Na o Ipapetša le ba Bangwe?

KE MANG go rena yo a sa kago a kopana le motho yo a lebelelegago gakaone go mo feta, yo a bonagalago a tumile kudu, yo a kwešišago dilo ka pela kudu goba yo a kgonago ka sekolong? Mohlomongwe ba bangwe ba phela gabotse mmeleng goba ba šoma mošomo o kgotsofatšago, ke ba atlegago kudu goba ba bonagalago ba e-na le bagwera ba bantši. Ba ka ba ba e-na le dilo tše dintši, tšhelete e ntši, koloi e mpsha goba ba ka fo bonagala e le ba thabilego go re feta. Ge re bolela ka dilo tše bjalo, na re ipapetša le ba bangwe? Na ga go kgonege go phema go ipapetša le ba bangwe? Ke ka baka la’ng Mokriste a ka nyaka go go phema? Le gona re ka kgotsofala bjang ntle le go ipapetša le motho le ge e le ofe?

Lebaka la go Ipapetša le ba Bangwe le Nako ya go Dira Bjalo

Lebaka le lengwe leo ka lona batho ba ka ipapetšago le ba bangwe ke gore se se dira gore ba dule ba itlhompha. Gantši batho ba kgotsofatšwa ke go lemoga gore ba atlega go swana le dithaka tša bona. Taba e nngwe gape ke gore go ipapetša le ba bangwe ke maiteko a go fokotša go se ikholofele, go kwešiša seo re kgonago go se dira le mo re felelago gona. Re lebelela seo ba bangwe ba se fihleletšego. Ge e ba ba swana le rena dikarolong tše dintši gomme ba fihleletše dipakane tše itšego, re ka nagana gore le rena re ka fihlelela dipakane tše swanago.

Gantši kudu go ipapetša le ba bangwe go dirwa magareng ga batho bao ba swanago—ba bong bjo bo swanago, bao e lego dithaka gomme ba le maemong a swanago setšhabeng le bao ba tsebanago. Ga go bonagale re ka ipapetša le motho yo a tlogago a sa swane le rena. Ge re e bea ka tsela e nngwe, ngwanenyana yo a tlwaelegilego wa mahlalagading a ka se ipapetše le mmasebotsana go e na le go ipapetša le bao a tsenago le bona sekolo, le gona mmasebotsana a ka se ipapetše le ngwanenyana yo a lego mahlalagading.

Ke dikarolong dife mo re ipapetšago le ba bangwe? Selo goba seka le ge e le sefe seo re nago le sona se se lebelelwago e le sa bohlokwa setšhabeng—e ka ba bohlale, bobotse, lehumo, diaparo—e ka ba motheo wa go ipapetša le ba bangwe. Lega go le bjalo, re sekametše tabeng ya go ipapetša le ba bangwe ka dilo tše di re kgahlago. Ka mohlala, mohlomongwe re be re ka se dume tekanyo ya ditempe tšeo yo mongwe wa batho bao re ba tsebago a di kgobokeditšego ntle le ge ka mo go kgethegilego re kgahlegela go kgoboketša ditempe.

 Go ipapetša le ba bangwe go utolla mekgwa e fapa-fapanego ya go arabela, go tloga kgotsofalong go ya kgateletšegong, go tloga kgahlegong le kganyogong ya go duma dilo go ya pelaelong goba lehloyong. A mangwe a maikwelo a a kotsi, gomme ga a dumelelane le dika tša Bokriste.

Go Ipapetša ka Tsela ya Phadišano

Ba bantši bao ba katanelago go ba “bathopa-sefoka” tabeng ya go ipapetša le ba bangwe ba bonagatša moya wa phadišano. Ba nyaka go ba kaone go feta ba bangwe, gomme ga ba kgotsofale go fihlela ba ikwa eka ba kaone. Ga go thabiše go ba kgaufsi le batho ba bjalo. Go gwerana le bona go a lapiša, ditswalano di a senyega. Ga se feela gore batho ba bjalo ga ba na boikokobetšo eupša gape gantši ba palelwa ke go diriša keletšo ya Beibele mabapi le go rata magagabo bona, ka ge go ka ba bonolo gore mokgwa wa bona o tsošetše ba bangwe maikwelo a go ikwa ba nyatšega e bile ba gobogile.—Mateo 18:1-5; Johane 13:34, 35.

