Boitshwaro bjo Bobotse bo “Thakxa Thutô ya Modimo”

MARIA yo monyenyane kua Kransnoyarsk, Russia, o opela gabotse moo morutišigadi wa gagwe a ilego a mo kgetha gore a opele sehlopheng sa diopedi sa sekolo. Kapejana ka morago ga moo, Maria ka tlhompho o ile a ya go morutišigadi wa gagwe go yo mo hlalosetša gore a ka se kgone go opela dikopelo tše dingwe. Ka baka la’ng? Ka gobane dikopelo tše dingwe di na le dikgopolo tša bodumedi tše di ganetšanago le ditumelo tša gagwe tše di theilwego Beibeleng. A makaditšwe ke se, morutišigadi wa gagwe o ile a botšiša gore, ‘Ke’ng se se fošagetšego ka go reta Modimo ka kopelo?’

E le go mmontšha lebaka la go se opele kopelo ye e bolelago ka Modimo yo e lego wa Boraro Botee, Maria o ile a bula Beibele ya gagwe gomme a hlalosa gore Modimo le Jesu Kriste ga se Modimo o tee le gore moya o mokgethwa ke matla a šomago a Modimo. (Mateo 26:39; Johane 14:28; Ditiro 4:31) Maria o hlalosa gore: “Tswalano ya-ka le morutišigadi ga se ya ka ya senyega. Go feta moo, re na le barutiši ba babotse sekolong sa rena. Ba nyaka gore re be ka tsela ya rena ya tlhago.”

Ngwageng ka moka wa sekolo, Maria o ile a hlompšha kudu ke barutiši ba gagwe gotee le bao a tsenago le bona ka klaseng. Maria o re: “Melao ya motheo ya Beibele e nthušitše bophelong. Mafelelong a ngwaga wa sekolo, ke ile ka amogela sefoka ka baka la go botega le go ba le thulaganyo, mola batswadi ba-ka bona ba ile ba amogela lengwalo la go tšwa go hlogo ya sekolo la go ba leboga ka baka la ge ba godišitše morwedi wa bona gabotse.”

Maria o ile a kolobetšwa ka August 18, 2001. O re: “Ke thabela gore ke hlankela Modimo yo a makatšago yo a swanago le Jehofa!” Bafsa bao e lego Dihlatse tša Jehofa lefaseng ka bophara ba phelela mantšu a Tito 2:10, moo re balago gore: “Thakxa thutô ya Modimo Mophološi wa rena [dilong tšohle].”

[Seswantšho go letlakala 32]

Maria le batswadi ba gagwe ka morago ga ge a kolobeditšwe

[Seswantšho go letlakala 32]

Lengwalo la tebogo le lengwalo la bohlatse la bokgoni