bao ba ba tlogelago ga ba kgone go itlhokomela, gantši ga ba na tsebo ya tša temo le tsebo ya go iphediša yeo ka tlwaelo e fetišwago go tloga molokong o mongwe go ya go o mongwe.”

Lenaneo la Lefase la Kabo ya Dijo le tšwetša pele thulaganyo yeo e hlametšwego go thuša go aba dijo dikolong bonyenyane gatee ka letšatši. Taba-kgolo ga se go fokotša tlala feela eupša gape le go thoma thuto ya ka mehla le mananeo a mangwe ao a hlametšwego go thuša go thibela HIV/AIDS gare ga bafsa.

Mafelong ao go ona thulaganyo ye e šetšego e thomilwe, bana ba hweditše dijo tše di nago le phepo, ba newa tlwaetšo ya go itlhokomela ya tša maphelo le thušo e nngwe. Le gona go lemogilwe gore moo boitshwaro bo lego kaone gona, ditekanyo tša go fetela ga HIV/AIDS di fokotšegile.

Ka mo go nyamišago, mafelelo a maiteko a batho gantši ke a sa felelago le ao a se nago mohola. Eupša Beibele e nea khomotšo e kgothatšago mabapi le tharollo ya ka mo go sa felego ya bothata bja tlala. Psalme 72:16 e re: “Xo tlo ba le mohora wa mabêlêʹ mo naxeng.” Mmušong wa Modimo, batho ba tla kgona go bolela ka Jehofa Modimo gore: “O êtêla naxa wa e noša meetse; . . . O ba medišetša mabêlêʹ xe O dira ka mokxwa o byalo.”—Psalme 65:9.

[Mothopo wa Seswantšho go letlakala 32]

WFP/Y. Yuge