Mehlolo Yeo o e Bonego!

LENTŠU “mohlolo” le na le tlhaloso e nngwe e bolelago “tiragalo e lemogegago kudu goba e sa tlwaelegago, selo goba phethagatšo.” Ka moka ga rena re bone mohuta wo wa mohlolo, wo o sa akaretšego Modimo ka gare.

Ka baka la go hwetša tsebo e oketšegilego mabapi le melao ya tlhago, batho ba ile ba kgona go fihlelela seo ka nako e nngwe se bego se lebelelwa ka mo go tlwaelegilego e le se se ka se fihlelelwego. Ka mohlala, nywageng e lekgolo e fetilego, batho ba bantši ba ka ba ba ile ba nagana gore dilo tše di dirwago ke di-computer, thelebišene, thekinolotši ya tša lefau-faung le ditšwelopele tša mehleng yeno tše di swanago le tšeo ga di kgonege.

Ka go lemoga gore ba fo ba le karolo e  nyenyane ya tsebo ya tša thutamahlale mabapi le dilo tše di kgahlišago tše di hwetšwago tlholong ya Modimo, bo-rathutamahlale ba bangwe ba dumela gore ba ka se sa hlwa ba bolela ka kgodišego gore go na le selo se se sa kgonegego. Ge e le gabotse, ba rata go bolela gore mohlomongwe se a kgonega. Ka gona ba holofela gore “mehlolo” e tla direga nakong e tlago.

Gaešita le ge re diriša tlhaloso ya motheo ya “mohlolo,” ka go rialo ra bolela ka dilo “tše di dirilwego ka thušo ya motho yo matla ka go fetišiša,” re ka bolela gore yo mongwe le yo mongwe wa rena o šetše a kile a bona mehlolo. Ka mohlala, re lebelela letšatši, ngwedi le dinaledi—ditšweletšwa ka moka tša “thušo ya motho yo matla ka go fetišiša,” Mmopi ka boyena. Ntle le moo, ke mang yo a ka hlalosago ka botlalo tsela yeo mmele wa motho o šomago ka yona, kamoo bjoko bo šomago ka gona goba kamoo lee le le nontšhitšwego le golago ka gona? Puku ya The Body Machine e bolela gore: “Mmele wa motho, wo o laolwago le go sepetšwa ka thulaganyo ke tshepedišo ya motheo ya dikwi, ke sedirišwa se se raraganego sa dikwi, entšine ye e šomago ka boyona, computer yeo e kgonago go ikatiša—tlholo e kgahlišago le e makatšago ka ditsela tše dintši.” Modimo yo a bopilego “mmele wa motho” o tloga a dirile mohlolo, wo o tšwelago pele o re makatša. Go na le mehuta e mengwe gape ya mehlolo yeo o e bonego, gaešita le ge o sa ka wa e lemoga gakaalo.

Na Puku e ka ba Mohlolo?

Ga go na puku e nngwe ye e abjago gohle go swana le Beibele. Na o e lebelela e le mohlolo? Na re ka bolela gore e bile gona ka “thušo ya motho yo matla ka go fetišiša”? Ke therešo gore Beibele ke puku e ngwadilwego ke batho, eupša ba ile ba bolela gore ba ngwadile dikgopolo tša Modimo, e sego tša bona. (2 Samuele 23:1, 2; 2 Petro 1:20, 21) Nagana ka se. Go be go e-na le batho ba ka bago 40, bao ba phetšego nywageng e fetago 1 600. Ba be ba e-tšwa ditlogong tše di fapa-fapanego e le badiši, bahlabani, barei ba dihlapi, bahlankedi ba setšhaba, dingaka, baperisita le dikgoši. Lega go le bjalo, ba ile ba kgona go fetišetša molaetša o swanago wa kholofelo wo e lego wa therešo le o nepagetšego.

