Go se sa Iphelela
Go se sa Iphelela
“[Kriste] ó hwile ’bakeng sa bohle, xore ba ba phelaxo ba se kê ba hlwa ba iphelêla.”—2 BA-KORINTHE 5:15.
1, 2. Ke taelo efe ya Mangwalo yeo e ilego ya tutueletša balatedi ba Jesu ba lekgolong la pele la nywaga gore ba fenye boithati?
E BE e le bošego bja Jesu bja mafelelo lefaseng. Diiring tše sego kae feela, o be a tla neela bophelo bja gagwe bakeng sa bohle bao ba bego ba tla dumela go yena. Bošegong bjoo, Jesu o boditše baapostola ba gagwe ba botegago dilo tše dintši tša bohlokwa. Gare ga tšona go be go e-na le taelo ya mabapi le seka seo se bego se tla ipontšha e le leswao leo le hlaolago balatedi ba gagwe. O itše: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe kè Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”—Johane 13:34, 35.
2 Bakriste ba therešo ba swanetše go ratana ka lerato la boikgafo gomme ba etiše dinyakwa tša badumedi-gotee le bona pele ga tša bona. Ga se ba swanela go dika-dika gaešita le tabeng ya go ‘gafa maphelo a bona bakeng sa bagwera ba bona.’ (Johane 15:13) Bakriste ba pele ba ile ba arabela bjang taelong ye e mpsha? Ka pukung ya gagwe e tumilego ya Apology, mongwadi wa lekgolong la bobedi la nywaga e lego Tertullian o ile a tsopola ba bangwe bao ba ilego ba bolela ka Bakriste gore: ‘Bona kamoo ba ratanago ka gona; kamoo ba ikemišeditšego gaešita le go hwelana.’
3, 4. (a) Ke ka baka la’ng re swanetše go lwantšha boithati? (b) Re tla ahla-ahla’ng sehlogong se?
3 Le rena re swanetše go ‘tšwela pele re hlatlolana merwalo, gomme ka go rialo ra phetha molao wa Kriste.’ (Ba-Galatia 6:2) Lega go le bjalo, boithati ke le lengwe la mapheko a magolo tabeng ya go latela molao wa Kriste le go ‘rata Jehofa Modimo wa rena ka dipelo tša rena ka moka, moya le monagano le go rata magagabo rena kamoo re ithatago ka gona.’ (Mateo 22:37-39) Ka ge re se ra phethagala, re sekametše tabeng ya go ba le boithati. Go oketša go se, go na le kgateletšo ya bophelo bja letšatši le letšatši, moya wa phadišano sekolong goba mošomong gotee le go šoma ka thata bakeng sa go iphediša, gomme dilo tše di dira gore tshekamelo ye ya tlhago e mpefale. Tshekamelo ye ya boithati ga e fokotšege. Moapostola Paulo o lemošitše ka gore: “Mehleng ya bofêlô . . . batho e tlo ba ba xo ithata.”—2 Timotheo 3:1, 2.
4 Go ya bofelong bja bodiredi bja gagwe bja lefaseng, Jesu o ile a nea barutiwa ba gagwe megato e meraro yeo e bego e ka ba thuša go fenya boithati. E be e le efe, gomme re ka holwa bjang ke ditaelo tša gagwe?
Tharollo ya Kgonthe
5. Ge Jesu a dutše a dira boboledi ka leboa la Galilea, ke’ng se a ilego a se tsebiša barutiwa ba gagwe, gomme ke ka baka la’ng seo e be e le se se makatšago go bona?