Go dira gore batho ba ikwe ba “lahlegetšwe” go a ba gobatša ka tsela e itšego. Go ya ka mongwadi yo mongwe, “go palelwa ga rena go ba bohloko kudu ge batho ba ba lego boemong bjo bo swanago le bja rena ba go bonagala ba hweditše dilo tše re di nyakago.” Ka baka leo, moya wa phadišano o hlohleletša lehufa, lehloyo le go se thabele yo mongwe ka baka la dilo tše a nago le tšona, go atlega ga gagwe, maemo, botumo le go ba le mohola, bjalo bjalo. Se se lebiša phadišanong e oketšegilego—modikologo o kotsi. Beibele e nyatša “go tsoša phadišano.”—Ba-Galatia 5:26, NW.

Batho ba lehufa ba leka go šireletša boitlhompho bja bona bjo bo senyegilego ka go nyatša se se fihleletšwego ke bao ba phadišanago le bona. Go arabela ka tsela e bjalo go ka bonagala e le mo go sa rego selo, eupša ge go sa lemogwe e bile go sa thibelwe, go ka lebiša sebeng se segolo. Ela hloko dipego tše pedi tša Beibele tšeo go tšona taba-kgolo e lego lehufa.

Nakong ya ge Isaka a be a dula gare ga ba-Filisita, o be a šegofaditšwe ka “maruô a dihuswane, le maruô a dikxomo, le balata ba bantši; Ba-Filisita ba bá ba mo tsebafêla.” Ba ile ba arabela ka go phušetša didiba tše di epilwego ke tatago Isaka e lego Aborahama, gomme kgoši ya bona e ile ya kgopela Isaka gore a tloge tikologong yeo. (Genesi 26:1-3, 12-16) Lehufa la bona le be le e-na le lehloyo e bile e le le senyago. Ba be ba fo ba ba ka se sa hlwa ba kgona go kgotlelela ge ba bona Isaka a thabile e bile a atlega a le gare ga bona.

Nywaga-kgolo ka morago, Dafida o ile a itira gore a tume ntweng. Mediro ya gagwe e ile ya tumišwa ke basadi ba Isiraele, bao ba ilego ba opela ka gore: “Saulo ó hlaba ba xaxwe ba sekete. Dafida ba xaxwe ké ’kete tše lesome.” Gaešita le ge a be a tumišwa ka tekanyo e itšego, Saulo o ile a lebelela go bapetšwa moo e le lenyatšo, gomme lehufa le ile la gola ka pelong ya gagwe. Go tloga moo go ya pele, lehloyo la gagwe go Dafida le ile la gola. Go se go ye kae, o ile a dira maiteko a mathomo a mmalwa a go bolaya Dafida. A bobe bjo bogolo gakaakaa bjo bo ka tšweletšwago ke lehufa!—1 Samuele 18:6-11.

Ka gona ge e ba go ipapetša ga rena le ba bangwe—mediro goba go atlega ga bona—go tsoša maikwelo a swanago a lehufa, hlokomela! A ke maikwelo a gobatšago, ao a sa dumelelanego le tsela ya Modimo ya go nagana. Eupša pele re ahla-ahla kamoo mekgwa e bjalo e ka fenywago ka gona, anke re eleng hloko selo se sengwe se se hlohleletšago batho gore ba ipapetše le ba bangwe.

Go Itlhahloba le go Kgotsofala

‘Na ke bohlale, ke a kgahliša, ke na le bokgoni, ke a bogega, ke a hlomphega, ke a ratega? Le gona go fihla bokgoleng bofe?’ Ke ka sewelo re emago pele ga seipone re ipotšiša dilo tše di swanago le tše. Lega go le bjalo, go ya ka mongwadi yo mongwe, “ka mo go kwagalago, gantši re nagana ka dipotšišo tše bjalo gomme re hwetša dikarabo tše re sa di bolelego tšeo ka tsela e itšego di sa kgotsofatšego.” Motho yo a sa kgonthišegego mabapi le se a ka se fihlelelago a ka naganišiša ka dilo tše ka ntle le moya wa phadišano goba maikwelo a lehufa. O fo ba a itlhahloba. Ga go  nape go e ba le selo se se fošagetšego ka seo. Lega go le bjalo, tsela e swanetšego ya go dira se, ga se go ipapetša le ba bangwe.

