Simisone o Fenya ka Matla a Jehofa!

BATHOPI bao ba itefeletšago ba mo gontše mahlo gomme ba mo gafela modirong o thata. Ke moka ba mo ntšha ka kgolegong gomme ba mo iša tempeleng ya boheitene e le gore ba kgahle batho. Ba mo gapeletša go gwanta pele ga babogedi ba dikete gomme ba mo dira sekwero. Mogolegwa yo ga se sesenyi goba moetapele wa bahlabani bao e lego manaba. Ke morapedi wa Jehofa gomme o hlanketše e le moahlodi kua Isiraele ka nywaga e 20.

Go tlile bjang gore Simisone—monna wa senatla kudu yo a kilego a phela—a feleletše a le boemong bjo bo bjalo bjo bo lešago dihlong? Na matla a gagwe a fetago a tlwaelegilego a be a tla mo phološa? Simisone o be a hwetša matla kae? Ge e ba go e-na le selo seo re ka ithutago sona phihlelong ya gagwe, ke sefe?

O tla “Thôma xo Namolêla Isiraele”

Bana ba Isiraele ba be ba dula ba furalela borapedi bja therešo. Ka gona, ge ba be ba “dira tše di befetšexo Morêna; Morêna a ba xafêla diatleng tša Ba-Filisita nywaxa e masome a manê.”—Baahlodi 13:1.

Pego ya Simisone e thomile ge morongwa wa Jehofa a be a tšwelela go mosadi wa moopa wa monna wa mo-Isiraele yo a bitšwago Manoa gomme a botša mosadi yo gore o tla belega morwa. Morongwa o ile a mo laela gore: “Hlôxô ya xaxwe e se kê ya batamêlwa ka lexarê; ka xobane lesoxanyana leo, xe le sa tš’o bêlêxwa, e tlo ba mokxêthwa wa Modimo; xomme ké yêna e a tl’o xo thôma xo namolêla Isiraele diatleng tša Ba-Filisita.” (Baahlodi 13:2-5) Pele ga ge Simisone a ka ingwa, Jehofa o ile a dira phetho ya gore Simisone a newe kabelo e itšego. Go tloga nakong ya ge a be a belegwa, e be e tla ba Moitlami—motho yo a kgethetšwego tirelo e kgethwa e sa tlwaelegago.

“Ké Yêna a Kxahlaxo Mahlô A-ka”

Ge Simisone a be a dutše a gola, “Morêna a mo šexofatša.” (Baahlodi 13:24) Ka letšatši le lengwe, Simisone o ile a ya go tatagwe le mmagwe gomme a re: “Kwa Thimina ke bone mosadi; ké ngwananyana wa Ba-Filisita; ntšeišeng yêna e bê mosadi wa-ka.” (Baahlodi 14:2) Anke o nagane feela kamoo ba ilego ba makala ka gona. Go e na le go lokolla Isiraele diatleng tša batlaiši ba yona, morwa wa bona o be a nyaka go dira kgwerano ya lenyalo le bona. Go nyala mosadi yo a tšwago barapeding ba medimo ya boheitene go be go le kgahlanong le Molao wa Modimo. (Ekisodo 34:11-16) Ka baka leo, batswadi ba  gagwe ba ile ba gana ka gore: “Mo xo barwedi ba bana ba bô-rena le mo sethšabeng sa xešo ka moka, a xa xo na mosadi, xe O y’o tšea mosadi xo Ba-Filisita ba ba sa bollaxo?” Lega go le bjalo, Simisone o ile a phegelela ka gore: “Ntseišê yêna-eo; ké yêna a kxahlaxo mahlô a-ka.”—Baahlodi 14:3.

Mosadi yo wa mo-Filisita o be a ‘kgahlile’ Simisone ka tsela efe? Cyclopedia ya McClintock le Strong e bolela gore e sego ka kgopolo ya gore e be e le “yo botse, yo a kgahlišago goba yo a bogegago eupša e be e le yo a swanetšego bakeng sa go fihlelela phetho, morero goba pakane.” Go fihlelela morero ofe? Baahlodi 14:4 (PK) e hlalosa gore Simisone ‘o be a tsoma go hlohla Ba-Filisita.’ Simisone o be a kgahlegela mosadi yo ka baka la morero woo. Ge Simisone a be a dutše a gola, “môya wa Morêna wa mo hlohleletša” goba go mo tutueletša go gata mogato. (Baahlodi 13:25) Ka gona moya wa Jehofa e be e le wona o tutueletšago Simisone gore a dire kgopelo ye e sa tlwaelegago ya go kgopela mosadi le ya go phetha modiro wa gagwe ka moka e le moahlodi wa Isiraele. Na Simisone o ile a hwetša sebaka seo a bego a se nyaka? Sa pele, anke re eleng hloko kamoo Jehofa a ilego a mo kgonthišetša ka gona gore O tla mo thekga.

