Tutuetšo ya Jesu Lefaseng ka Bophara

MOFETOLEDI wa Beibele e lego Edgar Goodspeed o ngwadile gore: “Dilo ka moka tše diebangedi di begago gore Jesu o di boletše, ka sephiring le phatlalatša, a ka ba a ile a di bolela ka diiri tše pedi feela. Lega go le bjalo, bonyenyane bjoo bo be bo tloga bo tutuetša, bo kgoma e bile bo tsenelela kudu mo e ka bago mo go swanetšego go bolela gore ga go na motho yo mongwe yo a kilego a tutuetša lefase gakaalo.”

Ge Jesu Kriste a be a phetha bodiredi bja gagwe bja lefaseng ka ngwaga wa 33 C.E., balatedi ba gagwe e be e le bonyenyane banna le basadi ba 120. (Ditiro 1:15) Lehono, batho ba fetago dikete tše dimilione ba ipolela gore ke Bakriste. Ba bangwe ba dimilione tše makgolo ba lebelela Jesu e le moporofeta. Ruri dithuto tša gagwe di ile tša tutuetša batho ka tsela e kgolo ka mo go sa tlwaelegago.

Tutuetšo ya Jesu lefaseng ka bophara e ile ya ba ya lemogwa ke baetapele bao e sego Bakriste. Ka mohlala, rabi wa mo-Juda e lego Hyman Enelow o ngwadile gore: “Jesu o fetogile motho yo a tumilego kudu, yo a rutegilego kudu le yo a tutuetšago kudu historing ya bodumedi ya batho.” Enelow o boletše gape gore: “Ke mang yo a ka bolelago ka botlalo tutuetšo yeo Jesu a bilego le yona bathong? Lerato leo a le tutueleditšego, khomotšo ye a e neilego, botse bjo a bo dirilego, kholofelo le lethabo tše a di kgothaleditšego—tšeo ka moka ga di lekanywe le selo historing ya motho. Gare ga dilo tše dikgolo le tše dibotse tše moloko wa batho o di tšweleditšego, ga go le se tee se se kilego sa batamela tutuetšong ya Jesu  lefaseng ka bophara. O fetogile motho yo a kgahlišago kudu historing.” Le gona, moetapele wa ma-Hindu e lego Mohandas K. Gandhi o itše: “Ga ke tsebe motho yo a diretšego batho dilo tše dintši go feta Jesu. Ge e le gabotse, ga go na se se fošagetšego ka Bokriste.” Lega go le bjalo, o okeditše ka gore: “Bothata bo na le lena Bakriste. Ga le kgone go phela ka go dumelelana le dithuto tša lena ka noši.”

Ke kgale Bojakane bo palelwa ke go phela ka go dumelelana le dithuto tša Jesu. Radihistori wa Bokriste e lego Cecil John Cadoux o boletše gore “go gola ka go nanya le ka boiketlo Kerekeng ka moka ga mokgwa o itšego wa go hlokomologa melao ya boitshwaro” go ile gwa “lemogwa ke baetapele ba Bokriste mathomong . . . a bo-140 A.D.” O boletše gore: “Ge e le gabotse go fokola mo ga melao ya boitshwaro go be go tla lebiša tabeng ya go dumelelana le ditsela tša lefase.”

Go fokola mo ga melao ya boitshwaro go ile gwa gola lekgolong la bone la nywaga ge Mmušiši wa Roma e lego Constantine a be a amogela Bokriste. Cadoux o ngwadile gore: “Bo-radihistori ba lemogile go kwanantšha mo gogolo mo go dirilwego Kerekeng ge e be e gwerana le Constantine gomme ba bangwe ba bona ba nyamišwa ke se.” Go theoša le nywaga go tloga ka nako yeo, bao ba ipolelago gore ke Bakriste ba ile ba tšwetša pele mediro e mentši ye e hlabišago dihlong ye e hlomphollago leina la Kriste.

Ka gona, dipotšišo tša bohlokwa ke gore: Ge e le gabotse, Jesu Kriste o rutile’ng? Le gona dithuto tše di swanetše go re tutuetša ka tsela efe?

[Seswantšho go letlakala 3]

“Ga ke tsebe motho yo a diretšego batho dilo tše dintši go feta Jesu.”—Mohandas K. Gandhi

[Seswantšho go letlakala 3]

“Ga go na motho yo mongwe yo a kilego a tutuetša lefase gakaalo.”—Edgar Goodspeed

[Mothopo]

Culver Pictures