Go ithekgile ka go ithuta ga tšona ka šedi, Dihlatse tša Jehofa di amogela Beibele ‘e se lentšu la batho, eupša e le lentšu la Modimo la therešo,’ go etša ge moapostola Paulo a ngwadile. (1 Ba-Thesalonika 2:13) Go theoša le nywaga, dikgatišo tša tšona di hlalositše kamoo seo go thwego ke dikganetšano ka Beibeleng di ka dumelelanago le molaetša wa yona ka moka. Go dumelelana mo go lego ka gare ga yona ka bogona ke bohlatse bja bolaodi bja Modimo. *

Ga go na puku e nngwe go swana le Beibele ye e kilego ya lebeletšana le maiteko a bjalo a go nyaka go fedišwa. Lega go le bjalo, e sa dutše e le gona, bonyenyane karolo ya yona ka maleme a fetago 2 000. Go bolokwa ga yona ga kgonthe e le puku e feletšego go bontšha gore Modimo o ile a tsena ditaba gare. Ruri Beibele ke mohlolo!

Mohlolo o ‘Phelago le o Matla’

Mehlolo ya mehleng e fetilego—go fodiša ka tsela ya mohlolo le go tsošwa ga bahu—ga e sa direga. Eupša re na le lebaka la go ba le kholofelo ya gore lefaseng le lefsa la Modimo le le tlago, mehlolo e bjalo e tla direga gape lefaseng ka bophara. E tla tliša kimollo ya sa ruri gomme e tla feta kwešišo ye re nago le yona gona bjale.

 Beibele ye re bilego le yona ka tsela ya mohlolo le lehono e ka dira seo se swanago le mehlolo ka go tutueletša batho go kaonefatša dimelo tša bona. (Bona mohlala lepokising le le rego “Matla a Lentšu la Modimo,” go letlakala 8.) Ba-Hebere 4:12 e re: “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.” Ee, Beibele e bile sedirišwa se sebotse sa go fetoša maphelo a batho ba fetago dimilione tše tshela bao ba dulago go dikologa lefase, ya dira gore maphelo a bona a be le morero gomme ya ba nea kholofelo e kgahlišago bakeng sa bokamoso.

Ke ka baka la’ng o sa dumelele Beibele gore e go direle mohlolo bophelong bja gago?

[Mongwalo wa ka tlase]

[Lepokisi/Seswantšho go letlakala 7]

NA O BE A ŠETŠE A HWILE GOBA O BE A SA PHELA?

Go ya ka Johane 19:33, 34, Jesu o be a šetše a hwile ge “e mongwê wa bahlabani a mo phula lehlakore ka lerumô, xwa napa xò e-tšwa madi le meetse.” Lega go le bjalo, Mateo 27:49, 50 diphetolelong tše dingwe e bontšha gore Jesu o be a sa dutše a phela ge se se direga. Ke ka baka la’ng di fapana?

Molao wa Moše o be o ileditše gore sesenyi se tlogelwe se lekeletše bošego ka moka koteng ya polao. (Doiteronomio 21:22, 23) Ka gona, mehleng ya Jesu, ge sesenyi se se kokotetšwego se be se sa dutše se phela mantšiboa, e be e le mokgwa gore se robje maoto, gomme ka tsela yeo gwa dirwa gore se hwe ka pela. Se be se ka se kgone go inamologa e le gore se heme gabotse. Taba ya gore bahlabani ba ile ba roba maoto a disenyi tše pedi tše di bego di kokotetšwe ka mathokong a Jesu eupša ba sa ka ba roba maoto a gagwe e bontšha gore ba be ba nagana gore o hwile. Go na le kgonagalo ya gore bahlabani ba ile ba mo hlaba lehlakore e le feela bakeng sa go tloša dipelaelo ka moka le go dira gore a se ke a tsoga ka morago, e lego seo se ka tšewago ka tsela e fošagetšego e le go tsoga bahung.

Temana ya Mateo 27:49, 50 (NW) e bea ditaba ka tsela e fapanego. E re: “Monna yo mongwe o ile a tšea lerumo gomme a mo hlaba lehlakore, gomme gwa tšwa madi le meetse. Jesu o ile a goelela gape ka lentšu le le phagamego, gomme a neela moya wa gagwe.” Lega go le bjalo, lefoko le le sekamišitšwego ga le tšwelele ka mengwalong ka moka ya Beibele ya bogologolo. Ditsebi tše dintši di dumela gore le ile la oketšwa go tšwa Ebangeding ya Johane eupša le ile la ngwalwa lefelong le le fošagetšego. Ka gona, diphetolelo tše dintši di ngwala lefoko le ka mašakanaboreng goba ka mašakaneng, di ngwala mongwalo wa tlase wo o hlalosago lefoko le goba di fo le tlogela ka mo go feletšego.