Simisone o be a le tseleng a lebile motseng wa bo monyadiwa wa Thimina. Pego ya Mangwalo e laodiša ka gore: “Ya re xe a tla dirapeng tša merara tša Thimina, a xahlana le tau ya lesoxana è rôra è le tseleng. A tlêlwa ke môya wa Morêna, a napa a e xaxoxanya.” Ponagatšo ye e lemogegago ya matla e tlile ge Simisone a be a le noši. Go be go se na dihlatse tše di bonego ka mahlo. Na ye e be e le tsela ya Jehofa ya go kgonthišetša Simisone gore yena bjalo ka Moitlami o be a e-na le bokgoni bja go phethagatša thomo ya gagwe ye a e neilwego ke Modimo? Beibele ga e bolele ka seo, eupša Simisone o ile a lemoga e le ruri gore matla a bjalo a sa tlwaelegago e be e se a gagwe. A swanetše go ba a be a e-tšwa go Modimo. O be a ka ithekga ka Jehofa gore a mo thuše modirong wo o bego o sa tla. A matlafaditšwe ke tiragalo ya tau, Simisone “xe a fihlile . . . a kwana le mosadi yola a bexo a mo kxahla.”—Baahlodi 14:5-7.

Ka morago ge Simisone a be a boela go beka mosadi yola, “a fapoxêla xo bôna setoto sa tau yela; a hwetša mo marapong a yôna xò na le mothšithši wa dinose le mamapô.” Ge a se na go gopola se, Simisone o ile a hlabela bafelegetši ba monyadi ba 30 ba ba-Filisita ba lenyalong la gagwe nyepo e rego: “Thai! Sejô se tšwa xo sejatô! Bose bo tšwa xo yo matla!” Ge ba be ba ka kgona go hlatholla nyepo ye, Simisone o be a tla ba nea diaparo tša ka gare tše 30 le diaparo tša ka ntle. Ge ba be ba ka ka palelwa, ba be ba swanetše go mo nea tšona. Ba-Filisita ba ile ba gakantšhwa ke nyepo ye ka matšatši a mararo. Ka letšatši la bone, ba ile ba dira phetho ya go tšhošetša mosadi wa gagwe. Ba mmoditše gore: “Otelêla monna wa xaxo, a re hlathollêlê nyêpô yeo.  Xe O sa re nyapollele, xôna wêna le lapa la tat’axo re tlo Le thšuma ka mollô.” A sehlogo se sekaakang! Ge e ba ba-Filisita ba be ba swara magagabo bona ka tsela ye, nagana ka boemo bjo kotsi bjo ba-Isiraele bao ba gateleditšwego ba bego ba le go bjona!—Baahlodi 14:8-15.

Mosadi yo a tšhošeditšwego o ile a phegelela Simisone gore a mmotše karabo. Ka go bontšha gore ga a rate Simisone le go mmotegela ka go se kwanantšhe, kapejana mosadi yo o ile a tsebiša bafelegetši ba monyadi. Ba ile ba hlatholla nyepo, gomme Simisone o ile a tseba lebaka. O ba boditše gore: “Xe Le ka bê Le sa ka la lema ka namane ya-ka, Le ka be Le sa ka la nyarola nyêpô ya-ka.” Sebaka se Simisone a bego a se letetše mo nakong ye se ile sa itšweletša. “A tlêlwa ke môya wa Morêna, a foloxêla Asikaloni, a bolaya banna ba masome a mararo ba xa bô-bôná; a tšea diaparô tša bôná, a di nea banna bála ba xo nyarola nyêpô ya xaxwe.”—Baahlodi 14:18, 19.

Na tiro ya Simisone kua Asikaloni e be e tutueditšwe ke kganyogo ya gagwe ya go nyaka go itefeletša? Aowa. E be e dirilwe ke Modimo ka mophološi yo a mo kgethilego. Ka Simisone, Jehofa o ile a thoma ntwa malebana le batlaiši ba sehlogo ba batho ba gagwe. Lesolo le le be le swanetše go tšwela pele. Sebaka sa bobedi se ile sa tšwelela ge Simisone a be a tlile go etela mosadi wa gagwe.

