Phihlelo

Re Dirišitše Maemo a Rena a Feto-fetogago go Nea Bohlatse Mafelong a Kgole

KA GE GO ANEGA RICARDO MALICSI

Ge ke be ke lahlegelwa ke mošomo wa-ka ka baka la boema-gare bja Bokriste, nna le lapa la-ka re ile ra kgopela Jehofa gore a re thuše go rulaganya bokamoso bja rena. Ge re be re rapela re be re bolela ka kganyogo ya rena ya go nyaka go oketša bodiredi bja rena. Kapejana ka morago ga moo, re ile ra thoma go phela bophelo bja go hlwa re huduga bjoo bo ilego bja dira gore re ye dinageng di šele tše seswai dikontinenteng tše pedi. Ka baka leo, re ile ra kgona go dira bodiredi bja rena mafelong a kgole.

KE BELEGETŠWE Philippines ka 1933, lapeng la ditho tša Kereke ya Philippine Independent. Ditho ka moka tše 14 tša lapa lešo di be di tsena kereke yeo. Ge ke be ke e-na le nywaga e ka bago e 12, ke ile ka kgopela Modimo thapelong go ntlhahla gore ke hwetše tumelo ya therešo. Morutiši yo mongwe wa-ka o ile a nngwadiša klaseng ya bodumedi, gomme ka ba Mokatholika yo a ineetšego. Le ka mohla ga se ka ka ka se be gona boipolelong bja Mokibelo goba Mmiseng wa Sontaga. Lega go le bjalo, ke ile ka thoma go belaela le go se kgotsofale. Ke be ke tshwenywa ke dipotšišo tša mabapi le seo se diregago ka batho ge ba e-hwa, mollo wa dihele le Boraro-botee. Dikarabo tšeo ke bego ke di newa ke baetapele ba bodumedi di be di sa bolele selo e bile di sa nkgotsofatše.

Go Hwetša Dikarabo tše di Kgotsofatšago

Ge ke be ke ithuta kua kholetšheng, ke ile ka šika le bagwera bao ba ilego ba ntlwaetša go lwa, go petšha, go kgoga gotee le mekgwa e mengwe e gobogilego. Mantšiboeng a mangwe, ke ile ka gahlana le mmago morutwana yo mongwe yoo ke bego ke tsena klase le yena. E be e le yo mongwe wa  Dihlatse tša Jehofa. Ke ile ka mmotšiša dipotšišo tšona tšela ke ilego ka di botšiša barutiši ba-ka ba bodumedi. O ile a araba dipotšišo tša-ka ka moka a diriša Beibele, gomme ke be ke kgodišegile gore seo a se boletšego e be e le therešo.

Ke ile ka reka Beibele gomme ka thoma go ithuta yona le Dihlatse. Go se go ye kae ke ile ka thoma go ya dibokeng ka moka tša Dihlatse tša Jehofa. Ka go latela keletšo e bohlale ya Beibele ya gore “ditlwaelano tše mpe di senya mekgwa e mebotse,” ke ile ka arogana le bagwera ba-ka ba gobogilego boitshwarong. (1 Ba-Korinthe 15:33, NW) Se se ile sa nthuša go dira tšwelopele thutong ya-ka ya Beibele gomme mafelelong ka ineela go Jehofa. Ka morago ga go kolobetšwa ka 1951, ke ile ka hlankela ke le modiredi wa nako e tletšego (mmulamadibogo) ka nakwana. Ke moka ka December 1953, ke ile ka nyala Aurea Mendoza Cruz yoo e bilego molekane wa-ka wa bophelo ka moka le mošomi-gotee le nna yo a botegago bodireding.

Karabo ya Dithapelo tša Rena

Re be re tloga re nyaka go hlankela re le babulamadibogo. Lega go le bjalo, kganyogo ya rena ya go hlankela Jehofa ka mo go tletšego e ile ya se atlege ka yona nako yeo. Lega go le bjalo, ga se ra ka ra hwa matwa go kgopela Jehofa gore a re bulele dibaka tirelong ya gagwe. Go sa dutše go le bjalo, bophelo bja rena bo be bo thatafa. Lega go le bjalo, re be re dutše re nagana ka dipakane tša rena tša moya, gomme ge ke be ke e-na le nywaga e 25, ke ile ka kgethelwa go ba mohlanka wa phuthego, molebeledi yo a okamelago phuthegong ya Dihlatse tša Jehofa.