5 Jesu o be a dira boboledi kgaufsi le Kesarea Filipi ka leboa la Galilea. Lefelo le la khutšo le le lebotse le ka ba le ile la bonagala e le le le swanetšego kudu bakeng sa boiketlo go e na le gore e be leo go lona go ithutwago go itima dilo. Lega go le bjalo, ge a le moo Jesu o ile a thoma go tsebiša barutiwa ba gagwe gore o swanetše “xo ya Jerusalêma le xo tlaišwa ka tše ntši ke ba baxolo le baperisita ba baxolo le ba-mangwalô, [“a bolawe,” NW] le xo tsoxa ka letšatši la boraro.” (Mateo 16:21) Tsebišo ye e swanetše go ba e ile ya makatša barutiwa ba Jesu gakaakang, ka gobane go fihla ka nako yeo ba be ba letetše gore Moetapele wa bona a hlome Mmušo wa gagwe lefaseng!—Luka 19:11; Ditiro 1:6.
6. Ke ka baka la’ng Jesu a ile a sola Petro ka go tia?
6 Petro ka go akgofa “a mmiletša [Jesu] thokô a thôma xo mo phêxêlêla a re: Morêna! A k’O lôtêxê, tšeo di se kê tša Xo dirêxêla.” Jesu o ile a arabela bjang? “A mo fularêla a re: Tloxa fá pele xa-ka, wene Lenaba; O a nkxopiša, xobane xa O eleletše tša Modimo, O eleletša tša batho.” A phapano e kgolo gakaakang magareng ga dipono tše tše pedi! Jesu o ile a amogela ka pelo e tšhweu tsela ya boikgafo yeo Modimo a bego a mo abetše yona—yeo ka dikgwedi tše sego kae e bego e tla mo lebiša lehung la gagwe la koteng ya tlhokofatšo. Petro o ile a mo kgothaletša gore a dire dilo ka tsela e bonolo. O itše: “A k’O lôtêxê.” Go molaleng gore Petro o be a e-na le maikemišetšo a mabotse. Lega go le bjalo, Jesu o ile a sola Petro ka gobane ka nako yeo o be a itumeletše gore a tutuetšwe ke Sathane. Petro o be a sa “eleletše tša Modimo, [a] eleletša tša batho.”—Mateo 16:22, 23.
7. Go etša ge go begilwe go Mateo 16:24, ke megato efe yeo Jesu a boletšego gore balatedi ba gagwe ba swanetše go e gata?
7 Mantšu a swanago le ao Petro a bego a a botša Jesu a ka kwewa lehono. Lefase gantši le kgothaletša batho gore ba ‘inaganele’ goba ba ‘dire dilo ka tsela e bonolo.’ Ka lehlakoreng le lengwe, Jesu o kgothaleditše boemo bja kgopolo bjo bo fapanego ka mo go feletšego. O boditše barutiwa ba gagwe gore: “Xe motho a rata xo nthšala moraxo, a ikxafê, a rwalê [“kota ya gagwe ya tlhokofatšo,” NW], ’me a ntatêlê.” (Mateo 16:24) The New Interpreter’s Bible e re: “Mantšu a e be e se taletšo go bao e bego e se ya tšwa e e-ba barutiwa, eupša e be e le taletšo ya gore bao ba bego ba šetše ba arabetše taletšong ya Kriste ba naganišiše ka seo se bolelwago ke go ba ga bona barutiwa.” Megato e meraro yeo Jesu a boletšego ka yona, go etša ge go begilwe ka lengwalong leo, e swanetše go gatwa ke bao e lego badumedi. Anke re ahla-ahleng megato ye ka o tee ka o tee.
8. Hlalosa seo se bolelwago ke go ikgafa.
8 Wa pele, re swanetše go ikgafa. Lentšu la Segerika bakeng sa ‘go ikgafa’ le bolela go ikemišetša go gana dikganyogo tša boithati goba dilo tšeo di tlago go hola rena feela. Go ikgafa ga se feela taba ya go phema ga rena boithabišo bjo itšego ka sewelo; e bile ga go bolele gore re swanetše go itima dilo goba go ikgobatša. Ga re sa “iphelêla” ka kgopolo ya gore re ikemišeditše go neela maphelo a rena ka moka le dilo ka moka tšeo di akaretšwago go ona go Jehofa. (1 Ba-Korinthe 6:19, 20) Go e na le go ba le boithati, maphelo a rena e ba ao a theilwego tabeng ya go hlankela Modimo. Go ikgafa go bolela go ikemišetša go dira thato ya Modimo, gaešita le ge se se ka ba se sa dumelelane le ditshekamelo tša rena tša go se phethagale. Re bontšha gore re botegela Modimo ka mo go feletšego ge re ineela go yena gomme re kolobetšwa. Ke moka re katanela go phelela boineelo bja rena bophelo bja rena ka moka.