O lwa Ntwa a le Noši

Ge a se na go boela Thimina, Simisone o ile a lemoga gore ratswal’agwe o be a nyadišitše mosadi wa gagwe go monna yo mongwe, ka ge a be a dumela gore Simisone ga a rate mosadi yo. Simisone o be a bonagala a kgopišegile. O ile a swara diphukubje tše 300 gomme a di bofa ka dipedi ka dipedi ke moka a bea serumula gare ga mesela ya tšona. Ge di be di lokollwa, di ile tša fiša mašemo, dirapa tša merara le dithokgwa tša mahlware, tša senya mehuta e meraro ya dibjalo tšeo di bego di bjetšwe ke ba-Filisita ngwageng woo. Ba-Filisita bao ba galefilego ba ile ba bonagatša gore ba sehlogo. Ba ile ba lebelela mosadi wa Simisone le tatagwe e le bona ba ikarabelago gomme ba ile ba ba fiša. Go itefeletša ga bona ka tsela e sehlogo go ile gwa phethagatša morero wa Simisone. Ka morago, o ile a ba hlasela ka polao e kgolo.—Baahlodi 15:1-8.

Na ba-Isiraele ba ile ba bona gore Jehofa Modimo o be a šegofatša Simisone gomme ka baka leo ba mo tlatša e le gore ba fediše pušo ya ba-Filisita? Le gatee. E le go phema kotsi, banna ba Juda ba ile ba romela banna ba 3 000 gore ba yo swara moetapele yo a kgethilwego ke Modimo gomme ba mo neele manabeng a gagwe. Lega go le bjalo, go se botege ka go se kwanantšhe ga ba-Isiraele ba go ile gwa nea Simisone sebaka sa go tšwela pele a kweša manaba a gagwe bohloko. Ge a be a le kgaufsi le go neelwa go ba-Filisita “ya ba xôna a tlêlwaxo ke môya wa Morêna; manti a mo matsoxong a xaxwe a ba byalo ka ’hlalê tša leokodi xe di hlabotšwe ke mollô; ditlêmô tša xaxwe tša kumaxana matsoxong a xaxwe.” Ke moka a topa lerapo la mohlagare wa pokolo gomme a bolaya manaba a sekete ka lona.—Baahlodi 15:10-15.

Ge a lopa Jehofa, Simisone o itše: “Ké wêna O dirilexo phološô e kxolo yé ka seatla sa mohlanka wa xaxo; ’me byale ke hwa ka lenyôra; ke wêla diatleng tša mašoboro á.” Jehofa o ile a kwa thapelo ya Simisone gomme a e araba. “Morêna ó be a fatotše sekxese . . . ; sè e-tšwa meetse; a nwa, ’me môya wa xaxwe wa boêla xo yêna, a lapoloxa.”—Baahlodi 15:18, 19.

Simisone o be a lebišitše tlhokomelo tabeng ya go phegelela boikemišetšo bja gagwe e lego ntwa ya gagwe malebana le ba-Filisita. Go dula ga gagwe ngwakong wa seotswa kua Gatsa e be e le ka morero wa go lwa malebana le manaba a Modimo. Simisone o be a nyaka lefelo la marobalo motseng wa manaba, gomme a be a ka hwetšwa ngwakong wa seotswa. Simisone o be a sa nagana ka maikemišetšo a gobogilego. O ile a tloga ngwakong wa mosadi yo bošego-gare, a tumola dikgoro tša motse le dijakwana tše pedi, gomme a di rwala a di iša tlhoreng ya thaba kgaufsi le Heburone, ye e bego e le bokgoleng bja dikhilomithara tše 60. Se se ile sa dirwa ka tumelelo ya Modimo le ka matla a tšwago go yena.—Baahlodi 16:1-3.

Tsela ye moya o mokgethwa o bego o šoma ka yona tabeng ya Simisone e be e le ya moswana-noši ka baka la maemo a sa tlwaelegago.  Bahlanka ba Modimo ba botegago lehono ba ka ithekga ka moya o swanago gore o ba matlafatše. Jesu o ile a kgonthišetša balatedi ba gagwe gore Jehofa “ba ba Mo kxopêlaxo ó ba nea Môya o mokxêthwa.”—Luka 11:13.

Ke ka Baka La’ng Jehofa a ile a ‘Tlogela Simisone’?

Go ile gwa direga gore Simisone a ratane le mosadi yo a bitšwago Delila. Dikgošana tše hlano tša ba-Filisita di be di tloga di fagahletše go bolaya Simisone mo di ilego tša kgopela mosadi yo gore a di thuše. Di ile tša ya go Delila gomme tša mmotša gore: “Mo ôtêlêlê a bê a Xo botšê mo xo tšwaxo matla a xaxwe a maxolo á, le xore re ka mo kxôna ka’ng.” E nngwe le e nngwe ya dikgošana tše hlano e be e tla mo nea “disilifêra tše sekete se se naxo le lekxolo” e le pipa-molomo.—Baahlodi 16:4, 5.