Ge ke dutše ke gola tsebong ya Beibele gomme ke kwešiša melao ya Jehofa ya motheo gakaone, ke ile ka lemoga gore mošomo wa-ka o be o sa dumelelane le boemo bja-ka bja boema-gare bjalo ka Mokriste. (Jesaya 2:2-4) Ke ile ka phetha ka go o tlogela. Ye e ile ya ba teko ya tumelo ya rena. Ke be ke tla kgona bjang go hlokomela lapa la-ka? Le mo re ile ra batamela Jehofa Modimo ka thapelo. (Psalme 65:2) Re ile ra mmotša ka dilo tšeo di re tshwenyago le tšeo re di boifago, gomme ra mmotša gape le ka kganyogo ya rena ya go hlankela moo go bego go nyakega baboledi ba Mmušo kudu. (Ba-Filipi 4:6, 7) Ga se ra tseba le gatee gore re tla bulegelwa ke dibaka tše kaakaa tša go fapa-fapana!

Go Thoma Leeto la Rena

Ka April 1965, ke ile ka amogela mošomo woo go ona ke bego ke šoma bjalo ka setsebi sa tša mello ya dikotsi tša difofane le sa tša phološo Boema-fofaneng bja Ditšhaba-tšhaba bja Vientiane kua Laos, gomme re ile ra hudugela gona. Kua motseng wa Vientiane, go be go e-na le Dihlatse tše 24, gomme re ile ra thabela modiro wa boboledi le baromiwa gotee le bana babo rena ba sego kae ba lefelong leo. Ka morago, ke ile ka išwa Boema-fofaneng bja Udon Thani, kua Thailand. Go be go se na Dihlatse kua Udon Thani. Re be re itshwarela diboka ka moka tša beke le beke re le lapa. Re ile ra dira boboledi ka ntlo le ntlo, maeto a go boela gomme ra thoma dithuto tša Beibele.

Re ile ra gopola keletšo ya Jesu go barutiwa ba gagwe ya gore ba swanetše go “enya dienywa tše ntši.” (Johane 15:8) Ka gona re ile ra ikemišetša go latela mohlala wa bona gomme ra tšwela pele go bolela ditaba tše dibotse. Go se go ye kae, re ile ra thabela go bona mafelelo a mabotse. Mosetsana wa mo-Thailand o ile a amogela therešo gomme ya ba kgaetšedi ya rena ya moya. Batho ba babedi ba tšwago Amerika Leboa ba ile ba amogela therešo gomme ge nako e dutše e e-ya ya ba bagolo ba Bakriste. Re ile ra tšwela pele go bolela ditaba tše dibotse ka nywaga e fetago e lesome kua leboa la Thailand. Re thaba gakaakang go kwa gore bjale go na le phuthego kua Udon Thani! Tše dingwe tša dipeu tša therešo tšeo re di bjetšego di sa dutše di enywa dienywa.

Lega go le bjalo, se se nyamišago ke gore re ile ra swanelwa ke go huduga gape, gomme re ile ra rapela gore “Mong wa punô” a re thuše go tšwela pele re e-ba le karolo modirong wa boboledi. (Mateo 9:38) Re ile ra išwa Tehran, motse-mošate wa Iran. E be e le nakong ya pušo ya Shah.

Go Dira Boboledi Tšhemong e Hlohlago

Ge re be re fihla kua Tehran, re ile ra hwetša bana babo rena ba moya gatee-tee. Re ile ra kopanela le sehlopha se senyenyane sa Dihlatse tše tšwago merafong e 13. Re ile ra swanelwa ke go dira diphetogo e le gore re kgone go bolela ditaba tše dibotse Iran. Gaešita le ge re se ra ka ra ganetšwa ka go lebanya, re be re swanetše go ba šedi.

Ka baka la dinako tša mošomo wa bao ba thabelago, ka dinako tše dingwe re be re swanetše go  swara dithuto tša Beibele bošego-gare goba ka matla-go-sa—go fihla ka masa. Lega go le bjalo, re be re thabile kudu go bona mafelelo a mabotse a modiro woo o thata! Malapa a mmalwa a ma-Philippine le a ma-Korea a ile a amogela therešo ya Bokriste gomme a ineela go Jehofa.

