‘Go Etša Talama e Khwibidu’

MOAPOSTOLA Johane o ile a bona pono ya setulo sa letago sa bogoši sa kua legodimong. Yo a dutšego setulong o be a bonagala bjalo ka “talama e thšweu.” Le gona O be a le bjalo ka ‘talama e khwibidu.’ (Kutollo 4:2, 3) Mafsika a e be e le a mohuta ofe?

A e be e se mafsika a sa bonaletšego ao a phadimago ka ntle. Mehleng ya bogologolo, lentšu la Segerika le le fetoletšwego e le “talama” le be le dirišwa ge go bolelwa ka mafsika a mebala e sa swanego, go akaretša le magakabje a bohlokwa ao a bego a bonaletša. A. T. Robertson o bolela ka go Word Pictures in the New Testament gore “talama” ye go boletšwego ka yona go Kutollo 4:3 “e [be e] tloga e sa swane le talama e sa bitšego kudu ya mehleng yeno.” Go oketša moo, ka morago pukung ya Kutollo, Johane o hlalosa motse wa legodimong e lego Jerusalema, ka gore: “Seetša sa wôna se swana le sa lebyê le le bohlôkwa-hlôkwa la talama ye e phadimaxo.” (Kutollo 21:10, 11) Mafsika ao Johane a bolelago ka ona go bonagala a be a bonaletša.

Yo go bolelwago ka yena a dutše sedulong sa bogoši ponong ya Johane ke Motho yo a nago le letago ka go fetišiša legohleng, e lego Jehofa Modimo. Ke yo a sekilego le yo mokgethwa ka tsela e phagamego ka go fetišiša. Ka go dumelelana le seo, moapostola Johane o ngwadile gore: “Modimo ké Seetša; xomme mo xo Yêna xa xo se e ka baxo lefsifsi.” (1 Johane 1:5) Ka go rialo, Johane o ile a kgothaletša badumedi-gotee le yena gore ba ‘ikgethagatše go etša ge Jehofa le yena e le yo mokgethwa.’—1 Johane 3:3.

Re swanetše go dira’ng gore re lebelelwe ke Modimo re le ba sekilego? Go ba ga rena le tumelo mading a Kriste a tšholotšwego bakeng sa tebalelo ya dibe tša rena go tloga go nyakega. Re swanetše gore gape re tšwele pele re “swere ka tsela ya seetša” ka go ithuta Beibele ka mehla le go phela ka go dumelelana le seo e se rutago.—1 Johane 1:7.