Sengwalwa sa motheo se se ngwadilwego ke Westcott le Hort, se dirišitšwe kudu e le motheo wa New World Translation, ka ge e bea lefoko le ka mašakanaboreng a mabedi. Se bolela gore lefoko le “le swanetše go lebelelwa kudu e le le le tšweleditšwego ke bangwadi.”

Ka gona, bohlatse bjo bogolo ke gore Johane 19:33, 34 e nepagetše le gore Jesu o be a šetše a hwile ge mohlabani wa mo-Roma a be a mo hlaba ka lerumo.

 [Lepokisi/Seswantšho go letlakala 8]

MATLA A LENTŠU LA MODIMO

E le mofsa wa mahlalagading yo a tšwago lapeng la batswadi bao ba aroganego, Detlef o ile a nwelela dihlare-taging, dino-taging le mminong wa morethetho o matla. * O ile a fetoga setho sa sehlopha seo ka tlwaelo se bitšwago mokgatlo wa bafsa ba dihlogo tša diphalola, gomme go se go ye kae boitshwaro bja gagwe bjo šoro bo ile bja mo dira gore a swarwe ke maphodisa.

Ka 1992, bafsa ba dihlogo tša diphalola ba 60 ba ile ba akaretšwa ntweng e kgolo ya ma-punk a 35 lebenkeleng la go jela le lefelong la go nwela bjala kua leboa-bohlabela la Jeremane. Yo mongwe wa ma-punk e lego Thomas o ile a bethwa o šoro gomme o ile a hwa ka baka la dikgobalo. Baetapele ba mmalwa ba dihlopha tše, go akaretša le Detlef, ba ile ba ahlolelwa go ya kgolegong ka morago ga ge ba be ba le kgorong ya tsheko yeo go bego go bolelwa kudu ka yona ditabeng.

Nakwana ka morago ga ge Detlef a be a lokolotšwe kgolegong, Dihlatse tša Jehofa di ile tša mo nea pampišana. Pampišana e be e e-na le sehlogo se se rego, “Ke ka Baka La’ng Bophelo bo Tletše Mathata Gakaakaa?” Gatee-tee Detlef o ile a lemoga therešo ya seo se bolelwago, gomme o ile a thoma go ithuta Beibele le Dihlatse. Se se ile sa fetoša bophelo bja gagwe ka mo go feletšego. Ga e sa le go tloga ka 1996 e be e dutše e le Hlatse e fišegago ya Jehofa.

Siegfried, yo e kilego ya ba le-punk e be e le mogwera yo mobotse wa Thomas, lesogana leo le ilego la bolawa; le yena ka morago o ile a ba Hlatse gomme ga bjale ke mogolo wa phuthego. Ge Siegfried a be a etetše phuthego yeo Detlef a kopanelago go yona bakeng sa go yo nea polelo ya Beibele (go ile gwa direga gore e be moo mmago Thomas le yena a bago gona dibokeng ka sewelo), Detlef o ile a mo laletša dijong tša matena. Nywageng e ka bago e lesome e fetilego, lehloyo la bona le be le sa laolege. Lehono, lerato la bona la borwarre le molaleng.

Detlef le Siegfried ba lebeletše pele go amogeleng Thomas ge a tsoga lefaseng la paradeise. Detlef o re: “Go fo nagana ka se go ntira gore ke sekiše megokgo. Ke maswabi ka se ke se dirilego.” Kganyogo ya bona ka bobedi ke go thuša Thomas ka nako yeo, ka ge lehono ba thuša ba bangwe go tseba Jehofa le go thabela kholofelo yeo Beibele e e neago.

Ee, ao ke matla a Lentšu la Modimo!

[Mongwalo wa ka tlase]

[Seswantšho go letlakala 6]

Mmele wa motho ke tlholo e makatšago

[Mothopo]

Anatomy Improved and Illustrated, London, 1723, Bernardino Genga