Kabelo ya-ka ya mošomo yeo ilego ya latela e bile Dhaka, kua Bangladesh. Re ile ra fihla moo ka December 1977. Ye e be e le naga e nngwe yeo go yona modiro wa rena wa boboledi o bego o se bonolo go o dira. Lega go le bjalo, re be re dula re gopola gore re swanetše go dula re le mafolofolo. Ka tlhahlo ya moya wa Jehofa, re ile ra kgona go hwetša malapa a mantši a bao ba bego ba ipolela gore ke Bakriste. A mangwe a malapa ao a be a nyoretšwe meetse a lapološago a therešo ao a hwetšwago ka Mangwalong a Makgethwa. (Jesaya 55:1) Ka lebaka leo, re ile ra thoma dithuto tše dintši tša Beibele.

Re be re dula re gopola gore thato ya Modimo ke gore “batho bohle ba phološwê.” (1 Timotheo 2:4) Se se thabišago ke gore ga go le o tee yo a ilego a leka go re bakela mathata. Bakeng sa go fenya kgethollo, re be re kgonthišetša gore re diriša tsela e nago le bogwera ya go batamela batho. Bjalo ka moapostola Paulo, re ile ra leka go ba “tšohle go bohle.” (1 Ba-Korinthe 9:22, PK) Ge re be re botšišwa gore re bewa ke eng moo, re be re bolela ka botho, ka gona re ile ra hwetša gore bontši bja batho bo be bo bontšha bogwera kudu.

Kua Dhaka re ile ra hwetša kgaetšedi yo mongwe yoo e lego Hlatse moo gomme ra mo kgothaletša go ba le rena dibokeng tša rena tša Bokriste le gore ka morago a be le rena modirong wa boboledi. Ke moka, mosadi wa-ka o ile a ithuta Beibele le lapa le lengwe gomme a le laletša go tla dibokeng tša rena. Ka baka la botho bja Jehofa bjo lerato, lapa ka moka le ile la amogela therešo. Ka morago, barwedi ba bona ba babedi ba ile ba thuša ka go fetolelwa ga dipuku tša Beibele lelemeng la se-Bengali, gomme bontši bja ba leloko la bona ba ile ba tseba Jehofa. Barutwana ba Beibele ba bantši ba ile ba amogela therešo. Bontši bja bona bjale bo hlankela e le bagolo goba babulamadibogo.

Ka ge Dhaka e le motse o nago le badudi ba bantši, re ile ra laletša ditho tše dingwe tša lapa la rena go re thuša modirong wa boboledi. Ba mmalwa ba ile ba arabela gomme ba thušana le rena kua Bangladesh. Re thabile e bile re leboga Jehofa ka baka la sebaka seo re bilego le sona sa go bolela ditaba tše dibotse nageng yeo! Go thomile go e-na le motho o tee feela, bjale go šetše go e na le diphuthego tše pedi kua Bangladesh.

Ka July 1982, re ile ra swanela go huduga Bangladesh. Re ile ra kgaogana le bana babo rena re sekišitše megokgo. Ka pela ka morago ga moo ke ile ka hwetša mošomo Boema-fofaneng bja Ditšhaba-tšhaba bja Entebbe kua Uganda, moo re bego re tla dula nywaga e mene le dikgwedi tše šupago. Ke’ng seo re bego re ka kgona go se dira go tumišeng leina le legolo la Jehofa nageng ye?

Go Hlankela Jehofa Afrika Bohlabela

Ge re fihla kua Boema-fofaneng bja Entebbe, mootledi wa koloi o ile a tla go tšea nna le mosadi wa-ka go re iša lefelong leo re tlago go dula go lona. Ge re tloga boema-fofaneng, ke ile ka thoma go boledišana le mootledi ka Mmušo wa Modimo. O ile a mpotšiša gore: “Na o yo mongwe wa Dihlatse tša Jehofa?” Ge ke dumela, mootledi a re: “Yo mongwe wa bana beno o šoma moagong wa go laola difofane.” Ke ile ka mo kgopela gore a nkiše moo gatee-tee. Re ile ra kopana le ngwanabo rena yo a bego a thabetše go re bona, gomme gwa dirwa dithulaganyo bakeng sa diboka le tirelo ya tšhemo.