Ge e ba dikarolwana tša silifera e be e le disekele, gona disekele tše 5 500 tšeo ba bego ba mo holofetša tšona e be e le pipa-molomo e kgolo. Aborahama o ile a lefa disekele tše 400 bakeng sa lefelo leo a bego a tla bolokela mosadi wa gagwe go lona, gomme mohlanka o ile a le rekiša feela ka disekele tše 30. (Genesi 23:14-20; Ekisodo 21:32) Taba ya gore dikgošana—babuši ba dinaga tše hlano tša ba-Filisita—di ile tša nea Delila pipa-molomo go e na le go mo kgopela gore a thuše setšhaba sa gabo ka potego e sa kwanantšhego e tliša kgopolo ya gore mohlomongwe e be e le mosadi wa mo-Isiraele. Boemong le ge e le bofe, Delila o ile a amogela seo a bego a holofetšwa sona.

Ka makga a mararo, Simisone o ile a nea Delila dikarabo tše di fošagetšego potšišong ya gagwe, gomme ka makga a mararo mosadi yo o ile a radia Simisone ka go leka go mmolaiša ka manaba a gagwe. Eupša “ka xobane à fela a mo phêxêlêla ka dipolêlô, a mo hlokiša khutšô, a bá a mo lapiša wa xo se sa rata xo phela.” Mafelelong, Simisone o ile a mmotša therešo—moriri wa gagwe ga se wa ka wa kotwa le ka mohla. Ge o be o ka kotwa, o be a tla fokola gomme a swana le banna ba bangwe ka moka.—Baahlodi 16:6-17.

Simisone o sentše ditaba gona moo. Delila o ile a mo radia mo a ilego a feleletša a kotilwe moriri. Lega go le bjalo, matla a Simisone a be a se hlogong ya gagwe e le ka kgonthe. Moriri wa gagwe o be o fo swantšhetša tswalano ya gagwe e kgethegilego le Modimo e le Moitlami. Ge Simisone a be a ipea boemong bjo bo ilego bja kgoma go ba ga gagwe Moitlami ka baka la go kotwa ga moriri wa gagwe, ‘Jehofa o ile a mo tlogela.’ Mo nakong ye ba-Filisita ba ile ba fenya Simisone, ba mo foufatša gomme ba mo lahlela kgolegong.—Baahlodi 16:18-21.

Se se re ruta thuto e bohlokwa e le ruri! Na ga se ra swanela go lebelela tswalano ya rena le Jehofa e le selo se bohlokwa kudu? Ge e ba re kwanantšha boineelo bja rena bja Bokriste ka tsela le ge e le efe, ke bjang re ka letelago gore Modimo a tšwele pele a re šegofatša?

“A Nkê ke hwê le Ba-Filisita”

Ba-Filisita bao ba thabilego ba ile ba leboga modimo wa bona Dagoni ka baka la go fenya Simisone. Ge ba keteka phenyo ya bona, ba ile ba iša lethopša la bona tempeleng ya Dagoni. Eupša Simisone o be a tseba lebaka la kgonthe la go fenywa ga gagwe. O be a tseba lebaka leo ka lona Jehofa a mo tlogetšego, gomme Simisone o ile a itshola ka baka la go palelwa ga gagwe. Ge Simisone a be a le kgolegong, moriri wa gagwe o ile wa thoma go gola kudu. Ga bjale ka ge a be a le pele ga ba-Filisita ba dikete, o be a tla dira’ng?

Simisone o ile a rapela ka gore: “Mong’a-ka Morêna, a k’O nkxopolê; mphê matla byale xa-tee fêla. Modimo, lesa ke itefeletše xo Ba-Filisita xa-tee fêla ka ’baka la mahlô a-ka a mabedi.” Ke moka o ile a itshwareletša ka dikokwane tše pedi tšeo di bego di le bogareng bja moago gomme “a inama a kakatlêla.” Mafelelo e bile afe? “Ngwakô ka moka wa wêla dikxôšana le batho ka moka ba bexo ba le xo wôna; xomme batho ba a ba bolailexo xo hweng xa xaxwe, ba bile ba fetiša bao a ba bolailexo mehla yela à sa phela.”—Baahlodi 16:22-30.

Mabapi le matla a gagwe ka noši, Simisone o be a sa lekane le motho. Ditiro tša gagwe tša matla di be di lemogwa e le ka kgonthe. Eupša sa bohlokwa kudu ke gore Lentšu la Modimo le bolela ka Simisone a le gare ga bao ba bego ba e-na le tumelo e matla.—Ba-Hebere 11:32-34.

[Seswantšho go letlakala 26]

Simisone o be a hwetša matla kae?