Dipotšišo tše Tšwago go Babadi

Na go ja ga Dafida le banna ba gagwe dinkgwa tša pontšho go bontšha gore molao wa Modimo o ka robja ka ntle le kotlo ka tlase ga maemo a thata?—1 Samuele 21:1-6.

Go ya ka Lefitiko 24:5-9, dinkgwa tša pontšho tšeo di bego di tlošwa gomme legatong la tšona gwa bewa tše dingwe ka Sabatha e nngwe le e nngwe di be di beetšwe go lewa ke baperisita. Molao wa motheo wa mabapi le taba ke gore dinkgwa tše e be e le tše kgethwa gomme e be e swanetše go ba dijo tša banna bao ba bego ba swaregile ka tirelo ya Modimo—baperisita. Go di fa mošomi feela yo a tlwaelegilego goba go di ja bakeng sa go fo ithabiša e be e tla ba mo go fošagetšego e le ruri. Lega go le bjalo, moperisita Ahimeleke ga se a ka a dira sebe ka go nea Dafida le banna ba gagwe dinkgwa tša pontšho gore ba di je.

Mohlomongwe Dafida o be a phetha kabelo e kgethegilego go tšwa go Kgoši Saulo. Dafida le banna ba gagwe ba be ba swerwe ke tlala. Ahimeleke o ile a lemoga gore dinkgwa di be di šetše di phethile morero wa tšona tirelong. Gaešita le ge go ja ga bona dinkgwa tša pontšho go be go tloga go le kgahlanong le molao, go be go dumelelana le tirišo ya motheo ya dinkgwa tša pontšho. Go ela hloko se go ile gwa dira gore Ahimeleke a lebelele boemo bjo e le bjo bo fapanego. Jesu Kriste ka boyena o ile a diriša tiragalo ye go bontšha go fošagala ga tirišo e sa swanelago ya molao wa Sabatha wo o bego o dirišwa ka tsela ye Bafarisei ba bego ba o kwešiša ka yona.—Mateo 12:1-8.

Lega go le bjalo, se se boletšwego mo ga se bolele gore molao wa Modimo o ka robja ge maemo a thoma go thatafala. Ka mohlala, boemo bjo bo bonagalago bo le thata bo ile bja tšwelela ge madira a ba-Isiraele a be a e-lwa le ba-Filisita. Kgoši Saulo o be a boletše gore: “Monna e a kaxo ja lè sešo la dikêla, kè sešo ka ôtla manaba a-ka, ó roxilwe!” Beibele e re: “Mohla woo ba be ba bolaile Ba-Filisita.” Bahlabani ba be ba lapile ka baka la ntwa e bile ba swerwe ke tlala, ‘gomme batho ba thoma go bolaela diphoofolo mo fase gomme ba di ja gotee le madi.’ (1 Samuele 14:24, 31-33) Ba senyeditše Jehofa ka go roba molao wa gagwe mabapi le madi. Ditiro tša bona di be di sa dumelelane le tirišo e nnoši ya madi yeo e kgethilwego ke Modimo, e lego ‘go dira poelanyo’ ya dibe. (Lefitiko 17:10-12; Genesi 9:3, 4) Ka kgaugelo, Jehofa o ile a amogela dihlabelo tše di kgethegilego tšeo di bego di direlwa bao ba bego ba dirile sebe.—1 Samuele 14:34, 35.

Ee, Jehofa o letetše gore re kwe melao ya gagwe maemong ka moka. Moapostola Johane o re: “Leratô la xo rata Modimo ké xe re e-ya ka melaô ya xaxwe.”—1 Johane 5:3.

[Seswantšho go letlakala 30]

Dinkgwa tše difsa tša pontšho di be di bewa ka Tabarenakeleng ka Sabatha e nngwe le e nngwe