Jesu Kriste o go Tutuetša ka Tsela Efe?

GO TŠWA go seo re se ahla-ahlilego sehlogong se se fetilego, na go ka ba le pelaelo le ge e le efe ya gore dithuto tša Jesu di kgomile lefase ka bophara? Lega go le bjalo, potšišo ye re swanetšego go ipotšiša yona ke gore, “Dithuto tša Jesu di nkgoma ka tsela efe?”

Dithuto tša Jesu di akareditše ditaba tše dintši tše di fapa-fapanego. Dithuto tša bohlokwa tše di di fetišetšago di ka kgoma karolo e nngwe le e nngwe ya bophelo bja gago. Anke re lebišeng tlhokomelo go seo Jesu a se rutilego mabapi le go ipeela dilo tše di tlago pele bophelong, go hlagolela segwera le Modimo, go thoma ditswalano tše dibotse le ba bangwe, go rarolla mathata le go phema ditiro tša bošoro.

Ipeele Dilo tše di Tlago Pele Bophelong

Lefase la lehono la leema-ema le re amoga nako e ntši le matla moo gantši go lebiša tlhokomelo dilong tša moya go beelwago ka thoko.  Ela hloko taba ya lesogana le le lego nywageng ya lona ya bo-20 leo re tla le bitšago Jerry. Gaešita le ge Jerry a thabela go ba le dipoledišano mabapi le ditaba tša moya e bile a tšeela godimo seo a ithutago sona dipoledišanong tšeo, o lla ka gore: “Ke fo ba ke se na nako ya go nwelela go tšona ka mehla. Ke šoma matšatši a tshela mo bekeng. Ke ka Sontaga feela mo ke sa šomego. Le gona ka morago ga go dira dilo tše ke swanetšego go di dira, ke ba ke lapile kudu.” Ge e ba o ikhwetša o le boemong bjo bo swanago, o ka holwa ke seo Jesu a se rutilego Thutong ya Thabeng.

Jesu o ile a botša lešaba le le bego le kgobokanetše go mo kwa gore: “Le se kê la belaêlêla bophelô bya lena la re: Re tlo ja’ng? Re tlo nwa’ng? Le mmele Le se kê la o belaêlêla la re: Re tlo apara’ng? Afa bophelô xa bo fete dijô ka boxolo? Le mmele, afa xa o fetiše seaparô? Lebêlêlang dinonyana tša sebakeng xa di byale, xa di bune, xa di kxobêlele dišexong; ’me Tata-weno ó a di otla. Afa lena xa Le di fetiše xa-xolo? . . . Ké xôna lesang xo belaêla la re: Re tlo ja’ng? Re tlo nwa’ng? Re tlo apara’ng? Tšeo ka moka ké tše badithšaba ba di tsomaxo ka kudu. Xe e le Tataweno wa maxodimong ó tseba xobane le lena tšeo ka moka Le phela ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.” (Mateo 6:25-33) Re ithuta’ng go se?

Jesu o be a sa bolele gore re swanetše go hlokomologa dinyakwa tša rena tša nama gotee le tša ditho tša malapa a rena. Beibele e re: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.” (1 Timotheo 5:8) Lega go le bjalo, Jesu o holofeditše gore ge e ba dilo tša pele re di etiša pele gomme tša moya e e-ba tšona di tlago pele, Modimo o tla kgonthišetša gore re hwetša dinyakwa tše dingwe. Taba-kgolo mo e mabapi le go ipeela dilo tše di tlago pele. Go latela keletšo ye go iša lethabong, ka gobane “ba lehlôxônôlô ké ba ba humanexilexo mo moyeng [“ba ba lemogago dinyakwa tša bona tša moya,” NW].”—Mateo 5:3.

Hlagolela Segwera le Modimo

Bao ba lemogago dinyakwa tša bona tša moya ba lemoga go nyakega ga go hlagolela tswalano e botse le Modimo. Re aga bjang segwera se sebotse le motho? Na ga re leke go tseba motho yoo gakaone? Re swanetše go ipha nako ya go ithuta ka dipono tša gagwe, mekgwa, bokgoni, dilo tše a di fihleletšego, dilo tše a di ratago le tše a sa di ratego. Go tloga go le bjalo le tabeng ya go aga segwera le Modimo. Go nyakega gore re mo tsebe ka mo go nepagetšego. Ge a rapela Modimo mabapi le barutiwa ba gagwe, Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Ee, re swanetše go tseba Modimo e le gore re hlagolele segwera le yena. Mothopo o nnoši wa tsebo e bjalo ke Lentšu la Modimo le le buduletšwego e lego Beibele. (2 Timotheo 3:16) Re swanetše go beela nako ka thoko bakeng sa go ithuta Mangwalo.

