“Thušo Ya-ka E Tšwa Go Jehofa”

Bafsa Bao ba Retago Jehofa ba Kaonefatša Maphelo a Bona

“KE NYAKA dilo tše kaone kudu bophelong!” Ke kamoo mošemane yo mongwe yo a lego mahlalagading a ilego a hlalosa ditebelelo tša gagwe ka gona. Eupša mofsa a ka hwetša bjang dilo tše kaone kudu bophelong? Beibele e nea karabo e lebanyago ka gore: “Xopola Mmopi wa xaxo Ò sa le yo mofsa!”—Mmoledi 12:1.

Go reta Jehofa le go mo hlankela ga se feela taba ya batho ba bagolo. Samuele, morwa wa Elikana le Hanna, e be e sa le yo monyenyane kudu ge a be a hlankela Jehofa tabarenakeleng. (1 Samuele 1:19, 20, 24; 2:11) Ngwanenyana yo monyenyane wa mo-Hebere o ile a bontšha tumelo e feletšego go Jehofa ge a be a šišinya gore molaodi wa madira a Siria e lego Naamane a ye go moporofeta Elisa e le gore a fodišwe bolwetši bja lephera. (2 Dikxoši 5:2, 3) Go Psalme 148:7, 12, bobedi bašemane le banenyana ba laelwa go reta Jehofa. * Ge a be a e-na le nywaga e 12 feela, Jesu o ile a ba le kgahlego e tseneletšego tirelong ya Tatagwe. (Luka 2:41-49) Ka baka la tlwaetšo ya bona e tšwago Mangwalong, bašemane ba bangwe bao ba bonego Jesu a le tempeleng ba ile ba goeletša ba re: “Hosiana Morwa wa Dafida!”—Mateo 21:15, 16.

Go Reta Jehofa Lehono

Lehono, bafsa ba bantši gare ga Dihlatse tša Jehofa ba ikgantšha ka ditumelo tša bona gomme ba boledišana le ba bangwe ka tšona ka sebete ge ba le dikolong goba ba le mafelong a mangwe. Ela hloko mehlala e mebedi.

Kua Brithania, klase ya Stephanie wa nywaga e 18 e be e ahla-ahla taba ya go ntšha mpa gotee le ditaba tše dingwe tše di lego mabapi le boitshwaro. Morutiši o ile a bolela ka go tia gore go ntšha mpa ke mo go amogelegago ka kakaretšo ga bjale le gore ga go na ngwanenyana yo a ka bago le lebaka la go gana mokgwa wo. Ge bohle ka klaseng ba be ba dumelelana le pono ye, Stephanie o ile a ikwa a gapeletšega go emela boemo bja gagwe bjo bo theilwego Beibeleng. Sebaka sa go dira bjalo se ile sa tšwelela ge morutiši a botšiša Stephanie gore o nagana eng ka seo. Le ge mathomong a be a tšhogile, Stephanie o ile a diriša sebaka seo go hlalosa pono ya Mangwalo. O ile a hlalosa Ekisodo 21:22-24 ka mantšu a gagwe gomme a bontšha gore ge e ba e be e le phošo go gobatša ngwana yo a sešogo a belegwa, gona go molaleng gore go ntšha mpa go thulana le thato ya Modimo.

Morutiši yoo, yo e lego moruti, o be a se a ka a bala ditemana tše. Go nea bohlatse ga Stephanie ka sebete go ile gwa lebiša dipoledišanong tše dintši tše di kgahlišago le barutwana-gotee le yena ka ditaba tše di fapa-fapanego. Ga bjale ngwanenyana yo mongwe o amogela dikopi tša morago-rago tša Morokami le Phafoga! ka mehla, gomme ba bangwe ba babedi ba bile gona kopanong ya selete ya Dihlatse tša Jehofa go tla go bona ge Stephanie a kolobetšwa e le go bontšha boineelo bja gagwe go Modimo.

Vareta wa nywaga e tshela yo a dulago Suriname, Amerika Borwa, o ile a diriša sebaka bakeng sa go reta Modimo ge morutišigadi wa gagwe a be a nyaka khomotšo e tšwago Mangwalong. Ge morutišigadi a boa ka morago ga go se be gona ka matšatši a mararo, o ile a botšiša barutwana ba  gagwe ge e ba ba be ba tseba lebaka leo ka lona a bego a se gona. Ba ile ba araba ka gore, “O be o babja, na ga go bjalo?” Morutišigadi o ile a araba ka gore: “Aowa, mogolo’a-ke o hlokofetše gomme ke nyamile kudu. Ka gona le se ke la dira lešata.”

Mathapameng ao ge mmagwe a sa bo itše šwaa, Vareta o be a swaregile ka go phetla dimakasine tša kgale a bala dihlogo tša tšona. O ile a hwetša Morokami wa July 15, 2001, wo o nago le sehlogo se se rego, “Na go na le Bophelo ka Morago ga Lehu?” A tletše lethabo, o ile a tsoša mmagwe gomme a re, “Mma, Mma, bona! Ke hweleditše morutišigadi wa-ka makasine o bolelago ka lehu!” Makasine o ile wa romelwa go morutišigadi o e-na le lengwalo le le tšwago go Vareta. O ngwadile gore: “Makasine wo ke wa gago ka mo go kgethegilego. Paradeiseng o tla bona mogolo’ago gape ka gobane Jehofa ga a bolele maaka le ka mohla. O holofeditše gore o tla tliša paradeise mo lefaseng, e sego legodimong.” Morutišigadi o ile a leboga kudu khomotšo e theilwego Beibeleng yeo dihlogo tše di e neilego.

Go Thea Motheo Bakeng sa Bokamoso

Jehofa ke “Modimo yo a thabilego,” gomme o nyaka gore bafsa ba thabe. (1 Timotheo 1:11, NW) Lentšu la gagwe le re: “Ithabêlê Ò sa le bofseng bya xaxo, O tsefêlwa ke matšatši a bofseng bya xaxo.” (Mmoledi 11:9) Jehofa o bona ka kua ga lebaka la bjale gomme o lemoga mafelelo a nako e telele a boitshwaro bjo bobotse gotee le bjo bobe. Ke ka baka leo Lentšu la gagwe le eletšago bafsa gore: “Xopola Mmopi wa xaxo Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!”—Mmoledi 12:1.

Ee, Jehofa o kganyoga gore bafsa ba thabele ka mo go feletšego mpho ya bohlokwa ya bophelo. Ka go gopola Modimo le go mo reta, bafsa ba ka phela bophelo bjo bo kgotsofatšago le bjo bo putsago. Le ge ba lebeletšane le mathata, ba ka bolela ka kgodišego gore: “Thušo ya-ka e tšwa go Jehofa.”—Psalme 121:2, NW.

[Mongwalo wa ka tlase]

[Ntlhakgolo go letlakala 9]

“Rêtang Morêna mono lefaseng, . . . lena masoxana le lena basetsana.”—PSALME 148:7, 12.

[Lepokisi go letlakala 8]

JEHOFA O THEKGA BAFSA

“Gobane wene o kholofelo ya-ka, Morena Jehofa, o mmotegi wa-ka go tloga bjaneng bja-ka.”—Psalme 71:5, PK.

“[Modimo] Ó Xo horiša tše di botse x’O tšofala; wa bušetšwa bosoxana bo-ka nong.”—Psalme 103:5.