9. (a) Ge Jesu a be a le lefaseng, kota ya tlhokofatšo e be e emela’ng? (b) Ke ka tsela efe re rwalago kota ya rena ya tlhokofatšo?
9 Mogato wa bobedi ke gore re swanetše go rwala kota ya rena ya tlhokofatšo. Lekgolong la pele la nywaga, kota ya tlhokofatšo e be e emela go tlaišega, go nyatšwa le lehu. Gantši e be e le disenyi feela tšeo di bego di bolaelwa koteng ya tlhokofatšo goba tšeo ditopo tša tšona di bego di fegwa koteng. Ka polelwana ye, Jesu o be a bontšha gore Mokriste o swanetše go itokišeletša go amogela tlaišo, lehloyo goba gaešita le lehu, ka ge e se karolo ya lefase. (Johane 15:18-20) Ditekanyetšo tša rena tša Bokriste di re dira gore re be ba fapanego, ka gona lefase le ka ‘re goboša.’ (1 Petro 4:4) Se se ka direga sekolong, mošomong wa rena goba gaešita le ka lapeng. (Luka 9:23) Lega go le bjalo, re ikemišeditše go kgotlelela lehloyo la lefase ka gobane ga re sa iphelela. Jesu o itše: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka. Thabang Le hlalalê, xobane moputsô wa lena ké o moxolo maxodimong.” (Mateo 5:11, 12) Ke therešo gore go amogelwa ke Modimo ke gabohlokwa kudu.
10. Go latela Jesu ka dinako tšohle go akaretša’ng?
10 Go wa boraro, Jesu Kriste o itše re swanetše go mo latela ka dinako tšohle. Go ya ka An Expository Dictionary of New Testament Words ka W. E. Vine, go latela go bolela go ba mogwera—“motho yo a yago le wena mo o yago.” Johane wa Pele 2:6 e re: “E a rexo: Ke dutše kè le wa [Modimo], xo swanetše xe a tšea ka tsela ye Yêna [Kriste] a bexo a tšea ka yôna.” Jesu o tšere ka tsela efe? Lerato la Jesu go Tatagwe wa legodimong le go barutiwa ba gagwe ga se la ka la mo dumelela gore a be le boithati. Paulo o ngwadile gore: “Kriste le Yêna xa a ka a ithata.” (Ba-Roma 15:3) Le ge Jesu a be a ikwa a lapile goba a swerwe ke tlala, o ile a etiša dinyakwa tša ba bangwe pele ga tša gagwe. (Mareka 6:31-34) Le gona Jesu o ile a tšea karolo ka mafolofolo modirong wa go bolela ka Mmušo le wa go ruta. Na ga se ra swanela go mo ekiša ge ka phišego re dutše re phetha thomo ya rena ya go ‘dira batho ba ditšhaba ka moka barutiwa, ka go ba ruta go boloka tšohle tšeo Jesu a di laetšego’? (Mateo 28:19, 20) Go tše ka moka, Kriste o re tlogeletše mohlala, gomme re swanetše gore re “tšeê ka mohlala wa xaxwe.”—1 Petro 2:21.
11. Ke ka baka la’ng e le gabohlokwa go ikgafa, go rwala kota ya rena ya tlhokofatšo, gomme ra latela Jesu Kriste ka dinako tšohle?
