Ke ka Baka La’ng go lwa ka Mantšu go Gobatša?

“Dintwa le diphapang xare xa lena di tšwa kae?”—JAKOBO 4:1.

MONGWADI wa Beibele e lego Jakobo o be a sa lebiša potšišo ye go madira a Roma ao ka nako yeo a bego a itokišeletša ntwa ya phenyo; le gona o be a sa hlohlomiše mabapi le maikemišetšo a ntwa ya borabele ya banna ba ba-Juda ba babolai ba lekgolong la pele la nywaga C.E. Jakobo o be a naganne ka dingangišano tšeo bonyenyane di bego di akaretša batho ba babedi. Ka baka la’ng? Ka gobane dingangišano tša batho di baka tshenyo go swana le dintwa tša kgonthe. Ela hloko dipego tše di latelago tša Beibele.

Barwa ba mopatriareka Jakobo ba be ba hloile moratho wa bona Josefa kudu moo ba ilego ba mo rekiša bokgobeng. (Genesi 37:4-28) Ka morago, Kgoši ya Isiraele e lego Saulo o ile a leka go bolaya Dafida. Ka baka la’ng? Ka gobane o be a hufegela Dafida. (1 Samuele 18:7-11; 23:14, 15) Lekgolong la pele la nywaga, basadi ba babedi ba Bakriste e lego Ebodia le Sintike ba ile ba šitiša khutšo ya phuthego ka moka ka baka la dingangišano tša bona.—Ba-Filipi 4:2.

Dinakong tša moragonyana bjale, batho ba be ba lokiša go se kwane ga bona ka go lwa dintwa tša batho ba babedi ba lebane ka ditšhoša goba dithunya. Gantši yo mongwe wa batho ba o be a bolawa goba a golofaletšwa ruri. Lehono batho bao ba lwago gantši dibetša tšeo ba di dirišago ke mantšu a galakago le a hlabago. Le ge madi a ka se tšhollwe, tlhaselo ya mantšu e gobatša maikwelo le botumo bja motho. Gantši batho bao ba se nago molato ba kwešwa bohloko go tše tšeo go thwego ke dintwa.

Ela hloko seo se ilego sa direga nywageng e fetilego ge moruti yo mongwe wa Anglican a be a latofatša moruti yo mongwe ka gore o diriša ditšhelete tša kereke gampe. Ntwa ya bona e ile ya tsebega phatlalatša gomme phuthego yeo ba bego ba e hlankela ya arogana. Ditho tše dingwe di be di gana go ba gona ditirelong tša kereke ge e ba moruti yo di bego di sa mo rate a be a swere thero. Go nyatšana ga ditho tša kereke e be e le mo go tseneletšego kudu moo e lego gore di be di sa boledišane ge di be di le kerekeng bakeng sa borapedi. Ntwa e ile ya golela pele ge moruti yo a bego a latofatša yo mongwe a be  a latofatšwa ka boitshwaro bjo bo gobogilego bja tša botona le botshadi.

Mopišopo yo Mogolo wa Canterbury o ile a ipiletša go baruti bao ka bobedi, a bitša ntwa ya bona gore ke “kankere” le “lenyatšo leo le hlomphollago leina la Morena wa Rena.” Ka 1997 yo mongwe wa baruti bao o ile a dumela go rola modiro. Yo mongwe o ile a tšwela pele a swareletše mošomong wa gagwe go fihlela a gapeletšega go rola modiro ka baka la nywaga ya gagwe. Lega go le bjalo, o ile a dula go fihlela motsotsong wa mafelelo, a rola modiro letšatšing leo a bego a keteka ngwaga wa gagwe wa bo-70 ka lona, ka August 7, 2001. The Church of England Newspaper e ile ya bolela gore letšatšing leo a rotšego modiro ka lona e be e le letšatši la mokete wa yo a bitšwago Mokgethwa Victricius. Victricius yo go thwego ke Mokgethwa e be e le mang? E be e le mopišopo wa lekgolong la bone la nywaga yo go begwago gore o ile a bethwa ka baka la go gana go lwa go tša bohlabani. Ka go ela hloko phapano magareng ga boemo bja kgopolo bja yo go thwego ke Mokgethwa Victricius le moruti yo a rolago modiro, kuranta e ile ya re: “Ka mo go fapanego, [moruti yo a bego a rola modiro] o be a tloga a ikemišeditše go lwa le moruti yo mongwe.”

Ge nkabe baruti bao ba be ba dirišitše keletšo ye e lego go Ba-Roma 12:17, 18 e rego: “Le se kê la lefetša motho bobe ka bobe. A batho bohle ba Le bônê Lè le ba xo bata bolô. Xe xo kxônêxa ka thokô ya lena, Le phedišanê xa-botse le batho ka moka,” nkabe ba ile ba phema go ikweša bohloko le go kweša ba bangwe bohloko.

Go thwe’ng ka wena? Ge e ba motho yo mongwe a go kgopiša, na sekgopi se go dira gore o mo hlasele ka mantšu? Goba na o phema mantšu a bogale gomme wa dula o butše mojako bakeng sa khutšo? Ge e ba o kgopišitše motho yo mongwe, na o phema motho yoo gomme wa holofela gore o tla lebala ka bothata bjo ge nako e dutše e e-ya? Goba na o akgofela go kgopela tshwarelo? Go sa šetšwe gore o kgopela tshwarelo goba o swarela ba bangwe, go leka go dira khutšo go tla tlaleletša bophelong bja gago bjo bobotse. Keletšo ya Beibele e ka re thuša gore re rarolle dikgohlano tša rena tšeo di bilego gona ka nako e telele bjalo ka ge sehlogo se se latelago se tla bontšha.