Lega go le bjalo, tsebo ka boyona ga se ya lekana. Thapelong yona yeo, Jesu o itše: “Ba [barutiwa ba gagwe] lototše ’ntšu la xaxo.” (Johane 17:6) Ga se ra swanela go fo monya tsebo ka Modimo eupša gape re swanetše go dira ka go dumelelana le tsebo yeo. Na go na le tsela e nngwe yeo ka yona re ka bago bagwera ba Modimo? Na ruri re ka letela gore segwera sa rena le motho le ge e le ofe se gole ge e ba ka go rata re dira dilo ka tsela ye e sa dumelelanego le dikgopolo le ditekanyetšo tša motho yoo? Ka gona, dipono le ditekanyetšo tša Modimo di swanetše go hlahla dikgato ka moka tša rena bophelong. Ela hloko kamoo ditekanyetšo  tša gagwe tše pedi di šomago ka gona ditswalanong tša rena le batho ba bangwe.

Aga Ditswalano tše Dibotse le ba Bangwe

Tiragalong e nngwe, Jesu o ile a anega kanegelo e kopana e le go ruta thuto e bohlokwa ditswalanong tša batho. O boletše ka kgoši ye e bego e nyaka go lokiša ditaba tša ditšhelete le bahlanka ba yona. Lega go le bjalo, yo mongwe wa bona o be a e-na le sekoloto se segolo gomme a se na tsela ye a ka se lefago ka yona. Kgoši e ile ya laela gore monna yoo, mosadi wa gagwe le bana ba gagwe ba rekišwe gomme go lefše sekoloto. Monna yo a kolotago o ile a wela fase gomme a lopa ka gore: “A k’O se mphêlêlê pelo; ke tlo Xo lefêla tšohle.” Ka baka la kwelobohloko, kgoši e ile ya phumola sekoloto sa gagwe. Eupša mohlanka yoo o ile a tloga, a hwetša mohlanka-gotee le yena yo a bego a mo kolota tšhelete e nyenyane, gomme a nyaka gore a mo lefe. Gaešita le ge mohlanka-gotee yo a ile a kgopela go gaugelwa, mohlanka yo wa pele o ile a dira gore a lahlelwe kgolegong go fihlela a lefa tšohle tše a bego a di kolota. Ge kgoši e be e e-kwa ka se, e ile ya galefa. E ile ya botšiša ka gore: “A e be e se thswanêlô xore le wêna O šôkêlwê mohlanka ka wêna, byalo ka xe nna ke Xo šoketšwe?” Le gona, o ile a dira gore mohlanka yo a sa lebalelego a lahlelwe kgolegong go fihlela a lefa tšohle tše a di kolotago. Ge a bolela seo se rutwago ke kanegelo ye, Jesu o itše: “Le Tate wa maxodimong ó tlo Le dira ka mokxwa woo xe Le sa lebalele, xe motho a sa lebalele ngwan’abô dithšitô tša xaxwe ka pelo.”—Mateo 18:23-35.

Bjalo ka batho ba sa phethagalago, re foša gantši. Re ka se ke ra lefa Modimo sekoloto se segolo se re bilego le sona ka baka la go mo fošetša. Selo feela se re ka se dirago ke go nyaka gore a re lebalele. Le gona Jehofa Modimo o ikemišeditše go re lebalela diphošo tša rena ka moka, ge e ba le rena re lebalela bana babo rena dibe tše ba re diretšego tšona. Yeo ke thuto e matla e le ruri! Jesu o rutile balatedi ba gagwe go rapela ka gore: “Re lebalêlê melato ya rena byalo ka xe re lebalêla ba ba naxo le melato xo rena.”—Mateo 6:12.

Rarolla Bothata ka go bo Tumola ka Medu

Jesu e be e le setsebi tabeng ya go kwešiša tsela ye batho ba bopegilego ka yona. Keletšo ya gagwe mabapi le go rarolla mathata e be e le mabapi le go a tumola ka medu. Ela hloko mehlala e mebedi e latelago.