11 Ke gabohlokwa gore re ikgafe, re rwale kota ya rena ya tlhokofatšo gomme re latele Mohlala wa rena ka dinako tšohle. Ge re dira bjalo re tla rarolla bothata bja boithati—lepheko la kgonthe leo le re šitišago go bontšha lerato la boikgafo. Go oketša moo, Jesu o itše: “E a rataxo xo phološa bophelô bya xaxwe, ó tlo bo lahla; ’me e a lahlaxo bophelô bya xaxwe ka ’baka la-ka, ó tlo bo hwetša. Xobane motho xo tlo mo hola’ng xe a ka rua lefase ka moka ’me a senyêxêlwa ke môya wa xaxwe? Xoba motho a ka nthša’ng sa xo rekolla môya wa xaxwe?”—Mateo 16:25, 26.
Re ka se Kgone go Hlankela Marena a Mabedi
12, 13. (a) Ke’ng seo se bego se tshwentše mmuši wa lesogana yoo a ilego a kgopela keletšo go Jesu? (b) Jesu o ile a nea lesogana le keletšo efe, gomme ka baka la’ng?
12 Dikgweding tše itšego ka morago ga ge Jesu a gateletše go nyakega ga gore barutiwa ba gagwe ba ikgafe, mmuši wa lesogana yo a humilego o ile a tla go yena gomme a re: “Moruti yo botse! Se sebotse se nkaxo se dira ké eng, xore ke bê le bophelô byo bo sa felexo?” Jesu o ile a mmotša gore ‘ka mehla a dire tše molao o di bolelago’ ke moka a tsopola tše dingwe tša tšona. Lesogana la re: “Tšeo ka moka ke di lotile.” Go molaleng gore monna yo o be a bolela go tšwa pelong gomme o be a dirile sohle seo a ka se kgonago gore a latele ditaelo tša Molao. Ka gona o ile a botšiša gore: “Ke sa hlaêlêlwa ke eng?” Ge a araba, Jesu o ile nea lesogana le taletšo e sa tlwaelegago, a re: “Xe O rata xo ba yo bolo-ka-tlalô, xôna yaa O rekišê tše O naxo natšô’, O di abêlê bahloki, ’me O tlê O ntatêlê.”—Mateo 19:16-21.
13 E le gore lesogana le hlankele Jehofa ka moya ka moka, Jesu o ile a lemoga gore le be le swanetše go tloša tšhitišo e kgolo bophelong bja lona—lehumo la lona. Morutiwa wa kgonthe wa Kriste a ka se kgone go hlankela marena a mabedi. A “ka se kxône xo dirêla Modimo, ’me [a] dirêla le Mamôna.” (Mateo 6:24) O swanetše go ba le ‘leihlo le le lokilego’ leo le lebišago tlhokomelo dilong tša moya. (Mateo 6:22) Go tlogela tše dingwe tša dilo tšeo o nago le tšona gomme wa di nea badiidi ke tiro ya go bontšha boikgafo. Sebakeng sa go gafa dilo tše tše di bonagalago, Jesu o ile a holofetša go nea mmuši wa lesogana tokelo e bohlokwa kudu ya go ikgobela lehumo legodimong—lehumo leo le bego le tla bolela bophelo bjo bo sa felego go yena gomme la mo dira gore a be le tebelelo ya gore mafelelong a buše le Kriste legodimong. Lesogana le be le sa ikemišetša go ikgafa. “La tloxa lè nyamile, ka xobane le be le na le mahumô a mantši.” (Mateo 19:22) Lega go le bjalo, balatedi ba bangwe ba Jesu ba ile ba arabela ka mo go fapanego.
14. Barei ba bane ba dihlapi ba ile ba arabela bjang taletšong ya Jesu ya gore ba mo latele?
14 Nywageng e mebedi pejana, Jesu o ile a nea taletšo e swanago go barei ba dihlapi ba bane e lego Petro, Andrea, Jakobo le Johane. Ba babedi ba bona ba be ba rea dihlapi ka nako yeo, gomme ba babedi ba be ba swaregile ka go lokiša malokwa a bona. Jesu o itše go bona: “Ntateleng, ke Le dirê barei ba xo phutha batho.” Mafelelong, ka moka ga bona e le ba bane ba ile ba tlogela modiro wa bona wa go rea dihlapi gomme ba latela Jesu bophelo bja bona ka moka.—Mateo 4:18-22.