Re na le bokgoni bjo bo sa swanego, go ithekgile ka dibopego tše di fapa-fapanego. Ka mehla go tla dula go e na le batho ba bangwe bao ba bonagalago ba dira gakaone go re phala. Ka gona, go e na le go ba lebelela ka tsela ya lehufa, re swanetše go lekanya tsela ye re dirago dilo ka yona mabapi le ditekanyetšo tša Modimo tša go loka, tše di neago tlhahlo ya kgonthe mabapi le se se lokilego le se sebotse. Jehofa o kgahlegela seo re lego sona re le motho ka o tee ka o tee. Ga a nyake go re bapetša le motho le ge e le ofe. Moapostola Paulo o re eletša ka gore: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.”—Ba-Galatia 6:4.

Go Fenya Lehufa

Ka baka la ge batho ka moka ba sa phethagala, go ka nyakega maiteko a matla le a tšwelago pele bakeng sa go fenya lehufa. Taba ya go tseba gore Mangwalo a re re “rakanê pele ka xo xodišana,” e fapane kudu le go dira bjalo. Paulo o ile a lemoga tshekamelo ya gagwe ka noši ya go sekamela sebeng. E le gore a e lwantšhe, o ile a swanelwa ke go “ôtlaka mmele wa [gagwe] xore [a] o thapišê.” (Ba-Roma 12:10; 1 Ba-Korinthe 9:27) Go rena, seo se ka bolela go ganetša dikgopolo tša phadišano, gomme legatong la tšona ra bea tše di agago. Re swanetše go rapela, re kgopele Jehofa gore a re thuše gore re “se kê [ra itshema go] fetiša moo xo [re] swanetšexo.”—Ba-Roma 12:3.

Le gona go ithuta Beibele le go naganišiša go a thuša. Ka mohlala, nagana ka Paradeise ya nakong e tlago yeo Modimo a e holofetšago. Ka nako yeo, batho ka moka ba tla ba le khutšo, ba tla phela gabotse mmeleng, ba ba le motlalo wa dijo, magae a boiketlo le mošomo o kgotsofatšago. (Psalme 46:8, 9; 72:7, 8, 16; Jesaya 65:21-23) Na go tla ba le motho le ge e le ofe yo a tla sekamelago phadišanong? Le gatee. Go ka se be le lebaka la go dira bjalo. Ke therešo gore Jehofa ga se a nea ditaba ka botlalo mabapi le kamoo bophelo bo tlago go ba ka gona ka nako yeo, eupša re ka nagana ka mo go kwagalago gore batho ka moka ba tla kgona go phegelela dikgahlego le bokgoni bjo ba bo ratago. Motho yo mongwe a ka ithuta ka tša bolepi bja dinaledi, yo mongwe a ka hlama meago e mebotse. Lebaka la go hufegelana e tla ba lefe? Mediro ya magagabo rena e tla re tutueletša go phetha mediro e mengwe e oketšegilego, e sego go re kgopiša. Maikwelo a bjalo e tla ba dilo tša nakong e fetilego.

Ge e ba bjoo e le bophelo bjo re bo kganyogago, na ga se ra swanela go katanela go hlagolela mokgwa o bjalo gona bjale? Re šetše re thabela paradeise ya moya, ye e se nago mathata a mantši a lefase le le re dikologilego. Ka ge go tla be go se na moya wa phadišano lefaseng le lefsa la Modimo, ruri go na le lebaka le le kwagalago la gore re o pheme gona bjale.

Ka gona, na go fošagetše go ipapetša le ba bangwe? Goba na go na le dinako tšeo ka tšona e tla bago mo go swanetšego go dira bjalo?

Go Ipapetša mo go Swanetšego

Go ipapetša mo gontši go ile gwa lebiša kgalefong goba dikarabelong tše gateletšago, eupša ga se gwa swanela go ba bjalo ka mehla. Mabapi le taba ye, ela hloko keletšo ya moapostola Paulo e rego: “Ka tumêlô Le kxôtlêlêlê Le bê baetši ba bao ba ruilexo tše di holofedišitšwexo.” (Ba-Hebere 6:12) Go katanela go hlagolela dika tše di swanago le tša bahlanka ba Jehofa ba botegago ba mehleng ya bogologolo e ka ba mo go holago.  Ke therešo gore seo se ka akaretša go ipapetša mo go itšego. Lega go le bjalo, go ka re thuša go bona mehlala ye re ka e ekišago le dikarolo tše re nyakago go di kaonefatša.