Go be go e-na le bagoeledi ba Mmušo ba 228 feela kua Uganda ka nako yeo. Re ile ra fetša ngwaga  wa rena wa mathomo re bjala dipeu tša therešo re e-na le bana babo rena ba babedi kua Entebbe. Ka ge batho ba moo ba rata go bala, re ile ra kgona go sepediša dipuku tše dintši, go akaretša le dimakasine tše makgolo. Re ile ra laletša bana babo rena go tšwa kua Kampala, motse-mošate go tla go re thuša go dira boboledi tšhemong ya Entebbe mafelo-bekeng. Polelong ya-ka ya mathomo ya phatlalatša, go be go e-na le batho ba bahlano—go akaretša le nna.

Nywageng e meraro e latetšego, re ile ra ba le dinako tše di thabišago bophelong bja rena ge re bona bao re ilego ra ba ruta ba arabela e bile ba dira tšwelopele ka go akgofa. (3 Johane 4) Kopanong e nngwe ya tikologo, barutwana ba rena ba Beibele ba tshelelago ba ile ba kolobetšwa. Bontši bja bona ba ile ba bolela gore ba tutueletšegile go tšea tirelo ya nako e tletšego ka baka la ge ba re bone re hlankela bjalo ka babulamadibogo mola e bile re šoma mešomo ya nako e tletšego.

Re ile ra lemoga gore mafelo a rena a mošomo le ona a ka ba tšhemo e botse. Nakong e nngwe ke ile ka batamela molaodi wa lefapha la tša mollo wa boema-fofaneng gomme ka boledišana le yena ka kholofelo ya go phela paradeiseng yeo e theilwego Beibeleng. Ke ile ka mmontšha ka Beibeleng ya gagwe gore batho bao ba kwago ba tla phela ka khutšo le ka go kwana, ba se sa hlwa ba tlaišwa ke tlala, go hlaela ga madulo, ntwa, bolwetši goba lehu. (Psalme 46:9; Jesaya 33:24; 65:21, 22; Kutollo 21:3, 4) Go bala ka dilo tše ka moka ka Beibeleng ya gagwe go ile gwa tsoša kgahlego. Re ile ra thoma thuto ya Beibele gatee-tee. O ile a ba gona dibokeng ka moka. Go se go ye kae o ile a ineela go Jehofa gomme a kolobetšwa. Ka morago ga moo o ile a šoma gotee le rena bodireding bja nako e tletšego.

Go bile le dikhuduego tša selegae ka makga a mabedi ge re be re le kua Uganda, eupša ga se tša emiša mediro ya rena ya moya. Ditho tša malapa a batho bao ba šomelago mekgatlo ya ditšhaba-tšhaba di ile tša išwa kua Nairobi, Kenya, ka lebaka la dikgwedi tše tshelelago. Rena bao ba tlogetšwego Uganda re ile ra tšwela pele ka diboka tša rena tša Bokriste le ka modiro wa boboledi gaešita le ge re be re swanetše gore re be bohlale le go ba šedi.

Ka April 1988, mošomo woo ke bego ke abetšwe go o dira o ile wa fela gomme re ile ra huduga gape. Re ile ra tloga Phuthegong ya Entebbe re kgotsofetše kudu ka baka la tšwelopele ya moya e dirilwego moo. Ka July 1997, re ile ra ba le sebaka sa go etela Entebbe gape. Ka nako yeo ba bangwe ba barutwana ba rena ba Beibele ba be ba hlankela e le bagolo. Re ile ra thaba kudu gakaakang go bona go e-na le batho ba 106 Sebokeng sa Phatlalatša!

Go Hudugela Tšhemong e sa Kago ya Šongwa

Na re be re tla kgona go diriša dibaka tše difsa tšeo di re bulegetšego? Ee, mošomo wa-ka o latelago o be o le kua Boema-fofaneng bja Ditšhaba-tšhaba bja Mogadishu, kua Somalia. Re be re ikemišeditše go diriša sebaka se se sefsa gabotse bakeng sa go šoma tšhemo e sa kago ya šongwa.

Re be re dira modiro wa rena wa boboledi kudu go batseta ba dinaga tše dingwe, bašomi ba ma-Philippine le batho ba bangwe ba tšwago dinageng dišele. Gantši re be re gahlana le bona mmarakeng. Re ile ra ba ra ba etela magaeng a bona bakeng sa go thabela bogwera. Ka go diriša bohlale, tsebo, šedi le go ithekga ka Jehofa ka mo go feletšego, re ile ra kgona go boledišana le ba bangwe ka ditherešo tša Beibele gomme se se ile sa enywa dienywa go bao ba tšwago ditšhabeng tša go fapa-fapana. Ka morago ga nywaga e mebedi, re ile ra huduga kua Mogadishu—pele ntwa e ka thoma moo.