15. Hlatse e nngwe ya Jehofa ya mehleng yeno e ile ya ikgafa bjang e le gore e latele Jesu?
15 Bakriste ba bantši lehono ba ekišitše mohlala wa barei ba bane ba dihlapi go e na le go ekiša mohlala wa mmuši wa lesogana yo a humilego. Ba tlogetše mahumo le kgonagalo ya gore ba atlege lefaseng le e le gore ba hlankele Jehofa. Deborah o re: “Ge ke be ke e-na le nywaga e 22, ke ile ka swanelwa ke go dira phetho e kgolo.” O hlalosa gore: “Ke be ke ithutile Beibele ka dikgwedi tše tshela, gomme ke be ke nyaka go neela bophelo bja-ka go Jehofa, eupša ba lapa lešo ba be ba ganetša kudu. Ba be ba humile le dinala, gomme ba be ba nagana gore ka go ba Hlatse ke be ke tla theoša seriti sa bona setšhabeng. Ba ile ba nnea diiri tše 24 gore ke dire phetho ya gore ke be ke rata eng—bophelo bja manobonobo goba therešo. Ge e ba ke be ke sa lese go ikopanya le Dihlatse, ba lapa lešo ba be ba tla ntahla. Jehofa o ile a nthuša gore ke dire phetho e swanetšego gomme a nnea matla a go e kgomarela. Ke feditše nywaga e 42 e fetilego ke le tirelong ya nako e tletšego, gomme ga ke itshole le gatee. Ka go gana bophelo bja boithati bja go rata boithabišo, ke phologile go hloka morero le go hloka lethabo moo ke go bonago go ditho tša lapa lešo. Ke thušitše monna wa-ka gotee le batho ba ka godimo ga lekgolo go ithuta therešo. Bana ba ba moya ke ba bohlokwa kudu go nna go feta mahumo le ge e le afe a dilo tše di bonagalago.” Dihlatse tše dingwe tša Jehofa tše dikete di na le maikwelo a swanago le a gagwe. Go thwe’ng ka wena?
16. Re ka bontšha bjang gore ga re sa iphelela?
16 Kganyogo ya go rata go se sa iphelela e tutueleditše Dihlatse tša Jehofa tše dikete gore di hlankele e le babulamadibogo, goba bagoeledi ba Mmušo ba nako e tletšego. Ba bangwe bao maemo a bona a sa ba dumelelego go tšea karolo bodireding bja nako e tletšego, ba hlagolela moya wa bobulamadibogo gomme ba dira sohle se ba ka se kgonago go thekga modiro wa go bolela ka Mmušo. Batswadi ba bontšha moya o swanago ge ba gafa nako ya bona e ntši le dilo tšeo ba di ratago e le gore ba nee bana ba bona tlwaetšo ya dilo tša moya. Ka tsela e itšego, ka moka ga rena re ka bontšha gore re etiša dikgahlego tša Mmušo pele maphelong a rena.—Mateo 6:33.
Re Tutuetšwa ke Lerato la Mang?
17. Re tutuetšwa ke’ng gore re ikgafe?
17 Go bontšha lerato la boikgafo ga se selo se bonolo go se dira. Eupša nagana ka seo se re tutuetšago. Paulo o ngwadile gore: “Re xapeletšwa ke leratô la Kriste, xomme re re: Xe Yêna a hwetše bohle è le o tee, . . . Ó hwile ’bakeng sa bohle, xore ba ba phelaxo ba se kê ba hlwa ba iphelêla, ba phelêlê Yêna e a hwilexo ’bakeng sa bôná ’me a tsoxa bahung ’bakeng sa bôná.” (2 Ba-Korinthe 5:14, 15) Re tutuetšwa ke lerato la Kriste gore re se sa iphelela. Yeo ke tutuetšo e matla gakaakang! Ka ge Kriste a re hwetše, na ga re ikwe re swanelega go mo phelela? Ke therešo gore go leboga lerato le le tseneletšego leo Modimo le Kriste ba re bontšhitšego lona go ile gwa re tutueletša gore re neele maphelo a rena go Modimo gomme re be barutiwa ba Kriste.—Johane 3:16; 1 Johane 4:10, 11.