Nagana ka Jonathane. Re ka re o be a e-na le mabaka a go ka ba le lehufa. E le morwa yo mogolo wa Kgoši Saulo wa Isiraele, Jonathane a ka ba a kile a lebelela gore o tla ba kgoši, eupša Jehofa o ile a kgetha lesogana leo a le fetago ka nywaga e 30 e lego Dafida yo mofsa. Go e na le go boloka sekgopi, Jonathane e be e le yo a fapanego ka baka la bogwera bjo bo se nago boithati le thekgo yeo a ilego a e nea Dafida bjalo ka kgoši e kgethilwego ke Jehofa. Jonathane e be e tloga e le monna wa moya. (1 Samuele 19:1-4) Ka go se swane le tatagwe, yo a bonego Dafida e le mophenkgišani wa gagwe, Jonathane o ile a lemoga gore dilo di be di hlahlwa ke Jehofa gomme a ikokobeletša thato ya Gagwe; ga se a ka a ipapetša le Dafida, a ipotšiša gore, “Ke ka baka la’ng go kgethilwe Dafida, go sa ka gwa kgethwa nna?”

Go Bakriste-gotee le rena, ga se ra swanela go boifa tše e kego ba bangwe ba leka go re phaela ka thoko goba go tšea maemo a rena. Phadišano ga se ya swanela. Bakriste ba ba godilego ka tsebo ba hlaolwa ka tirišano, botee le lerato, e sego phadišano. Setsebi sa tša leago e lego Francesco Alberoni se re: “Lerato ke lenaba le legolo la lehufa. Ge e ba re rata motho, re mo kganyogela dilo tše dibotse gomme re a thaba ge a atlega le ge a thabile.” Ka gona ge motho yo mongwe ka phuthegong ya Bokriste a kgethelwa tokelo e itšego, selo sa lerato e tla ba go kgotsofalela seo. Ke ka tsela yeo Jonathane a bego a le ka yona. Ka go swana le yena, re tla šegofatšwa ge re thekga bao ka potego ba hlankelago maemong a boikarabelo ka mokgatlong wa Jehofa.

Mohlala o mobotse wo o bewago ke Bakriste-gotee le rena o ka retwa ka mo go swanetšego. Go ipapetša le bona ka tsela e leka-lekanego go ka re tutueletša go ekiša tumelo ya bona ka tsela e botse. (Ba-Hebere 13:7) Eupša ge e ba re sa ntšhe mahlo dinameng, go ekiša ba bangwe go ka fetoga phadišano. Ge e ba re ikwa eka re phaetšwe ka thoko ke motho yo re bego re mo rata gomme ra leka go mo nyatša goba go mo swaya diphošo, re tla be re sa mo ekiše eupša re tla be re mo hufegela.

Ga go na motho yo a sa phethagalago yo e lego mohlala o phethagetšego. Ka baka leo, Mangwalo a re: “Bang baetši ba Modimo byalo ka bana ba ba ratêxaxo.” Le gona, “Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.” (Ba-Efeso 5:1, 2; 1 Petro 2:21) Dika tša Jehofa le Jesu—lerato la bona, borutho, kwelobohloko le boikokobetšo—e swanetše go ba tšeo re katanelago go di ekiša. Re swanetše go ba le nako ya go ipapetša le dika tša bona, merero le ditsela tša go dira dilo. Go ipapetša ka tsela e bjalo go ka kaonefatša maphelo a rena, gwa re nea tlhahlo ya kgonthe, go tsepama le tšhireletšego, e bile go ka re thuša go fihlelela boemo bja banna le basadi ba Bakriste ba ba godilego ka tsebo. (Ba-Efeso 4:13) Ge e ba re tsepamiša kgopolo tabeng ya go dira sohle se re ka se kgonago bakeng sa go ekiša mohlala wa bona o phethagetšego, ruri re ka se sekamele tabeng ya go ipapetša le magagabo rena.

[Seswantšho go letlakala 28, 29]

Kgoši Saulo o ile a hufegela Dafida

[Seswantšho go letlakala 31]

Jonathane ga se a ka a lebelela Dafida yo monyenyane e le mophenkgišani