Jesu o itše: “Le kwele xe ba boxolo-xolo ba boditšwe xwa thwe: O se kê wa bolaya! ’Me e a bolayaxo ó tlo swanêlwa ke kahlolô. Xe e le Nna ke Le botša ke re: Mang le mang e a befêlêlwaxo ngwan’abô ka lefêla, o tlo swanêlwa ke kahlolô. E a rexo: Lefêla! à e-ra ngwan’abô, ó swanetšwe ke thsêkô ya lekxotla.” (Mateo 5:21, 22) Jesu mo o bontšhitše gore modu wa bothata bja taba ya go bolaya o tseneletše kudu go feta tiro ya bošoro ka boyona. Motheo wo o boemong bja kgopolo bjo bo golago ka monaganong wa mmolai. Ge e ba batho ba be ba sa dumelele maikwelo a sekgopi goba kgalefo gore a gole, bošoro bjo bo ilego bja naganišišwa e sa le pele bo be bo ka se be gona. Ruri go be go tla efogwa tšhollo e ntši ya madi ge nkabe go dirišwa thuto ye!

Ela hloko kamoo Jesu a bontšhago modu wa bothata bjo bongwe bjo bo bakago manyami a magolo kudu. O boditše lešaba gore: “Le kwele ba boxolo-xolo bà boditšwe xwa thwe: O se kê wa otswa! Xe e le nna ke Le botša ke re: Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe. Ké xôna-xê, xe O kxopišwa ke leihlô la xaxo la le letona, le xonyê O le lahlê.” (Mateo 5:27-29) Jesu o rutile gore bothata bo tseneletše kudu go feta boitshwaro bjo bo gobogilego ka bobjona. Bo bakwa ke seo se tlago pele ga bjona—dikganyogo tše di gobogilego. Ge e ba motho a gana go dula a e-na le dikganyogo tše di sa swanelago gomme a ‘di ntšha’ ka monaganong wa gagwe, gona o tla fenya kgonagalo ya gore a be le bothata bja boitshwaro bjo bo gobogilego.

“Bušetša Thšoša ya Xaxo Bodulong bya Yôna”

Bošegong bjo Jesu a ekilwego le go swarwa ka bjona, yo mongwe wa barutiwa ba gagwe o ile a goga tšhoša ya gagwe e le gore a mo šireletše.  Jesu o ile a mo laela gore: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.” (Mateo 26:52) Mesong e latetšego, Jesu o boditše Pontio Pilato gore: “Mmušô wa-ka xa se o tšwaxo ’faseng leno. Xe mmušô wa-ka o ka be o e-tšwa lefaseng leno, bahlanka ba-ka ba ka be ba o hlabanêla. Byale mmušô wa-ka xa se o tšwaxo mono.” (Johane 18:36) Na thuto ye ga e na mohola?

Bakriste ba pele ba ile ba lebelela bjang seo Jesu a se rutilego mabapi le go se tšee karolo ntweng? Puku ya The Early Christian Attitude to War e re: “Go fo swana le ge [dithuto tša Jesu] di be di ganetša mehuta ka moka ya bošoro bjo bo sego molaong le go gobatša ba bangwe, go se be molaong ga go tšea karolo ntweng go [ile gwa] hlaloswa ka mo go kwagalago . . . Bakriste ba pele ba ile ba dira sona seo Jesu a bego a se bolela gomme ba kwešiša dithuto tša gagwe tša mabapi le go ba botho le go se be le karolo ntweng ka tsela ya kgonthe. Ba ile ba tswalanya bodumedi bja bona le khutšo; ba ile ba sola ka go tia ntwa yeo go yona go akaretšwago tšhollo ya madi.” Ruri histori e be e tla ba e fapanego kudu ge nkabe bohle bao ba bego ba ipolela gore ke Bakriste ba be ba tloga ba latela thuto ye!

O ka Holwa ke Dithuto ka Moka tša Jesu

Dithuto tše re di ahla-ahlilego tša Jesu di a kgahliša, di bonolo e bile ke tše matla. Batho ba ka holwa ke go tlwaelana le dithuto tša gagwe le go di diriša. *

Dihlatse tša Jehofa tikologong ya geno di tla thabela go go thuša go bona kamoo o ka holwago ka gona ke dithuto tše bohlale go phala tše di kilego tša rutwa ke motho le ge e le ofe. Re go laletša ka borutho go ikgokaganya le tšona goba o ngwalele atereseng e lego go letlakala 2 la makasine wo.

[Mongwalo wa ka tlase]

[Seswantšho go letlakala 5]

“Tata-weno ó a di otla”

[Seswantšho go letlakala 7]

Dithuto tša Jesu di ka tutuetša bophelo bja gago ka mo go holago