18. Ke ka baka la’ng boikgafo bo e-na le mohola?
18 Na go se sa iphelela ga rena go na le mohola? Ka morago ga ge mmuši wa lesogana yo a humilego a ganne taletšo ya Kriste gomme a tlogile, Petro o ile a re go Jesu: “Ši-di; rena re tloxetše tšohle; se re tl’o xo se hwetša ké eng?” (Mateo 19:27) Petro le baapostola ba bangwe ba be ba ikgafile e le ka kgonthe. Moputso wa bona e be e tla ba ofe? Sa pele, Jesu o boletše ka tokelo yeo ba bego ba tla ba le yona ya go buša le yena legodimong. (Mateo 19:28) Ka yona nako yeo, Jesu o ile a bolela ka ditšhegofatšo tšeo yo mongwe le yo mongwe wa balatedi ba gagwe a bego a tla di thabela. O itše: “Xa xo e a tloxetšexo lapa, xoba bana babô, xoba dikxaetšedi, xoba tat’axwe, xoba mm’axwe, xoba mosadi, xoba bana, xoba mašemo, è le ka ’baka la-ka le ka ’baka la Ebangedi, e a se tl’o xo boêlwa ke lekxolo ka se tee sa tšôna, è sa le bophelong byono, . . . ’me mehleng e tl’o xo tla ó tlo hwetša bophelô byo bo sa felexo.” (Mareka 10:29, 30) Re hwetša dilo tše dintši kudu go feta tšeo re di tlogetšego. Na bo-tatago rena ba moya, bo-mmago rena, bana babo rena, dikgaetšedi tša rena le bana ba rena ga ba bohlokwa kudu go feta selo le ge e le sefe seo re se lahlilego e le gore re hwetše Mmušo? Ke mang yo a bilego le bophelo bjo bo kgotsofatšago kudu—Petro goba mmuši wa lesogana yo a humilego?
19. (a) Lethabo la kgonthe le ithekgile ka’ng? (b) Re tla ahla-ahla’ng sehlogong se se latelago?
19 Jesu o ile a bontšha ka mantšu le ditiro gore lethabo le tlišwa ke go nea le go hlankela ba bangwe, ga le tlišwe ke go ba le boithati. (Mateo 20:28; Ditiro 20:35) Ge re se sa iphelela eupša re latela Kriste ka dinako tšohle, re hwetša kgotsofalo e kgolo bophelong ga bjale gomme re na le kholofelo ya bophelo bjo bo sa felego nakong e tlago. Ke therešo gore ge re ikgafa, Jehofa e ba Mong wa rena. Ka go rialo re fetoga bahlanka ba Modimo. Ke ka baka la’ng bokgoba goba bohlanka bjo e le bjo bo putsago? Bo kgoma bjang diphetho tšeo re di dirago bophelong? Sehlogo se se latelago se tla ahla-ahla dipotšišo tše.
Na o a Gopola?
• Ke ka baka la’ng re swanetše go lwantšha ditshekamelo tša rena tša boithati?
• Go ikgafa, go rwala kota ya rena ya tlhokofatšo le go latela Jesu ka dinako tšohle go bolela’ng?
• Re tutuetšwa ke’ng gore re se sa iphelela?
• Ke ka baka la’ng go phela bophelo bja boikgafo go e-na le mohola?
[Dipotšišo tša Thuto]
[Seswantšho go letlakala 11]
“Morêna! A k’O lôtêxê”
[Seswantšho go letlakala 13]
Ke’ng se se ilego sa dira gore mmuši wa lesogana a se ke a latela Jesu?
[Diswantšho go letlakala 15]
Lerato le tutueletša Dihlatse tša Jehofa go hlankela e le bagoeledi ba Mmušo ba fišegago