 International Civil Aviation Organization e ile ya nthomela Yangona, kua Myanmar. Le moo gape, re ile ra bulegelwa ke dibaka tše dibotse bakeng sa go thuša ba dipelo tše di botegago gore ba ithute ka merero ya Modimo. Ka morago ga Myanmar, re ile ra romelwa Dar es Salaam, kua Tanzania. Go be go le bonolo kudu go bolela ditaba tše dibotse ka ntlo le ntlo kua Dar es Salaam ka gobane go be go e-na le sehlopha sa batho ba bolelago Seisemane.

Dinageng ka moka tšeo re šomilego go tšona, ga se ra ba le mathata a mantši mabapi le go dira bodiredi bja rena, gaešita le ge maemong a mantši modiro wa Dihlatse tša Jehofa o be o thibetšwe. Ka baka la boemo bja mošomo wa-ka, woo gantši o bego o sepedišana le mmušo goba mekgatlo ya ditšhaba-tšhaba, batho ba be ba sa belaele seo re bego re se dira.

Mošomo wa-ka wa boiphedišo o ile wa nyaka gore nna le mosadi wa-ka re phele bophelo bja go hlwa re huduga ka nywaga e masome a mararo. Lega go le bjalo, re ile ra lebelela mošomo wa-ka e le yona tsela feela ya go fihlelela pakane ya rena. Pakane ya rena ya mathomo e be e dutše e le go tšwetša pele dikgahlego tša Mmušo wa Modimo. Re leboga Jehofa ka go re thuša go diriša gabotse maemo a rena a feto-fetogago le go thabela diphihlelo tše di kgahlišago tša go gaša ditaba tše dibotse mafelong a kgole.

Go Boela Moo re Thomilego Gona

Ge ke be ke e-na le nywaga e 58, ke ile ka phetha ka go rola modiro e sa le ka pela gomme ka gomela kua Philippines. Ge re fihla, re ile ra kgopela Jehofa ka thapelo gore a hlahle dikgato tša rena. Re ile ra thoma go hlankela phuthegong ya Trece Martires City, profenseng ya Cavite. Mathomong ge re be re fihla, go be go e-na le bagoeledi ba Mmušo wa Modimo ba 19 feela. Go ile gwa rulaganywa mediro ya go dira boboledi letšatši le letšatši gomme gwa thongwa dithuto tše dintši tša Beibele. Phuthego e ile ya thoma go gola. Lebakeng le lengwe mosadi wa-ka o be a e-na le dithuto tša legae tša Beibele tše 19 gomme nna ke be ke e-na le tše 14.

Go se go ye kae, Holo ya Mmušo e ile ya thoma go se sa re lekana. Re ile ra iša taba ye go Jehofa ka thapelo. Ngwanabo rena wa moya gotee le mosadi wa gagwe ba ile ba phetha ka go neela ka lefelo, gomme ofisi ya lekala e ile ya amogela kgopelo ya go adima tšhelete bakeng sa go aga Holo e mpsha ya Mmušo. Moago o mofsa o bile le karolo e kgolo modirong wa boboledi, gomme palo ya ba bago gona e ile ya oketšega beke le beke. Ga bjale re sepela lebaka la go feta iri tše pedi go ya le go boa bakeng sa go thuša phuthego e nngwe e nago le bagoeledi ba 17.

Nna le mosadi wa-ka re thabela tokelo yeo re bilego le yona ya go hlankela dinageng tše dintši tša go fapa-fapana. Ge re lebelela morago bophelong bja rena bja go hlwa re huduga, re ikwa re kgotsofetše kudu go tseba gore re bo dirišitše ka tsela e kaone kudu yeo re bego re ka kgona—go thuša ba bangwe go ithuta ka Jehofa!

[Mmapa go letlakala 24, 25]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

TANZANIA

UGANDA

SOMALIA

IRAN

BANGLADESH

MYANMAR

LAOS

THAILAND

PHILIPPINES

[Seswantšho go letlakala 23]

Nna le mosadi wa-ka, Aurea